1, 2. Aweyi Yave kevovelanga kwa selo yandi?

 YAVE ofilanga nkangu andi tuka kolo. Kuna nz’ankulu, wasadilanga mbasi, mona-meso ye ndozi mu zayisa oma ma kusentu yovo vana salu kiasikididi. (Nta. 7:89; Yez. 1:1; Dan. 2:19) Ezak’e ntangwa, Nzambi wasolanga wantu mu kunsunzula yo vana nkanikinu miandi. Kiakala nkia mpila o nkangu a Yave babadikilanga e diambu diandi, awana balemvokelanga tuludiku twandi basambulwanga.

² O unu, Yave osadilanga Diambu diandi, mwand’avelela ye nkutakani mu fila nkangu andi. (Mav. 9:31; 15:28; 2 Tim. 3:16, 17) O tuludiku tutambulanga kwa yandi twatoma kiá, tuna nze yeto ‘tuwanga nding’oku nima, oku vo eyayi i nzila nudiatila mo.’ (Yes. 30:21) Yave osadilanga mpe Yesu mu kutuwisa e nding’andi. Wasola Yesu mu fila e nkutakani muna nzil’a “ntaudi akwikizi yo lulungalalu.” (Mat. 24:45) Tufwete lemvokelanga tuludiku ye nkanikinu miandi, kadi avo tuvangidi wo tuvwa moyo a mvu ya mvu.—Ayib. 5:9.

3. Nki kilenda kakidila mu lembi lemvokela luludiku lwa Yave? (Tala fwaniswa va ntandu.)

³ Satana ozeye wo vo luludiku lwa Yave lukutuvuluza. Muna kuma kiaki, ovavanga kutuvukumuna twalembi wá e  ndinga yayi. O ntim’eto mpe walembi lunga ulenda kutukakidila mu lembi lemvokela luludiku lwa Yave. (Yer. 17:9) Mu longi diadi, tubadika una tulenda sundila e nkaku milenda kutusimba mu lembi wá e nding’a Nzambi. Tubadika mpe una o wila Yave yo vovana yandi muna sambu dilenda kutusadisila mu kumfinama kana nkutu nkia diambu ditubwididi.

4. Aweyi Satana keyivisilanga e ngindu za wantu?

⁴ Satana ovavanga yivisa e ngindu za wantu muna sadila nsangu zaluvunu. (Tanga 1 Yoane 5:19.) Vana ntandu, e zulunalu, nkanda, radio, televizau ye Internete imwanganesanga nsangu mu nza yawonso. Kana una vo ezak’e ntangwa e sadilwa yayi izayisanga nsangu zamfunu, nkumbu miayingi isayanesanga fu ke ina ngwizani ko ye nkanikinu mia Yave. (Yer 2:13) Kasikil’owu, balenda vova vo o sompana nkento yo nkento yovo yakala yo yakala ke diambi ko. Ediadi difilanga wantu ayingi mu yindula vo Nkand’a Nzambi tezo uviokesanga vava uvovelanga diambu dia sompana nkento yo nkento yovo yakala yo yakala.—1 Kor. 6:9, 10.

5. Aweyi tulenda vengela vukumunwa kwa nsangu zaluvunu za Satana?

⁵ Awana bezolanga nkanikinu mia Yave aweyi balenda vengela vukumunwa kwa nsangu zaluvunu za Satana? Aweyi balenda zayila oma mambi ye mambote? Nkand’a Nzambi uvananga e mvutu vo: ‘Muna lunda yo sadila diambu dia Nzambi.’ (Nku. 119:9) E Diambu dia Nzambi dikutusadisanga mu zaya edi dialudi y’edi dialuvunu. (Nga. 23:23) Yesu wavova vo muna zinga, ‘diambu divaikanga muna nu’a Yave’ tuvwanga o mfunu. (Mat. 4:4) Tufwete zaya una tusadila nkanikinu mia Nkand’a Nzambi muna zingu kieto. Kasikil’owu, vitila Mose kasoneka nsiku a Yave mu kuma kia zumba, o nleke Yosefe wazaya wo vo vangu diadi sumu kuna kwa Nzambi. Kazola kolamena Yave ko vava nkaz’a Potifa kazola vo kaleka yandi. (Tanga Etuku 39:7-9.) Kanele vo nkaz’a Potifa wantontanga ntangwa zawonso, Yosefe wasola wila nding’a Yave vana fulu kia wila nkaz’a Potifa. Yeto mpe tufwete wilanga nding’a Yave ke nsangu zaluvunu za Satana ko.

6, 7. Adieyi tufwete vanga mu venga tuludiku twa Satana?

⁶ E nza yazala ye malongi ma mpila mu mpila melongwanga muna mabundu oma mefilanga wantu ayingi mu yindula vo ke dilendakana ko mu solola e nsambil’aludi. Kansi, avo tuna ye luzolo lwa wila Yave, ke dikala diampasi ko mu solola e ludi. Tufwete sola ona tuwila. Ke tulendi wá ndinga zole ko mu nkumbu mosi. Nze una meme dizayilanga e  nding’a mvungudi andi, yeto mpe tufwete zayanga e nding’a Yesu ona Yave kasola mu kutuvungula.—Tanga Yoane 10:3-5.

⁷ Yesu wavova vo: “Nutoma tal’owu nuwa.” (Maku 4:24) Tuludiku twa Yave twatoma kiá ye twa nsongi, kansi tufwete kala yo nyindu asikila mu lemvokela mana kevovanga. Avo ke tukebele ko, tulenda wila tuludiku twa Satana vana fulu kia wila tuludiku twa Nzambi a zola. Kuyambula ko vo miziki mia nza, vídeo, mambu mesongwanga muna televizau, nkanda, akundi, alongi yovo ana bebadikilwanga vo akwa ngangu bafila zingu kiaku.—Kol. 2:8.

8. (a) Aweyi o ntim’eto ulenda kutufidila mu vukumunwa kwa Satana? (b) Adieyi dilenda kutubwila avo tuvezele sinsu ya lulukisu?

⁸ Satana ozeye wo vo tu asumuki. Avo olendele kutuvukumuna mu kuyivana muna lutovoko lweto, diampasi dikala kwa yeto mu sikila ye kwikizi muna Yave. (Yoa. 8:44-47) Kasikil’owu, tulenda yambula samba, kulula vema muna salu kia umbangi yovo kondwa mu tukutakanu. Mawonso mama i sinsu isonganga oma mevangamanga muna ntim’eto ye dilenda kala diavonza avo tuvezele e sinsu yayi. Avo ke tusidi sungididi ko, malembe-malembe tulenda yambula wá nding’a Yave. Kuna kulanda, tulenda kuyivana muna zolela yeto yo vanga diambu diambi dina nkutu ke twayindulanga ko. (Roma 7:15) Kansi, tulenda venga vilwa wau avo tusidi e sungididi muna sinsu ya lulukisu yo singika mambu vana vau. Avo tuwá nding’a Yave ye sungididi kiawonso, ke tuwila ngindu z’abendomoki ko.—Nga. 11:9.

9. Ekuma dinina diamfunu mu bakula vana vau e ngindu zilenda kutufila mu vanga edi diambi?

⁹ O solola kimbevo mu nzaki dilenda vuluza o muntu. Diau dimosi mpe, tulenda venga e vonza avo tubakwidi e ngindu zilenda kutufila mu vanga edi diambi. Vana vau, tufwete vanga diambu vitila ‘twabakama kwa [Satana] muna vanga luzolo luandi.’ (2 Tim. 2:26) Adieyi tufwete vanga avo tubakwidi vo e ngindu ye zolela yeto ke ina ngwizani ko ye mana Yave kevavanga kwa yeto? Vana vau, tufwete vutuka kwa yandi, vava luludiku lwandi yo kunlemvokela. (Yes. 44:22) Tufwete wo zaya vo e nzengo zambi zilenda twasa mpasi zayingi kana  nkutu vo muntu ovutukidi kwa Yave. Muna kuma kiaki, diambote twalembi yambula Yave.

10, 11. (a) Aweyi tulenda zayila nkwa lulendo? (b) Adieyi tulongokele muna ukolami wa Kora, Datani yo Abirami?

¹⁰ Tufwete sungamena vo ntim’eto ulenda kutuvambula yo Yave. Kasikil’owu, tulenda kituka akwa lulendo yovo akwa loko. Badika una e fu yayi ilenda kutukakidila mu lembi wá nding’a Yave yo kutufila mu nzila zambi. O nkwa lulendo olenda yindula vo osundidi akaka ye olenda vanga konso dina kazolele. Olenda yindula vo ke vena muntu ko olenda kumvovesa dina kafwete vanga, kiakala akw’andi Akristu, akuluntu, kana nkutu nkubik’a Yave. Kuna kwa muntu a mpila yayi, e nding’a Yave ketoma yo wanga diaka ko.

¹¹ Vava Aneyisaele bakangalanga muna makanga, Kora, Datani yo Abirami bakolamena wisa kia Mose yo Arone. Muna kuma kia lulendo, akolami awaya bavanga nkubika za yau kibeni za sambila Yave. Adieyi Yave kavanga? Wavonda akolami. (Nta. 26:8-10) E mbandu au diambu diamfunu itulongele. O kolamena Yave mfwilu kaka ditwasanga. Nkand’a Nzambi uvovanga vo “umvwania uvita nkosomoko.”—Nga. 16:18; Yes. 13:11.

12, 13. (a) Yik’e nona kisonganga una e loko dilenda twasila e vonza. (b) Yika una e loko dilenda wokelela mu nzaki avo muntu kayikebele ko.

¹² E fu kia loko mpe kia vonza. Nkumbu miayingi, o nkwa loko oyindulanga vo e nkanikinu mia Yave ke mintadidi ko. Olenda yindula vo olenda kwandi baka lekwa kiangani. Vava Namani wa nkuluntu a makesa ma Suria kawukwa mu kuma kia wazi wandi, wavana tukau kwa Elesa wa ngunza, kansi katambula to ko. Kansi, o Ngekazi wa ntaudi a Elesa walokokela tukau twatu. Ngekazi wavova vo: ‘E nkal’a Yave aka, ilundumukina [Namani] yatambula kingandi kwa yandi.’ Lembi zayisa Elesa, Ngekazi wayenda kwa Namani yo kumvovesa mambu maluvunu kimana katambula “talant’a palata ye nsobani zole za mvwatu.” Adieyi diabwila Ngekazi wau kavanga e diambu diadi yo vuna ngunz’a Yave? Wabakama kwa wazi.—2 Nti. 5:20-27.

¹³ E loko dilenda yantika malembe-malembe. Avo ke tuyikebele ko, dilenda wokela mu nzaki yo sia e zingu kieto mu vonza. Lusansu lwa Akani lutoma songanga e ziku kia diambu diadi. Tala una e loko dia Akani diawokelela. Wavova vo: “Una yamona mun’esanzu, mpet’ambote a Sina ye nkama zole za sekele za palata, ye vimpa kia wolo kin’ezitu dia makumole ma sekele, ndokokele yo, mbongele yo.” Vana fulu kia venga e zolela yambi, Akani kuna loko diawonso wayiya e lekwa yambote yo sweka yo muna saba kiandi. Vava sumu dia Akani diazayakana, Yosua wamvovesa vo Yave mpasi kekuntwasila. Muna lumbu kiakina, Akani y’esi nzo andi bavondwa muna matadi. (Yos. 7:11, 21, 24, 25) Konso muntu mu yeto olenda kituka nkwa loko nze Akani. Muna kuma kiaki, tufwete ‘kuyikenga ye loko diawonso.’ (Luka 12:15) Kana una vo ezak’e ntangwa tulenda lwakilwa kwa ngindu zambi yovo yindula mambu masafu, diambote twasingikanga ngindu zeto kimana zalembi kutufila mu sumuka.—Tanga Yakobo 1:14, 15.

14. Adieyi tufwete vanga avo lulendo yovo loko dizolele kutufila mu vanga edi diambi?

¹⁴ E fu kia lulendo ye loko kilenda twasa mfwilu. O yindula e mfwilu mia  vangu diambi dikutusadisa mu kwamanana wila nding’a Yave. (Nsi. 32:29) Muna Bibila o Nzambi aludi okutuzayisanga e nluta mia vangu diambote ye mfwilu mia vangu diambi. Avo lulendo yovo loko dizolele kutufila mu vanga edi diambi, diangangu twayindula e mfwilu dilenda twasa kwa yeto kibeni, kwa azolw’eto ye muna ngwizani eto yo Yave.

15. Adieyi tulenda longoka muna mbandu a Yesu?

¹⁵ Yave ozolele vo twakala ye zingu kiambote. (Nku. 1:1-3) Okutuvananga luludiku muna ntangwa tuvwidi lo mfunu. (Tanga Ayibere 4:16.) Kana una vo Yesu walunga kakala, diavavanga vo kamokenanga yo Yave yo kwamanana samba. Yave wasadisanga Yesu yo kumfila mu mpila yasivi. Watuma mbasi mu kunlunga-lunga, wamvana mwand’avelela mu kunsadisa yo kumfila mu sola ntumwa zandi 12. E nding’a Yave yawakana tuka kuna zulu mu songa vo wasadisanga yo tonda Yesu. (Mat. 3:17; 17:5; Maku 1:12, 13; Luka 6:12, 12; Yoa. 12:28) Nze Yesu, yeto mpe tufwete ziulanga ntima mieto kwa Yave muna sambu. (Nku. 62:7, 8; Ayib. 5:7) E sambu kikutusadisanga mu finama Yave yo zingila muna mpila ikunyangidikanga.

16. Aweyi Yave kekutusadisilanga mu wila nding’andi?

¹⁶ Yave ke kutukomekenanga ko mu lemvokela tuludiku twandi, kansi okutusadisanga twasolola tuludiku twatu avo tuzolele. Avo tulombele mwand’andi avelela, okutuvana wo kuna mvevo. (Tanga Luka 11:10-13.) Nkand’a Nzambi uvovanga vo: “Nutoma tala ngwa nuwa.” (Luka 8:18) Kasikil’owu, avo tulombele kwa Yave katusadisa mu yambula vangu dia zumba, kansi tukwamanananga tala mavangu ma zumba, tusonga vo ke tuzolele lusadisu lwandi ko. Muna vwa lusadisu lwandi, tufwete kala vana fulu kina yo mwand’a Yave, nze muna tukutakanu tweto. Selo yayingi ya Yave bevenganga e vonza muna wanga nding’a Yave muna tukutakanu. Vava bebakulanga vo makani mambi mayantikidi kota muna ntima miau, vana vau besingikanga ngindu zau.—Nku. 73:12-17; 143:10.

17. Ekuma dinina dia vonza dia kuyibunda e vuvu kiasaka?

¹⁷ Badika nona kia Davidi wa Ntinu a Isaele. Vava kakala nleke, wavonda Ngoleyate wa mwisi Felesetia. Kuna kwalanda, Davidi wakituka ekesa, i bosi ntinu. Wakala ye salu kia tanina yo baka nzengo mu kuma kia zula kia Isaele. Kansi, vava kayantika kuyibunda e vuvu kiasaka, ntim’andi wamvuna. Wasumuka yo Bate-seba yo vondesa nkutu Ureya wa nkaz’andi. Vava Yave kamvana longi, Davidi kuna lulembamu lwawonso watambulwila sumu diandi yo vutulwisa ngwizani andi yo Yave.—Nku. 51:4, 6, 10, 11.

18. Adieyi dilenda kutusadisa mu kwamanana wá nding’a Yave?

¹⁸ Tufwete lemvokelanga lulukisu luna muna 1 Korinto 10:12 lwa lembi kuyibund’e vuvu kiasaka. Wau vo ke tulendi ‘singika ntambi zeto’ ko, vekala ye ndinga tuwila, avo ke nding’a Yave ko, ya Satana. (Yer. 10:23) Muna kuma kiaki, diamfunu twasambanga ntangwa zawonso, landa luludiku lwa mwand’avelela yo kwamanana wá nding’a Yave ye sungididi kiawonso.