MUNA lukutakanu lwa espesiale lwavangama kuna mbanza Nagoya, Japão muna ngonde ya Abidi ya mvu wa 2013, mpangi Anthony Morris, mosi muna Buka kia Selo Yambuta wasunzula nkanda wampa muna ndinga Japão una yo ntu a diambu The Bible​—The Gospel According to Matthew (Bibila​—Nsangu Zasoneka Matai). O lutangu lw’awana bakala muna lukutakanu lwalu kumosi y’awana bawilanga malongi muna internete lwavioka 210.000 ma wantu. Vava bawá luzayisu lwalu, nkangu wasika makonzo mu mitini miayingi.

O nkanda Nsangu Zasoneka Matai mu Traducão do Novo Mundo wabongelwa. Kansi, o nkanda wau wa makaya 128 waswaswana kikilu. Mpangi Morris wavova vo nkanda wau wavaikisu mu sadisa wantu bezingilanga ku Japão. Nkia diambu diaswaswana muna nkanda wau? Ekuma wavaikisilwa? Aweyi wantu bebadikilanga nkanda wau?

Wantu ayingi basivika e mpila wasonekenwa o nkanda Nsangu Zasoneka Matai. E masono ma ndinga Japão malenda sonekenwa tuka va ntandu yaku yand’a lukaya yovo tuka kuna lumonso yakuna lunene. Vana ntandu, muna nkanda miayingi mia ndinga yayi kumosi ye nkanda mieto, e masono mesonekenwanga tuka kuna lumonso yakuna lunene. Kansi, e masono ma nkanda wau wampa va ntandu meyantikilanga, nze una usonekenwanga zulunalu ye nkanda miankaka mia ndinga Japonês. Kuna kwa esi Japão ayingi, e mpila yayi ya sonekena ke ikalanga mpasi ko mu tanga. Vana ntandu, e ntu mia mambu mikalanga vana ntandu a lukaya misilu se ntu mia mambu miakete muna sadisa wantu mu zaya mambu masina mena mu nkanda wau.

Ampangi kuna Japão bayantika tanga o nkanda Nsangu Zasoneka Matai vana vau. Mpangi mosi ankento una ye vioka 80 lwa mvu wavova vo: “Nkumbu miayingi yatanga nkand’a Matai, kansi e mpila basonekene nkanda wau insadisi mu toma bakula e Longi dia Yesu vana Mongo.” Mpangi ankaka ankento wavova vo: “Yatanga nkanda wau wawonso mu lumbu kimosi. Nkanda miankaka yatanga miakala ye masono meyantikilanga kuna lumoso yakuna lunene, kansi ayingi muna esi Japão betoma yangalelanga nkanda mina ye masono meyantikilanga va ntandu.”

Ekuma nkanda wau winina wamfunu muna zunga kia Japão? Wantu ayingi kuna Japão ke bazeye mayingi ko mu kuma kia Bibila, kansi bena ye luzolo lwa tanga kio. Wantu ayingi kuna Japão ke bazeye Bibila ko, owau bena ye lau dia vwa kunku kia nkanda wau yo tanga wo.

Ekuma basolela nkanda Matai? Akaka muna esi Japão vava bewanga o mvovo “Bibila,” Yesu Kristu beyindulanga. O Nkanda Matai wasolwa kadi uvovelanga luvila lwa Yesu Kristu yo luwutuku lwandi, uvovelanga mpe e Longi diandi vana Mongo ye ungunza  wa lumbu yambaninu. Wantu ayingi kuna Japão beyangalelanga zaya mambu mama.

Ateleki avema kuna Japão bayantika kaya nkanda wau wampa mu nzo ye nzo ye vava bevutukilanga kingula wantu. Mpangi mosi ankento wavova vo: “Owau ngina ye lau dia kaya Diambu dia Nzambi kwa wantu ayingi muna zunga kieto. Vava nkanda Nsangu Zasoneka Matai wasunzulwa, yakaya nkanda mosi muna fuku wa lumbu kia lukutakanu.”

Aweyi ateleki besunzulwilanga nkanda wau? Wantu ayingi kuna Japão batomene zaya mvovo miami: “Mwelo wasâdila,” “tuba pele vana vena ngulu” ye “ke nutelamenw’owu wa mbazi mene e mioyo ko.” (Matai 6:34; 7:6, 13) Besivikanga mu zaya vo e mvovo miami mia Yesu Kristu. Vava bemonanga e mvovo miami muna Nsangu Zasoneka Matai, ayingi muna yau bevovanga vo: “Ngina ye luzolo lwa tanga Bibila kana nkutu nkumbu mosi.”

Vava ateleki bevutukanga kingula ana batambula nkanda wau, nkumbu miayingi wantu awaya bevovanga vo batangidi kala ndambu a nkanda wau yovo wawonso. Yakala dimosi una ye kimbuta vioka mvu 60 wavovesa nteleki mosi vo: “Nkumbu miayingi itanganga nkanda wau, ukumfiulwisanga kikilu. Dodokolo diaku, undonga mambu mankaka ma Bibila.”

Ateleki bekayanga mpe nkanda wau vava besilanga umbangi vana fulu kia ndonga. Mpangi mosi ekolo kasilanga umbangi, wavana email andi kwa nkento mosi watambulwila nkanda Nsangu Zasoneka Matai. Vava vavioka ola mosi, nkento ndioyo wasonekena mpangi yo kunzayisa vo otangidi kala ndambu a nkanda wau ye ozolele longoka mambu mankaka. Vioka lumingu lumosi, nkento ndioyo wayantika longoka Bibila yo kwenda muna tukutakanu.

Vioka 1.600.000 ma nkanda wau mitwikwanga muna nkutakani kuna Japão. Konso ngonde Mbangi za Yave bekayanga nkanda miayingi kwa wantu. E mvovo miantete mia nkanda wau misonganga ngindu z’awana bavaikisa wo. Mivovanga vo: “Tuna ye vuvu vo o tanga nkanda wau dikusadisa mu wokesa luzolo lwaku muna ludi kia Nkand’a Nzambi.”