1, 2. (a) Adieyi Yave kevavanga kwa selo yandi? (b) Nkia yuvu tubadika mu longi diadi?

 PETELO wa ntumwa wavumunwinwa mu yika mambu masonama muna nkand’a Fuka yo sasila vo Akristu bafwete kala avauka nze una diavavwanga kwa Aneyisaele. (Tanga 1 Petelo 1:14-16.) O Yave wa “Mvauki,” ovavanga vo akuswa ye “mameme makaka” bavanga mawonso balenda mu kala avauka muna nkal’au yawonso.—Yoane 10:16.

² Mu longi diadi, tubadika nkanikinu mina muna nkand’a Fuka mikutusadisa mu longoka e nsiku mia Nzambi mu kuma kia vauka yo sadila mio muna zingu kieto. Tuvana mpe mvutu za yuvu eyi: Aweyi tufwete badikilanga e fu kia kulula e nsiku mia Yave? O nkand’a Fuka adieyi ukutulonganga mu kuma kia yikama kimfumu kia Yave? Adieyi tulenda longoka muna kimenga bavananga Aneyisaele?

3, 4. (a) Ekuma Akristu bafwete vengela e fu kia kulula nsiku ye nkanikinu mina muna Bibila? (b) Ekuma ke tufwete landilanga kunda ko ngatu lunda makasi?

³ Muna kembelela Yave, tufwete lemvokelanga e nsiku ye nkanikinu miandi, ke tufwete kulula kana umosi ko. O unu, ke tuna ku nsi a Nsiku a Mose ko, kansi, e Nsiku wau  ukutusadisanga mu bakula mana Yave ketondanga ye mana kemenganga. Kasikil’owu, Aneyisaele bavoveswa vo: “Kulandi kunda ko, ngatu lundil’ekasi muna wan’a nkangu aku, kansi ozola nkw’aku konso una okuzolela: i Yave kwame.”—Fuka 19:18.

⁴ Yave kazolele ko twalandanga e kunda ngatu lunda makasi. (Roma 12:19) Avo tukulwidi nsiku ye nkanikinu mia Nzambi, Satana oyangalala ye tuvezesa e nkumbu a Nzambi. Kana nkutu vo muntu utufungisi makasi, ke tufwete yambula ko vo makasi matuyala. O Nkand’a Nzambi ukutuyikilanga vo “yinzu ya tuma” inatinwanga lusalu lwa ntalu. Lusalu lwalu i uselo weto. (2 Korinto 4:1, 7) Ka tuzolele sia makasi ko mena nze lekwa kia mfwasi mu kinzu kilundilwanga lusalu lwa ntalu.

5. Adieyi tulenda longoka muna nona kia Arone ye lufwa lwa wan’andi? (Tala fwaniswa kuna lubantiku lwa longi.)

⁵ O nkand’a Fuka 10: 1-11 ukutuzayisanga diambu dimosi diatwasila esi nzo a Arone mpasi zayingi. Yave watwika tiya tuka kuna zulu mu vonda wan’a Arone, Nadabi yo Abiu. I bosi, Yave wavovesa Arone y’esi nzo andi balembi kendalala. Ediadi diatonta kikilu lukwikilu lwau. Nga osonganga vo wavauka muna lembi kalanga vamosi ye yitu yovo akaka ana bavaikiswa muna nkutakani?—Tanga 1 Korinto 5:11.

6, 7. (a) Vava tubakanga e nzengo za kwenda yovo lembi kwenda ku nkinzi a longo kuna nzo a Nzambi, adieyi tufwete yindula? (Tala mvovo vana yanda.) (b) Aweyi tulenda sasila e kuma ke tukwendela ku nkinzi a longo ko kuna nzo a Nzambi?

⁶ Dilenda kala vo ke vabwidi diambu ko dilenda tonta lukwikilu lweto nze dina diabwila Arone y’esi nzo andi. Kansi, adieyi tuvova avo yitu kieto una vo ke Mbangi a Yave ko utuvene mboka ya kwenda kuna nkinzi a longo kuna nzo a Nzambi? Ke vena nsiku ko muna Bibila uvovanga vo ke tufwete kwenda ko, kansi vena ye nkanikinu milenda kutusadisa mu baka e nzengo. *

⁷ E nzengo zeto za kembelela Yave yo kwamanana kala wavauka zilenda tokanesa e yitu yeto. (1 Petelo 4:3, 4) Ka tuzolele kubakendeleka ko. Muna kuma kiaki, tufwete mokena yau kuna ngemba ye ziku kiawonso. Avo dilendakana, tufwete mokena yau vitila lumbu kia nkinzi. Tulenda kubavutula  matondo muna mboka batuvene. Tulenda kubazayisa vo tuzolele vo bakala ye kiese muna lumbu kiau kiamfunu ye ke tuzolele kubakendeleka ko kumosi ye awana bebokelesa wau vo ke tuvanga ko mana mevangwanga muna nkinzi a longo kuna nzo a Nzambi. Eyayi i mpila tulenda vengela sia lukwikilu lweto mu vonza.

8. O nkand’a Fuka aweyi utoma songelanga kimfumu kia Yave?

⁸ O nkand’a Fuka utoma vovelanga kimfumu kia Yave. Vioka nkumbu 30 tutanganga vo e nsiku mina muna nkand’a Fuka kwa Nzambi miatuka. Mose wazaya diambu diadi ye wavanga mana Yave kankanikina. (Fuka 8:4, 5) Nze Mose, tufwete vanganga mana Yave wa Mfumu eto kazolele vo twavanga. Kana una vo e nkubik’a Yave ikutusadisa, ezak’e ntangwa lukwikilu lweto lutontwanga vava tukalanga va fulu kia yeto kaka nze dina diabwila Yesu muna makanga. (Luka 4:1-13) Avo tubundidi e vuvu muna Nzambi yo yikama kimfumu kiandi, ke vekala muntu ko okutufila mu kulula nkanikinu mia Nzambi. Ke tumona wonga ko.—Ngana 29:25.

9. Ekuma nkangu a Nzambi umengenuanga kwa zula yawonso?

⁹ Tufwete kala ye ziku vo nkangu a Yave mu nza yawonso ubangikwa kadi Yesu wavovesa alongoki andi vo: “Bekunuyekola muna mpasi, yo kunuvonda: nwasaulwa kwa zula yawonso muna nkumbu ame.” (Matai 24:9) Kana una vo tumweswanga e mpasi, tukwamanananga sila umbangi yo kala twavauka muna nkal’eto yawonso. Tu akwa unsongi, twavelela muna nitu ye muna ngindu. Tuzitisanga mpe e nsiku mia nsi. Ozevo, ekuma wantu akaka bekutumengenanga? (Roma 13:1-7) E kuma kadi Yave kaka tulemvokelanga nze mfumu eto. “Yandi kaka” tusambilanga ye ke tuzolele kulula nsiku ye nkanikinu miandi mia nsongi ko.—Matai 4:10.

10. Adieyi diabwila mpangi mosi wayambula lemvokela nsiku mia Yave?

¹⁰ Wau vo ke tu “a nza ko,” ke tukuyisianga mu mambu ma nza yayi ko yovo mu vita ngatu mu mambu ma mbumba. (Tanga Yoane 15:18-21; Yesaya 2:4.) Akristu akaka bakiyekola kwa Nzambi bayambula lemvokela nsiku a Nzambi wa kuyivambula ye nza. Ayingi muna Akristu awaya baviluka o ntima yo vutuka kwa Yave. (Nkunga 51:17) Kansi, akete kaka ke baviluka ntima ko. Kasikil’owu, muna Vit’Anzole ya Nz’Amvimba mpangi zayingi kuna Hungria basiwa mu pelezo kondwa kuma. Mapolisia babaka mpangi 160 za mbanza mosi ana ke balungisa kimbuta kia mvu 45 ko yo kubavovesa vo bakota muna salu kia kisoladi. Ayingi muna yau ke batambulwila ko, kansi vwa muna yau batambulwila yo vwata mvwatu mia kisoladi. Vioka mvu miole, mosi muna mpangi zazi watumwa vo kavonda Mbangi za Yave. Mosi muna Mbangi za Yave mpangi andi. Kansi, e mpangi ana bazengelwa e tumbu kia lufwa ka bavondwa diaka ko.

11, 12. Adieyi tulenda longoka muna kimenga bavananga Aneyisaele kuna nz’ankulu?

¹¹ O Nsiku wasikidisanga e kimenga kina Aneyisaele bafwete vana. (Fuka 9:1-4, 15-21) E kimenga kifwete kala kialunga kadi kimenga kialunga kia Yesu kiasunzulanga. Diavavanga mpe vo Aneyisaele balanda luludiku lwasikidiswa mu kuma kia konso mpil’a kimenga. E sono kia Fuka 12:6 kisonganga dina dialombwanga kwa ngudi owutidi: “E lumbu ya luveleleso luandi ovo ilungidi muna mwan’eyakala yovo mwan’ankento, otwas’ememe dia mvu mosi se lukau luamfutumuki, yo nsweswe eyembe yovo mbwela mun’esumu kuna mwelo a saba kia wananina, kuna kwa nganga.” Kana una vo nkanikinu mia Yave miasikididi miakala, o Nsiku watoma songanga vo yandi nkwa zola ye nkwa ntim’anleka. Kasikil’owu, avo ngudi ke lenda vana kimenga kia meme ko, wayambulwanga vo kavana mbwela zole yovo nsweswe miole mia mayembe. (Fuka 12:8) Kana una vo nsukami, Yave wanzolanga yo kunyangalela nze awana bavananga kimenga kiantalu. Adieyi tulenda longoka mu diambu diadi?

¹² Paulu wa ntumwa wakasakesa Akristu mu tambika o “lutambiku lua lusanisinu” kwa Nzambi. (Ayibere 13:15) Tuvananga lutambiku lua lusanisinu vava tuzayisanga e nkumbu a Yave kw’akaka. Ampangi z’akala ye z’akento ana bafwa matu, ndinga ya sinsu besadilanga mu sanisina Nzambi. Ampangi ana ke belendanga vaika mu nzo ko mu kuma kia mayela, besanisinanga Yave muna sonekanga nkanda, sila umbangi mu telefone ye kw’awana bekubakingulanga. Kana una vo e mpila tukembelelanga Yave yaswaswana mu kuma kia vimpi ye ngangu zeto, edi disundidi o mfunu i vana kina kisundidi o wete.—Roma 12:1; 2 Timoteo 2:15.

13. Ekuma tufwete vaninanga e nsangu za salu kia umbangi?

¹³ Wau vo tuzolanga Yave, ye kiese kiawonso tukumvananga lukau lua lusanisinu. (Matai 22:37, 38) Kansi, adieyi tufwete vanga avo batulombele e nsangu zeto za salu kia umbangi za konso ngonde? Tufwete kalanga ye kiese kia vana e nsangu zazi, kadi muna mpila yayi tusongelanga o vumi weto kwa Nzambi. (2 Petelo 1:7) Kansi, ke vena muntu ko ofwete yindula vo kafwete kaka viokesa ntangwa yayingi muna salu kia umbangi kimana kavana ola zayingi. E kuma kadi, avo nteleki kelendanga sala kwayingi ko muna salu kia umbangi mu kuma kia kinunu yovo mayela, olenda vana kana miniti 15. Wau vo i diau kelendanga o vanga, Yave oyangalala. Yave ozeye wo mpe vo mpangi zeto bekunzolanga ye bazolele kala Mbangi zandi. Nze una asukami kuna Isaele yankulu bavaninanga tukau kwa Nzambi, o unu mpe awana ke belendanga sala kwayingi ko mu kuma kia kinunu yovo mayela balenda vana nsangu za salu kia umbangi zina balendele ye kiese kiawonso. E nsangu tuvananga zisiwanga vamosi ye  nsangu za nza yawonso zina zisadisanga nkubik’a Yave mu toma sikidisa mana mevuwanga o mfunu muna salu kia umbangi. Ekiaki i kuma tuvaninanga e nsangu za salu kia umbangi.

14. Sasila ekuma tufwete fimpilanga e mpil’to ya longokela.

¹⁴ Wau vo longokele mambu mamfunu mena muna nkand’a Fuka, nga otomene bakula ekuma nkanda wau wasilwa muna Diambu dia Nzambi diavumunwinwa? (2 Timoteo 3:16) Nga una ye kani dia kwamanana kala wavauka? Yave ovavanga vo twamvana kina kisundidi o wete. Elo, wafwana kikilu tambula eki kisundidi o wete. Nanga oyangalela toma longoka e Bibila kiawonso. (Tanga Ngana 2:1-5.) Sambanga yo fimpa e mpil’aku ya longokela. Ukiyuvula: Nga ivananga kwa Yave kina kisundidi o wete? Nga iyambulanga vo mana mesongwanga muna televizau, vídeogames yovo nsaka zankaka zankakidila mu lembi nungunuka muna ludi? Avo i wau, diambote watoma yindula mana Paulu kavova muna nkand’a Ayibere.

15, 16. Ekuma Paulu kavovela ye ziku kiawonso vava kasonekena esi Ayibere?

¹⁵ Paulu wasonekena Akristu Ayibere ye ziku kiawonso. (Tanga Ayibere 5:7, 11-14.) Wabavovesa vo: “Nukitukidi se nu fwa-matu.” Ekuma kabavovesela ye ziku kiawonso? Nze Yave, Paulu wabazolanga ye watokananga wau vo mu kimvumina kaka bazingilanga, i sia vo, malongi maleboka ma Bibila. Kana una vo o bakula malongi  maleboka ma Bibila mfunu kwina, tufwete dianga “madia mangolo,” i sia vo, toma bakula malongi masina ma Bibila avo tuzolele nungunuka muna ludi.

¹⁶ Vana fulu kia longa akaka, esi Ayibere muntu bavwanga o mfunu mu kubalonga. Ekuma? Ke bazolanga dia “madia mangolo” ko. Ukiyuvula: Nga ngina yo nyindu asikila mu kuma kia madia mangolo mena muna Bibila? Nga ikalanga yakubama mu dia mo? Yovo kidianga mo ko ngatu samba? Avo i wau, nga e mpil’ame ya longokela ke yambote ko? Ka tufwete silanga kaka wantu umbangi ko, kansi, tufwete mpe kubalonganga yo kubakitula se alongoki.—Matai 28:19, 20.

17, 18. (a) Ekuma tufwete dilanga “madia mangolo” (b) Aweyi tufwete badikilanga o nua malavu ma nkolwa vitila twenda ku lukutakanu?

¹⁷ Yave ke kutukomekenanga ko mu longoka Bibila. Kana nkutu vo ke dikalanga diasazu ko kwa yeto mu longoka Bibila, tufwete kwamanana dia “madia mangolo,” kana nkutu mvu miayingi se tuna mu ludi. Ediadi mfunu dina avo tuzolele kwamanana kala twavauka.

¹⁸ Muna kala twavauka, tufwete toma fimpanga e sono yo vanga mana Nzambi kekutulombanga. Wan’a Arone, Nadabi yo Abiu, bavondwa kadi basunzula “tiya twanzenza,” nanga ekolo bakala ku nkolw’a malavu. (Fuka 10:1, 2) Tala dina Nzambi kavovesa Arone. (Tanga Fuka 10:8-11.) Nga e sono kiaki kisonganga vo ke tufwete nua konso malavu ma nkolwa ko vitila twenda ku lukutakanu lwa Kikristu? Yindula e diambu edi: Oyeto ke tuna ku nsi a Nsiku ko. (Roma 10:4) Muna nsi zankaka, mpangi zeto ekolo bedianga benuanga malavu mankolwa muna tezo vitila benda ku lukutakanu. Mbungwa yá za vinyu zasadilwa mun’elambu dia Nduta. Vava Yesu kasikidisa Nlekelo, alongoki andi banua vinyu ina yasunzulanga menga mandi. (Matai 26:27) Dina Nkand’a Nzambi utumbanga i fu kia nua malavu mayingi ye nkolwa. (1 Korinto 6:10; 1 Timoteo 3:8) Muna kuma kia ntona zau, Akristu ayingi bevenganga nua malavu ma nkolwa vitila basambila Yave. Kansi, e mambu maswaswana muna konso nsi. E diambu disundidi o mfunu kwa Akristu i zaya “nswaswani mun’eki kiavauka y’eki ke kiavauka ko,” kimana bakwamanana kala bavauka yo kembelela Yave.

19. (a) Aweyi tulenda tomesena e nsambil’eto ya esi nzo ye longi dia yeto kibeni? (b) Aweyi olenda songela vo una ye kani dia kwamanana kala wavauka?

¹⁹ Avo tutomene vavulula muna Diambu dia Nzambi, tulenda solola nkanikinu miayingi miambote. Sadilanga e sadilwa ya vavulwila tuna yau mu tomesa e nsambil’eno ya esi nzo ye longi dia ngeye kibeni. Toma zaya Yave ye kani diandi. Umfinama. (Yakobo 4:8) Sambanga kwa Nzambi nze una wavanga ntozi a nkunga ona wayimbila vo: “Untemwen’o meso, yamona Masivi muna nsiku aku.” (Nkunga 119:18) Kukuludi nsiku ye nkanikinu mina muna Bibila ko. Lemvokelanga o nsiku a Yave ona “Wavauka” yo kuyivana kuna vema kwawonso muna ‘salu kia vauka kia nsangu zambote za Nzambi.’ (1 Petelo 1:15; Roma 15:16) Tufwete kwamanana kala twavauka mu lumbu yayi yambi yambaninu. Yambula yeto awonso twakala twavauka muna nkal’eto yawonso yo yikama kimfumu kia Yave.