Yindulanga ana Bena mu Salu kia Ntangwa ke Ntangwa
“Tukwaminini o yindula salu kieno kia lukwikilu, yo mfuntu a zola.”—1 TESALONIKA 1:3.
1. Aweyi Paulu kamonanga mu kuma ki’awana bafuntukanga mu samuna nsangu zambote?
PAULU wa ntumwa wazolanga mpangi z’akala ye z’akento ana bafuntukanga mu samuna nsangu zambote. Wasoneka vo: “Tukwaminini o yindula salu kieno kia lukwikilu, yo mfuntu a zola, yo luzindalalu lua vuvu, muna Mfumu eto Yesu Kristu, vana vena Nzambi w’Es’eto.” (1 Tesalonika 1:3) Yave mpe osungamenanga yo yangalela mawonso bevanganga nkangu andi muna kunsadila, kiakala vo mayingi yovo makete bevanganga.—Ayibere 6:10.
2. Adieyi tubadika mu longi diadi?
2 Tuka muna tandu yavioka yamu lumbu yeto, Akristu bevanganga mayingi mu kuyivana kuna mvevo muna salu kia Yave. Mu longi diadi, tubadika dina Akristu akaka bavanga muna tandu kiantete mu sadila Yave. Tulongoka mpe mana bevanganga selo ya ntangwa ke ntangwa o unu ye una tulenda kubasadisila.
AKRISTU MUNA TANDU KIANTETE
3, 4. (a) Adieyi bavanga ampangi muna tandu kiantete mu sadila Yave? (b) Ateleki a Kintinu muna tandu kiantete akweyi babakilanga nzimbu mu lungisa e nsatu zau?
3 Vava Yesu kavubwa, ke vavioka kolo ko wayantika samuna oma ma Kintinu yo longa akaka basala mpe salu kiaki. (Luka 3:21-23; 4:14, 15, 43) Vava Yesu kafwa, ntumwa zandi bayantika fila e salu kia samuna nsangu zambote ye zakwamanana sayana. (Mavangu 5:42; 6:7) Akristu akaka basisa e nzo zau kimana basala e salu kia kimisionario. Muna bonga nona, Filipo wasamuna nsangu zambote mu zunga yayingi ya Palestina. (Mavangu 8:5, 40; 21:8) Paulu, ona wasala mpe salu kia kimisionario, wasisa nsi andi yo kwenda samuna nsangu zambote mu nsi zayingi. (Mavangu 13:2-4; 14:26; 2 Korinto 1:19) Akaka mpe nze Maku, Luka ye Silwano (Sila), basoneka nkanda miakaka mia Bibila yovo basadisa awana basoneka Bibila. (1 Petelo 5:12) Mpangi zayingi mpe z’akento basalanga entwadi ye mpangi zazi. (Mavangu 18:26; Roma 16:1, 2) Muna Sono ya Kingerekia ya Kikristu, tutanganga mambu makiese bavanga mpangi zazi z’akala ye z’akento. O tusansu twatu tukutusungamesanga vo Yave oyangalelanga e salu besalanga selo yandi yo lungisa nsatu zau.
4 Ateleki a Kintinu muna tandu kiantete akweyi babakilanga nzimbu mu lungisa e nsatu zau? Ke balombanga lusadisu kwa mpangi zau ko, kadi ezak’e ntangwa basalanga e salu kia ndambu a lumbu. (1 Korinto 9:11-15) Kansi, batambulanga lusadisu bavewanga. Babokelwanga kwa mpangi mu kwenda dila vamosi, bavewanga fulu kia zingila yovo sadiswa mu mpila zakaka. Konso mpangi yovo nkutakani yawonso yazolanga kubasadisa.—Tanga Mavangu 16:14, 15; Filipi 4:15-18.
SELO YA NTANGWA KE NTANGWA O UNU
5. Adieyi yakala dimosi yo nkaz’andi bavova mu kuma kia zingu kiau muna salu kia ntangwa ke ntangwa?
5 O unu mpe, ndonga befuntukanga mu sadila Yave mu mpila zaswaswana muna salu kia ntangwa ke ntangwa. (Tala babu “ Mpila Zaswaswana za Salu kia Ntangwa ke Ntangwa.”) Aweyi bemonanga mu kuma kia mpil’a zingu basola? Okasakeswa avo oyuvwidi e kiuvu kiaki kw’akaka muna mpangi zazi. Mpangi mosi ayakala wasala e salu kia kimviti a nzila a ngonde ke ngonde, kia espesiale, kimisionario yo sadila kuna Betele ya nsi ya kinzenza wavova vo: “O kota muna salu kia ntangwa ke ntangwa i nzengo zisundidi o mfunu yabaka muna zingu kiame. Vava yalungisa mvu 18, diampasi diakala mu baka e nzengo kana vo yakota sikola zampwena, sadila mu kompani yovo sala e salu kia kimviti a nzila. Mana mbwene kala muna zingu kiame mekunsonganga vo Yave kevilakananga ko e ngolo tuvanganga muna kunsadila ntangwa ke ntangwa. Isadilanga e ngangu zina Yave kampana mu mpila ina kiadi lenda zo sadila ko kele vo yasola sala e salu ya nza.” Nkaz’andi wavova vo: “Konso salu ivewanga kikunsadisanga mu nungunuka. Tumonanga una Yave kekututaninanga yo kutufila ntangwa zawonso. Ediadi ke diadi vangama ko kele vo twasola e zingu kiambote twakala kiau kuna nsi eto. Lumbu yawonso ivutulanga matondo kwa Yave mu kuma kia zingu kieto muna salu kia ntangwa ke ntangwa.” Nga i diau mpe ozolele muna zingu kiaku?
“O kota muna salu kia ntangwa ke ntangwa i nzengo zisundidi o mfunu yabaka muna zingu kiame”
6. Aweyi Yave kemonanga mu kuma kia salu tukunsadilanga?
6 Dialudi vo, mpangi zakaka ke balendi kota mu salu kia ntangwa ke ntangwa ko, kansi bevanganga mawonso balenda mu sadila Yave. Tuzeye wo vo Yave oyangalelanga e salu kiau. Muna bong’e nona, muna Filemone 1-3, Paulu watwika mavimpi kwa mpangi zawonso muna nkutakani a Kolosai, akaka muna yau wabayikila muna nkumbu zau. (Tanga.) Paulu wayangalelanga e salu kiau, diau dimosi mpe kavanga o Yave. O unu mpe, Yave oyangalelanga mana ovanganga muna salu kiandi. Ozevo, adieyi olenda vanga muna sadisa selo ya ntangwa ke ntangwa?
UNA TULENDA SADISILA AVITI A NZILA
7, 8. Adieyi divavwanga muna salu kia kimviti a nzila? Aweyi akaka muna nkutakani balenda sadisila aviti a nzila?
7 Nze una ateleki avema bavanganga muna tandu kiantete, o unu aviti a nzila betoma kasakesanga e nkutakani. Ndonga muna yau besalanga tezo kia ola 70 muna salu kia umbangi konso ngonde. Aweyi olenda kubasadisila?
8 Shari wa mpangi ankento una vo mviti a nzila wavova vo: “Aviti a nzila bekumamanga vava bevaikanga muna salu kia umbangi lumbu yawonso. Kana una vo i wau, lukasakeso bavwidi o mfunu.” (Roma 1:11, 12) Mpangi ankaka ankento wasala se mviti a nzila mu mvu miayingi, wavova mu kuma kia aviti a nzila a nkutakani andi vo: “Befuntukanga yo lembi yoya. Vava akaka bevaikanga yau muna salu kia umbangi, kubabokela mu kwenda dia, kubakayila e nzimbu yovo lusadisu lwakaka, beyangalalanga kikilu. Ediadi dikubasonganga vo mfunu kikilu okubavwanga.”
9, 10. Adieyi mpangi zankaka bevanganga mu sadisa aviti a nzila muna nkutakani?
9 E mpila yakaka tulenda sadisila aviti a nzila i salanga yau muna salu kia umbangi. Mpangi zole z’akento bena vo aviti a nzila bavova vo, mpangi zayingi z’akala ye z’akento bavwidi o mfunu muna sala yau muna lumingu ye muna masika. Mpangi mosi ankento osadilanga kuna Betele ya Brooklyn, osungamenanga lusadisu katambulanga vava kasalanga salu kia kimviti a nzila. Wavova vo: “Mpangi mosi ankento wakala ye kalu wampovesa vo, ‘Konso ntangwa kuna ye muntu ko olenda vaika yandi muna salu kia umbangi, umbokela twavaika entwadi.’ Wansadisa kikilu muna salu kiame kia kimviti a nzila.” Mpangi Shari wavova vo: “Kuna mfoko a salu kia umbangi, aviti a nzila bena vo ampumpa, nkumbu miayingi yau mosi kaka bekalanga. Olenda kubabokela muna nsambil’eno ya esi nzo. O kubabokelesa muna salu yakaka dikubasadisa mu kala bakumama.”
10 Mpangi mosi ankento una mu salu kia ntangwa ke ntangwa mu tezo kia mvu 50, wavova mu kuma kia lusadisu katambulanga kumosi ye aviti a nzila akaka ampumpa: “Akuluntu eto ke baviokesanga ngonde zole ko lembi kingula aviti a nzila. Batuyuvulanga mavimpi meto, salu kieto kia kinsuni yo vava zaya mana matutokanesanga. Etima dia sadisa bakala diau. Bakingulanga e nzo zeto mu zaya kana vo lusadisu tuvwidi o mfunu.” Akuluntu awaya ye mpangi zakaka, mbandu a Onesiforo betangininanga. Walunga-lunganga esi nzo andi, kansi wavananga mpe lusadisu kwa Paulu.—2 Timoteo 1:18.
11. Adieyi divavwanga muna salu kia kimviti a nzila a espesiale?
11 E mpila yakaka ya salu kia ntangwa ke ntangwa i salu kia kimviti a nzila a espesiale. Ndonga muna aviti a nzila a espesiale besalanga tezo kia ola 130 muna salu kia umbangi konso ngonde. Besalanga mpe salu yakaka ya nkutakani. Konso ngonde, e vula dikubavananga lusadisu lwakete wau vo ke bena ye ntangwa ko mu sala e salu kia kinsuni. Finzimbu bevewanga fikubasadisanga mu sumba ina bavwidi o mfunu, ediadi dikubavananga ntangwa ya sala kwayingi muna salu kia umbangi.
12. Aweyi akuluntu ye mpangi zakaka balenda sadisila aviti a nzila a espesiale?
12 Adieyi tulenda vanga muna sadisa aviti a nzila a espesiale? Nkuluntu mosi osadilanga kuna vula, omokenanga ye aviti a nzila a espesiale ayingi wavova vo: “Akuluntu bafwete mokenanga yau kimana bazaya mana mekubatokanesanga, i bosi besikidisa una balenda kubasadisila. Mpangi zakaka beyindulanga vo aviti a nzila a espesiale ke bekondwanga má ko wau vo lusadisu betambulanga kuna vula, kansi ampangi muna nkutakani balenda kubasadisa mu mpila zayingi.” Nze aviti a nzila a ngonde ke ngonde, aviti a nzila a espesiale beyangalalanga mpe vava ampangi besalanga yau entwadi muna salu kia umbangi. Nga olenda sala yau entwadi?
UNA TULENDA SADISILA AKENGI A ZUNGA
13, 14. (a) Adieyi tufwete sungamenanga mu kuma kia akengi a zunga y’akazi au? (b) Adieyi olenda vanga mu sadisa akengi a zunga?
13 Akengi a zunga ye akazi au bazikuka muna mwanda, bakumama muna lukwikilu ye bekutukasakesanga. Kansi, ke tufwete vilakana ko vo oyau mpe lukasakeso bevwang’o mfunu. Bezolanga mpe vo mpangi z’akala ye z’akento basalanga yau muna salu kia umbangi. Beyangalalanga vava ampangi bekubabokelanga mu viokesa ntangwa vamosi. Vava akengi a zunga yovo akazi au beyelanga, tulenda kubasadisa muna kubakingula yo lungisa e nsatu zau. Luka “wa ngang’a wuk’anzolwa,” walungisanga e nsatu za Paulu ye akaka ana bakangalanga mu kingula nkutakani zayingi.—Kolosai 4:14; Mavangu 20:5–21:18.
14 Akengi a zunga y’akazi au, zola yo lukasakeso lw’akundi au bevwanga o mfunu. Nkengi a zunga mosi wasoneka vo: “Akundi ame bezayanga e ntangwa ina ivwanga lukasakeso mfunu. Bekungyuvulanga e yuvu kuna umbakuzi wawonso, ediadi dikunsadisanga mu vova mana mekuntokanesanga. Wau vo betoma kungwinikinanga, ediadi dikunsadisanga kikilu.” Akengi a zunga betoma yangalalanga vava mpangi z’akala ye z’akento bekubasonganga o zola yo kituka se akundi au akieleka.
SADISA MPANGI BESADILANGA KUNA BETELE
15, 16. Ekuma e salu besalanga ampangi kuna Betele ye muna Maseka ma Tukutakanu Twampwena kinina kiamfunu? Aweyi tulenda kubasadisila?
15 Awana besadilanga kuna Betele ye muna Maseka ma Tukutakanu Twampwena, salu kiamfunu besalanga muna yikama e salu kia samuna nsangu zambote. Avo muna nkutakani yovo muna zunga kieno vena ye mpangi besadilanga kuna Betele, aweyi olenda kubasadisila?
16 Vava belwakanga kuna Betele, kinsona bemonanga wau basisa yitu ye akundi au. Mpangi zazi beyangalalanga vava mpangi zakaka kuna Betele ye muna nkutakani bevavanga kubazaya yo kituka akundi au. (Maku 10:29, 30) E salu kisalwanga kuna Betele, kivananga e ntangwa kwa esi Betele mu kwenda muna tukutakanu yo vaika muna salu kia umbangi konso lumingu. Kansi, ezak’e ntangwa divavanga mpe vo basala salu yakaka. Diambote vava ampangi muna nkutakani bebakulanga dio yo songa luyangalalu lwau muna salu besalanga mpangi zazi.—Tanga 1 Tesalonika 2:9.
SADISA SELO YA NTANGWA KE NTANGWA MUNA NSI ZA KINZENZA
17, 18. Nkia salu besalanga e selo ya ntangwa ke ntangwa muna nsi za kinzenza?
17 Akaka mun’awana besalanga salu kia ntangwa ke ntangwa betondanga vo benda sadila mu nsi zakaka. Divavanga vo badia madia ke bazeye ko, balongoka ndinga yampa, bakulukilwa e fu ya kisi nsi ye zingu kiampa. Nkia salu besalanga e selo ya ntangwa ke ntangwa muna nsi za kinzenza?
18 Akaka muna yau misionario, besalanga kwayingi muna salu kia umbangi. Ateleki azikuka ye alongi ambote, belonganga kw’akaka muna nkutakani zau mana balongoka. E vula dikubikilanga e misionario fulu kiambote mu zingila yo kubavana finzimbu fikubasadisanga mu sumba ina bavwidi o mfunu. Akaka befilwanga muna nsi zakaka mu kwenda sadila kuna vula yovo mu salu kia tunga mavula, nzo za salu kia nsekola muna zunga ivovwanga ndinga zisekolwanga, Maseka ma Tukutakanu Twampwena yovo Maseka ma Kintinu. E vula yovo ampangi muna nkutakani belungisanga nsatu zau muna kubavana madia ye fulu kiakala. Nze ampangi kuna Betele, mpangi zazi bekuyivananga muna salu kia tunga, bekwendanga muna tukutakanu yo vaika muna salu kia umbangi konso lumingu. Ampangi muna nkutakani mayingi belongokanga kwa mpangi zazi z’akala ye z’akento.
19. Aweyi olenda sadisila selo ya ntangwa ke ntangwa ana bekwiza sadilanga muna nsi eno?
19 Aweyi olenda sadisila selo ya ntangwa ke ntangwa ana bekwiza sadilanga muna nsi aku? Zaya dio vo vava belwakanga diampasi dikalanga mu kulukilwa madia ma nsi aku. Dianu vo, vava okubabokelanga beza dia, olenda kubayuvula avo beyangalela yeleka madia ke bazeye ko yovo vena ye madia ke bezolanga ko. Vava betezanga longoka ndinga ye fu ya nsi aku, ke belongokanga vana vau ko. Muna kuma kiaki, kala yo luzindalalu yo kubasadisa kuna ngemba zawonso. Luzolo lwa longoka bekalanga lwau!
20. Aweyi olenda sadisila selo ya ntangwa ke ntangwa ye mase mau?
20 Ekolo mvu miviokanga, divavanga vo selo ya ntangwa ke ntangwa ana besadilanga muna nsi zakaka babaka e nzengo mu kuma kia mpila balenda sadisila mase mau bena vo se anunu. Avo mase mau Mbangi za Yave, bezolanga vo wan’au bakwamanana muna salu kiau. (3 Yoane 4) Dialudi vo, selo ya ntangwa ke ntangwa bevanganga mawonso balenda mu lunga-lunga mase mau yo kubakingulanga. Kansi, ampangi ana bezingilanga kumosi ye mase ma selo ya ntangwa ke ntangwa, balenda vana mpe lusadisu. Balenda kuyivana mu lunga-lunga mase mama avo lusadisu bavwidi o mfunu. Ke tufwete vilakana ko vo e selo ya ntangwa ke ntangwa salu kiayingi besalanga muna yikama e salu kia samuna nsangu zambote, kina vo i salu kisundidi o mfunu ova nza o unu. (Matai 28:19, 20) Nga olenda yikama selo ya ntangwa ke ntangwa muna sadisanga mase mau?
21. Aweyi selo ya ntangwa ke ntangwa bemonanga mu kuma kia lusadisu ye lukasakeso bevewanga kw’akaka?
21 Ndonga befuntukanga mu sala kadi bazolele vwama. Kansi, awana bena muna salu kia ntangwa ke ntangwa befuntukanga kadi bazolele vana eki kisundidi o wete kwa Yave yo sadisa akaka. Muna kuma kiaki, beyangalelanga konso lusadisu bevewanga kw’akaka. Mpangi mosi ankento osalanga salu kia ntangwa ke ntangwa wayenda sadila kuna nsi yankaka wavova vo: “Kana nkutu vava akaka besonekanga nkanda mu vutula matondo, disonganga vo yindula bekuyindulanga yo yangalela e salu kiaku.”
22. Aweyi obadikilanga e salu kia ntangwa ke ntangwa??
22 Awana bena muna salu kia ntangwa kwa ntangwa, basola mpil’a zingu kivananga kiese kiasikila. Ekiaki i zingu kisundidi o wete o unu. E selo ya ntangwa ke ntangwa balenda longoka e fu ye mambu tuvwidi o mfunu owau ye mana tuvwa o mfunu muna nza yampa. Ke kolo ko, selo yawonso ya Yave besala e salu kitwasa kiese kiasikila lumbu yawonso. Muna kuma kiaki, yambula twakwamanana yindula e ‘salu kia kwikizi’ ye “mfuntu a zola” wa mpangi ana bena muna salu kia ntangwa ke ntangwa.—1 Tesalonika 1:3.
