1-3. Ekuma Paulu kakadila ye ziku vo olenda bunda Yave vuvu? (Tala fwaniswa ova ntandu.)

AKRISTU ana bazingilanga muna Roma muna tandu kiantete, mu kolo kiampasi bazingilanga. Yindula vo u mosi muna yau. Akristu babangikwanga kwa esi Roma. Babadikilwanga kwa esi Roma vo yau batwasa mvuanga muna mbanza yo kubavunina mambu vo wantu bamenganga. Ayingi muna mpangi zaku Akristu basiwanga mu pelezo. Akaka batubwanga kwa bulu yansisi kimana badiwa. Ankaka bakomwanga vana nti, i bosi bayokwanga kimoyo mu vana ntemo muna fuku. Konso lumbu, wazayanga wo vo mambu mama malenda mpe kulwakila.

² Muna kolo kiakina kiampasi, Paulu wa ntumwa wasiwa muna pelezo. Nanga wakiyuvulanga kana vo mpangi zandi Akristu balenda kunsadisa kadi wayindula ekolo kateka kala mu mpasi kansi ke muntu ko wansadisa. Kansi, Paulu watambula lusadisu kwa Yave muna Mfumu Yesu. Wasoneka vo: “O Mfumu untelamène, unkumikini mpe.” Yesu wavana Paulu o nkuma kavuanga o mfunu. Paulu  wasoneka nkutu vo ‘wakutiswa mpe muna nu’a nkosi.’—2 Timoteo 4:16, 17. *

³ Paulu wasungamena una Yave kateka kunsadisila. Muna kuma kiaki, wakala ye ziku vo Yave okumvana o nkuma kavuidi o mfunu mu zizidila e mpasi kanuananga zau ye konso mpasi zadi kumbwila kuna sentu. Wakala kikilu ye ziku kia diambu diadi, i dianu kasonekena vo: “O Mfumu okunkutisa mpe muna mavangu mawonso mambi.” (2 Timoteo 4:18) Paulu wazaya wo vo kana nkutu mu mambu mana mpangi zandi ke balendi kunsadisa ko, olenda bund’e vuvu muna lusadisu lwa Yave yo Yesu. Kakala ye lukatikisu ko.

4, 5. (a) Nani olenda kuvana lusadisu ovuidi o mfunu ntangwa zawonso? (b) Aweyi olenda kumikina e ngwizani aku yo Yave?

⁴ Nga wabwilwa kala diambu diampasi, lembi kala yo muntu olenda kusadisa? Nanga wakatulwa mu salu yovo bangikwa kuna sikola. Dilenda kala vo wabakama kimbevo kiangolo yovo bwila mpasi zankaka. Nanga walomba lusadisu kwa wantu ankaka, kansi wakendalala kikilu kadi ke bavana lusadisu ko luna wavuanga o mfunu. Dialudi vo, ezaka mpasi zikutubwilanga, o wantu ke balendi zo fokola ko. Adieyi ofwete vanga? O Nkand’a Nzambi ukutuzayisanga vo ‘twabunda Yave e vuvu.’ (Ngana 3:5, 6) Kansi, nga olenda kala kikilu ye ziku vo yandi okusadisa? Elo. Tulenda tanga nona yayingi muna Nkand’a Nzambi ikutukwikidisanga vo Yave osadisanga kikilu nkangu andi.

⁵ Kukendalala ko avo wantu ke bavene lusadisu ko luna ovuidi o mfunu. Kansi, nze Paulu, badikila e mpasi nze lau muna bunda kikilu e vuvu muna Yave. Zikuvananga mpe lau mu mona una kekulunga-lungilanga muna zingu kiaku. E vuvu kiaku ye ngwizani aku yo Yave isikila.

6. Ekuma dilenda kadila diampasi mu bunda Yave vuvu vava tunuananga ye diambu diampasi?

⁶ Nanga onuananga ye diambu diampasi dikukendelekanga. Ovanganga mawonso olenda mu kuma kia diambu diadi yo samba kwa Yave mu lomba lusadisu. Nga olenda vuvika o ntima wau una ye vuvu vo Yave okusadisa? Elo. (Tanga Nkunga 62:8; 1 Petelo 5:7.) Avo zolele kala ye ngwizani ambote yo Yave, diamfunu wabundang’e vuvu muna yandi. Kansi, ovanga wo, ke diasazu ko. Ekuma? Kimosi muna kuma i kia sia vo ke vana vau ko Yave kalenda vanina e mvutu za sambu yaku.—Nkunga 13:1, 2; 74:10; 89:46; 90:13; Kabakuke 1:2.

7. Ezak’e ntangwa Yave ke vananga mvutu za sambu yeto ko vana vau. Ekuma?

⁷ Ekuma ezak’e ntangwa Yave ke vaninanga mvutu za sambu yeto ko  vana vau? Nkand’a Nzambi uvovanga vo Yave i Se dieto, yeto tu wan’andi. (Nkunga 103:13) O se ke vananga mwan’andi ko yawonso kelombanga yovo kumvana yo vana vau. O se ozeye wo vo mwana olenda yangalela konso lekwa kamuene, kansi ke vevioka lumbu yayingi ko kazolele kio diaka ko. O se ozeye mpe dina diambote kwa mwan’andi ye una dilenda vanga kw’akaka. Ozeye kina mwana kavuidi o mfunu ye ntangwa kafwete kio kumvana. Kele vo se kavananga mwana konso lekwa kazolele vana vau, wadi kituka se selo kia mwana. O Yave wa Se dieto kuna zulu, otoma kutuzolanga. Wau vo yandi i Mvangi eto, ozeye lekwa tuvuidi o mfunu ye ntangwa yambote kekutuvana kina tulombele. Muna kuma kiaki, diambote twavingilanga mu mona una Yave kevanina e mvutu za sambu yeto.—Tezanesa ye Yesaya 29:16; 45:9.

8. Nkia nsilu kasia o Yave mu kuma kia mpasi zina ke tulenda zizidila ko?

⁸ Sungamena mpe vo Yave ozeye e mpasi zina konso muntu kalenda zizidila ye zina kalendi zizidila ko. (Nkunga 103:14) Muna kuma kiaki, okutuvananga nkuma tuvuidi o mfunu. Dialudi vo ezak’e ntangwa tulenda mona vo ke tulenda diaka zizidila ko. Kansi, Yave osianga nsilu vo avo mpasi zituviokele tezo, ‘oteta nzila’ kimana twalenda zo zizidila. (Tanga 1 Korinto 10:13.) Dia lufiaulwisu mu zaya vo tulenda kala ye vuvu vo Yave ozeye mana tulenda zizidila.

9. Adieyi tufwete vanga avo tulombele lusadisu kwa Yave, kansi katuvene mvutu vana vau ko?

⁹ Avo tulombele lusadisu kwa Yave, kansi katuvene mvutu vana vau ko, tufwete kala yo luzindalalu. Sungamena vo Yave una ye luzolo lwa kutusadisa, kansi ovingilanga e ntangwa yambote kekutuvana kina tuvuidi o mfunu. Muna Nkand’a Nzambi tutanganga vo: ‘Yave ovingila kimana kanumwesesa e dienga, muna kuma kiaki otelama kanufwila e nkenda. Kadi o Yave i Nzambi a unsongi; akwa nsambu ana bekumvingilanga.’—Yesaya 30:18.

10-12. (a) Ezak’e ntangwa ekuma o lunga-lunga yitu kieto una vo mbevo dikadilanga diampasi? (b) O bunda Yave vuvu muna ntangw’a mpasi aweyi dilenda vanga muna ngwizani aku yo yandi? Yika nona.

¹⁰ Ezak’e ntangwa olenda bwilwa mpasi yo mona nze una Paulu kamona yo vava vo wavuluzwa muna “nu’a nkosi.” (2 Timoteo 4:17) Muna kolo kiaki, diamfunu kikilu wabund’e vuvu muna Yave. Kasikil’owu, dilenda kala vo yitu kiaku una vo mbevo olunga-lunganga. I bosi, osambidi kwa Yave kimana kasadisa wabaka nzengo zambote yo vua nkuma wa zizidila. * Owau, una yo luvuvamu lwa ntima kadi osungamene vo  Yave omonanga yo bakula e mpasi zaku. Okusadisa mu zizidila e mpasi yo sikila ye kwikizi muna yandi.—Nkunga 32:8.

¹¹ Ezak’e ntangwa olenda yindula vo Yave ke kusadisanga ko. Nanga madotolo ke bawizanene ko mu kuma kia dina bafwete vanga. Nanga wakala ye vuvu vo yitu yaku bekufiaulwisa, kansi se yau nkutu besakisanga o mambu. Avo diadi dibwididi, bunda Yave vuvu ntangwa zawonso kimana kavana nkuma. Siamisanga ngwizani aku yo yandi. (Tanga 1 Samuele 30:3, 6.) I bosi, vava obakula una Yave kekusadisilanga, e ngwizani aku yo yandi iwokela.

¹² I wau kamona o Linda. * Walunga-lunga mase mandi mu kolo kiandá yavana bafwa. Wavova vo: “Muna kolo kiakina, ezak’e ntangwa mono, mpangi ame yo nkaz’ame ke twazayanga ko dina tufwete vanga. Nkumbu miayingi twamonanga vo ke tuna yo nsadisi ko. Kansi, vava tuyindulanga kolo kiakina kiampasi, tumonanga una Yave katusadisila. Watukumikanga yo kutuvana kina twavuanga o mfunu, kana nkutu vava ke twazayanga ko dina tuvanga.”

13. O bund’e vuvu muna Yave aweyi diasadisila Rhonda mu zizidila mpasi za mpila mu mpila?

¹³ O bund’e vuvu kieto kiawonso muna Yave dilenda mpe kutusadisa mu zizidila mambu mampasi. I diau diabwila Rhonda. O nkaz’andi, una vo ke Mbangi a Yave ko, wavonda o longo. Muna kolo kiau kimosi, mpangi andi wabakama kimbevo kiampasi kiyikilwanga vo lopus. Ke vavioka ngonde zayingi ko, nkwezi andi wafwa. Vava ntim’andi wayantika vuvama, Rhonda wakota muna salu kia kimviti a nzila. Kansi ke vavioka kolo ko ngudi andi wafwa. Aweyi Rhonda kalenda zizidila mpasi zazi zawonso? Wavova vo: “Yasambanga kwa Yave lumbu yawonso, kana nkutu vava yabakanga nzengo mu mambu makete. Ediadi diansadisa mu badikila Yave nze nkundi ame akieleka. Yalongoka o mfunu wa bund’e vuvu muna yandi vana fulu kia bund’e vuvu muna mono kibeni yovo muna wantu ankaka. Yave wansadisanga kikilu. Walungisanga nsatu zame zawonso. Muna kuma kiaki, imonanga nze mono isalanga entwadi yo Yave.”

14. Aweyi Yave kalenda kusadisila avo yitu kiaku ovaikisu muna nkutakani?

¹⁴ Badika diambu diakaka diampasi. Dilenda kala vo mosi muna esi nzo eno ovaikisu muna nkutakani. Ozeye dina diasonama muna Nkand’a Nzambi mu mpila tufwete kaladila y’awana bavaikiswa muna nkutakani. (1 Korinto 5:11; 2 Yoane 10) Kansi, wau vo otoma zolanga yitu kiaku, olenda mona vo lemvokela nkanikinu a Nkand’a Nzambi diambu diampasi yovo ke dilendakana ko. Nga okala ye vuvu vo Se diaku dia zulu  okuvana nkuma wa kunlemvokela ye kwikizi kiawonso? Nga obadikila diambu diadi nze lau dia toma finama Yave?

15. Ekuma Adami kakolamena Yave?

¹⁵ E diambu diadi aweyi difwananene ye dina diabwila Adami wa yakala diantete? Nga wakwikila vo olenda kwandi kolama Yave yo kwamanana zinga? Ve, Adami ‘kavukikwa ko.’ (1 Timoteo 2:14) Ekuma kakolamena Yave? Adami wadia e bundu kina nkaz’andi kamvana kadi waluta zola nkaz’andi ke mu Yave ko. Wawila nding’a nkaz’andi ke mu wila nkanikinu a Yave ko.—Etuku 3:6, 17.

16. Nani tufwete luta zola? Ekuma?

¹⁶ Dina Adami kavanga dikutulonganga vo tufwete zolanga Yave lutila una tuzolelanga konso muntu. (Tanga Matai 22:37, 38.) Avo tutoma zolanga Yave, tulenda sadisa yitu yeto mu mpila yambote, kiakala vo Yave besambilanga yovo ve. Muna kuma kiaki, kwamanana siamisa zola kwaku muna Yave yo kumbundanga e vuvu. Avo otokananga kwayingi mu kuma kia yitu kiaku wavaikiswa mu nkutakani, samba kwa Yave yo kunzayisa mawonso mena muna ntima. * (Roma 12:12; Filipi 4:6, 7) Kana nkutu vo wakendalala kikilu una, badikila diambu diadi nze lau dia siamisa ngwizani aku yo Yave. Ediadi dikusadisa mu kumbund’e vuvu yo zaya vo o lemvokela Yave nluta kaka ditwasanga.

17. Avo tuyivene muna salu kia samun’e nsangu zambote, nkia vuvu tulenda kala kiau mu kuma kia Yave?

¹⁷ Ekuma Yave kavuluzila Paulu muna “nu’a nkosi”? Paulu wavova vo: ‘Kimana muna lusadisu lwame, e salu kia samun’e nsangu zambote kiatoma salwa.’ (2 Timoteo 4:17) Yave watuvana mpe salu kia samuna e “nsangu zambote” yo kutuyikila vo tu ‘akw’andi a salu.’ (1 Tesalonika 2:4; 1 Korinto 3:9) Avo tuvangidi mawonso tulenda muna salu kiaki, tukala ye vuvu vo Yave okutuvana yawonso tuvuidi o mfunu. (Matai 6:33) Muna mpila yayi, ke dikala mpasi ko mu vingila yavana Yave kevana e mvutu za sambu yeto.

18. Aweyi olenda bundila e vuvu muna Yave yo siamisa ngwizani aku yo yandi?

¹⁸ Muna kuma kiaki, siamisanga e ngwizani aku yo Yave lumbu yawonso. Avo mpasi zibwididi yo telamwa moyo, sadila lau diadi mu toma finama Yave. Tanganga, longokanga Diambu dia Nzambi yo badika mana olongokanga. Sambanga kwa Yave yo kuyivana muna salu kiandi. Avo ovangidi mawonso mama, kala ye vuvu vo Yave okusadisa mu zizidila mpasi zawonso owanananga zau o unu ye konso mpasi zilenda kubwila kuna sentu.