Mu mvu miayingi, e nkanda mieto mia sasilanga vo Ngonge a Mangonge i nkumbu iyikilwanga Satana vava kayingwa kuna zulu. Ekuma? E kuma kadi o nkand’a Lusengomono usonganga vo Satana yandi ofilanga e zula muna nuanisa nkangu a Nzambi. (Lusengomono 12:1-17) Edi twabakulanga vo Ngonge i nkumbu yankaka ya Satana.

Kansi, vena ye mambu ke matoma kiá ko muna umbakuzi wau. Yindula diambu edi: Vava kayika lufwasu lwa Ngonge, Yave wavova vo ovana Ngonge kwa “nuni zambiki za mbaku miawonso yo kwa bulu yafuta.” (Yezekele 39:4) I bosi, Yave wakudikila vo: “E lumbu kina mvana kwa Ngonge e fulu kia ziamina muna Isaele.” (Yezekele 39:11) Ozevo, aweyi Satana una vo vangwa kia mwanda kadi dilwa kwa nuni ye bulu yafuta? Aweyi kadi zikilwa ova ntoto? Nkand’a Nzambi usonganga vo Satana okangwa yo tubwa muna mbilu mu 1.000 dia mvu. Ke singa diwa ko ngatu zikwa.—Revelação 20:1, 2.

Nkand’a Nzambi uvovanga vo kuna mfoko a 1.000 dia mvu, Satana ovaikiswa muna mbilu, ‘otungianisa zula ina muna konko yau ayà ya nza, e Ngonge ye Mangonge, kalungisa yo kuna vita.” (Lusengomono 20:8) Kele vo Satana yandi i Ngonge, ediadi disongele vo Satana okuyitungianisa yandi kibeni. Muna kuma kiaki, o “Ngonge” oyikwanga muna nkand’a Yezekele yovo muna nkand’a Lusengomono ke Satana ko.

Ozevo, nani i Ngonge a Mangonge? Muna vana mvutu za kiuvu kiaki, tufwete vavulula muna Nkand’a Nzambi mu zaya kana nani onuanisanga nkangu a Nzambi. Nkand’a Nzambi uyikanga e vita ya ‘Ngonge a Mangonge,’ vita ya “ntinu a node” ye vita ya “ntinu mia nza.” (Yezekele 38:2, 10-13; Daniele 11:40, 44, 45; Lusengomono 17:14; 19:19) Nga zazi vita zaswaswana? Nanga ke wau ko. Dilenda kala vo Nkand’a Nzambi nkumbu zaswaswana wasadila mu yika vita yau imosi. Ekuma tuvovele wo? Kadi Nkand’a Nzambi ukutuzayisanga vo e zula yawonso va nza ilunganiswa muna vita yansuka ifila muna vita ya Armangedo.—Lusengomono 16:14, 16.

 Avo tutezanese sono yayi yawonso iyikanga vita yansuka yo nkangu a Nzambi, tumona vo e nkumbu a Ngonge a Mangonge ke iyikanga Satana ko. Kansi, Ngonge a Mangonge i kintwadi kia zula. Nga “ntinu a node” ofila zula yayi? Ke tuna ye ziku ko. Kansi, nanga o mvovo wau ngwizani una ye dina Yave kavova mu kuma kia Ngonge: “Okwiza tuka fulu kiaku kuna nsukansuka za node, ongeye ye nkangu miayingi yaku, awonso bekwendelanga vana mvalu, e nkutakani ayingi yo makesa mayingi.”—Yezekele 38:6, 15.

Diau dimosi mpe, Daniele wa ngunza ona wazinga tandu kimosi yo Yezekele, wavova mu kuma kia ntinu a node vo: “E nsangu zituka kuna este yo kuna node zikuntelekes’o moyo: i mpaika kevaika ye lunzi kiayingi, kafwasakesa yo bukumun’ayingi. Okuma saba ya lumbu luandi muna kati kwa mbu yo mongo avauka yo wete, kansi suka kesuka, ke vakal’on’okunsadisa ko.” (Daniele 11:44, 45) Diau dimosi diyikanga nkand’a Yezekele kesinga vanga o Ngonge.—Yezekele 38:8-12, 16.

Adieyi disinga bwa kuna mfoko a vita yansuka? Daniele wa ngunza wavova vo: “E ntangwa ina o Mikaele [Yesu Kristu] otelama [muna Armangedo], wa nkuluntu anene, on’otelamene [tuka muna mvu wa 1914] muna diambu dia wan’a nkangu aku; mukala kolo kiampasi [mpasi zayingi], kina ke kiakala ko tuka kiakadila zula yamuna kiau kolo kina: e kolo kiakina o nkangu aku betaninwa, konso muntu wasonama muna nkanda.” (Daniele 12:1) Diau dimosi tutanganga muna Lusengomono 19:11-21 kesinga vanga o Yesu.

Nani i “Koke ye Makoke” (yovo Ngonge ye Mangonge) oyikwanga muna Lusengomono 20:8? E nkumbu yayi iyikanuga awonso ana bekolamena Yave yo nuanisa nkangu andi muna lutonto lwansuka kuna mfoko a 1.000 dia mvu. Dina bevanga difwanana ye dina divanga Ngonge a Mangonge, i sia vo, zula inuanisa nkangu a Nzambi kuna mfoko a mpasi zayingi. Nze zula ina isinga fwaswa muna Armangedo, o Ngonge ye Mangonge mpe osinga fwaswa. (Lusengomono 19:20, 21; 20:9) Muna kuma kiaki, awonso ana bekolama kuna mfoko a 1.000 dia mvu, bafwana yikilwa vo ‘Ngonge ye Mangonge.’

Wau vo tu alongoki a Nkand’a Nzambi, mu vingila twina kimana twazaya ndiona okituka “ntinu a node” kuna sentu. Kansi, kiakala nani osinga fila e zula mu nuanisa nkangu a Nzambi, tuna ye ziku kia mambu mole: (1) Ngonge a Mangonge ye makesa mandi ke besunda ko, fwaswa befwaswa. (2) Yesu Kristu wa Ntinu eto otanina nkangu a Nzambi yo kubakotesa muna nz’ampa ya luvuvamu ye kiese.—Lusengomono 7:14-17.