1. Ekuma selo ya Nzambi bemwenanga “mpasi zayingi”?

 NGA difwete kutusivikisa mu zaya vo “mpasi zayingi” tumona vitila twatambula lukau lwa moyo a mvu ya mvu? Ve. Kiakala nkutu vo mvu miayingi se twina mu ludi, yeto awonso tumonanga mpasi zazi. Ekuma? E kuma kadi mu nza ya Satana tuzingilanga.—Lusengomono 12:12.

2. (a) Vana ntandu a mpasi bemonanga wantu awonso alembi lunga, nkia mpasi zakaka bemonanga Akristu? (Tala fwaniswa va ntandu.) (b) Nani i tuku dia lubangamu? Aweyi tuzayidi wo?

² Wantu awonso alembi lunga bemonanga e mpasi za zingu. Kansi vana ntandu a mpasi zazi, vena ye mpasi zakaka bemonanga Akristu. (1 Korinto 10:13) Zakaka muna mpasi zazi i bangikwa mu kuma kia nzengo zau za sikila ye kwikizi muna Nzambi. Yesu wazayisa alandi andi vo: “O ntaudi kasundidi mfumu andi ko. Ovo bambangika, oyeno mpe bekunubangika.” (Yoane 15:20) Nani i tuku dia lubangamu lwalu? Satana. Muna Nkand’a Nzambi oyikilwanga vo “nkosi ankwinti” ona ‘ovavanga vempola’ nkangu a Nzambi. (1 Petelo 5:8) Satana ovanganga mawonso mu vava fwasa kwikizi kieto muna Yave. Yambula twazaya dina diabwila Paulu wa ntumwa.

3-5. (a) Nkia lubangamu Paulu kawanana lwau kuna mbanz’a Luseta? (b) Mu nkia mpila e mvovo miandi mu kuma kia mpasi miakadila mia lukasakeso?

³ Paulu nkumbu miayingi kamweswa mpasi mu kuma kia kwikizi kiandi muna Nzambi. (2 Korinto 11:23-27) Lumbu kimosi kuna mbanz’a Luseta, Paulu wawuka yakala dimosi kadiatanga ko tuka kawutukila. Mu kuma kia sivi diadi, o wantu bayindula vo Paulu yo Banaba zinzambi. Yau awole badodokela e ndonga vo ke babasambila ko. Kansi, vana vau afidi a nsambil’a Kiyuda balwaka yo vova luvunu mu kuma kia Paulu yo Banaba. O nkangu wakwikila muna luvunu lwau. Muna kuma kiaki, bayantika tuba Paulu matadi yavana babanza vo ofwidi.—Mavangu 14:8-19.

⁴ Vava Paulu yo Banaba bakingula e mbanz’a Delebe, “bavutukidi kuna Luseta, ye Ikonio, ye Antiokia, basikidisi mioyo mi’alongoki, babawondelele vo basikila muna lukwikilu, oku vo, muna mpasi zayingi i tufwete kotela muna kintinu kia Nzambi.” (Mavangu 14:21, 22) O zaya vo “mpasi zayingi” tumona dilenda kutuyoyesa. Muna kuma kiaki, aweyi Paulu yo Banaba ‘bakumikina alongoki’ muna kubavovesa vo mpasi zayingi bemona?

⁵ Tulenda solola e mvutu za kiuvu kiaki muna mvovo mia Paulu. Wavova vo: “Muna mpasi zayingi i tufwete kotela muna kintinu kia Nzambi.” Kavova ko vo: “Tufwete zizidila mpasi zayingi.” Kansi, Paulu wayika o nsendo betambula awana besikila ye kwikizi muna Nzambi. O nsendo wau ke ndozi ankatu ko. Yesu wavova vo: “Ndion’ozindalala yakuna mbaninu, i yun’ovuluzwa.”—Matai 10:22.

6. Nkia nsendo betambula awana bezizidilanga lubangamu?

⁶ Avo tuzizidila e mpasi, nsendo tuvwa. Kuna kwa Akristu akuswa, o nsendo wau i zingu kilembi suka kuna zulu yo yala kumosi yo Yesu. Kuna kwa “mameme makaka,” o nsendo wau i zingila yakwele mvu ova ntoto muna luvuvamu. (Yoane 10:16; 2 Petelo 3:13) Kansi e kolo tuvingilanga vwa nsendo wau, “mpasi zayingi” tumona. Yambula twabadika mpila zole za lubangamu tulenda wanana lwau.

7. Nkia mpila lubangamu tulenda wanana lwau?

⁷ Yesu wasakula vo: “Bekunuyekola kuna mbazi za nkanu; muna masambilu  nuyosonwenwa; vana ndose za nyazi ye ntinu.” (Maku 13:9) Yesu wasonga vo Akristu akaka bemweswa mpasi muna nitu. Ezak’e ntangwa, lubangamu lwalu lulenda tuka kwa mfumu za mabundu yovo kwa mfumu za tuyalu. (Mavangu 5:27, 28) Badika diaka nona kia Paulu. Nga wonga kamona mu kuma kia lubangamu lwalu? Ve.—Tanga Mavangu 20:22, 23.

8, 9. Aweyi Paulu kasongela vo wakubama kakala mu zizidila mpasi? Aweyi akaka muna mpangi zeto o unu bezizidilanga e mpasi bemweswanga?

⁸ Kuna unkabu wawonso Paulu wasunda e mpasi kamweswa kwa Satana yo vova vo: “Kibadikila moyo ame ma kiatà oku ngina ko, mpasi owu manesa nkul’ame, yo uselo una yatambula kwa Mfumu Yesu, wa sila nsangu zambote za nsambu za Nzambi o umbangi.” (Mavangu 20:24) Paulu kamonanga wonga wa lubangamu ko. Kansi, wakalanga wakubama mu zizidila lubangamu. Wakala y’ekani dia sila ‘umbangi una ufwene’ kana nkutu vava kabangikwanga.

⁹ O unu, mpangi zayingi besikilanga ye kwikizi muna ntangw’a lubangamu. Muna nsi mosi, akaka muna Mbangi za Yave basiwa muna pelezo mu tezo kia mvu 20 lembi fundiswa. Ekuma? E kuma kadi ke bazola kuyisia mu mambu ma luyalu ko. Ke bevewanga nswa wa kingulwa ko kana nkutu kwa yitu yau, akaka muna yau bewandwanga yo bangikwa.

10. Ekuma ke tufwete mwena wonga ko wa mpasi za kinsalukisa?

¹⁰ Muna fulu yakaka, mpangi zeto bezizidilanga mpasi zikubabwilanga kuna kinsalukisa. Avo e diadi dibwididi, kumoni wonga ko. Sungamena nona kia Yosefe. Kuna kinsalukisa, watekwa muna ubundu. Kansi, Yave ‘wankôla muna mpasi zandi zawonso.’ (Mavangu 7:9, 10) Yave olenda vanga diau dimosi kwa ngeye. Sungamenanga vo Yave “ozeye e mpuluza kevuluz’awana bekumvumina muna umpukumuni.” (2 Petelo 2:9) Kuma kiasikila una kiau mu bunda e vuvu muna Yave yo zizidila lubangamu kuna unkabu. Kala ye vuvu vo Yave olenda kuvuluza mu nza yayi yambi yo kuvana moyo a mvu ya mvu.—1 Petelo 5:8, 9.

11. Ezaka mpasi tumweswanga aweyi ziswaswanene yo Lubangamu?

¹¹ Tulenda mpe mweswa mpasi zakaka. Aweyi e mpasi zazi ziswaswanene ye mpasi zina tumweswanga muna nitu? E mpasi tumweswanga muna nitu zina nze tembwa kiangolo kibwidi kuna kinsalukisa yo fwasa e nzo aku vana vau. Kansi, e mpasi zakaka zikutubwilanga zilenda tezaneswa ye nselele zifusisanga e mabaya ma nzo aku malembe-malembe. Vava obakula vo nselele zifusisi e nzo, kulenda vanga diaka diambu ko kadi e nzo se ibwa.

12. (a) Nkia mpasi zakaka Satana kesadilanga? Ekuma ketoma sadilanga mpasi zazi? (b) Ekuma Paulu kakendalelanga?

¹² Satana ozolele fwasa ngwizani eto yo Yave. Olenda sadila lubangamu yovo  mpasi zakaka, nze lukendalalu, luna vo i mpasi ketoma sadilanga. Ekuma? E kuma kadi lukendalalu lulenda fwasa e ngwizani eto yo Nzambi malembe-malembe. Ezak’e ntangwa, Paulu wa ntumwa wakendalalanga. Lumbu kimosi, wakiyikila vo “muntu a nkangu a ntima.” (Tanga Roma 7:21-24.) Ekuma muntu nze Paulu kakendalelanga? Ngwizani ambote kakala yau yo Yave, nanga wakala mosi muna buka kia selo yambuta. Kansi, Paulu wakendalalanga mu kuma kia usumuki wandi. Wazolanga vanga edi diambote, kansi diampasi diakala. Avo i wau omonanga, olenda kasakeswa mu zaya vo Paulu mpe wanuananga ye diambu diadi.

13, 14. (a) Ekuma akaka muna nkangu a Yave bekendalelanga? (b) Nani ozolanga fwasa lukwikilu lweto? Ekuma?

¹³ Ezak’e ntangwa, mpangi zayingi z’akala ye z’akento bekendalalanga, betokananga yo kuyimwena nkutu vo ke bena mfunu ko. Muna bonga e nona, mpangi ankento una vo mviti a nzila wavova vo: “Ntangwa zawonso, iyindulanga e mbi yavanga yo tokana kwayingi. Vava iyindulanga mawonso yavanga, ikuyibadikilanga vo ke vena muntu ko olenda kunzola, kana nkutu Yave.”

¹⁴ Ekuma selo yakaka yakwikizi ya Yave bekendalelanga nze mpangi ankento ndioyo? Valenda kala ye kuma yayingi. Nanga dilenda kala vo ngindu zabendomoka bekalanga zau mu kuma kia yau kibeni yovo mu kuma kia mana mababwila muna zingu. (Ngana 15:15) Akaka balenda kendalala mu kuma kia mayela metokanesanga ngindu zau. Kiakala nkia kuma una kiau mu kendalala, sungamena vo vena ye ndiona ozolanga vo twakendalala. Nani ozolanga vo twakendalala yo yambula sadila Yave? Satana. Oyandi, wavewa tumbu kia lufwa ye ozolele vo ngeye mpe wadimbula e vuvu. (Lusengomono 20:10) Satana ozolanga kututokanesa yo kulula vema kweto. Kiakala nkia mpila mpasi kekutumwesanga, edi kazolele o Satana vo twayambula sadila Nzambi. Kuyivuni ko, nkangu a Nzambi mu vita bena, benuananga mu tanina kwikizi kiau muna Yave.

15. Mun’owu wa 2 Korinto 4:16, 17, nkia kani tufwete kala diau?

¹⁵ Kala ye kani dia lembi yambula nwana vita yayi. Kwamanana sia sungididi muna nsendo. Paulu wasonekena Akristu kuna Korinto vo: ‘Tulembele fwil’o ntima; kana una vo o wuntu weto wa mbazi ukufwila, owu wakati i uvangilwa se va lumbu ke lumbu. Okala vo kadi, e mpasi zeto, zazi za kolo kiandwelo, zinungunuka kikilu o kutusadil’ezitu dia nkembo a mvu ya mvu.’—2 Korinto 4:16, 17.

16. Ekuma dinina diamfunu twakubama tuka owau mu zizidila mpasi?

¹⁶ Satana “tumpeso” yovo ndekwa zayingi kesadilanga mu kutubangika. (Efeso 6:11) Ekiaki i kuma tufwete lemvokelanga luludiku luna muna 1 Petelo 5:9 vo: “Nunsi’e kitantu, nusikila muna  lukwikilu.” Muna sikila, tufwete kubika ngindu ye ntima mieto owau, kimana twakala twakubama yo vanga edi diambote. Muna bonga e nona: Vitila benda mu vita, masoladi belongwanga mu kala wakubama mu nuana e vita. Diau dimosi mpe kwa yeto. Ka tuzeye ko kana nkia mpil’a vita tunuana kuna sentu. Muna kuma kiaki, tufwete toma kubama ekolo e vita yayi ke yalweke ko. Paulu wa ntumwa wakasakesa Akristu vo: “Nwiyitonta, kana mu lukwikilu nwina; nwiyizay’e ziku.”—2 Korinto 13:5.

17-19. (a) Aweyi tulenda kuyifimpila? (b) Aweyi aleke balenda kubamena mu vovela oma ma lukwikilu lwau kuna sikola?

¹⁷ Imosi muna mpila olenda ‘kuyizayil’e ziku’ yovo kuyifimpa, i muna kukiyuvula e yuvu nze eyi: ‘Nga isambanga lumbu yawonso? Vava akaka bekunkasakesanga mu vanga edi diambi, nga ilemvokelanga Nzambi nze nyadi ke mu wantu ko? Nga ilungananga mu tukutakanu konso lumingu? Nga ikalanga ye unkabu wa vova oma ma lukwikilu lwame? Nga ilolokanga e mbi bekumpanganga mpangi zame nze una izolelanga vo yau mpe bandoloka? Nga ilemvokelanga akuluntu a nkutakani ame ye awana  bevitang’o ntu mu nkutakani za nza yawonso?’

¹⁸ Tuzinganga yo wantu bevavanga bendomona ngindu zeto. Aleke ayingi besonganga unkabu wa vovela oma ma lukwikilu lwau kuna sikola. Ke bemonanga nsoni ko ngatu wonga wa vanga wo. Adieyi disadisanga aleke awaya mu vova kuna unkabu? Besadilanga ndekwa zina muna yinkanda-nkanda yeto. Kasikil’owu, e Despertai! ya Yuli ya mvu wa 2009, yasonga vo avo nkundi aku a sikola uyuvwidi vo: “Ekuma kukwikidilanga mu longi dia lunungunuku ko?” olenda kumvutula vo: “Ekuma mfwete kwikidila muna longi dia lunungunuku? Akwa ngangu za nza nkutu ngindu zaswaswana bekalanga zau mu kuma kia longi dia lunungunuku, kansi yau bebadikilwanga vo basundidi e ngangu.” Mase, nulonganga wan’eno una balenda vovela oma ma lukwikilu lwau kimana bakala bakubama mu vanga wo kuna sikola.

¹⁹ Dialudi vo, ke ntangwa zawonso ko dikalanga diasazu mu vovela oma ma lukwikilu lweto yovo vanga mambu makaka mana Yave kazolele vo twavanga. Muna bonga e nona, avo lumbu kiamvimba tusadidi, ngolo divava mu kwenda mu lukutakanu. Yovo dilenda kala diampasi mu sikama mu mene mu kwenda mu salu kia umbangi. Kansi, sungamena edi: Avo una ye fu kia vanga mambu mama owau, wakubama okala vava mpasi zibwa kuna sentu.

20, 21. (a) O badika lukûlu aweyi dilenda kutusadisila mu sunda lukendalalu? (b) Adieyi tufwete kwamanana vanga?

²⁰ Adieyi tuvova mu kuma kia mpasi zakaka? Kasikil’owu, aweyi tulenda sundila lukendalalu? Imosi muna mpila tulenda wo vangila, i badikanga kimenga kia lukûlu kia Yesu. I diau Paulu wa ntumwa kavanganga. Ezak’e ntangwa, wakimwenanga vo kena mfunu ko. Kansi, wazaya wo vo Kristu wafwa ke mu kuma kia wantu alunga ko, kansi mu kuma ki’asumuki nze yandi. Wasoneka vo: ‘Muna lukwikilu nkadila, luna luina muna Mwan’a Nzambi, ona wanzola, kakuyekolwel’omu mono.’ (Ngalatia 2:20) Elo, Paulu watambulwila lukûlu yo kwikila vo mu kuma kiandi kikilu lwavaninwa.

²¹ Ongeye mpe olenda vwa nluta avo otambulwidi vo lukûlu i lukau kavana o Yave mu kuma kiaku. Ediadi ke disongele ko vo lukendalalu lufokoka vana vau. Akaka nanga bezizidila lukendalalu yavana ikwiza e nza yampa. Kansi, sungamena vo: Awana kaka bezindalala i betambula nsendo. Konso lumbu kiviokanga, kikutufinamesanga ye lumbu kina Kintinu kia Nzambi kikwiza. Vava kikwiza, luvuvamu lukala ova nza, wantu awonso bekituka alunga. Dianu vo, kala y’ekani dia kota muna Kintinu kiaki, kana nkutu muna mpasi zayingi.