PETELO wabokomoka ye dilu vava kavakulwila Yesu o nkalu. Kana una vo diavavanga vo Petelo kateka vutulwisa kimwanda kiandi, Yesu wazola kunsadila mu sadisa akaka. Muna kuma kiaki, Yesu wamvovesa vo: ‘Avo ovutukidi, kumika mpangi zaku.’ (Luka 22:32, 54-62) Kuna kwalanda, Petelo wakituka se mosi muna malunzi ma nkutakani ya Akristu muna tandu kiantete. (Ngal. 2:9) Diau dimosi mpe, o mpangi ona wasala kala nze nkuluntu olenda vutukila kiyekwa kiaki yo mona e kiese kia kumika mpangi zandi muna mwanda.

Akaka mun’awana basala kala nze akuluntu, bakatulwa kiyekwa kiaki. Ediadi dilenda kubafila mu yindula vo mana bateka vanga ke mena mfunu ko. Mpangi Julio, * ona wasala kala se nkuluntu ku nsi mosi ya Ámerica do Sul mu tezo kia mvu 20, wavova vo: “Yasadilanga ntangw’ame muna kubika malongi, kingula yo vungula ampangi muna nkutakani. Kansi, mawonso mama yayambula mo vanga. Ediadi diasisa wulu diampwena muna zingu kiame. Kolo kiampasi kikilu kiakala kwa mono.” O unu, mpangi Julio wavutuka sala se nkuluntu.

Yakobo wasoneka vo: “Nubadika dio vo dia kiese kaka, abunzi ame, ovo nubwa muna mpukumunwa za mpila mu mpila.” (Yak. 1:2) E mpukumunwa kayika o Yakobo i mpasi tumonanga mu kuma kia lubangamu ye usumuki weto. Wayika diaka zolela ya nitu, fu kia swaswanesa yovo sia mpambula ye fu yakaka. (Yak. 1:14; 2:1; 4:1, 2, 11) Vava Yave kekutuvananga longi yovo tumbu, dilenda kututwasila ntantu zayingi. (Ayib. 12:11) Kansi, tufwete sia ngolo muna lembi vidisa kiese kieto.

Kana nkutu batukatwidi kiyekwa muna nkutakani, twakinu ye lau dia songa lukwikilu yo zola kweto muna Yave. Tulenda mpe fimpa e kuma twasadilanga nze nkuluntu. Nga i mu kuma kia wete  dia yeto kibeni, yovo zola kweto muna Nzambi kwatufila mu kuyifwanisa mu tambula kiyekwa kiaki yo zaya vo e nkutakani i yandi ye ifwete lungwa-lungwa kuna zola kwawonso? (Mav. 20:28-30) Ampangi basala kala nze akuluntu ye bakinu sadila Nzambi ye kwikizi kiawonso, besonganga kw’awonso kumosi yo Satana vo zola kwau muna Yave kwakieleka.

Vava Davidi kavewa e tumbu mu kuma kia masumu mampwena kavanga, watambulwila elongi yo lolokwa. Davidi wayimbila vo: “Nkwa nsambu on’oyambulwilu ekuzuka, on’ofukilu esumu. Nkwa nsambu o muntu kebadikilwa mbi kwa Yave ko. On’okondelo umpûka muna mwanda.” (Nku. 32:1, 2) E tumbu kiavelelesa Davidi yo kunkitula se mvungudi ambote a nkangu a Nzambi.

Nkumbu miayingi, ampangi ana bevutukilanga kiyekwa kiau kia kinkuluntu bekitukanga avungudi ambote lutila nkutu una bateka kala. Nkuluntu mosi wavova vo: “Owau itoma bakulanga una mfwete sadisila awana bevanganga vilwa.” Wankaka wavova vo: “Owau itoma yangalelanga elau ngina diau dia sadila mpangi zame.”

Ntozi a nkunga wasoneka vo: “[Yave] kekwama tumba ko.” (Nku. 103:9) Muna kuma kiaki, ke tufwete banzanga ko vo Nzambi kalendi bunda diaka vuvu ko kwa ndiona wavanga sumu diampwena. Mpangi Ricardo ona wasala kala se nkuluntu mu mvu miayingi, wavova vo: “Yakendalala kikilu mu kuma kia vilwa yavanga. Mu kolo kiayingi, e ngindu yakala zau za sia vo kiafwana ko, zankakidilanga mu sadila diaka mpangi zame nze nkuluntu. Kiakala ye vuvu ko vo ampangi balenda diaka kumbund’e vuvu. Kansi wau vo izolanga sadisa akaka, yalongokanga Bibila yo wantu ayingi, kasakesa ampangi muna Seka dia Kintinu yo sala yau entwadi muna salu kia umbangi. Ediadi diansadisa mu kuyibunda diaka e vuvu. Owau yavutukila kiyekwa kia kinkuluntu.”

O lund’e kunda dilenda kakidila mpangi mu sala se nkuluntu. Muna kuma kiaki, diambote twatanginina Davidi wa selo kia Yave, ona watinanga  Ntinu Saulu wa nkwa kimpala. Davidi kazola landa kunda ko, kana nkutu vava kakala ye lau dia vanga wo. (1 Sam. 24:4-7; 26:8-12) Vava Saulu kafwa muna vita, Davidi wadila lumbu yayingi, wayikila Saulu yo Yonatane wa mwan’andi vo ‘anzolwa.’ (2 Sam. 1:21-23) Davidi kalundanga kunda ko.

Avo obadikilanga dina bavanga vo ke diansongi ko, kuyambula ko vo e kunda kiayala ngindu zaku. Kasikil’owu, vava mpangi William kakatulwa kiyekwa kia kinkuluntu, una kateka sala tezo kia 30 ma mvu nze nkuluntu kuna Grã-Bretanha, walundila akuluntu akaka e kunda. Adieyi diasadisa mpangi William mu singika ngindu zandi? Wavova vo: “O tanga nkand’a Yobi diankasakesa kikilu. Avo Yave wasadisa Yobi mu vanga ungudi ye akundi andi tatu, olenda mpe kunsadisa mu vanga ungudi ye akuluntu Akristu.”—Yobi 42:7-9.

Avo ngeye kibeni wabaka nzengo za yambula sala se nkuluntu, diambote watoma kuyifimpa mu zaya e kuma wabakila nzengo zazi. Nga mpasi za zingu zafila mu yambula sala se nkuluntu? Nga mambu makaka wayantika sia va fulu kiantete muna zingu kiaku? Nga wakendalala mu kuma kia usumuki wa mpangi zankaka? Kiakala konso kuma kiafila mu vanga wo, sungamena vo vava wasalanga se nkuluntu, malau mayingi wakala mau mu sadisa akaka ke mu wau ko. Malongi maku mabakumikanga, e mbandu aku yabakasakesanga, e nkingula zaku zabasadisanga mu zizidila e mpasi. E kwikizi wasonganga vava wasalanga nze nkuluntu kiamwesanga ntim’a Yave e kiese. Ongeye mpe kiese diatwasilanga.—Nga. 27:11.

Yave osadisanga mpangi z’akala mu vutukila kiese kiau y’etima diau dia vit’o ntu muna nkutakani. Avo ngeye kibeni wabak’e nzengo za yambula sala se nkuluntu yovo kiyekwa bakatula, olenda kuyifwanisa diaka mu kala nkuluntu. (1 Tim. 3:1) Paulu ‘kavwenanga samba ko’ vo Akristu kuna Kolosai bazadiswa yo zayi wa luzolo lwa Nzambi, kimana ‘bakangalela e nkangala ifwene Yave muna kunyangidika una ufwene.’ (Kol. 1:9, 10) Avo wavutukila kiyekwa kia sala se nkuluntu, sambanga kwa Yave kimana kasadisa wakala ye ngolo, luzindalalu ye kiese. Mu lumbu yayi yambaninu, avungudi anzodi bavwilu o mfunu muna sadisa nkangu a Nzambi wasikila muna mwanda. Nga olenda kuyifwanisa mu kumika mpangi zaku?