1, 2. Aweyi Yesu kakumikina alongoki andi muna lumbu kia lufuluku lwandi?

 ALONGOKI wole a Yesu bayendanga kuna vata dimosi diakala tezo kia 11 dia kilometa tuka kuna Yerusaleme. Bakendalala bakala kadi Yesu wafwa ye ke bazaya wo ko vo wafuluka. Vana vau, Yesu wabafinama yo yantika kangala yau. I bosi, “tuka muna Mose ye Ngunza zawonso, oyantikidi kubasasila o mambu ma yandi kibeni muna Sono yawonso.” (Luka 24:13-15, 27) Bafiaulwiswa kikilu, e ntima miau miazinanga kadi ‘wabatendwela’ yovo “toma kubasasila” e Sono.—Luka 24:32.

² Muna fuku wauna kaka, alongoki awaya bavutuka kuna Yerusaleme. Vava bawanana y’antumwa, babasamunwina dina diavangama. Ekolo bamokenanga, Yesu wamoneka kwa yau awonso. Antumwa bamona kikilu o wonga ye bayantika katikisa kana vo ndioyo i Yesu kieleka. Nkand’a Nzambi usonganga una kabakumikina: ‘Ubatendwele e ntima bazay’e nsas’a sono.’—Luka 24:45.

3. Ekuma tulenda kendalela muna salu kieto kwa Yave? Aweyi tulenda kwamanena kala ye kiese?

 ³ Ezak’e ntangwa tulenda kendalala nze una bakendalela alongoki. Kana una vo tukuyivananga muna salu kia Yave, tulenda kendalala avo wantu ke bazolele wá ko e nsangu tusamunanga. (1 Korinto 15:58) Yovo tulenda yindula vo alongoki eto ke benungunukanga ko. Akaka muna yau balenda nkutu bembola Yave. Aweyi tulenda kwamanena kala ye kiese muna salu kia umbangi? E diambu dikutusadisa i toma bakula e nsas’a yingana ya Yesu. Owau tubadika yingana tatu yo zaya dina tulenda longoka.

4. Ayeyi i nsas’a kingana kia Yesu kia nkuni ona waleka?

⁴ Tanga Maku 4:26-29. Ayeyi i nsas’a kingana kia Yesu kia nkuni ona waleka? O nkuni, ateleki a Kintiu kesunzulanga, e mbongo i nsangu zina besamunanga kwa wantu a ntima miambote. O nkuni ovanganga mana wantu awonso bevanganga, i sia vo, ‘leka mu fuku yo sikama mu mwini.’ E ndungunuk’a mbongo tuka muna lumbu ikunwanga yavana ikutikwanga, ntangwa yayingi iviokanga. Muna kolo kiaki, “e mbongo itumbuluka yo kula.” E ndungunuka yayi malembe-malembe ivangamanga. Diau dimosi mpe, o muntu malembe-malembe kenungunukanga muna mwanda yovo finama Yave. Vava kenungunukanga yamu tezo kia baka e nzengo za sadila Nzambi, ‘oyimanga e mbongo’ vava keyekolanga e zingu kiandi kwa Yave yo vubwa.

5. Ekuma Yesu katela kingana kia nkuni ona waleka?

⁵ Ekuma Yesu katela kingana kiaki? Yesu ozolele twabakula vo Yave onungununanga e ludi muna ntima mia awana bena ye tima dia zaya e ludi. (Mavangu 13:48; 1 Korinto 3:7) Oyeto tukunanga e mbongo yo yitila e maza, kansi ke tulendi yo wokesa ko yovo nungununa yo mu kingolo. Nze i muntu oyikwanga muna kingana, ke tuzayanga ko una inungunukinanga. Ekolo tukwamanananga zinga, nanga ke tubakulanga ko una e mbongo a Kintinu inungunukinanga muna ntim’a muntu. Kansi, kuna kulandanga, ilenda yima mbongo. I bosi, o nlongoki ampa osala  yeto entwadi muna salu kia nkutika.—Yoane 4:36-38.

6. Adieyi tufwete tambulwila mu kuma kia ndungunuk’a nlongoki?

⁶ Adieyi tulenda longoka muna kingana kiaki? Diantete, tufwete tambulwila vo ke tulendi zaya mawonso ko muna mpila o nlongoki kenungunukinanga muna ludi. Kana una vo i wau, tuvanganga mawonso tulenda mu sadisa yo yikama o nlongoki, ke tufwete kunkomekena ko vo kavubwa. Kansi kuna lembama kwawonso, tubakulanga vo yandi mosi kaka olenda baka e nzengo kana vo oyekola e zingu kiandi kwa Yave. Yave otondanga kaka kiyekola kweto avo tukunzolanga kikilu.—Nkunga 51:12; 54:6; 110:3.

7, 8. (a) Nkia longi diakaka tulenda longoka muna kingana kia Yesu kia nkuni ona waleka? Yika e nona. (b) Adieyi kitulongele mu kuma kia Yave yo Yesu?

⁷ Diazole, o bakula e nsas’a kingana kiaki dikutusadisa mu lembi kendalala avo kuna lubantiku ke tumwene nluta mia salu kieto kia umbangi ko. Tufwete kala yo luzindalalu. (Yakobo 5:7, 8) Avo tuvangidi mawonso mu sadisa nlongoki, kansi e ludi ke kinungunukini ko muna ntim’andi, ke disongele ko vo ke tu alongi ambote ko. Yave oyambulanga vo e mbongo a ludi yanungunuka kaka muna ntima mia akwa lulembamu ana bena ye luzolo lwa vanga nsobani. (Matai 13:23) Muna kuma kiaki, ke tufwete yindula ko vo lutangu lwa wantu bevubwanga i lusonganga e nluta mia salu kieto kia umbangi. Vana ntandu, Yave ke tezelanga salu kieto kia umbangi ko muna mpila ina o wantu betambulwilanga e nsangu zeto. Kansi, oyangalelanga e ngolo tuvanganga.—Tanga Luka 10:17-20; 1 Korinto 3:8.

⁸ Diatatu, ke ntangwa zawonso ko tulenda mona e nsobani ivangamanga muna ntim’a muntu. Kasikil’owu, yakala dimosi yo nkaz’andi ana balongokanga yo misionario bamvovesa vo bazolele kituka ateleki alembi vubwa. Wabavovesa vo bafwete yambula ntete nua e fomo. Mpangi wasivika kikilu vava bamvovesa vo ke benuanga diaka fomo ko se vioka ngonde zayingi. Babakula vo avo banuini yo kuna kinsweki, Yave okubamona, omenganga akwa kuvunina. Muna kuma kiaki, babaka e nzengo vo avo ke beyambula nua fomo ko, ozevo diambote banuina yo vana meso ma misionario. Kana una vo e misionario ka bakula ko e nsobani yampwena bavanga akazi awaya, o zola kwau muna Yave kwabasadisa mu baka nzengo zambote.

9. Ayeyi i nsas’a kingana kia Yesu ki’ekonde?

⁹ Tanga Matai 13:47-50. Ayeyi i nsas’a kingana kia Yesu ki’ekonde? Yesu wavova vo o samuna e nsangu za  Kintinu dina nze tuba ekonde diampwena muna mbu. Nze una ekonde dibakilanga “mbizi za mpila zawonso,” e salu kieto kia umbangi wantu a mpila zawonso kituntanga. (Yesaya 60:5) O ulolo wa wantu bekwizanga muna tukutakanu twa mvivu ye muna Luyindulu konso mvu, disonganga e ziku kiaki. Akaka muna wantu awaya bena nze mbizi “zambote” ye bekitukanga amosi muna nkutakani ya Akristu. Akaka bena nze mbizi “zambi,” o Yave ke kubatambulwilanga ko.

10. Ekuma Yesu katela kingana ki’ekonde?

¹⁰ Ekuma Yesu katela kingana kiaki? O vambulwa kwa mbizi kuvovelwanga mu kingana kiaki, ke kuyikanga mfundis’a nsuka ko ina ivangama muna kolo kia mpasi zayingi. Kansi, kusonganga diambu divangamanga mu lumbu yayi yambaninu ya tandu kiaki. Yesu wasonga vo ke wantu awonso ko ana bezolanga e nsangu za Kintinu i bezola kituka selo ya Yave. Ayingi bekwizanga muna tukutakanu tweto yovo longoka e Bibila ke bena ye luzolo ko lwa yekola e zingu kiau kwa Yave. (1 Ntinu 18:21) Akaka nkutu beyambulanga lungana muna tukutakanu. Aleke akaka kwa mase m’Akristu basanswa, kansi ke balongoka zola Yave ko. Yesu watoma kiesesa vo konso muntu mu yeto kafwete baka nzengo yandi kibeni. Avo tubakidi nzengo zambote, Yave okutubadikila vo twantalu vana meso mandi.—Kangai 2:7.

11, 12. (a) Aweyi tulenda bakila nluta muna kingana ki’ekonde? (b) Adieyi kitulongele mu kuma kia Yave yo Yesu?

¹¹ Aweyi tulenda bakila e nluta muna kingana ki’ekonde? O bakula mana mevovwanga muna kingana kiaki, dikutusadisa mu lembi kendalala avo nlongoki a Bibila yovo mosi muna wan’eto ka zolele sadila Yave ko. Tufwete vanga mawonso tulenda muna kubalonga. O muntu ke kitukanga nkundi a Yave ko mu kuma kia sia vo olongokanga Bibila yovo mu ludi kasansukila. Avo kena ye luzolo lwa tambulwila wisa kia Yave ko, kalendi kituka mosi muna selo ya Nzambi ko.

¹² Nga diadi disongele vo awana bayambula e ludi ke beyambulwa diaka  ko vo bavutuka muna nkutakani? Nga disongele vo ke vena diaka ye vuvu ko mu kuma ki’awana ke bayekwele ntete zingu kiau ko kwa Yave? Ve. O wantu bena y’elau dia kituka akundi a Yave vitila mpasi zayingi zayantika. Yave okubavovesanga vo: “Nuviluk’oku ngina, ozevo mviluk’oko nwina.” (Malaki 3:7) E diambu diadi ditoma kieseswanga muna kingana kia Yesu kia mwan’a nkolami.—Tanga Luka 15:11-32.

13. Ayeyi i nsas’a kingana kia mwan’a nkolami?

¹³ Ayeyi i nsas’a kingana kia Yesu kia mwan’a nkolami? O se wa nkwa nkenda oyikwanga mu kingana kiaki, Yave wa Se dieto dianzodi kesunzulanga. O mwana ona wavidisa vwa diandi dia ntalu, i wantu ana beyambulanga e nkutakani ya Kikristu. Bekitukanga se akwa nza ya Satana, ina nze “nsi yanda” yavambuka yo Yave. (Efeso 4:18; Kolosai 1:21) I bosi, akaka muna yau bebakulanga vo vilwa bavanga ye bebakanga e nzengo za vutuka kwa Yave. Ediadi ngolo divavanga, kansi wau vo alembami ye bavilukidi kikilu o ntima mu kuma kia mana bavanga, Yave okubalolokanga yo kubatambulwila diaka.—Yesaya 44:22; 1 Petelo 2:25.

14. Ekuma Yesu katela kingana kia mwan’a nkolami?

¹⁴ Ekuma Yesu katela kingana kiaki? Yesu wasonga vo Yave ozolele vo awana bayambula kunsadila bavutuka kwa yandi. O se oyikwanga muna kingana kadimbula vuvu ko vo mwan’andi olenda vutuka. Vava kamona mwan’andi wayizanga kuna “vala” wayenda nswalu mu kunkika. O se wazola vo mwan’andi kazaya vo okuntambula diaka. E kingana kiaki kifwete fila awana bayambula e ludi mu vutuka vana vau kwa Yave. Wau vo ke bena  diaka ye ngwizani ambote ko yo Yave, balenda kendalala, ediadi dilenda kala diampasi mu vutuka. Kansi, avo bavangidi ngolo, nluta bevwa. Vava bevutuka, Yave, Yesu ye mbasi beyangalala.—Luka 15:7.

15, 16. (a) Adieyi tulongokele muna kingana kia Yesu kia mwan’a nkolami? Yik’e nona. (b) Adieyi kitulongele mu kuma kia Yave yo Yesu?

¹⁵ Aweyi tulenda bakila nluta muna kingana kia mwan’a nkolami? Tufwete tanginina mbandu a Yave ya zola. Vava muntu kevutukanga muna nkutakani, ke tufwete ‘wokesa unsongi’ weto ko yo lembi kuntambula. Ediadi dilenda sia e ngwizani eto yo Yave mu vonza. (Kimpovi 7:16) E diambu diankaka tulenda longoka muna kingana kiaki, i badikila ona wayambula kwiza mu nkutakani nze “ememe diavila” edi dilenda vutuka. (Nkunga 119:176) Avo tuwananene yo muntu wayambula kwiza mu nkutakani, nga tuvanga mawonso tulenda muna kunsadisa kavutuka? Nga tuzayisa kw’akuluntu vana vau kimana bansadisa? Avo tubakwidi yo sadila mana mena muna kingana kia Yesu, tuvanga wo.

¹⁶ Awana bevutukanga muna nkutakani, bevutulanga matondo mu kuma kia nkenda za Yave yo zola ye lusadisu lwa nkutakani. Mpangi mosi wavaikiswa mu nkutakani mu mvu 25 wavova vo: “Tuka yavutukila muna nkutakani e kiese kiame kiwokelanga wau yatambula ‘nsungi ya mvutulu a moyo’ yatuka kwa Yave. (Mavangu 3:19) Konso muntu ovananga lusadisu yo kunsonga zola. Owau ngina ye kanda diambote dia mwanda.” Mpangi mosi wa ndumba wavaikiswa mu nkutakani mu mvu ntanu, vava kavutuka wavova vo: “Kina ye mvovo ko mu kunuzayisa una o zola kuna Yesu kayika kulunganenanga omu mono. O kala mosi muna nkubik’a Yave lau diampwena kikilu!”

17, 18. (a) Adieyi tulongokele muna yingana tatu yayi? (b) Adieyi i kani dieto?

¹⁷ Adieyi tulongokele muna yingana tatu yayi? Diantete, ke tulendi zaya mawonso ko muna mpila o nlongoki kenungunukinanga muna ludi. Tuvananga mawonso kwa Yave. Diazole, ke diansongi ko dia yindula vo awonso bekwizanga muna tukutakanu yo longoka yeto e Bibila bekituka selo ya Yave. Diansuka, kana nkutu vo akaka balenda yambula Yave, ke tufwete dimbula vuvu ko vo balenda vutuka. Vava bevutuka, tubatambula muna mpila isonga o zola kwa Yave.

¹⁸ Yambula konso muntu mu yeto kakwamanana vava zayi, umbakuzi ye ngangu. Ekolo otanganga yingana ya Yesu ukiyuvula: ‘Ayeyi i nsas’a kingana kiaki? Ekuma kiasonekenwa mu Bibila? Aweyi ndenda sadila dina kilonganga? Adieyi kindongele mu kuma kia Yave yo Yesu?’ Avo tuvangidi wo, tusonga vo tubakulanga e nsas’a mvovo mia Yesu.