1. Aweyi o nkand’a Fuka ulenda kutusadisila?

 YAVE ovavanga vo selo yandi yawonso bakala bavauka. Kana una vo o vauka kuyikwanga muna Nkand’a Nzambi wawonso, e fu kiaki kitoma yikwanga muna nkand’a Fuka. O bakula yo yangalela nkanda wau dikutusadisa mu zaya una tulenda kadila twavauka.

2. Nkia mambu tulenda solola muna nkand’a Fuka?

² O nkand’a Fuka wasonekwa kwa Mose, umosi muna “sono yawonso” ina yo ‘mfunu muna longa.’ (2 Timoteo 3:16) E nkumbu a Yave iyikwanga tezo kia nkumbu kumi mu konso kapu kia nkanda wau. O bakula o nkand’a Fuka dikutukumika mu venga vanga konso diambu dilenda twasa luvezo muna nkumbu a Nzambi. (Fuka 22:32) E mvovo “mono i Yave,” mivutukilwanga nkumbu miayingi muna nkanda wau, mifwete kutusungamesanga o mfunu wa lemvokela Nzambi. Mu longi diadi ye dina dilanda, tusolola tusalu twantalu tuna muna nkand’a Fuka, tulenda kutusadisa mu kala twavauka muna nsambil’eto kwa Nzambi.

3, 4. O luveleleso lwa Arone yo wan’andi nki lwasunzulanga? (Tala fwaniswa ova ntandu.)

³ Tanga Fuka 8:5, 6. Yave wasola Arone mu kala se ngang’ambuta, o wan’andi se nganga muna zula kia Isaele. Arone, Yesu kasunzulanga, o wan’andi Akristu akuswa basunzulanga. O sukula Arone aweyi diasonganga? Nga diadi diasonganga vo Yesu veleleswa kavavanga? Ve. Yesu kakala ye sumu ko ye ‘wakondwa twangu.’ (Ayibere 7:26; 9:14) Muna kuma kiaki, vava Arone kasukulwa, Yesu kasunzulanga ona una vo wavelela ye wansongi. Ozevo, o sukula wan’a Arone nki disunzulanga?

⁴ O sukula wan’a Arone disunzulanga o velela kw’awana besolwanga mu kala se nganga kuna zulu. Nga o velela kwaku ngwizani kwina ye luvubu lwau? Ve, kadi luvubu ke lukatulanga masumu ko. Kansi, i sinsu kia kuyiyekola kwa muntu kuna kwa Nzambi. Wau vo akuswa baveleleswa “muna diambu,” bafwete sadilanga malongi ma Kristu muna zingu kiau. (Efeso 5:25-27) Muna mpila yayi, bekala bavauka yo velela. Kansi, adieyi tuvova mu kuma kia “mameme makaka”?—Yoane 10:16.

5. Ekuma tulenda vovela vo Diambu dia Nzambi divelelesanga mpe mameme makaka?

⁵ O wan’a Arone ke basunzulanga “ndonga ayingi” ko ya mameme makaka ma Yesu. (Lusengomono 7:9) Kansi, e Diambu dia Nzambi dikitulanga mpe mameme makaka se mavauka yo velela. Awana bena ye vuvu kia zingila ova ntoto, vava bebundanga e vuvu muna mana Nkand’a Nzambi uvovanga mu kuma kia nkum’a kimenga kia Yesu, dikubafilanga mu sambila Yave “fuku yo mwini.” (Lusengomono 7:13-15) O luveleleso lwa akuswa ye  mameme makaka lwakinu vangama. Muna kuma kiaki, bekalanga nkal’avelela ntangwa zawonso. (1 Petelo 2:12) Yave oyangalalanga vava kemonanga nkangu andi ukalanga wavelela ye mu kintwadi ekolo belemvokelanga yo landa Yesu wa Mvungudi au ye kwikizi kiawonso.

6. Ekuma tufwete kuyifimpilanga?

⁶ O luveleleso lwa nitu lw’anganga muna Isaele, nkia nsasa lwina kwa yeto o unu? Wantu ayingi tulongokanga yau Nkand’a Nzambi bemonanga vo twavelela tukalanga ye tutoma kuyikubikanga, e fulu yeto mpe ya nsambila yavelela ikalanga. Vana ntandu, awana bazolele sambila Yave bafwete kala yo “ntim’avelela.” (Tanga Nkunga 24:3, 4; Yesaya 2:2, 3) Ozevo, muna sadila Yave, tufwete kala twavelela muna ngindu, ntima ye muna nitu. Diambote twayifimpanga. Ezak’e ntangwa dilenda vava vo twavanga nsobani muna mambu mayingi kimana twakala twavauka. (2 Korinto 13:5) Kasikil’owu, o muntu una vo wavubwa otalanga mavangu ma zumba kafwete kiyuvula: ‘Nga yavauka?’ Kafwete vava lusadisu mu yambula vangu diadi diambi.—Yakobo 5:14.

7. Nkia mbandu kasisa o Yesu yafwanana ye ina y’anganga iyikwanga muna Fuka 8:22-24?

⁷ Vava kinganga kiasikidiswa muna Isaele, e menga ma vaka kia meme masiwa vana nsuk’a kutu kwalunene yo muna nlembo anene a koko kwalunene yo muna nlembo anene a kulu kwalunene kwa Arone wa Ngang’ambuta yo wan’andi. (Tanga Fuka 8:22-24.) E mpila ina e menga masadilwa yasonga vo anganga bafwete lungisa mbebe au yo lemvo wawonso. Diau dimosi mpe, nze Ngang’ambuta, Yesu wasisa mbandu ambote kw’akuswa ye mameme makaka. Walemvokelanga luludiku lwa Nzambi, wavanga luzolo lwa Yave ye wakala ye mpil’a zingu kiavauka.—Yoane 4:31-34.

8. Adieyi tufwete vanga yeto awonso?

⁸ Wau vo tu asambidi a Yave, yeto awonso tufwete landa e mbandu a Yesu ona wasonga e kwikizi muna Nzambi. Tufwete lemvokela luludiku lwa Nzambi luna muna Bibila, muna mpila yayi tuvenga ‘kendelek’o mwand’avelel’a Nzambi.’ (Efeso 4:30) Muna kuma kiaki, tufwete kala ye kani dia ‘singika nzila za malu meto.’—Ayibere 12:13.

9. Nkia mambu bavova mpangi tatu besalanga ye mpangi za Buka kia Selo Yambuta? Aweyi e mvovo miau milenda kusadisila mu kala wavauka?

⁹ Yambula twabadika mvovo mia mpangi tatu besalanga ye mpangi za Buka kia Selo Yambuta se mvu miayingi. Wantete wavova vo: “Kanele vo lau diampwena kikilu dia sala yau kumosi, e kolo lumbu iviokanga ibakulanga vo, kana una vo bakuswa muna mwanda, mpangi zazi wantu alembi lunga. Kansi, e kani diame mu mvu miami miawonso i lemvokela  awana bevitanga o ntu.” Wanzole wavova vo: “E sono nze 2 Korinto 10:5 kiyikanga vo ‘twalemvokela Kristu,’ kikunsadisanga mu lemvokela awana bevitanga o ntu yo sala yau entwadi. O lemvo wau wa nsi a ntima.” O mpangi wantatu wavova vo: “O lemvokela e nkubik’a Yave ye awana kesadilanga mu lungisa e kani diandi ova ntoto disongele vo tufwete zola mana Yave kezolanga yo menga mana kemenganga, vava luludiku lwandi ntangwa zawonso yo vanga mana mekunyangidikanga.” Mpangi ndioyo osungamenanga e mbandu a mpangi Nathan Knorr. Mpangi Knorr, ona wakituka mosi muna Buka kia Selo Yambuta, watambulwila diambu dina akaka bakatikisa, diayikwa muna Eyingidilu dia 1925 muna longi diakala yo ntu a diambu vo “Luwutuku lwa Zula” muna Kingelezo. O lemvo wau wasivikisa kikilu mpangi ndioyo. O badika e mvovo mia mpangi tatu zazi, dilenda kusadisa mu lemvokela Nzambi yo kwamanana kala wavauka.

10. O lemvokela nsiku a Nzambi mu kuma kia menga ekuma dinina o mfunu?

¹⁰ Tanga Fuka 17:10, 14. Yave wakanikina Aneyisaele mu lembi dia ‘konso menga.’ Akristu bekanikinwanga mpe vo bayikenga muna menga ma wantu ye ma bulu. (Mavangu 15:28, 29) Diankenda kikilu avo tuvangidi diambu dilenda fila Nzambi mu kutubembola yo kutuvaikisa muna nkutakani andi. Tuzolanga Yave ye tuzolele kunlemvokela. Kana nkutu vo e zingu kieto mu vonza kina, ke tuyambula ko vo awana ke bazeye Yave ko yovo ana ke bekunlemvokelanga ko batufila mu kunkolamena. Tuzeye wo vo akaka balenda kutuveza mu kuma kia lembi tambulwila menga, kansi tusola lemvokela Nzambi. (Yuda 17, 18) Adieyi dikutusadisa mu lembi tambulwila dia yovo siwa menga?—Nsiku 12:23.

11. Ekuma tulenda vovela vo e Lumbu kia Lubakanisu kiamfunu kikilu kiakalanga?

¹¹ Dina ngang’ambuta kavanganga muna Lumbu kia Lubakanisu konso mvu, dikutusadisanga mu bakula una Nzambi kebadikilanga e menga. E menga masadilwanga kaka ye kani diasikila. Masadilwanga mu loloka o masumu kimana Aneyisaele bakala ye ngwizani ambote yo Nzambi. E menga ma ngombe ye ma nkombo mazazilwanga vana ntwal’a fukwa kia nkel’ekangu. (Fuka 16:14, 15, 19) Muna menga mama, Yave walolokanga masumu ma Aneyisaele. Yave wavova mpe vo avo muntu ovondele e bulu kimana kadia, e menga ma bulu mafwete yitilwa yo fukilwa o ntoto, kadi “muna nitu yawonso o menga i moyo.” (Fuka 17:11-14) O nkanikinu wau mfunu kikilu wakala. Vitila mvu miayingi, Nzambi wakanikina Noa ye mbongo andi vo ke badie menga ko. (Etuku 9:3-6) Ediadi nkia nsasa dina kwa Akristu?

12. Aweyi Paulu kasongela e ngwizani ina vana vena menga yo lolokwa masumu?

¹² Paulu wa ntumwa wasasila vo menga mavwidi nkuma wa velelesa vava kasoneka vo: “Mun’owu wa nsiku mpe, yadi wo vova nkutu vo, e lekwa  yawonso muna menga ikianzisilwa, vana vakondelo e mbungukw’a menga ke vena luyambulwilu ko.” (Ayibere 9:22) Kansi, o mfunu wa kimenga kia bulu wa kolo kiandwelo wakala. Paulu wavova vo e yimenga yayi yasungamesanga Aneyisaele vo asumuki bakala, kimenga kisundidi bavwanga o mfunu muna lolokwa emvimba masumu mau. O Nsiku wakala se ‘kini kia mambu mambote mekwiza, ke fwaniswa kibeni kia mambu ko.’ (Ayibere 10:1-4) Ozevo, aweyi masumu madi lolokelwa?

13. Wau vo Yesu wasunzula e ntalu a menga mandi kwa Yave, aweyi disongele kwa ngeye?

¹³ Tanga Efeso 1:7. Yesu wafwa nze kimenga mu kuma kia wantu awonso. Ediadi mfunu kikilu dina kw’awana bekunzolanga yo zola Se diandi. (Ngalatia 2:20) Kansi, dina Yesu kavanga kuna nim’a lufuluku lwandi i diatuvuluza muna sumu, nze una wavangamanga muna Lumbu kia Lubakanisu. Vava Ngang’ambuta kakotanga muna suku dia Mumpungu-vauka, diakala nze yandi wayendanga vana ndose a Nzambi. Muna suku diadi, o nganga wasunzulanga e menga ma bulu kwa Nzambi. (Fuka 16:11-15) Vava kafuluka, Yesu watomboka kuna zulu yo sunzula kwa Nzambi e ntalu a menga mandi. (Ayibere 9:6, 7, 11-14, 24-28) Tuvutulanga matondo wau vo tulenda  lolokwa masumu yo kala ye ntona zavelela avo tusongele lukwikilu muna kimenga kia Yesu.

14, 15. Ekuma dinina o mfunu mu bakula yo lemvokela nsiku a Yave mu kuma kia menga?

¹⁴ Owau nanga otomene bakula ekuma Yave katukanikina twalembi dia konso menga. (Fuka 17:10, 14) Nga obakwidi ekuma e menga menena mavauka kwa Nzambi? E menga i moyo. (Etuku 9:4) Ka lukatikisu ko vo otambulwila vo tufwete badikila e menga nze una Nzambi kebadikilanga mo yo lemvokela nkanikinu wa venga e menga. Mpila mosi kaka tulenda kadila ye ngwizani ambote yo Nzambi i kala yo lukwikilu muna kimenga kia lukûlu kia Yesu yo bakula vo e menga mantalu kikilu kwa Mvangi eto.—Kolosai 1:19, 20.

¹⁵ Konso muntu mu yeto olenda bakama kimbevo kivava vo kabaka nzengo kana vo otambulwila yovo lembi tambulwila siwa menga, ngengele za menga yovo mawuku mesadilanga menga. Muna kuma kiaki, diamfunu wasambanga kwa Yave, vavulula yo baka nzengo zasikila vitila wabwilwa diambu dia kinsalukisa. Ediadi dikusadisa mu kala ye ziku vo kusiwa menga ko. Ke tuzolele kendeleka Yave ko muna tambulwila vanga diambu dina ketumbanga. O unu, madotolo mayingi ye akaka bekutukasakesanga mu vana menga meto mu vuluza mioyo mia wantu. Kansi, wau vo tu nkangu avauka a Nzambi, tuzeye wo vo Yave una yo nswa wa zayisa una ufwete sadilwa e menga. Kuna kwa yandi, ‘konso menga’ mavauka. Muna kuma kiaki, tufwete kala ye kani dia lemvokela nsiku andi mu kuma kia menga. Tulenda kunsonga mpe muna nkal’eto avelela vo tuzitisanga e menga ma kimenga kia Yesu. Muna menga mandi kaka tulolokelwanga masumu yo kala ye vuvu kia vwa moyo a mvu ya mvu.—Yoane 3:16.

16. Ekuma nkangu a Yave ufwete kadila wavauka?

¹⁶ Vava Yave kavevola Aneyisaele muna ubundu kuna Engipito, wabavovesa vo: “Mono i Yave ona wanutombola tuka muna Engipito, yakala Nzambi eno: nwavauka, kadi i mvauki kwame.” (Fuka 11:45) Yave wavavanga vo Aneyisaele bakala bavauka kadi oyandi wavauka. Diau dimosi mpe kevavanga kwa yeto o unu. O nkand’a Fuka utoma songanga diambu diadi.

17. Owau, aweyi obadikidi o nkand’a Fuka?

¹⁷ Ka lukatikisu ko vo obakidi e nluta muna maka mambu tubadikidi muna nkand’a Fuka. Nanga otomene yangalela nkanda wau yo toma bakula e kuma tufwete kadila twavauka. Kansi, nkia mambu diaka tulenda longoka muna nkand’a Fuka? Aweyi o nkanda wau ulenda kutusadisila mu sambila Nzambi mu mpila yavelela? Tubaka mvutu za yuvu yayi muna longi dilanda.