1, 2. (a) Nkia kingana o Yesu katela akundi andi? (Tala fwaniswa kiantete) (b) Adieyi tufwete vava zaya mu kuma kia kingana kia mameme ye nkombo?

YESU diambu diamfunu kazayisa kwa akundi andi Petelo, Andere, Yakobo yo Yoane. Vava kabatela kingana kia ntaudi akwikizi yo lulungalalu, kia ndumba kumi ye kia talanta, Yesu watela akundi andi kingana kiankaka. Muna kingana kiaki, Yesu wayika e ntangwa ina “Mwan’a muntu” kesinga fundisa “zula yawonso.” Wavova vo “Mwan’a muntu” ovambula wantu mu buka yole, kia mameme ye kia nkombo. Vana ntandu, wayika diaka buka kiatatu, i sia vo, ‘mpangi’ za Ntinu.—Tanga Matai 25:31-46.

² Nze antumwa, selo ya Yave mu lumbu yeto bevavanga mpe zaya e nsas’a kingana kiaki kadi kivovelanga diambu dia zingu yovo lufwa lwa wantu. Yesu wavova vo akaka  bevua moyo a mvu ya mvu, kansi akaka fwaswa befwaswa. Muna kuma kiaki, diamfunu twazaya e nsas’a kingana kiaki ye dina tufwete vanga mu vwa moyo a mvu ya mvu. Mu longi diadi, tubak’e mvu za yuvu eyi: Aweyi Yave kekutusadisilanga mu bakula kingana kiaki? Aweyi tuzayidi wo vo kingana kiaki salu kia umbangi kivovelanga? Nani ofwete samuna e nsangu zambote? Ekuma wantu bafwete yikamena “Ntinu” ye ‘mpangi zandi’?

3, 4. (a) Adieyi tufwete zaya muna bakula kingana kiaki? (b) Muna mvu wa 1881, adieyi diasasilwa muna Eyingidilu mu kuma kia kingana kiaki?

³ Muna zaya e nsas’a kingana kia mameme ye nkombo, tufwete zaya (1) Nani i “Mwan’a muntu” yovo “Ntinu,” aki nani i mameme ye nkombo ye aki nani i ‘mpangi’ za Ntinu? (2) Nkia ntangwa o Mwan’a muntu kevambula yovo fundisa mameme ye nkombo? (3) Nkuma akaka beyikilwanga vo mameme, akaka nkombo?

⁴ Muna mvu wa 1881, Eyingidilu diavova vo “Mwan’a muntu” yovo “Ntinu” oyikwanga mu kingana i Yesu. Diasasila vo e mpangi za Ntinu ke awana kaka ko besinga yala yo Yesu kuna zulu, kansi ye awana mpe bezingila ova ntoto vava bekituka wantu alunga. Eyingidilu diavova vo wantu besinga vambulwa muna kolo kia Luyalu lwa Kristu lwa Zunda dia Mvu, awana batanginina zola kwa Nzambi muna mawonso bavanganga, beyikilwa vo mameme.

5. Muna mvu wa 1923, aweyi nkangu a Nzambi babakulwila kingana kia mameme ye nkombo?

⁵ Kuna kwalanda, Yave wasadisa nkangu andi mu toma bakula kingana kiaki. Muna mvu wa 1923, Eyingidilu dia 15 dia ngonde ya Okutoba diavova vo Yesu i “Mwan’a muntu.” I bosi, diasadila sono ya Nkand’a Nzambi mu sasila vo e ‘mpangi’ ziyikwanga mu kingana kiaki i awana kaka besinga yala yo Yesu, yau awonso ku zulu bekala muna kolo kia Luyalu lwa Kristu lwa Zunda dia Mvu. Diavova mpe vo mameme i awana bezingila ova ntoto muna luyalu lwa Yesu ye mpangi zandi. Wau vo kingana kiaki kivovanga vo mameme besadisanga mpangi za Ntinu, o vambulwa yovo lufundisu luvangama ekolo mpangi za Yesu zakuswa muna mwanda bakinu ova ntoto, i sia vo, vitila Luyalu lwa Zunda dia Mvu. E longi diadina diavova mpe vo mameme i awana bekwikilanga muna Yesu, bekwikilanga mpe vo Kintinu kisinga twasa zingu kiakiese.

6. Muna mvu wa 1995, aweyi umbakuzi weto mu kuma kia kingana kia nkombo ye mameme wasingikilwa?

⁶ Mu mvu miayingi, twabanzanga vo wantu befundiswanga muna salu kia umbangi tusalanga mu lumbu yayi yambaninu. Avo batambulwidi e nsangu tukubazayisanga, bebadikilwa nze mameme, avo babembwele zo, bebadikilwa nze nkombo. Kansi muna mvu wa 1995, umbakuzi weto mu kuma kia kingana kiaki wasingikwa. Eyingidilu diatezanesa e sono kia Matai 24:29-31 (tanga) ye kia Matai 25:31, 32 (tanga). Eyingidilu diadi diasasila vo Yesu osinga fundisa wantu muna kolo kia mpasi  zayingi, vava Mwan’a muntu “kekwizila muna nkembo andi.” *

7. Ayeyi i nsas’a kingana kia nkombo ye mameme?

⁷ O unu, tutomene zaya e nsas’a kingana kia mameme ye nkombo. Tuzeye wo vo “Mwan’a muntu” yovo “Ntinu” i Yesu. E ‘mpangi’ za Ntinu i awana bakuswa muna mwand’avelela besinga yala yo Yesu kuna zulu. (Roma 8:16, 17) E “mameme” ye “nkombo” i wantu a zula yawonso. Besinga fundiswa kuna mfoko a mpasi zayingi ezi ziyantika ke kolo ko. Tuzeye wo mpe vo Yesu osinga fundisa wantu mun’owu wa mpila bekadilanga ye akuswa ana bakinu ova ntoto. Tuvutulanga kikilu matondo kwa Yave wau kekutusadisanga mu bakula kingana kiaki ye yingana yankaka ina muna Matai kapu kia 24 ye 25.

8, 9. Ekuma Yesu kayikila mameme vo ‘asongi’?

⁸ Yesu kasadila mvovo ‘samuna nsangu zambote’ ko muna kingana kia mameme ye nkombo. Ozevo, aweyi tuzayidi wo vo kingana kiaki kikutulonganga vo e salu kia samuna e nsangu zambote mfunu kikilu kina?

⁹ Muna bak’e mvutu za kiuvu kiaki, entete tufwete sungamena vo Yesu diambu kazola longa muna kingana kiaki. Kavovelanga mameme ye nkombo zakieleka ko. Muna kuma kiaki, kazola vova ko vo konso muntu ona obadikilwa nze meme kafwete vananga madia ye mvuatu kwa akuswa, kubakingula vava beyelanga yovo vava besiwanga mu pelezo. Kansi, Yesu wayikila mameme vo ‘asongi’ wau vo bebadikilanga akuswa vo mpangi zandi yo kubayikama mu lumbu yayi yambaninu yazala ye mpasi.—Matai 10:40-42; 25:40, 46; 2Timoteo 3:1-5.

10. Aweyi mameme balenda sadisila mpangi za Kristu?

¹⁰ Vava Yesu katá kingana kia mameme ye nkombo, mambu mebwa mu lumbu yambaninu kavovelanga. (Matai 24:3) Kasikil’owu, wavova vo: “E nsangu zazi zambote za kintinu zisamunwa muna nza yawonso.” (Matai 24:14) I bosi, vitila katá kingana kia mameme ye nkombo, Yesu watá kingana kia talanta. Yesu watá kingana kiaki mu longa akuswa vo bafwete kuyivananga muna salu kia samuna e nsangu zambote. Kansi, akete kaka muna yau bakinu ova ntoto, e salu bafwete sala kiayingi. Akuswa bevoveswanga vo basamuna e nsangu zambote kwa “zula yawonso” vitila mbaninu iza. Nze una tulongokele kala mu kingana kia mameme ye nkombo, e “mameme” besadisa mpangi za  Yesu. Imosi muna mpila balenda sadisila mpangi za Yesu i muna salu kia samuna e nsangu zambote. Kansi, nga divavanga kaka vo bavananga tukau yovo kubakasakesa mu sala e salu kia umbangi?

11. Nkia kiuvu tulenda kiyuvula? Ekuma?

¹¹ O unu, vena ye milhão nana ma alongoki a Yesu. Ayingi muna yau ke akuswa ko. Yesu kabavana talanta ko. Kwa mpangi zandi akuswa kaka kavana e talanta. (Matai 25:14-18) Tulenda kiyuvula vo: “Wau vo Yesu kabavana talanta ko, nga bafwete kikilu samuna e nsangu zambote?” Elo. Yambula twazaya e kuma.

12. Adieyi tulongokokele muna mvovo mia Yesu miasonama muna Matai 28:19, 20?

¹² Yesu wakanikina alongoki andi awonso vo basamuna e nsangu zambote. Vava Yesu kafuluka, wavovesa alandi andi vo ‘bakitula wantu se alongoki’ yo kubalonga “mambu mawonso” kabakanikina. Muna kuma kiaki, alongoki awaya mpe bafwete lemvokela nkanikinu a Yesu wa samuna e nsangu zambote. (Tanga Matai 28:19, 20.) Tumwene vo yeto awonso tufwete samunanga e nsangu zambote, kiakala vo vuvu kia zingila kuna zulu tuna kiau yovo kia zingila ova ntoto.—Mavangu 10:42.

13. Adieyi tulongokele muna mona-meso kiasongwa Yoane?

¹³ O nkand’a Lusengomono ukutulonganga vo e salu kia samuna e nsangu zambote kisalwa kwa Akristu akuswa ye kw’akaka. Yesu wasonga Yoane wa ntumwa e mona-meso kia “ndumba” obokelanga wantu vo beza nua maza ma moyo. E ndumba isunzulanga 144.000 ma akuswa ana besinga yala yo Yesu kuna zulu. (Lusengomono 14:1, 3; 22:17) E maza mesunzulanga kimenga kia Yesu kia lukûlu eki kisadisa wantu mu vua zingu kiakondwa sumu ye lufwa. (Matai 20:28; Yoane 3:16; 1Yoane 4:9, 10) Kuna vema kwawonso, akuswa belonganga wantu oma ma lukûlu ye dina bafwete vanga mu vua nsambu zitwasa lukûlu. (1Korinto 1:23) Kansi e mona-meso kiaki kiyikanga mpe buka kiakaka kia wantu bena vo ke akuswa ko, bena ye vuvu kia zingila ova ntoto. Oyau mpe bevoveswanga vo babokela wantu vo: ‘Nwiza.’ Belemvokelanga o nkanikinu wau muna samuna e nsangu zambote kw’akaka. Muna kuma kiaki, e mona-meso kiaki kisonganga vo awonso betambulwilanga e nsangu zambote, bafwete mpe zo samuna kw’akaka.

14. Aweyi tulemvokelanga o “nsiku a Kristu”?

¹⁴ Awonso belemvokelanga o “nsiku a Kristu” bafwete samuna e nsangu zambote. (Ngalatia 6:2) Yave ovavanga vo awonso ana bekunsambilanga balemvokela nsiku miau mimosi. Kuna  nz’ankulu, Yave wavavanga vo Aneyisaele ye nzenza zazinganga yau vamosi balemvokela nsiku miandi. (Luvaiku 12:49; Fuka 24:22) Kansi o unu, ke divavanga ko vo twalemvokela nsiku miawonso kavana kwa Aneyisaele. Twakala tu akuswa yovo ve, tufwete lemvokelanga o “nsiku a Kristu.” Dimosi muna mambu mamfunu katulonga o Yesu i zola. (Yoane 13:35; Yakobo 2:8) Tufwete zola Yave, Yesu yo wantu. Imosi muna mpila tulenda songela zola kwaku i samunwinanga o wantu e nsangu zambote za Kintinu.—Yoane 15:10; Mavangu 1:8.

15. Ekuma tulenda vovela vo Yesu kwa alongoki andi awonso kakanikina vo basamuna e nsangu zambote?

¹⁵ Dina Yesu kavovesa kwa akete kaka muna alongoki andi ezak’e ntangwa dilenda vovua mu kuma kia alongoki ayingi. Kasikil’owu, Yesu wakanga e kangu ye alongoki andi 11 kaka yo kubasia nsilu vo beyala muna Kintinu kiandi. Kansi wantu 144.000 besinga yala yandi entwadi. (Luka 22:29, 30; Lusengomono 5:10; 7:4-8) Vava Yesu kafuluka, akete kaka muna alongoki andi bawá nkanikinu wa samuna e nsangu zambote. (Mavangu 10:40-42; 1Korinto 15:6) Kansi, alongoki awonso a Yesu muna tandu kiantete balemvokela nkanikinu wau. (Mavangu 8:4; 1Petelo 1:8) O unu mpe, tuzeye wo vo tufwete samuna e nsangu zambote kana una vo ke tuwanga nding’a Yesu ko ikutuvovesanga vo twasala e salu kiaki.  Elo, tezo kia milhão nana twina tusamunanga e nsangu zambote. Tuzeye wo vo vava tusamunanga e nsangu zambote, tusonganga vo tukwikilanga muna Yesu.—Yakobo 2:18.

16-18. Aweyi tulenda sadisila mpangi za Kristu? Ekuma tufwete wo vangila owau?

¹⁶ Satana okwamanananga nuanisa mpangi zakuswa za Kristu bakinu ova ntoto ye ozeye wo vo “kolo kiandwelo” kaka kasidi kiau. (Lusengomono 12:9, 12, 17) Kansi kana una vo benuaniswanga kwa Satana, Akristu akuswa bakinu vit’o ntu muna salu kia samuna e nsangu zambote. Owau, se wantu ayingi bewanga e nsangu zambote lutila tandu yankaka. Kieleka, Yesu una ye akuswa ye okubafilanga.—Matai 28:20.

¹⁷ Lau diampwena kikilu kwa yeto dia sadisa mpangi za Kristu muna salu kia samuna e nsangu zambote. Tukubasadisanga mpe vava tuvananga tukau yo kuyivana muna salu kia tunga Maseka ma Kintinu, Maseka ma Tukutakanu twampwena ye mavula. Vava tulemvokelanga akuluntu ye mpangi zankaka bevewanga kiyekwa kwa “ntaudi akwikizi yo lulungalalu,” tusonganga vo tuzolanga sadisa mpangi za Kristu.—Matai 24:45-47; Ayibere 13:17.

¹⁸ Ke kolo ko Akristu akuswa ana bakinu ova ntoto besiwa e dimbu kia nsuka. I bosi, ambasi beyambula “tembwa yau ayà ya nza,” vana vau e mpasi zayingi ziyantika. (Lusengomono 7:1-3) Vitila Armangedo yayantika, Yesu onata akuswa kuna zulu. (Matai 13:41-43) Muna kuma kiaki, avo tuzolele badikilwa nze mameme vava Yesu kekwiza, eyayi i ntangwa tufwete song’e kwikizi kwa mpangi zakuswa za Kristu.