E kiuvu kiaki mfunu kina, musungula kw’awana bafwilwa akazi. Balenda kala y’etima dia vutuka zinga vamosi ye akazi au ana befuluka muna nz’ampa. Mpangi mosi wafwilwa o nkento wavova vo: “Omono yo nkaz’ame ke twazola fokola longo lweto ko. Luzolo twakala lwau i kwamanana sambila Nzambi entwadi nze yakala yo nkento yakwele mvu. E ngindu zame ke zasoba ko.” Nga vena ye kuma kiasikila mu kwikila vo awana befuluka ova ntoto balenda sompa? Ka tuzeye ko.

Tuka mvu miayingi, e nkanda mieto mivovanga vo e mvovo mia Yesu mu kuma kia lufuluku yo sompa nanga awana befuluka ova ntoto miyikanga. E nkanda mieto mivovanga mpe vo awana befuluka ke besompa ko. * (Mat. 22:29, 30; Maku 12:24, 25; Luka 20:34-36) Kansi, nga vena ye diambu dilenda kutufila mu yindula vo e mvovo mia Yesu mu kuma kia lufuluku, awana bekwenda kuna zulu miyikanga? Yambula twafimpa e mvovo mia Yesu.

Aki nani Yesu kamokenanga yau vava kayika e mvovo miami mu kuma kia lufuluku? (Tanga Luka 20:27-33.) Asaduki kamokenanga yau, ana ke bakwikilanga mu lufuluku ko. Bavava filakesa Yesu muna kunyuvula kiuvu mu kuma kia lufuluku ye longo lwa kinkwezi. * Yesu wavutula vo: “O wan’a tandu kiaki sompa besompanga, sompeswa besompeswanga: kansì tu, ana befwaneswa o luakila muna tandu kiakina, yo muna lufuluku lua mafwa, ke besompa ko, ngatu sompeswa: ke balendi fwa diaka nkutu ko: kadi betela besiwa ye mbasi; se wan’a Nzambi, i wan’a lufuluku.”—Luka 20:34-36.

Ekuma e nkanda mieto mivovelanga vo Yesu nanga awana befuluka ova ntoto kayika? Vena ye kuma yole. Kiantete, Asaduki nanga awana befuluka ova ntoto bayindulanga. Muna kuma kiaki, o Yesu wabavana e mvutu mun’owu wa mana bayindulanga. Diazole, kuna mfoko a mvutu zandi, wayika Abarayama, Isaki yo Yakobo, akwa kwikizi ana befuluka yo vwila moyo ova ntoto.—Luka 20:37, 38.

Kansi, o Yesu nanga lufuluku lw’awana bekwenda kuna zulu kayika. Ekuma tuvovele wo? Yambula twafimpa mvovo miole mina muna mvutu za Yesu kwa Asaduki.

“Ana befwaneswa o luakila . . . muna lufuluku lua mafwa.” Akuswa akwikizi ‘bafwaneswa muna Kintinu kia Nzambi.’ (2 Tes. 1:5, 11) Mu kuma kia kimenga kia lukûlu kia Kristu, Nzambi obadikilanga akuswa vo ansongi. Vava befwanga, Nzambi okubabadikilanga vo bavevokele muna masumu mau. (Roma 5:1, 18; 8:1) Akuswa awaya beyikilwanga vo ‘akwa nsambu yo velela’ yo fwaniswa mu lufuluku lw’awana bekwenda zingila kuna zulu. (Lus. 20:5, 6) Kansi, vana vena awana befuluka yo zingila ova ntoto, vekala mpe “y’ana balembi songa.” (Mav. 24:15) Nga dilenda vovwa mu kuma kiau vo ‘bafwaniswa’ muna lufuluku?

“Ke balendi fwa diaka nkutu ko.” Yesu kavova ko vo: “Ke besinga fwa diaka ko.” Kansi,  wavova vo: “Ke balendi fwa diaka nkutu ko.” E nsekola zakaka zisekolanga mvovo miami vo: “Ke befwa ko” ye “o lufwa ke luna ye nkuma ko muna yau.” Akuswa ana besikilanga ye kwikizi yamuna lufwa, befulwanga yo kwenda kuna zulu yo vwata owu ulembi fwa, i sia vo, zingu kilembi suka, eki ke kilendi fwaswa ko. (1 Kor. 15:53, 54) Lufwa ke luna ye nkuma ko mun’awana befulwanga yo kwenda zingila kuna zulu. *

Adieyi tulenda vova muna mambu mawonso tubadikidi? Tulenda vova vo e mvovo mia Yesu mu kuma kia sompa ye lufuluku, awana befuluka yo kwenda kuna zulu miyikanga. Avo i wau, e mvovo mia Yesu mitusadisi mu bakula mambu tatu mu kuma ki’awana befulwanga mu kwenda zingila kuna zulu: (1) Ke besompanga ko, (2) ke balendi fwa diaka ko ye (3) bekitukanga nze ambasi kuna zulu. Kansi, o Yesu avo lufuluku lw’awana bezingila kuna zulu kayika, ediadi yuvu yakaka divaikisanga.

Kiantete, avo Asaduki lufuluku lw’awana bezingila ova ntoto bayindulanga, ekuma Yesu kayikila lufuluku lw’awana bezingila kuna zulu? Yesu ke ntangwa zawonso ko kavananga e mvutu kw’atantu andi mun’owu wa mana bayindulanga. Kasikil’owu, kuna kwa Ayuda ana banlomba e sinsu, Yesu wabavutula vo: “Nubangula nzo yayi yavauka, yavumbula yo muna lumbu tatu.” Yesu wazaya wo vo Asaduki tempelo ina yatungwa bayika, “kansi oyandi, owu kavovèle, wa nzo avauk’a to kiandi.” (Yoa. 2:18-21) Nanga Yesu kamona mfunu ko wa vana e mvutu kwa Asaduki, ana ke bakwikilanga mu lufuluku ko ngatu muna mbasi. (Nga. 23:9; Mat. 7:6; Mav. 23:8) Kansi, Yesu wazola vova e ludi mu kuma kia lufuluku lw’awana bekwenda kuna zulu muna wete dia alongoki andi ana badi kala ye vuvu kia kwenda kuna zulu.

Kiazole, ekuma Yesu kuna mfoko a mvovo miandi kayikila Abarayama, Isaki yo Yakobo ana befulwa yo zingila ova ntoto? (Tanga Matai 22:31, 32.) Vitila kayika wantu awaya akwa kwikizi, Yesu wayantikila e mvutu zandi mu mvovo emi: “Vo i lufuluku lua mafwa.” E mvovo miami misonganga vo Yesu diambu diakaka kazola vovela. Wayambula vovela lufuluku lw’awana bekwenda kuna zulu yo yantika vovela luna lw’awana bezingila ova ntoto. Yesu wazaya wo vo Asaduki batambulwilanga mana Mose kasoneka. Muna kuma kiaki, wayika mvovo mina Nzambi kavovesa kwa Mose vana nti walemanga. Yesu wazola songa kwa Asaduki vo lufuluku lwa wantu ova ntoto luna muna kani dia Nzambi.—Luv. 3:1-6.

Kiatatu, avo e mvovo mia Yesu mu kuma kia lufuluku ye sompana awana befuluka mu kwenda zingila kuna zulu miyikanga, ediadi disongele vo awana befuluka yo zingila ova ntoto besinga sompa? E Diambu dia Nzambi ke divananga mvutu zasikididi ko mu kiuvu kiaki. Avo Yesu lufuluku lw’awana bezingila kuna zulu kayika, ozevo e mvovo miandi ke mitoma kiesesanga ko kana vo awana befuluka yo zingila ova ntoto sompa besinga sompa muna nz’ampa yovo ve.

Nkand’a Nzambi uvovanga vo lufwa i lufokolanga o longo. Muna kuma kiaki, o nkaz’aku avo wafwa, kufwete kuyitumba ko avo obakidi e nzengo za sompa diaka. Ezazi nzengo za muntu yandi kibeni. Ke vena muntu ko ofwete tumba ona obakidi nzengo za sompa diaka.—Roma 7:2, 3; 1 Kor. 7:39.

Tulenda kala ye yuvu yayingi mu kuma kia una ukala e zingu muna nz’ampa. Vana fulu kia tokanena e mvutu za yuvu yayi, tufwete vingila yo mona. Kansi, tulenda kala ye ziku eki: Awana belemvokelanga Yave zingu kiakiese bekala kiau, kadi Yave osinga lungisa e nsatu ye zolela yau yawonso mu mpila yambote.—Nku. 145:16.