1. O tanginina Yesu ekuma dikutufinamesanga yo Yave?

NKUMBU miayingi, tuvavanga tanginina fu ya wantu ana tutoma yangalelanga. Muna wantu awonso bazinga kala ova ntoto, Yesu Kristu i muntu osundidi tufwete tanginina. Ekuma? Lumbu ,Yesu wavova vo: “Ona wambona, wamona Se.” (Yoane 14:9) Wavova wo kadi watangininanga mu mpila yalunga e kiwuntu kia Se diandi. Muna kuma kiaki, vava tulongokanga kiwuntu kia Yesu, tulongokanga mpe kiwuntu kia Yave. Vava tutangininanga Yesu, tufinamanga Yave, ona osundidi o nene muna nsema wawonso. Ekwe lau diampwena tuna diau!

2, 3. (a) Ekuma Yave katuzayisila oma ma zingu kia Yesu? Adieyi Nzambi eto kevavanga vo twavanga? (b) Adieyi tubadika mu longi diadi ye muna longi dilanda?

² Muna Nkand’a Nzambi, Yave okutuzayisanga oma ma zingu kia Yesu. Ekuma? E kuma kadi o Nzambi eto ozolele vo twazaya Mwan’andi kimana twantanginina una ufwene. (Tanga 1 Petelo 2:21.) Muna Nkand’a Nzambi, e  mbandu ina Yesu katusisila itezaneswanga ye ntambi. Aweyi disongele? Yave ozolele vo twalanda e ntambi za Mwan’andi, i sia vo, twantanginina Yesu muna mawonso kavanga. Kansi, Yesu muntu alunga kakala. Muna kuma kiaki, Yave ke vavanga ko vo twatanginina Mwan’andi mu mpila yalunga. Nzambi ozolele vo twavanga mana tulenda mu tanginina Yesu.

³ Yambula twabadika yaka fu yambote ya Yesu. Mu longi diadi, tubadika lulembamu yo walakazi wandi. Muna longi dilanda, tubadika unkabu ye umbakuzi wandi. Muna konso fu, tubaka mvutu za yuvu tatu: Ayeyi i nsas’a fu kiaki? Aweyi Yesu kasongela fu kiaki? Aweyi tulenda kuntanginina?

4. O kala nlembami aweyi disongele?

⁴ Nki i lulembamu? Wantu ayingi bena ye fu kia lulendo, beyindulanga vo kala nlembami sinsu kia lutovoko yovo lembi kuyibunda e vuvu. Nga dialudi? Ve, kadi muna kala nlembami ngolo ye unkabu divavanga. Lulembamu i kondwa lulendo yovo umvwania. Muna Nkand’a Nzambi, o mvovo “lulembamu” ulenda sekolwa vo “lusakalalu lua ntima.” (Filipi 2:3) Muna kala alembami, entete tufwete kala ye fu kia kuyikulula. Kasikil’owu, disionario dimosi dia Nkand’a Nzambi divovanga vo: “Lulembamu i zaya vo twakete twina vana meso ma Nzambi.” Vana ntandu, avo tusonga lulembamu ke tukuyimwena ko vo tusundidi akaka. (Roma 12:3) Ke diasazu ko kwa wantu alembi lunga mu songa e fu kiaki. Kansi, avo tubadikidi o nene wa Yave yo tanginina e mbandu a Yesu, tulenda longoka songa lulembamu.

5, 6. (a) Nani i Mikaele wa mbasi ambuta? (b) Aweyi Mikaele kasongela lulembamu?

⁵ Aweyi Yesu kasongela lulembamu? O Mwan’a Nzambi osonganga lulembamu ntangwa zawonso, kiakala kuna zulu nze mbasi ankuma ye vava kakala ova ntoto nze muntu alunga. Yambula twabadika yaka nona.

⁶ Mpila kayibadikilanga. O nkand’a Yuda ukutuzayisanga oma ma zingu kia Yesu vitila keza ova ntoto. (Tanga Yuda 9.) Nze Mikaele wa mbasi ambuta, Yesu ‘wazekana yo Nkadi ampemba’ mu kuma kia vimbu dia Mose. Vava Mose kafwa,Yave wanzika vana fulu kina wantu ke balendi sololwela vimbu diandi ko. (Nsiku 34:5, 6) Nanga Nkadi ampemba wazola vukumuna Aneyisaele kimana bayantika sambila vimbu dia Mose. Kiakala nkia diambu Nkadi ampemba kazola vanga, o Mikaele kuna unkabu wawonso wankakidila. Nkanda mosi uvovanga vo e mvovo ‘zekana’ ye ‘fila e mpaka,’ misadilwanga mpe mu yika mfundu vana vena wantu wole ye milenda songa vo “Mikaele watelamena e wisa kia Nkadi ampemba kia baka vimbu dia Mose.” Kansi,  Mikaele wazaya wo vo e wisa kiandi kina ye tezo. Muna kuma kiaki, wayambula e diambu diadi vana moko ma Yave wa Mfundisi Anene ona wina ye wisa kia fundisa Satana. Ekwe lulembamu kasonga o Yesu!

7. Aweyi Yesu kasongela lulembamu muna mvovo ye mavangu mandi?

⁷ Vava Yesu kakala ova ntoto, wasonga mpe lulembamu muna mpov’andi ye mu mana kavanganga. Mvovo miandi. Yesu kazolanga ko vo wantu bansia e sungididi kiasaka. Kansi, wazolanga vo Se diadi katambula nkembo wawonso. (Maku 10:17, 18; Yoane 7:16) Yesu kavoveselanga alongoki andi ko mu mpila ina badi kuyimwena nze mazowa yovo ke bena mfunu ko. Kansi, wabazitisanga yo songa vo wababundanga e vuvu muna kubasanisina mu kuma kia fu yau yambote. (Luka 22:31, 32; Yoane 1:47) Mavangu mandi. Yesu wasola zingu kiavevoka, lembi vava kimvwama. (Matai 8:20) Wazolanga sala e salu yasakalala ina wantu ankaka ke bazolanga sala ko. (Yoane 13:3-15) Wasonga mpe mbandu ambote ya lulembamu muna lemvo wandi. (Tanga Filipi 2:5-8.) Nswaswani ye akwa lulendo ana ke bezolanga lemvokela akaka ko, Yesu kuna lulembamu lwawonso wavanga mawonso Yave kantuma, walemvoka “yamuna lufwa.” Kieleka, Yesu wa Mwan’a muntu, nkwa “ntim’anleka” kakala.—Matai 11:29.

8, 9. Aweyi tulenda songela lulembamu?

⁸ Aweyi tulenda tanginina lulembamu lwa Yesu? Mpila tukuyibadikilanga. Avo tusonga lulembamu, tubakula vo e wisa kieto kina ye tezo. Muna kuma kiaki, tuzeye wo vo ke tuna yo nswa wa fundisa wantu ankaka ko. Ke tufwete kubaveza ko ngatu katikisa makani mau. (Luka 6:37; Yakobo 4:12) O lulembamu lukutusadisa mu venga e fu kia ‘wokesa unsongi wa yeto kibeni.’ Ediadi disongele vo ke tufwete kuyibadikila ko vo tusundidi akaka wau vo ke bena ye ­ngangu yovo malau nze yeto ko. (Kimpovi 7:16) Akuluntu ana bena vo alembami, ke bekuyibadikilanga ko vo basundidi mpangi zau. Kansi, avungudi awaya akwa zola ‘bebadikilanga akaka vo babasundidi.’—Filipi 2:3; Luka 9:48.

⁹ Badika nona kia mpangi W. J. Thorn, ona wasala se nkengi a zunga tuka muna mvu wa 1894. Vioka mvu miayingi, wasolwa mu lunga-lunganga e nsusu muna Mpatu a Kintinu kuna mbanza Nova York. Konso ntangwa kayindulanga vo wafwana sala salu kisundidi o mfunu ke mu kiakina ko, mpangi Thorn wakivovesanga vo: “Ongeye u mbundukutu a ntoto. Nki  una kiau mu kuyitundidika?” (Tanga Yesaya 40:12-15.) Ekwe mpila yambote ya songela lulembamu!

10. Aweyi tulenda songela lulembamu muna mvovo ye mavangu meto?

¹⁰ Mvovo mieto. Avo tusonga lulembamu, disoba e mpila ina tuvoveselanga akaka. (Luka 6:45) Vava tumokenanga yau, ke tufwete kuyitundidika ko mu kuma kia malau meto ngatu mu kuma kia mana tuvanganga. (Ngana 27:2) Kansi, tufwete sanisinanga mpangi zeto mu kuma kia mana mambote bevanganga yo sia e sungididi muna fu yau yambote ye ngangu zau. (Ngana 15:23) Mavangu meto. Akristu ana besonganga lulembamu ke bevavanga tunda ko mu nza yayi. Kansi, besolanga zingu kiavevoka, besalanga kana nkutu salu yasakalala kimana basadila Yave una ufwene. (1 Timoteo 6:6, 8) Edi disundidi o mfunu, tulenda kala alembami muna songanga lemvo. Tufwete kala alembami kimana ‘twalemvokela awana bena ye wisa’ muna nkutakani yo tambulwila yo landa luludiku lwa nkubik’a Yave.—Ayibere 13:17.

11. Nki i walakazi?

¹¹ Nki i walakazi? O mvovo “walakazi” usongele vo kala ye ngemba. O walakazi i sinsu kia zola, kiafwanana ye fu kia nkenda. Nkand’a Nzambi uyikanga e fu nze “walakazi” ye “nkenda.” (Luka 1:78; 2 Korinto 1:3; Filipi 1:8) Nkanda mosi usasilanga oma ma Nkand’a Nzambi uvovanga vo mayingi mevavwanga muna songa walakazi, ke fwila kaka nkenda ko awana bena mu mpasi. Uvovanga vo o songa walakazi disongele vo “kuyisia vana fulu kia wantu ankaka yo vava kubasadisa” muna vanganga diambu dilenda tomesa zingu kiau. O walakazi i fu kifilanga muntu sadisa wantu ankaka.

12. Adieyi disonganga vo Yesu wafwilanga wantu e nkenda? E nkenda adieyi zamfila mu vanga?

¹² Aweyi Yesu kasongela walakazi? Nkenda ye mavangu mandi. Yesu wafwilanga akaka e nkenda. Vava kamona nkundi andi Maria ye akaka badilanga mu kuma kia lufwa lwa Lazaro, Yesu wadila yau entwadi. (Tanga Yoane 11:32-35.) E nkenda zina zamfila mu fula mwan’a nkento ansona zamfila mpe mu fula Lazaro. (Luka 7:11-15; Yoane 11:38-44) E vangu diadi dia nkenda nanga diavana Lazaro e lau dia vwila moyo kuna zulu. Entete, Yesu wafwila ulolo wa wantu ana bayizanga kwa yandi e “nkenda.” E nkenda zamfila mu “kubalonga mambu mayingi.” (Maku 6:34) E mambu mama masoba zingu ki’awana balanda malongi mandi. Yesu mayingi kavanganga ke fwila kaka wantu nkenda ko. E nkenda zamfila mpe mu sadisa awana bamonanga e mpasi.—Matai 15:32-38; 20:29-34; Maku 1:40-42.

13. Aweyi Yesu kavoveselanga akaka kuna ngemba? (Tala fwaniswa kuna lubantiku lwa longi)

¹³ Mvovo miandi mia ngemba. E nkenda za Yesu zamfila mu vovesela akaka kuna ngemba zawonso, musungula awana bamweswanga e mpasi. Matai wa ntumwa wayika ungunza wa Yesaya mu kuma kia Yesu. Yesaya wavova vo: “Etutu diabosoka ketolola dio ko, evusu difita mwisi kezima dio ko.” (Yesaya  42:3; Matai 12:20) Aweyi disongele? Yesu ka vezanga wantu ko ngatu kubamwesa mpasi. Kansi, wamokenanga yau mu kubafiaulwisa. Wasamunanga e nsangu zavananga e vuvu kw’awana “babudikw’e ntima.” (Yesaya 61:1) Wabokelanga wantu ana ‘bafuntukanga yo bimuka yo mazitu’ beza kwa yandi kimana ‘basolola e vundu.’ (Matai 11:28-30) Wasonga kw’alongoki andi vo Nzambi ovwanga konso selo kiandi o mfunu, kumosi ye “andwelo,” ana babadikilwanga kwa wantu a nza vo ke bena mfunu ko.—Matai 18:12-14; Luka 12:6, 7.

14. Aweyi tulenda songela walakazi kw’akaka?

¹⁴ Aweyi tulenda tanginina walakazi wa Yesu? Mvovo mieto mia ngemba. Nkand’a Nzambi ukutuzayisanga vo twasianga ngolo za songa walakazi ye nkenda, kana nkutu vo diampasi dikalanga kwa yeto. E fu yayi imosi muna fu isonganga vo muntu ovwete ‘kiwuntu kiampa’ kina Yave kevavanga kwa Akristu awonso. (Tanga Kolosai 3:9, 10, 12.) Aweyi olenda songela walakazi? Nkand’a Nzambi uvovanga vo: ‘Nusâdila.’ (2 Korinto 6:11-13) Toma winikinanga vava muntu kekuzayisanga una kemonanga ye dina dikuntokanesanga. (Yakobo 1:19) Yindula yo kiyuvula: ‘Kele vo yakala vana fulu kiandi, aweyi yadi mona?’ Nkia diambu yadi vwa o mfunu?—1 Petelo 3:8.

15. Adieyi tulenda vanga mu sadisa awana bakendalala yovo ana bena mu mpasi?

¹⁵ Mavangu meto. O walakazi ukutufilanga mu sadisa akaka, musungula awana bakendalala yovo ana bena mu mpasi. Aweyi tulenda kubasadisila? O nkanda Roma 12:15 uvovanga vo: “Nudidis’awana bedilanga.” Nkumbu miyingi, o wantu lufiaulwisu bevuanga o mfunu, ke kubazayisa ko dina bafwete vanga. Bevavanga akundi ana bekubavuanga o mfunu yo kubawá. Mpangi mosi anketo ona wafiaulwiswa kw’ampangi vava mwan’andi ankento kafwa, wavova vo: “Yayangala kikilu vava akundi ame bayizanga dila yame  entwadi.” Tulenda mpe songa walakazi muna sadisanga akaka. Nanga dilenda kala vo nkento ansona ovavanga lusadisu mu singika lekwa muna nzo andi. Yovo mpangi una vo se nunu ovavanga lusadisu mu kwenda muna tukutakanu, muna salu kia umbangi yovo kwa dotolo. Kana nkutu vangu diakete, dilenda twasa nsobani yampwena muna zingu kia muntu. (1 Yoane 3:17, 18) Edi disundidi o mfunu, tulenda songa ngemba kw’akaka muna vanganga mawonso tulenda muna samun’e nsangu zambote. Eyayi i mpila isundidi tulenda sadisila akwa ntima miambote mu soba zingu kiau.

16. Adieyi tulenda vova mu kasakesa awana bakendalala?

¹⁶ Mvovo mieto mia ngemba. O walakazi ukutufila mu ‘kasakes’akwa ntima mia nkenda.’ (1 Tesalonika 5:14) Adieyi tulenda vova muna kubakasakesa? Tulenda kubazayisa vo mfunu kikilu tukubavuanga. Tulenda kubasanisina yo kubasadisa mu zaya e fu yau yambote ye mana balenda vanga. Tulenda kubasungamesa vo Yave wabasadisa mu zaya e ludi, muna kuma kiaki, mfunu kikilu bena kwa yandi. (Yoane 6:44) Tulenda kubasonga e ziku vo Yave olunga-lunganga selo yandi ana “babudik’e ntima” yovo ana “bakendalala.” (Nkunga 34:18) E mvovo mieto mia ngemba milenda fiaulwisa awana bakendalala.—Ngana 16:24.

17, 18. (a) Aweyi Yave kazolele akuluntu bafwete lunga-lungila mameme mandi? (b) Adieyi tubadika muna longi dilanda?

¹⁷ Akuluntu, Yave ozolele vo nualunga-lunga mameme mandi kuna ngemba zawonso. (Mavangu 20:28, 29) Nufwete sungamenanga vo e mbeb’eno i longa, kasakesa yo fiaulwisa mameme mandi. (Yesaya 32:1, 2; 1 Petelo 5:2-4) Muna kuma kiaki, o nkuluntu una vo nkwa nkenda ke vavanga yala mpangi zandi ko, i sia vo, sikidisa nsiku yovo sadila vilwa wau mu kubakomekena mu vanga lutila dina balenda vanga. Kansi, o nkuluntu ozolanga vo mpangi zandi bakala kikilu ye kiese, okalanga ye vuvu vo o zola kwau muna Yave kukubafila mu vana kwa Nzambi kina kisundidi o wete.—Matai 22:37.

¹⁸ Vava tubadikanga lulembamu yo walakazi wa Yesu, dikutukasakesanga mu kuntanginina. Muna longi dilanda, tuvovela una tulenda tanginina unkabu yo umbakuzi wa Yesu.