MPANGI Guy Hollis Pierce, mosi muna Buka kia Selo Yambuta kia Mbangi za Yave. Wafokwele e zingu kiandi ova ntoto kina kia 18 kia ngonde a Malusu ya mvu wa 2014 ye kimbuta kia mvu 79. Nze mosi muna mpangi za Kristu zakuswa, wafulwa yo tambula nsendo andi kuna zulu.—Ayibere 2:10-12; 1 Petelo 3:18.

Mpangi Guy Pierce ku Auburn kawutukila, mbanz’a Califórnia, kuna Estados Unidos, kina kia 6 kia Novemba, 1934. Wavubwa muna mvu wa 1955. Wakazala yo mpangi Penny muna mvu wa 1977 yo sansa wana. Wakala mpe nze se kwa wantu ayingi. Muna mvu wa 1982, wayantika salu kia kimviti a nzila kumosi yo mpangi Penny wa nkaz’andi. Tuka muna mvu wa 1986, wayantika sala se nkengi a zunga kuna Estados Unidos, wasala e salu kiaki mu mvu 11.

Muna mvu wa 1997, mpangi Guy yo nkaz’andi Penny Pierce bayantika sadila kuna Betele ya Estados Unidos. Mpangi Pierce wasadila kuna Departamento de Serviço. Muna mvu wa 1998 wasolwa se nsadisi a Buka kitalanga oma ma Asadi muna Buka kia Selo Yambuta. Kina kia 2 kia ngonde ya Okutoba ya mvu wa 1999, muna lukutakanu luvangamanga konso mvu, bavana luzayisu vo mpangi Pierce wasolwa se mosi muna Buka kia Selo Yambuta. Mu mvu miansuka miviokele, wasadila mu buka yaswaswana nze Buka kia Asadi, kia Asoneki, kia Amwangi ye muna Buka kia Afidi.

Mpangi Pierce nkwa ngemba ye kiese kakalanga e ntangwa zawonso. Wantu bena ye fu ya kisi nsi yaswaswana bamfinamanga kondwa lukatikisu. Kansi e diambu diatoma tuntanga e sungididi kia wantu, i zola kwandi, lulembamu, mpila kazitisilanga nsiku ye nkanikinu mia Nzambi ye lukwikilu lwasikila kakala lwau muna Yave. Nkumbu miayingi, mpangi Guy Pierce wavovanga vo e ntangwa ilenda funga yo lembi vaika, kansi e nsilu mia Yave ke milendi funga ko ye wazola vo wantu mu nza yawonso bazaya wo.

Mpangi Pierce wasadila Yave ye fululu kiawonso, nkumbu miayingi wayantikanga sala muna mene yamuna fuku. Wayendanga mu nsi zayingi mu kasakesa mpangi zandi z’akala ye z’akento. Wavaulanga e ntangwa mu sadisa awana bavavanga lusadisu yovo awana balombanga luludiku lwandi. Kana nkutu se mvu miayingi miviokele kala, ampangi besungamenanga e nzol’andi amvevo, ngemba yo lukasakeso kabavananga olu lwatukanga muna Sono.

Mpangi eto anzolwa kesinga vilakanwa ko kwa nkaz’andi, wan’andi sambanu, atekelo andi, wan’atekelo andi ye kwa ulolo wa wan’andi a mwanda. O mpangi Mark Sanderson una vo mosi muna Buka kia Selo Yambuta, wafila longi dia luziku lwa mpangi Pierce kuna Betele ya Brooklyn kina kia Sabala, 22 kia Malusu, 2014. Wavovela oma ma vuvu kakala kiau mpangi Pierce kia vwila moyo kuna zulu ye watanga e mvovo mia Yesu: ‘Kuna nzo Es’ame fulu yayingi ina ko. . . . Ovo ngyele yo kunukubikila fulu, kwiza nkwiza diaka, yanutambula kwa mono kibeni; kuna ngina, oyeno mpe nwakala ko. Kuna nkwenda, nuzeye ko e nzila.’—Yoane 14:2-4.

Tusidi ye viangi kia mpangi Pierce. Kansi tuna ye kiese kia zaya vo ‘wazaya e nzila’ ye ‘fulu kiandi.’