1. Ekuma tuvutulwilanga matondo kwa Yave?

YAVE okutuvananga ‘konso lukau luambote, ye konso lukau luaziku.’ (Yakobo 1:17) Yave i mvungudi eto anzodi ona olungisanga e nsatu zeto zawonso. (Nkunga 23:1-3) Kieleka, tuna ye kuma yayingi ya vutula matondo kwa Yave. Yandi i “tininu dieto yo nkuma,” musungula vava tukalanga mu mpasi. (Nkunga 46:1) Tumonanga nze una wamona o ntozi a nkunga ona wasoneka vo: “Nuvana matondo kwa Yave kadi wambote, kadi o walakazi wandi wakwele mvu.”—Nkunga 106:1.

2, 3. (a) E fu kia lembi vutula matondo nkia vonza kilenda twasa? (b) Nkia yuvu tubadika mu longi diadi?

² Ekuma tufwete vutulwilanga matondo kwa Yave? Nze una wasakulwa, omu lumbu yayi yambaninu wantu ke bena ye fu kia vutula matondo ko. (2 Timoteo 3:2) Ayingi ke beyangalelanga mambu mambote ko mana Yave  kevanganga mu kuma kiau. Mu nza yayi yazala ye fu kia loko, wantu bekasakeswanga mu sumba e lekwa kana nkutu ina ke bavwidi o mfunu ko. Muna kuma kiaki, ayingi ke beyangalelanga ina bena yau ko. Nze Aneyisaele kuna nz’ankulu, tulenda yima e fu kia lembi vutula matondo yo vidisa e kiese kieto muna nsambu tuvwanga. Tulenda mpe vidisa e ngwizani eto yo Yave.—Nkunga 106:7, 11-13.

³ Yindula mpe dina dilenda vangama vava tukalanga mu mpasi. E mpasi zeto zilenda vioka e tezo yo kutufila mu vilakana e nsambu tuvwanga yo sia kaka sungididi muna mpasi. (Nkunga 116:3) Adieyi dilenda kutusadisa mu kwamanana vutula matondo? Aweyi tulenda kadila yo nyindu asikila kana nkutu muna ntangw’a mpasi? Yambula twazaya.

4. Adieyi dilenda kutusadisa mu kwamanana vutula matondo kwa Yave?

⁴ Ngolo divavanga muna kwamanana vutula matondo kwa Yave. Entete, tufwete yindula una Yave kesambulwilanga konso muntu mu yeto. I bosi, tufwete badikanga una e nsambu zazi zisongelanga o zola kwa Nzambi muna yeto. Vava ntozi a nkunga kavanga wo, wasivika kikilu mu kuma kia mawonso Yave kavanga muna wete diandi.—Tanga Nkunga 40:5; 107:43.

5. Adieyi tulenda longoka muna mbandu a Paulu mu kuma kia vutula matondo?

⁵ O badika e nona kia Paulu wa ntumwa dilenda kutusadisa mu zaya e mpila tulenda vutulwila matondo kwa Yave. Tuzeye wo vo Paulu wabadikanga e nsambu katambulanga kadi wavutulanga matondo kwa Nzambi muna sambu. Paulu wazaya wo vo “muntianguna-Nzambi, yo mbangiki, yo ntiakididi” kateka kala. Wavutulanga kikilu matondo, kadi kana una vo mambu mambi kavanga, Nzambi yo Kristu bamfwila e nkenda yo kumvana kiyekwa kia sila umbangi kw’akaka. (Tanga 1 Timoteo 1:12-14.) Paulu wavutulanga mpe matondo kwa mpangi zandi. Nkumbu miayingi katondanga Yave mu kuma  kia fu yau yambote ye kwikizi kia mpangi zandi. (Filipi 1:3-5, 7; 1 Tesalonika 1:2, 3) Paulu wavutulanga matondo kwa Yave muna mawonso mpangi zandi bavanganga mu kuma kiandi vava kakala mu mpasi. (Mavangu 28:15; 2 Korinto 7:5-7) Ekiaki i kuma Paulu kakasakesela Akristu vo: “Nutondanga mpe. . . , yo temoziana muna ngyaku, ye nkunga, ye ngimbila zakimwanda.”—Kolosai 3:15-17.

6. Ekuma ovutulwilanga matondo kwa Yave?

⁶ Aweyi tulenda tanginina mbandu a Paulu? Muna badikanga mana Yave kevanganga kwa konso muntu mu yeto. (Nkunga 116:12) Nkia mvutu ovana avo muntu oyuvwidi vo: “Nkia nsambu za Yave otoma yangalelanga?” Nga oyika e ngwizani ambote una yau yo Yave? Yovo luloloko lwa masumu maku muna kimenga kia Yesu kia lukûlu? Nga oyika mpangi zaku z’Akristu ana basadisa muna ntangw’a mpasi? Nga oyika e kiese omonanga mu kuma kia nkaz’aku yovo wana? Vena ye kuma yayingi ifwete kutufila mu vutula matondo kwa Yave. Muna kuma kiaki, vaulanga e ntangwa ya badika e nsambu otambulanga kwa Nzambi. Ediadi dikufila mu kumvutulanga matondo lumbu yawonso.—Tanga Nkunga 92:1, 2.

7. (a) Ekuma tufwete vutulwilanga matondo kwa Yave muna sambu? (b) Nkia nluta ovwa muna vutulanga matondo kwa Yave muna sambu?

⁷ Avo tubadikidi e nsambu zawonso tuvwanga, tuvutula matondo kwa Yave muna sambu. (Nkunga 95:2; 100:4, 5) Wantu ayingi besambanga kaka kwa Nzambi avo lekwa bazolele lomba. Kansi, Yave oyangalalanga vava tusambanga mu kumvutula matondo mu kuma kia ina tuna yau kala. Selo yayingi ya Nzambi iyikwanga muna Bibila, nze Kana yo Kizekeya, ana bavutula matondo kwa Yave muna sambu. (1 Samuele 2:1-10; Yesaya 38:9-20) Tanginina e mbandu au yo vutulanga matondo kwa Yave mu kuma kia mana kevanganga muna wete diaku. (1 Tesalonika 5:17, 18) Avo ovangidi wo, okala ye kiese, o zola kwau muna Nzambi kuwokela yo kwamanana kala nkundi andi.—Yakobo 4:8.

8. Adieyi dilenda kutufila mu lembi vutulanga matondo?

⁸ Avo ke tuyikebele ko, tulenda yambula yangalela e tukau twambote kekutuvananga o Yave. Ekuma? E kuma kadi tu wantu alembi lunga, twasambukila e fu kia lembi vutulanga matondo kwa mase meto mantete. Yave wasia Adami yo Eva muna Paradiso yo kubavana yawonso bavuanga o mfunu. Bakala ye lau dia zinga yakwele mvu muna luvuvamu.  (Etuku 1:28) Kansi, ke bayangalela ina bavewa ko. Bakituka akwa loko ye bazola tambula lutila ina bavewa. Kuna kwalanda, bavidisa yawonso. (Etuku 3:6, 7, 17-19) Wau vo mu nza tuzingilanga wantu ayingi ke betondanga ko, yeto mpe tulenda yima e fu kiaki. Tulenda vidisa luyangalalu lweto muna yawonso kekutuvananga o Yave, nze kikundi kieto yo yandi yovo e lau dia kala muna kintwadi kia wana-ngudi mu nza yawonso.Tulenda vukumunwa kwa lekwa ya nza yayi. (1 Yoane 2:15-17) Muna venga o ntambu wawu, tufwete badikanga e nsambu tuvwanga yo vutulanga matondo kwa Nzambi mu kuma kia lau tuna diau dia kala nkangu andi.—Tanga Nkunga 27:4.

9. Ekuma tufwete badikilanga e nsambu tuvwanga vava tukalanga mu mpasi?

⁹ O vutulanga matondo dikutusadisa mu zizidila mpasi. Tulenda kendalala yovo yoya mu kuma kia diambu dilenda soba e zingu kieto, nze kondwa kwikizi kwa nkaz’eto, mayela, lufwa lwa nzolw’eto yovo sumbula. O badika e nsambu zina Yave kekutuvananga dikutufiaulwisa yo kutuvana nkuma wa zizidila e mpasi. Tubadika yaka nona.

10. Nkia nluta kevuanga Irina muna badikanga e nsambu ketambulanga?

¹⁰ Irina, mviti a nzila a ngonde ke ngonde kuna Estados Unidos, wakazala yo nkuluntu ona kasikila ye kwikizi ko muna yandi yo kumbembola kumosi yo wan’andi. * Nki kisadisanga Irina mu kwamanana sadila Yave ye kwikizi kiawonso? Wavova vo: “Ivutulanga matondo kwa Yave wau vo okundunga-ndunganga. Wau vo ivutulanga matondo mu kuma kia mawonso mambote itambulanga konso lumbu, imonanga vo o zayakana yo zolwa kwa Se dieto una kuna zulu, lau diampwena kikilu. Nzeye wo vo ke singa kumbembola ko.” Kana una vo Irina mambu mayingi ma mpasi kenuananga mau muna zingu kiandi, o kala ye kiese dikunsadisanga mu zizidila yo kasakesa akaka.

11. Nki kiasadisa mpangi Kyung-sook mu zizidila kimbevo kiandi?

¹¹ Kyung-sook, mpangi ankento ozingilanga kuna Asia, wasala e salu kia kimviti a nzila yo nkaz’andi vioka mvu 20. I bosi, wasoloka ye kimbevo kia câncer, wavoveswa vo ngonde tatu kaka yovo sambanu kasidi zau mu zinga. Kana una vo yandi yo nkaz’andi mpasi zayingi banuana zau, vimpi wambote bakalanga wau. Wavova vo: “E kimbevo kiaki kiantokanesa kikilu, yamona nze mono yavidisa e lekwa yawonso, wonga kikilu yamona.” Nki kisadisanga mpangi Kyung-sook mu zizidila e mpasi zazi? Wavova vo: “Konso  fuku vitila yaleka, ikwendanga va fulu kia mono kaka yo samba mu nding’a ngolo yo yika mambu tanu mangyangidikidi mu lumbu kiokio. I bosi, o ntim’ame uvuvamanga yo kumfila mu songa o zola kwame muna Yave.” Nkia nluta kevwanga o Kyung-sook muna sambanga konso fuku? Wavova vo: “Yabakula vo Yave okutufiaulwisanga muna ntangw’a mpasi, e nsambu tuvwanga ziviokele e mpasi tumonanga muna zingu.”

12. Aweyi mpangi Jason kafiaulwisilwa vava nkaz’andi kafwa?

¹² Jason, osadilanga kuna vula dia nsi mosi ya África, una muna salu kia ntangwa ke ntangwa se vioka mvu 30. Wavova vo: “Mvu nsambwadi miviokele kala tuka nkaz’ame kafwila, nkenda zayingi imonanga. Okuyisia vana fulu kiandi mu kuma kia una kamonanga ekolo kanuananga ye kimbevo kia câncer, dikunkendelekanga kikilu.” Adieyi disadisanga mpangi Jason mu zizidila e mpasi zazi? Wavova vo: “Ezak’e ntangwa isungamenanga ntangwa za kiese yaviokesanga kumosi yo nkaz’ame, ivutulanga matondo kwa Yave muna sambu mu kuma kia ntangwa zazi. O ntim’ame uvuvamanga kikilu yo kumfila mu tondanga Yave mu kuma kia ntangwa za kiese twaviokesa vamosi. O vutula matondo kwasoba kikilu e mpila ya badikila mambu. Yakinu mona e ntantu za fwilwa, kansi ivutulanga matondo kwa Yave wau vo longo lwambote yakala lwau yo vwa e lau dia kunsadila kumosi yo muntu ona wanzolanga. Ediadi dikunsadisanga mu kala ye kiese.”

13. Nki kisadisanga Sheryl mu zizidila lufwa lwa yitu yandi?

¹³ Vava e sumbula kia tembwa kiangolo ye kizalu kiabwa kuna Filipinas mu mvu wa 2013, Sheryl ona wakala ye kimbuta kia mvu 13 muna kolo kiakina, wavidisa yawonso kakala yau. Wavova vo: “Yavidisa e nzo ame ye yitu yame.” Se, ngudi, ye mpangi zandi tatu bafwa muna kizalu. Adieyi disadisanga mpangi Sheryl  mu zizidila e mpasi zazi lembi kendalala kwayingi? Sheryl okwamanananga vutula matondo kwa Yave kadi obadikanga e nsambu zawonso kevwanga. Wavova vo: “Yamona mawonso bavanga ampangi mu vana lusadisu yo kasakesa awana bakala mu mpasi. Yazaya wo vo ampangi mu nza yawonso basambanga mu kuma kiame.” Wakudikila vo: “Ivutulanga kikilu matondo wau vo Yave i Nzambi ame. Okutuvananga ina tuvwidi o mfunu.” Kieleka, vava tuvutulanga matondo mu kuma nsambu tuvwanga, dikutusadisanga mu lembi kendalala kwayingi. Ediadi dikutusadisa mu zizidila konso mpasi zilenda kutubwila.—Efeso 5:20; tanga Filipi 4:6, 7.

14. Nkia vuvu tuna kiau? (Tala fwaniswa kuna lubantiku lwa longi)

¹⁴ Muna lusansu lwawonso, nkangu a Yave uvutulanga matondo mu kuma kia nsambu bevwanga. Vava Aneyisaele bavuluzwa vana moko ma Faro ye makesa mandi muna Mbu Ambwaki, bayimbila nkunga mu kembelela Yave yo kumvutula matondo. (Luvaiku 15:1-21) O unu, dimosi muna mambu mekututwasilanga kiese i zaya vo ke kolo ko e mpasi ke zikala diaka ko. (Nkunga 37:9-11; ­Yesaya 25:8; 33:24) Yindula una tumona vava Yave kefwasa mbeni zandi zawonso yo kutukotesa muna nza yampa ya luvuvamu ye unsongi. Lumbu kiambote kikilu kikala mu tonda Yave.—Lusengomono 20:1-3; 21:3, 4.

15. Adieyi okwamanana vanga mu mvu wau wa 2015?

¹⁵ Omu mvu wau wa 2015, nsambu zayingi tuvingilanga kwa Yave. Dialudi vo tulenda wanana ye mpasi. Kansi, kiakala nkia diambu dibwa tuzeye wo vo Yave ke kutubembola ko. (Nsiku 31:8; Nkunga 9:9, 10) Okwamanana kutuvana yawonso tuvwidi o mfunu kimana twansadila ye kwikizi kiawonso. Yambula twakala ye kani dia tanginina Kabakuke wa ngunza, ona wavova vo: “Kadi kana una vo o nsanda ke usavuka ko, ke mukala bundu ko muna nsing’a vinyo; e mfuntuk’a olive ivunina, ye mpatu zilembi yima dia, o mameme makendokele muna mpaka, ke vekala ngombe ko vana madikilu: Sangwina nsangwina (yovo yangalela) muna Yave, Mona mona Nzambi a luvuluzu ame e kiese.” (Kabakuke 3:17, 18) Mu mvu wau, yambula twakwamanana badika e nsambu zawonso tuvwanga yo landa luludiku luna muna sono kia mvu wa 2015: “Nuvana matondo kwa Yave kadi wambote.”—Nkunga 106:1.