E SALU kia samuna e nsangu zambote i salu kisundidi mfunu kisalwanga o unu va ntoto. Lau diampwena kikilu dia sunzula Yave mu salu kiaki. Kansi, ezak’e ntangwa dilenda kala diampasi kwa aviti a nzila ye ateleki mu tatidila vema kwau muna salu kia umbangi. Ekuma?

Ateleki ankaka bemonanga vo ke bemokenanga yo wantu ayingi ko vava besilanga umbangi mu nzo ye nzo kadi wantu ke bewanukanga mu nzo zau ko. Vava wantu bekalanga ku nzo, ke besonganga luzolo lwa wá nsangu zambote ko yovo kutufwemena. Ateleki ankaka zunga kianene bena kiau, wantu beyangalelanga wá e nsangu zambote. Kansi, beyindulanga vo ke belenda mokena yo wantu awonso ko muna zunga kiau. Ankaka bekendalalanga kadi se mvu miayingi besamunanga nsangu zambote kansi yamu wau e mbaninu ke ikwizanga ko.

Ezak’e ntangwa tulenda bwilwa mpasi zilenda kulula vema kweto mu salu kia umbangi. Mu nza iyalwanga kwa ‘ndiona wambi’ tuzingilanga, i sia vo, Satana wa Nkadi ampemba. Muna kuma kiaki, diampasi mu tatidila vema kweto mu salu kia samuna e nsangu zambote.—1 Yoane 5:19.

Kana nkutu kia mpasi olenda wanana zau muna salu kia umbangi, kala ye ziku vo Yave okusadisa mu sunda zo. Kansi, adieyi olenda vanga muna wokesa vema kwaku muna salu kia umbangi? Yambula twabadika maka mambu tulenda vanga.

Konso mvu, wantu ayingi bevubwanga yo kituka Mbangi za Yave. Avo ke kolo ko wavubilu, olenda longoka mayingi kwa awana besalanga salu kia umbangi se vioka mvu miayingi. Avo se mvu miayingi miviokele kala tuka wavubilwa, nga olenda sadisa ateleki ampa? Avo ovangidi wo, dilenda kutwasila kiese kiayingi.

Yesu wazaya wo vo alongoki andi lusadisu bavuanga o mfunu mu kala alongi ambote. Muna  kuma kiaki, wabasonga una bafwete sila umbangi. (Luka 8:1) O unu, ateleki ampa lusadisu lwa mpila yayi bavuidi o mfunu muna nungunuka.

Ka tufwete yindula ko vo avo nteleki ampa ovaikidi mu salu kia umbangi, ozeye kala longa. Ateleki ampa lusadisu bevuanga o mfunu lw’awana bekubasonganga ngemba yo zola. Ateleki azikuka bafwete longa ateleki ampa una balenda (1) kubikila yo vanga nsongesela za mana bevova kwa muntu (2) mokenena yo wantu, (3) kayila nkanda, (4) vutukila kingula wantu ye (5) yantika longoka Nkand’a Nzambi yo muntu. Ateleki ampa balenda zikuka avo basidi e sungididi yo tanginina ateleki azikuka vava belonganga. (Luka 6:40) O nteleki ampa okalanga ye kiese kia zaya vo una yo muntu olenda kunsadisa. O sanisina yo songa dina nteleki ampa kafwete vanga, dilenda mpe kunsadisa.—Kimpovi 4:9, 10.

Kana una vo tusianga ngolo za mokena yo wantu mu salu kia umbangi, ezak’e ntangwa o muntu tulenda toma mokena yandi i mpangi ona tuvaikidi yandi. Sungamena vo vava Yesu katuma alongoki andi muna salu kia umbangi, “nwole-nwole” kabatuma. (Luka 10:1) Ekolo basalanga, bakasakesanga muntu yo nkwandi. Tuna ye lau dia ‘fiaulwisa’ muntu yo nkwandi vava tusalanga e salu kia umbangi ye mpangi zeto.—Roma 1:12.

Nkia mambu olenda vovela? Nga vena ye diambu dia lukasakeso wawanana diau? Nga vena ye diambu diamfunu walongoka muna longi dia ngeye kibeni yovo muna longi dia esi nzo? Nga vena ye diambu dia lukasakeso wawá muna lukutakanu? Ezak’e ntangwa, olenda vaika mu salu kia umbangi yo nteleki ona kutomene zaya ko. Olenda kunyuvula una kalongokela e ludi. Adieyi diankwikidisa vo eyayi i nkubik’a Yave? Nkia malau ma salu kavewa yovo mambu mambote kawanana mau? Olenda mpe kunzayisa mambu wawanana mau muna salu kia umbangi. Kiakala nkia mpil’a zunga tusadilanga, vava tusalanga yo mpangi muna salu kia umbangi, tukalanga ye lau diambote dia ‘kasakesa muntu yo nkwandi.’—1 Tesalonika 5:11.

Muna tatidila o vema kweto muna salu kia umbangi, tufwete tomesa longi dia yeto kibeni. “Ntaudi akwikizi yo lulungalalu” ovaikisanga malongi ma mpila mu mpila oma tulenda longoka. (Matai 24:45) Yambula twabadika dimosi muna mambu mamfunu tulenda longoka muna longi dia yeto kibeni: Ekuma e salu kia sila umbangi kinina  kiamfunu? E babu “ Ekuma Ofwete Tatidila o Vema Kwaku Muna Salu kia Umbangi?” kisonganga e kuma tufwete wo vangila.

O fimpa mambu mena mu babu kiaki dilenda kusadisa mu tatidila o vema kwaku muna salu kia umbangi. Muna longi dia ngeye kibeni, vavanga sono yankaka ya Nkand’a Nzambi isonganga e kuma ofwete songela o vema muna salu kia umbangi. I bosi, toma badika e kuma yayi. Avo ovangidi wo, o vema kwaku muna salu kia umbangi kuwokela.

E nkubik’a Yave ikutukasakesanga mu sadila ndekwa zampa zilenda kutusadisa mu tomesa e salu kieto kia umbangi. Muna bong’e nona, katula salu kia nzo ye nzo, tulenda mpe sila umbangi muna nkanda, muna telefone, muna nzila, vana fulu kia ndonga, sila umbangi kuna kinsalukisa yovo kuna salu. Tulenda mpe vanga nkubika mu sila umbangi mu zunga ke ina ye ateleki ayingi ko yovo mu zunga ikondelo ateleki.

Nga ovanganga ngolo za sadila ndekwa zampa? Ayingi bavua nluta wau basadila ndekwa zazi. Badika nona tatu ilende.

Mpangi mosi ankento una ye nkumbu April wasadila luludiku luna muna Salu Kieto kia Kintinu lusonganga una tulenda yantikila longoka Nkand’a Nzambi yo wantu. Wavana e lau dia longoka Nkand’a Nzambi kwa wantu tatu kesalanga yau. April wasivika yo mona kiese vava yau atatu batambulwila longoka yo yantika kwenda mu tukutakanu.

Tukasakeswanga mpe mu vava wantu ana balenda yangalela maka malongi mevaikiswanga mu nkanda mieto. Nkengi a zunga mosi kuna Estados  Unidos wabaka nzengo za kaya Despertai diakala ye longi diavovelanga mapine kwa mfumu za nzo zitekanga mapine mu zunga kimosi. Yandi yo nkaz’andi bakaya mpe Despertai yakala yo ntu a diambu vo “Os Desafios de ser Médico” mu vioka 100 za masuku mesadilanga madotolo. Wavova vo e nkingula zazi zisadisanga wantu mu zaya e salu kieto kia sila umbangi ye nkanda mieto. Wau vo batoma zaya wantu muna zunga, o nkengi a zunga yo nkaz’andi bevutukilanga kingula wantu ayingi.

Mpangi mosi ankento oyikilwanga vo Judy wasoneka kuna vula diasina mu vutula matondo mu kuma kia lukasakeso lwavewa lwa sila umbangi muna telefone. Wavova vo ngudi andi ona wakala ye mvu 86, wanuananga ye mpasi zayingi za mayela, nkumbu miayingi wasilanga umbangi muna telefone. Muna kuma kiaki, wayantika longoka Nkand’a Nzambi yo nkento mosi una ye kimbuta kia mvu 92.

O tuludiku tuvewanga muna nkanda mieto nluta miayingi tutwasanga. Avo sadidi tuludiku twatu, tukusadisa mu kala ye kiese yo tatidila o vema kwaku muna salu kia umbangi.

Adieyi ditwasanga nluta muna salu kia umbangi? Ke lutangu lwa nkanda ko tukayanga yovo lwa wantu tulongokanga yau ngatu lw’awana twasadisa mu kituka se Mbangi za Yave. Yindula nona kia Noa. Katula esi nzo andi, akwa diaka kasadisa mu kituka asambidi a Yave? Kana una vo i wau, nteleki ambote kakala. Edi disundidi o mfunu i sadila Yave ye kwikizi kiawonso.—1 Korinto 4:2.

Ateleki ayingi bebakulanga vo kuyisila makani kiese kiayingi dikubatwasilanga muna salu kia umbangi. Nkia makani olenda kuyisila? E babu “ Sikidisa Makani Mana Olenda Lungisa” kivovelanga maka mambu olenda vanga.

Lombanga lusadisu lwa Yave muna vwa nluta muna salu kia umbangi. Avo olungisi makani maku, okala ye kiese kia zaya vo ovangidi mawonso olenda muna salu kia samuna e nsangu zambote.

Kieleka, dilenda kala diampasi mu samuna e nsangu zambote. Kansi, vena ye mambu olenda vanga muna tatidila vema kwaku muna salu kia umbangi, nze kala ye mbokena zambote yo mpangi ovaikidi yandi, kala ye longi dia ngeye kibeni, sadila luludiku luvewanga kwa ntaudi akwikizi yo sikidisa makani mana olenda lungisa. Edi disundidi o mfunu, sungamena vo Yave wa Nzambi wavana e lau dia samuna e nsangu zambote yo kala mosi muna Mbangi zandi. (Yesaya 43:10) Kieleka, okala ye kiese kiayingi avo otatididi vema kwaku muna salu kia umbangi.