VAVA Anita kakituka Mbangi a Yave, o nkaz’andi wafunga kikilu makasi. * Wavavanga kunsima kalembi kwenda mu tukutakanu yo kunkanikina vo kavovi diaka nkumbu a Nzambi ko. Vava kavovanga e nkumbu a Yave, nkaz’andi wafunganga kikilu makasi.

Vana ntandu, o nkaz’a Anita kazolanga ko vo kalonga wan’au oma ma Yave yovo kubanata mu tukutakanu. Diampasi kikilu diakala kwa yandi kadi diavavanga vo kalonga wan’andi kuna sweki.

Nze una usonganga nona kia Anita, mosi muna yitu yaku olenda kusima wayambula sadila Yave. Dilenda kala mpe vo diambu diakaka diampasi onuananga diau. Nanga se kolo oyelanga. Dilenda kala vo mwana yovo nkaz’aku wafwidi. Yovo mosi muna esi nzo aku otoma zolanga wayambwidi sadila Yave. Muna mambu mama, adieyi olenda vanga muna sikila ye kwikizi muna Yave?

Paulu wa ntumwa wavova vo: “Luzindalalu nuvwidi o mfunu.” (Ayibere 10:36) Muna kuma kiaki, adieyi dilenda kusadisa mu zindalala?

Vava okalanga mu mpasi, sungamena vo Yave ofwete bund’e vuvu kimana kasadisa mu zindalala. Lomba lusadisu lwandi muna sambu. I diau kavanga o Ana vava nkaz’andi kafwa ku kinsalukisa. Mvu 30 miavioka tuka bakazalela. Ana wavova vo: “Vava kayenda kuna salu, kavutuka diaka ko. Kimbuta kia mvu 52 kaka kakala kiau.”

Kana una vo ola zayingi kakalanga kuna salu, e ntantu ke zafokoka ko. Adieyi kavanga? Wavova vo: “Yaziula ntim’ame kwa Yave yo kundodokela kimana kansadisa.” Una ye ziku vo Yave wansadisa kadi vava kasamba, o ntim’andi wavuvama. Wavova vo: “Kina ye lukatikisu ko vo Yave osinga fula nkaz’ame.”—Filipi 4:6, 7.

Yave osianga nsilu kwa selo yandi vo owá sambu yau. (Nkunga 65:2) Okubavana yawonso bavuidi o mfunu mu kwamanana kunsadila. Yave okusadisa mu sikila ye kwikizi muna yandi kana nkutu muna ntangw’a mpasi.

Vena ye mpila yankaka kekutusadisilanga o Yave mu zindalala. Watuvana mpangi z’akala ye z’akento muna nkutakani. Tulenda longoka diambu muna mpila ina ampangi kuna Tesalonika basadisila muntu yo nkwandi vava babangikwanga. Muna kolo kiakina, diavavanga vo bakasakesa muntu yo nkwandi. (1 Tesalonika 2:14; 5:11) Basadisanga mpangi zau kimana basikila ye kwikizi muna Yave muna lungananga vamosi yo kala akundi. Adieyi tulenda vanga muna sikila ye kwikizi nze ampangi kuna Tesalonika?

Tufwete vanganga kikundi y’ampangi muna nkutakani yo kasakesa muntu yo nkwandi, musungula muna ntangw’a mpasi. (Roma 14:19) Paulu wa ntumwa mpasi zayingi kamona mu kuma kia lubangamu yovo mambu mankaka, kansi Yave wamvana nkuma kavuanga mfunu muna zindalala. Kasikil’owu, Yave wasadila ampangi mu kasakesa Paulu. Paulu wavova mu kuma kia akundi andi vo: “Bakedi se fiauzi wame.” (Kolosai 4:10, 11) Mpangi zazi bazolanga kikilu Paulu. Muna kuma kiaki, vava kavavanga lusadisu, bamfiaulwisanga yo kunkasakesa. Nanga ngeye mpe osungamenanga ntangwa ina mpangi za nkutakani eno bavova yovo vanga diambu diakasakesa.

Yave wavana mpe akuluntu muna nkutakani. Mpangi zazi balenda kukasakesa yo kuvana luludiku lwa Nkand’a Nzambi. Bena nze ‘tininu muna tembwa, y’eswekameno muna nkuka; nze nkoko mia maza muna fulu kia kaya, nze vevelo kia mbek’ampwena muna nsi a lunioko.’ (Yesaya 32:2) Dia lukasakeso kikilu mu zaya vo mpangi zazi bena yo luzolo lwa kutusadisa. Muna kuma kiaki, vava onuananga ye diambu diampasi, lomba lusadisa kw’akuluntu. Balenda kusadisa mu kwamanana sadila Yave.

Dialudi vo akuluntu ke balendi fokola mpasi zaku zawonso ko. Wantu alembi lunga nze ngeye. (Mavangu 14:15) Kansi, avo lombele lusadisu kwa akuluntu, balenda kufiaulwisa yo samba kwa Yave mu kuma kia mpasi zaku. (Yakobo 5:14, 15) Muna bong’e nona, akuluntu bakasakesa mpangi mosi kuna Itália ona wayelanga kimbevo kiangolo mu mvu miayingi. Mpangi ndioyo wavova vo: “O zola kw’ampangi kumosi ye nkingula zau zansadisa mu zizidila.” Avo mu mpasi wina, Yave ozolele vo walomba lusadisu kw’akuluntu.

Vava tusianga e sungididi muna salu kia Yave, tulenda mona una Yave kekutusadisilanga. I diau kavanga o John. Vava kakala ye kimbuta kia mvu 39, wasoloka ye kimbevo kia câncer. Wamonanga vo ke diansongi ko mu bakama kimbevo kiaki, musungula wau vo wakinu nleke. Watokananga mu kuma kia nkaz’andi yo mwan’au wakala ye kimbuta kia mvu ntatu kaka. Wavova vo: “Diavavanga vo nkaz’ame kalunga-lunga mwan’eto yo mono. Diavavanga mpe vo kansadisanga mu nua nlongo yo kwenda kwa madotolo.” Muna kuma kia ulolo wa nlongo kanuanga, watovokanga kwayingi yo lunzua e vumu. Kansi, ke diau kaka ko diantokanesanga. Se diandi mpe kimbevo kiangolo kakala kiau ye muntu kavavanga ona ofwete kunlunga-lunga.

Adieyi diasadisa John ye esi nzo andi mu zizidila kolo kiakina kiampasi? Kana una vo John watovoka kakala, wasadisanga esi nzo andi mu sia sungididi muna salu kia Yave. Wavova vo: “Ke twakondwanga mu tukutakanu ko, twayendanga muna salu kia umbangi konso lumingu yo kalanga ye nsambila ya esi nzo kana nkutu vava diakala diampasi.” John walongoka o mfunu wa kwamanana siamisa ngwizani andi yo Yave. Kana una vo kuna lubantiku wakendalala yo tokana, ke vavioka kolo ko ntim’andi wavuvama. Wazaya wo vo Yave okunzolanga yo kumvana nkuma kavuanga o mfunu. Yave olenda mpe kusadisa vava otokananga yovo okalanga ye wonga. John wavova vo: “Yave olenda kukumika, nze una kankumikina.”

Vava una mu mpasi, sungamenanga e mvovo mia Paulu: “Luzindalalu nuvwidi o mfunu.” Bund’e vuvu muna Yave muna sambanga kwa yandi. Finama mpangi zaku muna nkutakani, lomba lusadisu kw’akuluntu yo kwamanana sia sungididi muna salu kia Yave. Okusadisa mu zizidila konso mpasi onuananga zau owau yovo konso mpasi zilenda kubwila kuna sentu.