AVO utezaneso yo nti a nsedele, o nti a olive ulenda moneka vo wakete kikilu. Kansi, diampasi dikalanga o nti a olive wayuma muna ntangw’a kala. Vena ye nti mia olive mina ye kimbuta kia 1000 dia mvu. E mianzi mia nti a olive mitoma kotanga muna nsi a ntoto. Muna kuma kiaki, o nti wau ulenda savuka kana nkutu bazengele e vimbu diandi. Ekolo e mianzi miakinu moyo, ulenda savuka diaka.

Yobi wa nkwa kwikizi wakala ye vuvu vo kana nkutu ofwidi, osinga zinga diaka. (Yobi 14:13-15) Wasadila nona kia nti, nanga kia nti a olive, mu songa e vuvu kiandi muna nkum’a Yave wa kumfula. Yobi wavova vo: “Vena ye vuvu muna nti, Ovo ukeswa, usavuka diaka.” Avo kala kifokokele yo noka e mvula, e sinza kia nti a olive ulenda savuka diaka yo vaikisa “tayi nze nkuna.”—Yobi 14:7-9.

Nze una o mvati a nsengo kekadilanga ye tima dia mona o nti a olive una wayuma wasavuka diaka, Yave wa Nzambi una ye tima dia fula selo yandi ye ulolo wa wantu ankaka. (Matai 22:31, 32; Yoane 5:28, 29; Mavangu 24:15) Yindula e kiese tukala kiau vava tutambula awana bafwa yo kubamona diaka bena o moyo.