Selo yankaka ya Nzambi bena vo ampumpa bevovanga e mvovo nze miami. Bazeye wo vo Yave ozolele vo selo yandi basompela ‘kaka muna Mfumu,’ i sia vo, kazala kaka yo Nkristu akieleka. (1 Korinto 7:39) Kansi, ekuma Akristu ankaka bevovelanga mambu mama?

Akristu ana bevovanga mambu mama balenda yindula vo o lutangu lwa mpangi z’akento bena vo ampumpa lusundidi luna lwa mpangi z’akala zampumpa. Ediadi dialudi muna nsi zayingi. Kasikil’owu, kuna Coréia, vana vena mpangi 100 bena vo ampumpa, 57 akento ye 43 kaka dia akala. Kuna Colômbia, vana vena mpangi 100 bena vo ampumpa, 66 akento ye 34 kaka dia akala.

Mu fulu yankaka, mase ana bena vo ke Mbangi za Yave ko, avo wan’au bazolele kazala, nzimbu zayingi belombanga za longo yovo lekwa ifwanga ntalu yayingi. Dilenda kala diampasi kwa mpangi zankaka z’akala mu vana e lekwa yayi. Muna kuma kiaki, mpangi zayingi z’akento betokananga kana vo besinga solola yakala una vo Nkristu. *

Avo wabakama kala kwa ngindu zazi, kala ye ziku vo Yave obakulanga e mpasi zaku ye ozeye una omonanga.—2 Tusansu 6:29, 30.

Kana una vo i wau, muna Bibila Yave okutukanikinanga vo twakazala kaka muna Mfumu. Ekuma? Kadi yandi ozeye edi diambote muna yeto, ozolele kututanina. Yave kazolele ko vo twabaka nzengo zambi zikututwasila mpasi ye ntantu. Muna lumbu ya  Nekemiya, Ayunda ayingi bakazalanga ye akento ana ke basambilanga Nzambi ko. Muna kuma kiaki, Nekemiya wayika e mbandu ambi ya Solomo, ona ‘wazolwa kwa Nzambi andi, o Nzambi wantumbika e kintinu kia Isaele awonso. Kansi, wasumukiswa nkutu kwa akento anzenza.’ (Nekemiya 13:23-26) Yave ozeye wo vo e nkanikinu miandi miambote kwa yeto. Ekiaki i kuma kekanikinanga Akristu vo basompela kaka muna Mfumu. (Nkunga 19:7-10; Yesaya 48:17, 18) Tuvutulanga kikilu matondo wau kekutuvananga longi diazola ye diafwana bundw’e vuvu. Vava tulemvokelanga Yave nze Nyadi eto, tutambulwilanga vo yandi una ye wisa kia kutuzayisa dina tufwete vanga.—Ngana 1:5.

Dialudi vo kuzolele ‘kala ntwadi ko’ yovo kazala yo muntu ona ke zolanga Yave ko. O muntu ndioyo olenda kuvukumuna wayambula sadila Nzambi. (2 Korinto 6:14) Luludiku lwa Yave lwambote kaka lukalanga, Akristu ayingi o unu besolanga lemvokela Yave. Kansi, akaka nzengo zaswaswana bebakanga.

Mpangi mosi ankento una ye nkumbu Maggy, ozingilanga kuna Austrália, wabanda kimakangu yo muntu una vo ke Nkristu akieleka ko. * Wavova vo: “Nkumbu miayingi yakondwanga mu tukutakanu kimana twakala kaka vamosi. E ngwizani ame yo Yave yakuluka kikilu.” Mpangi ankaka ankento una ye nkumbu Ratana, ozingilanga kuna Índia, wabanda kimakangu yo nkundi a sikola ona wayantika longoka Nkand’a Nzambi. Kansi, walongokanga kaka o Nkand’a Nzambi kimana kabanda yandi e kimakangu. Kuna kwalanda, mpangi ankento ndioyo wayambula sadila Yave yo yantika sambila mu dibundu diankaka kimana e toko diadina kakazala yandi.

Ndenguè, ozingilanga kuna Camarões, kimbuta kia mvu 19 kakala vava kakazala yo yakala ke diasambilanga Yave ko. Vitila lukazalu lwau, e toko diadi wansia nsilu vo olenda kwandi kwamanana kala Mbangi a Yave. Kansi vioka tumingu tole vava bakazala, wamvovesa vo kafwete yambula kwenda muna tukutakanu. Mpangi ankento wavova vo: “Kinsona kikilu yamona yo dila. Kiazayanga diaka ko dina mfwete vanga muna zingu. Nkumbu miayingi yakibanzanga.”

Dialudi vo vena ye Akristu ana basompana yo muntu ona ke sadilanga Yave ko, una vo muntu ambote ye nkwa ngemba. Kansi, kiakala vo nkaz’aku ona kesadilanga Yave ko fu yambote kena yau, aweyi wina e ngwizani aku yo Yave? Aweyi omonanga mu zaya vo kwalemvokela ko e longi kavana kimana wakala ye kiese? Edi disundidi o mfunu, aweyi Yave kemonanga mu kuma kia dina wavanga?—Ngana 1:33.

Mpangi z’akala ye z’akento mu nza yawonso ana belemvokelanga nkanikinu a Yave wa sompela ‘kaka muna Mfumu,’ bena ye ziku vo ezazi i nzengo zambote babaka. Mpangi zayingi bakinu ampumpa bena ye kani dia yangidika Yave yo sompana kaka yo muntu ona osambilanga Yave. Michiko ozingilanga kuna Japão wakala ye kani dia lemvokela Nzambi kana una vo e yitu yandi bavavanga kunkomekena kakazala yo muntu ona kazolanga Yave ko. Diampasi diakala kwa yandi wau kamonanga akundi andi bakazalanga ye Akristu akieleka ekolo yandi kakwamanananga mpumpa. Wavova vo: “Yakivovesanga vo wau vo Yave ‘Nzambi a kiese,’ tulenda kala ye kiese kiakala vo twakazala yovo ve. Ikwikilanga mpe vo Yave olungisanga e nsatu zeto. Muna kuma kiaki, avo luzolo lwa kazala tuna lwau, kansi ke twasolwele ntete ko ona tulenda kazala yandi, diambote twakwamanana vingila.” (1 Timoteo 1:11) Kuna kwalanda, Michiko wakazala yo mpangi una ye fu yambote. Kiese kikilu kemonanga wau kawila longi dia Yave.

Vena mpe ye mpangi zankaka bevingilanga yavana besolola muntu ona balenda kazala yandi. Kasikil’owu, Bill ozingilanga kuna Austrália, wavova vo ezak’e ntangwa wakalanga ye tima dia banda kimakangu ye akento ana ke basambilanga Yave ko. Kansi, wavenga vanga yau kikundi kiasaka, kadi kazola ‘kala ntwadi’ ye mundembi-kwikila ko. Muna kolo kiakina, wazola mpe mpangi zayingi z’akento muna nkutakani, kansi ke batambulwila sompana yandi ko. Bill wavingila mvu 30 yavana kasolola nkento una vo Nkristu wakala ye makani  nze mandi. Wavova vo: “Kikuyibanzanga ko. Imonanga vo nsambu zayingi ivuanga kadi ntwadi tukwendanga mu salu kia umbangi, tulongokanga yo sambila Yave. Ngina ye kiese kia zayana yo kala vamosi ye akundi a nkaz’ame, kadi yau awonso asambidi a Yave. Tusadilanga nkanikinu mia Nkand’a Nzambi muna kumika longo lweto.”

Adieyi olenda vanga ekolo obundang’e vuvu muna luludiku lwa Yave yo vingila yavana osolola yakala yovo nkento ona okunsadilanga? Diambote wayindulanga ekuma kwasompele ko yamu wau. Avo i mu kuma kia lemvokela nkanikinu a Yave, kala ye ziku vo ediadi Yave diyangidikanga. (1 Samuele 15:22; Ngana 27:11) Vana ntandu, kwamanana samba kwa Yave yo kunzayisa una omonanga. (Nkunga 62:8) Ekolo ovanganga mawonso olenda mu zizidila e ntonta yo nuanisa e zolela yambi, e ngwizani aku yo Yave ikumamanga lumbu ke lumbu. Kala ye ziku vo Yave ozeye e nsatu zaku, kadi ongeye mfunu wina kwa yandi. Yave kesianga nsilu ko wa vana yakala yovo nkento kwa muntu. Kansi, avo nsatu za sompa kikilu una zau, Yave ozeye una kalenda lungisila nsatu zaku.—Nkunga 145:16; Matai 6:32.

Ezak’e ntangwa olenda mona nze una wamona Davidi ona wavova vo: “Zabuka wamputula, e Yave; o mwand’ame uladidi: Kunsweki ndose aku ko.” (Nkunga 143:5-7, 10) Kudimbula vuvu ko. Vana e ntangwa kwa Yave kimana kasonga dina kazolele vo wavanga. Wilanga Yave muna tanganga Nkand’a Nzambi yo badika mana otanganga. Ediadi dikusadisa mu zaya dina Yave kevavanga kwa ngeye ye una kasadisila selo yandi kuna nz’ankulu. Avo owila Yave, okala ye ziku vo okwamanana kunlemvokela.

Adieyi diaka olenda vanga mu kwamanana kala ye kiese yo kuyivana mu salu yankaka ekolo wakinu mpumpa? Olenda sia ngolo za kumika e ngwizani aku yo Yave yo yima fu yambote. Olenda mpe longoka kala nkwa ntim’amvevo, nsadi ambote, muntu oyangalelwanga kw’akaka yo songa kwikizi muna Yave. E fu yayi mfunu ina muna kala ye longo lwakiese. (Etuku 24:16-21; Rutu 1:16, 17; 2:6, 7, 11; Ngana 31:10-27) Vavanga ntete Kintinu muna kuyivananga muna salu kia umbangi ye muna salu ya nkutakani eno. E mambu mama mekusadisa mu lembi baka e nzengo za uzowa. Bill wavova mu kuma kia mvu mina kakala mpumpa vo: “Mu nzaki kikilu miavioka! Yasadilanga e ntangwa yayina muna salu kia Yave nze mviti a nzila.”

O nkanikinu wa Yave wa sompela ‘kaka muna Mfumu’ ke walutila ntangwa ko. Avo tubakidi nzengo za kazala kaka yo Nkristu akieleka, tuzitisa Yave yo kala ye kiese. Nkand’a Nzambi uvovanga vo: “Nkwa nsambu o muntu ovuminanga Yave, yo toma yangalela muna nkanikinu miandi. Muna nzo andi mwina vwa yo lusalu: O unsongi wandi uzingang’aka.” (Nkunga 112:1, 3) Muna kuma kiaki, kala ye kani dia lemvokela nkanikinu a Nzambi wa sompela ‘kaka muna Mfumu.’”