VAVA nkangu a Nzambi bakatuka kuna Babele muna mvu wa 537 Vitila Tandu Kieto, Yave watokana mu kuma kiau ekolo bavutukanga kuna Yerusaleme. Wabavovesa vo: “Nukubika nzil’a nkangu; nutima, nutima manene; nukatula matadi.” (Yes. 62:10) Yindula dina diavavwanga kw’Ayuda akaka muna lemvokela nkanikinu wau. Nanga ndonga muna Aneyisaele bavita kuna ntwala muna singika e nzila. Ediadi diasadisa mpangi zau ana babalandanga mu vanga nkangalu wambote ekolo bavutukanga kuna nsi au.

Diau adimosi mpe, ekolo tulungisanga salu ya mpila mu mpila muna salu kia Yave, dina nze yeto tulandanga nzila. Yave ozolanga vo twalungisa e salu yayi kondwa nkakalakani zayingi. Muna Diambu Diandi, tulukiswanga vo: ‘Leleka eyendelo dia malu maku, e nzila zaku zawonso zatoma dimbwa.’ (Nga. 4:26) Diakala vo u nleke yovo mbuta, olenda bakula o mfunu wa lemvokela luludiku lwalu.

Nkand’a Nzambi uvovanga vo: “O nkembo a matoko i nkum’au.” (Nga. 20: 29) Aleke ayingi bena ye mavimpi mambote, nkuma, ngangu y’etima dia kala ye zingu kiasikila. Nkumbu miayingi, ambuta bemonanga vo aleke bavwidi ngangu, umbangu ye bena ye vuvu vo aleke balenda lungisa makani mau. Kansi, aleke bekala kaka ye kiese kiakieleka avo basadidi ngangu yo umbangu wau muna salu kia Yave.

Wantu akaka a nza beyangalelanga e ngangu ye umbangu wa mpangi zeto z’aleke. Kasikil’owu, vava nleke una vo Mbangi a Yave kekalanga ye ngangu zayingi kuna sikola, alongi ye akw’andi a sikola balenda kunkasakesa katanga sikola zandá kimana kakala ye zingu kiambote mu nza yayi. Avo nleke otomene zaya e nsaka za somba, olenda kasakeswa kw’akaka kayivana muna nsaka zazi. Nga ntonta zazi onwananga zau? Nga muntu ozeye  onwananga ye ntonta zazi? Adieyi dilenda sadisa Nkristu mu baka nzengo zambote?

Malongi ma Nkand’a Nzambi malenda sadisa Nkristu mu kala ye zingu kiasikila. Muna Kimpovi 12:1 tutanganga vo: “Yindula Nsemi aku muna lumbu yaku ya kileke.” Ayeyi i mpila yambote ngeye nleke olenda ‘yindulwila Nsemi aku’?

Tubadika e nona kia Eric, * nleke mosi kuna Wes­te ya África. Wazolanga tá somba dia malu. Vava kakala ye kimbuta kia mvu 15, wasolwa mu kota muna buka kia nsaka za tá somba kia nsi andi. Wakala y’elau dia kwenda toma longoka nsaka zazi kuna nsi za Mputu yo kitula zo se mpil’a zingu kiandi. Muna kolo kiaki, Eric wayantika longoka Nkand’a Nzambi ye Mbangi za Yave. Aweyi kadi ‘yindulwila Nsemi andi’? Adieyi tulenda longoka muna nona kiandi?

Ekolo kalongokanga o Nkand’a Nzambi, Eric walongoka vo Nzambi ofokola e mpasi zawonso za wantu. Muna kuma kiaki, wabakula vo o vanga luzolo wa Nzambi i diambu disundidi o mfunu ke mu tá somba ko. I bosi, Eric wavubwa yo yantika sadila e ntangwa ye ngolo zandi muna salu kia Yave. Kuna kwalanda, wakituka se selo kia salu muna nkutakani. Vana fulu kia toma longoka tá somba, wakota Sikola ya Nkand’a Nzambi mu Kuma kia Mpangi z’Akala Ampumpa.

Kele vo kayivana muna nsaka za tá somba, Eric wadi vwama yo kala ye tunda. Kansi, wabakula e ludi kia nkanikinu mia Nkand’a Nzambi kisonganga vo: “O mavwa ma mvwama i’vata diandi diangolo: Nze yaka kianda mun’emona diandi.” (Nga. 18:11) Elo, e nzimbu zilenda vunginika muntu. Kadi ke zitwasanga zingu kiasikila ko. Vana ntandu, awana bevavanga vwama, nkumbu miayingi ‘bekuyisomekanga muna mbidi a mpasi.’—1 Tim. 6:9, 10.

Aleke ayingi bekalanga ye kiese kiasikila muna salu kia ntangwa ke ntangwa. Eric wavova vo: “Yakota muna buka ki’ampangi ana besadilanga Yave muna salu kia ntangwa ke ntangwa. Ekiaki i buka kisundidi o wete ndenda yikama. Ivutulanga matondo kwa Yave wau kansonga e mpila ndenda kadila ye kiese kiakieleka ye zingu kiasikila.”

Adieyi tuvova mu kuma kiaku? Vana fulu kia kuyivana muna mambu ma nza yayi, nga olenda sikidisa e ntambi zaku mu kusadisa wakala ye malau mayingi muna salu kia Yave? Nga olenda vanga e ngolo kimana wakota mu salu kia kimviti a nzila?—Tala e babu kina yo ntu a diambu “ Malau Mana Kulendi Vwa ko Muna Tanga Sikola Zandá.”

Vava bakingula e Betele ya Estados Unidos, mpangi mosi yo nkaz’andi bamona una ampangi kuna Betele basadilanga ye kiese. Kuna kwalanda, mpangi ankento wasoneka vo: “Twakivananga emvimba muna mambu ma zingu kieto.” Muna kuma kiaki, akazi awaya babaka e nzengo za toma sadila ntangwa ye ngolo zau muna salu kia Yave.

Kuna lubantiku, diampasi kikilu diakala kwa akazi awaya mu soba maka mambu muna zingu kiau. Kansi lumbu kimosi, babadika mvovo mia Yesu muna Yoane 8:31 mivovanga vo: “Ovo nukalanga muna diambu diame, nu alongoki ame kieleka.” Babakula vo mayingi mevavwanga muna kala alongoki akieleka a Yesu. Bavova vo: “Diambu tufwete vanga muna vevola e zingu kieto.” Muna kuma kiaki, bateka e nzo au ampwena ye lekwa ina ke bavwanga mfunu ko. I bosi, bayaluka yo kwenda sadila muna nkutakani yavavanga lusadisu. Owau, besalanga se aviti a nzila. Beyikamanga mpe e salu kia tunga Maseka ma Kintinu yo vana moko muna salu ya tukutakanu twa mvivu. Aweyi bemonanga mu kuma kia nsobani bavanga? “Kiese kiayingi tukalanga kiau wau twavevola e zingu kieto yo vanga konso dina e nkubik’a Yave ikutukasakesanga mu vanga.”

Solomo wasoneka vo: “O meso maku matala kaka kuna ntu, singika ve yaku kuna ntwala.” (Nga. 4:25) Nze una nati a kalu una muna nzila kesilanga e sungididi kuna ntwala, tufwete venganga konso diambu dilenda kutufila mu lembi sia e sungididi muna makani meto ma mwanda yo lungisa mo.

Nkia makani ma mwanda ozolele lungisa? O kota muna salu kia ntangwa ke ntangwa, dimosi muna makani mama. Nanga olenda kwenda sadila  mu nkutakani ina ye zunga kiampwena kansi ateleki akete. Avo u mpangi a yakala, nanga olenda kwenda sadila muna nkutakani ivwidi akuluntu yovo selo ya salu o mfunu. Olenda mokena yo nkengi a zunga kazayisa e nkutakani ivavanga lusadisu. Avo ozolele kwenda sadila ku zunga kivwidi asadi ayingi o mfunu, vava zaya e nkutakani ivavanga lusadisu. *

Tubadika diaka mvovo mia Yesaya 62:10. Muna lwaka kuna Yerusaleme, diavavanga vo akaka muna Ayuda bavanga e ngolo za singika e nzila. O unu mpe, ngolo divavanga muna lungisa makani meto ma mwanda. Kuvutuki manima ko. Muna lusadisu lwa Yave, olenda lungisa makani maku. Lomba kwa Yave kavana ngangu kimana wakatula e nkakalakani muna nzil’aku. Kuna kulanda, omona una Yave kalenda kusadisila mu ‘leleka eyendelo dia malu maku.’—Nga. 4:26.