1. Ekuma tufwete siamisinanga e ngwizani eto yo Yave?

AVO u Mbangi a Yave wavubwa, lekwa kiantalu una kiau. E lekwa kiaki i ngwizani ambote una yau yo Yave. Kansi, e ngwizani yayi mu nuaniswa ina kwa nza ya Satana. Ilenda mpe kuluka mu kuma kia usumuki weto. Ekiaki i kuma tufwete silanga ngolo muna siamisa ngwizani eto yo Yave.

2. (a) Nki i kikundi? (Tala mvovo va yand’a lukaya.) (b) Adieyi tufwete vanga muna wokesa kikundi kieto yo Yave?

² Nga Yave muntu akieleka kwa ngeye? Nga okumbadikilanga nze Nkundi aku? Nga ozolele vo kikundi kiaku yo yandi kiawokela? E sono kia Yakobo 4:8 kisonganga dina ofwete vanga. Kivovanga vo: “Nufinama Nzambi, oyandi mpe okunufinama.” Kikundi kiaku yo Yave kitadidi ngeye yo Yave. * Avo osidi ngolo za finama Yave, oyandi mpe  okufinama. Avo ovangidi wo, Yave muntu akieleka kekala kwa ngeye. Vana ntandu, e ngwizani aku yo yandi iwokela yamu tezo kia mona nze una kamona o Yesu vava kavova vo: “Ndiona wantuma i waludi” ye “Omono inzeye.” (Yoane 7:28, 29) Kansi, adieyi diaka olenda vanga muna siamisa ngwizani aku yo Yave?

3. Aweyi tulenda mokenena yo Yave?

³ Avo zolele toma finama Yave, diamfunu kikilu wamokenanga yandi lumbu yawonso. Kansi, nga ediadi dilendakana? Yindula una ngeye yo nkundi aku ozingilanga kwandá nulenda mokenena? Nulenda twikaziananga e nkanda yovo mokena mu telefone. Omokenanga yo Yave vava osambanga kwa yandi. (Tanga Nkunga 142:2.) Kansi, aweyi olenda yambulwila vo Yave kamokena yaku? Olenda wo vanga muna tanganga Nkand’a Nzambi yo badika mana otanganga. (Tanga Yesaya 30:20, 21.) Yambula twabadika una mbokena zazi yo Yave zilenda siamisina ngwizani aku yo yandi yo kunkitula se Nkundi aku.

4, 5. Aweyi Yave kevovelanga kwa ngeye vava olongokanga Nkand’a Nzambi? Yika nona.

⁴ Tuzeye wo vo Nzambi ovovanga kwa yeto muna Nkand’a Nzambi. Nga Nkand’a Nzambi ulenda kusadisa mu toma finama Yave? Elo. Vava otanganga yo longoka Nkand’a Nzambi, siang’e sungididi mu mana otanganga. Yindula una olenda sadila mana olongokanga. Avo ovangidi wo, oyambula vo Yave kavova kwa ngeye. Okala se Nkundi ona okusadisanga. Ediadi dikufinamesa yo yandi.—Ayibere 4:12; Yakobo 1:23-25.

⁵ Kasikil’owu, aweyi omonanga vava otanganga mvovo mia Yesu vo: “Ke nusadila lusalu lueno ova nsi ko”? Avo ovanganga mawonso mu sia Yave va fulu kiantete muna zingu kiaku, omona vo Yave okuyangalelanga. Kansi, dilenda kala vo otangidi mvovo mia Yesu yo bakula vo ofwete vevola zingu kiaku yo sia sungididi muna salu kia Nzambi. Avo i wau, Yave okusadisa mu bakula dina olenda vanga muna kumfinama.—Matai 6:19, 20.

6, 7. (a) Vava tulongokanga Nkand’a Nzambi, adieyi divangamanga muna zola kweto muna Yave ye muna zola kwandi muna yeto? (b) Nkia kani diantete tufwete kala diau vava tulongokanga Nkand’a Nzambi?

 ⁶ Dialudi vo vava tulongokanga Nkand’a Nzambi, tuzayanga e nsobani tulenda vanga muna sadila Yave una ufwene. Kansi, tulongokanga mpe mambu mambote kevanganga kumosi ye kiwuntu kiandi eki kikutufilanga mu toma kunzola. Vava o zola kweto muna yandi kuwokelanga, o zola kwandi mpe muna yeto kuwokelanga. E ngwizani eto yo Yave isikilanga. —Tanga 1 Korinto 8:3.

⁷ Avo tuzolele finama Yave, diamfunu twalongokanga Nkand’a Nzambi ye kani diasikila. Yesu wavova vo: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.” (Yoane 17:3) Vava tutanganga Nkand’a Nzambi, tulenda longoka mambu mayingi mampa ye mamfunu. Kansi, e kani dieto diantete i toma zaya Yave nze Muntu.—Tanga Luvaiku 33:13; Nkunga 25:4.

8. (a) Adieyi akaka balenda yindula mu mpila ina Yave kakadila yo Azareya wa Ntinu? (b) Avo zeye Yave, aweyi omona mu kuma kia mana kevanganga?

⁸ Avo tutomene zaya Yave nze Nkundi eto, ke tutokana ko vava Nkand’a Nzambi ke usonganga ko e kuma kavangila diambu kingandi. Kasikil’owu, vava Azareya kakala ntinu a Yuda, o nkangu nzambi za luvunu wasambilanga. Azareya kabayikama ko. “Owu wansongi kavanga muna meso ma Yave.” (2 Ntinu 15:1-5) Kansi, Yave wavana Azareya e tumbu kia kimbevo kia wazi. Ekuma? E ndambu a lusansu lwalu ke ikutuzayisanga kuma ko. Ozevo, aweyi omonanga mu kuma kia dina Yave kavanga? Nga dikutokanesanga yo yindula vo Yave kavanga diansongi ko, watumba Azareya kondwa kuma? Ve. Avo tomene zaya Yave, ozaya vo e tumbu kevananga kiansongi kaka kikalanga. Ntangwa zawonso ovaninanga e longi “muna unsongi.” (Yeremiya 30:11) Kansi, kana nkutu vo kubakwidi ko ekuma Yave katumbila Azareya, olenda kala ye ziku vo Yave dia unsongi kavanga.

9. Nkia mambu matusadisi mu bakula e kuma Yave katumbila Azareya ye kimbevo kia wazi?

⁹ O Nkand’a Nzambi mayingi kekutuzayisanga mu kuma kia zingu kia Azareya wa Ntinu, ona wayikilwanga mpe vo Uziya wa Ntinu. (2 Ntinu 15:7, 32) O lusansu luna muna nkand’a 2 Tusansu 26:3-5, 16-21 luvovanga vo wavanga ‘owu wansongi muna meso ma Yave.’ Kansi, luvovanga mpe vo kuna kwalanda, “o ntim’andi uzangukidi, yamu lubukumuku.” O ntinu wavava vanga diambu dina diavangwanga kaka kw’anganga. Nganga lunana ye mosi bamvovesa vo diambu diambi kazola vanga ye bavava kunsima. Adieyi kavanga? Wasonga lulendo yo kubafungila nkutu makasi. E mambu mama matusadisi mu bakula e kuma Yave katumbila ntinu ye kimbevo kia wazi.

10. Ekuma ke tufwete vavilanga zaya kuma ko muna mawonso kevanganga o Yave? Aweyi tulenda kadila ye ziku vo Yave ovanganga oma mansongi?

¹⁰ Nkia diambu diamfunu tulongokele? Muna lusansu lwa Azareya wa Ntinu, muna ye mambu mayingimekutusadisanga mu bakula e kuma  Yave kantumbila. Kansi, avo Nkand’a Nzambi ke uzayisi mawonso ko, adieyi ofwete vanga? Nga ofwete tokana kana vo dina Yave kavanga diansongi? Yovo oyindula vo Nkand’a Nzambi una ye nsangu zafwana zifwete kukwikidisa vo mawonso kevanganga o Nzambi mansongi? (Nsiku 32:4) Avo tomene zaya Yave nze Muntu, okunzola yo kumbund’e vuvu. Ke divava ko vo wateka zaya e kuma kikumfilanga mu vanga konso diambu. Ekolo olongokanga Nkand’a Nzambi, Yave okituka se muntu akieleka kwa ngeye yo kumfinama.—Nkunga 77:12, 13.

11-13. Aweyi ozayidi vo Yave owanga e sambu? (Tala e fwaniswa kuna lubantiku lwa longi.)

¹¹ Vava tusambanga, tufinamanga Yave. Tukunkembelelanga, kumvutula matondo yo kunlomba lusadisu. (Nkunga 32:8) Kansi, avo zolele kala ye kikundi kiambote yo Yave, ofwete kwikila vo owanga e sambu.

¹² Wantu ankaka bevovanga vo Nzambi ke wanga sambu ko, e sambu kisadisanga kaka o muntu mu kala yo ntim’a vuvama. Bekwikilanga vo e sambu kisadisanga kaka mu toma yindula mambu mekutokanesanga yo vava ngeye kibeni una olenda mo singikila. Dialudi vo e sambu kilenda kusadisa mu mambu mama. Kansi, vava omokenanga yo Yave muna sambu, oyandi okuwanga kikilu. Aweyi olenda kadila ye ziku?

¹³ Yindula diambu edi: Vitila Yesu keza ova ntoto, wamona una Yave kavaninanga  e mvutu za sambu ya selo yandi ova ntoto. Vava kakala ovantoto, Yesu wasambanga kwa Se diandi kuna zulu yo kunzayisa e ngindu zandi. Lumbu kimosi, wasamba nkutu fuku wamvimba. (Luka 6:12; 22:40-46) Nga Yesu wadi wo vanga kele vo kayindula vo Yave kawanga sambu yandi ko? Yesu walonga mpe alongoki andi una balenda sambila kwa Yave. Nga Yesu wadi wo vanga kele vo kayindula vo Yave ke wanga sambu ko? Kalukatikisu ko vo Yesu wazaya wo vo Yave owanga kikilu e sambu. Wavova nkutu vo: “E Tata, ifiaukidi wau ungwidi. Nzeye wo vo e lumbu yawonso okungwanga.” Yeto mpe tulenda kala ye ziku vo Yave owanga e sambu yeto.—Yoane 11:41, 42; Nkunga 65:2.

14, 15. (a) Nkia nluta tubakanga vava tulombanga mambu masikididi muna sambu? (b) E sambu ya Kathy aweyi yansadisila mu toma finama Yave?

¹⁴ Ke ntangwa zawonso ko olenda bakula e mvutu za sambu yaku. Kansi, avo olombele diambu diasikididi muna sambu, ke dikala mpasi ko mu bakula e mvutu za Yave. Vana ntandu, Yave okituka wakieleka kwa ngeye. Avo oziudi ntim’aku kwa Yave yo kunzayisa mawonso mekutokanesanga, e ngwizani aku yo yandi itoma wokela.

¹⁵ Kasikil’owu, Kathy wayendanga nkumbu miayingi muna salu kia umbangi, kansi kakalanga ye kiese ko. * Wavova vo: “Kiayangalelanga salu kia umbangi ko. Kiakalanga kikilu ye tima ko.” Vava kayambula o sala muna kompani, nkuluntu mosi wankasakesa kakota muna salu kia  kimviti a nzila. Wavova vo: “Wampana nkutu e ndomba ya salu kia kimviti a nzila. Yabak’e nzengo za sala se mviti a nzila. Kansi, yayantika mpe samba kwa Yave lumbu yawonso kimana kansadisa mu yangalela e salu kia umbangi.” Nga Yave wavana e mvutu za sambu yandi? Vava kalungisa mvu ntatu muna salu kia kimviti a nzila, wavova vo: “Wau vo se ntangwa ayingi ikalanga muna salu kia umbangi ye mayingi ilongokanga kwa mpangi zankaka z’akento, malembe-malembe yayantika tomesa ndekwa zame za sila umbangi. O unu, kiyangalelanga kaka salu kia umbangi ko, kansi zola izolanga kio. Edi disundidi o mfunu, e ngwizani ame yo Yave yawokela kikilu.” Kieleka, e sambu ya Kathy yansadisa mu toma finama Yave.

16, 17. (a) Adieyi tufwete kwamanana vanga mu siamisa kikundi kieto yo Yave? (b) Adieyi tubadika muna longi dilanda?

¹⁶ Tulenda kwamanana finama Yave yakwele mvu. Muna kuma kiaki, yambula twawanga e nding’andi lumbu yawonso muna longokanga Nkand’a Nzambi yo mokenanga yandi muna sambu. Avo tuvangidi wo, kikundi kieto yo Yave kiwokela. Muna lusadisu lwandi, tulenda zizidila konso mpasi zilenda kutubwila.

¹⁷ Kansi, kana una vo tusambanga kwa Yave lumbu yawonso, ezak’e ntangwa tulenda wanana ye diambu diampasi muna zingu. Muna kolo kiaki, tulenda yantika dimbula e vuvu muna Yave. Tulenda banza vo Yave ke wanga sambu yeto ko yo katikisa kana vo nkundi eto kikilu. Avo ngindu zazi zilwakidi, adieyi ofwete vanga? E longi dilanda dikusadisa.