1, 2. Aweyi Yesu kasongela zola kwandi muna wantu?

O MWAN’ANTETE a Nzambi i ziku kisundidi kia ngangu za Yave. Wakala se “mbuta mbangu” a Se diandi. Yindula e kiese kamona o Yesu vava Se diandi “kasikidis’ezulu” yo ‘teza nkubilwa mia nza.’ Kansi, muna lekwa yawonso kavanga o Se diandi, ‘eyangi dia Yesu diakala vana vena wan’a wantu.’ (Ngana 8:22-31) Kieleka, Yesu ozolanga wantu tuka kuna lubantiku.

² Kuna kwalanda, Yesu wasonga kwikizi yo zola muna Se diandi yo zola muna wantu awonso vava kasisa zulu yo kwiza ova ntoto nze muntu. Yesu kuna zola kwawonso wavanga wo kimana kavana moyo andi se “lukûlu lua wantu ayingi.” (Matai 20:28; Filipi 2:5-8) Vava Yesu kakala ova ntoto, Nzambi wamvana nkuma wa vanga masivi. Masivi mama masonga vo Yesu otoma zolanga wantu ye mana kevanga muna wete dia wantu ke kolo ko.

3. Adieyi tubadika mu longi diadi?

³ Vava kakala ova ntoto, Yesu wasamunanga mpe “nsangu  zambote za kintinu kia Nzambi.” (Luka 4:43) Wazaya wo vo e Kintinu kiaki kivelelesa nkumbu a Se diandi yo fokola emvimba mpasi za wantu. Vava Yesu kasilanga umbangi, masivi mayingi kavanga. Masivi mama masonga o zola kwandi muna wantu. Ekuma dinina diamfunu kwa yeto o unu? E kuma kadi mana kavanga mekutuvananga vuvu kia kusentu. Muna kuma kiaki, yambula twabadika masivi yá ma Yesu.

4. Adieyi diabwa vava Yesu kawanana yo muntu wayelanga wazi?

⁴ Vava kasamunanga e nsangu zambote, Yesu wayenda ku zunga kimosi kiayikilwanga vo Ngalili. Muna mbanza mosi ya zunga kiaki, wawana mo yakala dimosi diakala ye kimbevo kia wazi. (Maku 1:39, 40) Wau vo kimbevo kiangolo kakala kiau, Luka una vo ngang’a mawuku wanyikila vo muntu “wabilam’o wazi.” (Luka 5:12) Nkand’a Nzambi uvovanga vo vava muntu ndioyo kamona Yesu, “obukalele, undodokele, oku vo, E Mfumu, ovo ozolele wo, olenda kunkianzisa.” Muntu ndioyo wazaya wo vo Yesu wakala yo nkuma wa kunwuka, kansi wavava zaya kana vo Yesu wakala yo luzolo lwa kunwuka. Ekuma? E kuma kadi muntu ndioyo watoma zaya Afarisi, ana bavezanga wantu bakala yo wazi. Nkia ngindu kakala zau o Yesu? Nga owuka muntu ndioyo wasobwa e mpwa kwa kimbevo? Avo ngeye, adieyi wadi vanga?

5. Adieyi diafila Yesu mu wuka nkwa wazi?

⁵ Nanga o muntu wayelanga wazi kakaza ko vo “wafunzuka, wafunzuka” nze una wakanikinwa muna Nsiku a Mose. (Fuka 13:43-46) Kansi, Yesu kamfungila makasi ko. Wamfwila e nkenda ye wazola kunsadisa. Ke tuzeye ko dina Yesu kayindula, kansi tuzeye una kamona muna ntima. Wakendalala kikilu yo vanga sivi. Waviakana muntu ndioyo, diambu dina vo ke muntu ko wavanganga dio. Yesu wavova kuna nkenda ye ziku kiawonso vo: “Nzolele wo; kianza kwaku.” Vana vau “o wazi unkatukidi.” (Luka 5:13, 14) Elo, Yave wavana Yesu o nkuma wa vanga sivi diadi yo songa vo watoma zolanga wantu.—Luka 5:17.

6. Nkia diambu ditusivikisi muna masivi kavanga o Yesu? Masivi mama adieyi mesonganga?

⁶ Yesu masivi mayingi kavanga muna nkum’a Nzambi. Kawuka kaka nkwa wazi ko. Yesu wawuka mpe wantu bakala ye yimbevo ya mpila mu mpila. Nkand’a Nzambi uvovanga vo wantu basivikanga vava ‘bamonanga mababa mavovanga, avanguki bawukwanga, mbevo za malu zadiatanga ye mpofo zamonanga.’ (Matai 15:31) Vava Yesu kawukanga muntu, ke diavavanga ko vo kamvanga lupasu. Yesu wakala yo nkuma wa wuka yîkwa ya nitu ina yakala ye kimbevo. Wawukanga wantu vana vau, ezak’e ntangwa nkutu wawukanga wantu bakala vala yo yandi. (Yoane 4:46-54) E nona yayi adieyi isonganga? Yesu Kristu wa Ntinu eto una yo nkuma ye tima dia fokola emvimba yimbevo yawonso. Vava tulongokanga una Yesu kakadilanga yo wantu, dikutuvananga vuvu vo muna nz’ampa “omwena nsukami yo nkondami e nkenda.” (Nkunga 72:13)  Wau vo i diau kikilu kazolele, Yesu owuka awonso bemonanga e mpasi.

7, 8. Yika dina diavangama vitila Yesu kawanana yo yakala dimosi dia mbevo kuna Beteseda?

⁷ Ke vavioka ngonde zayingi ko vava kawuka nkwa wazi, Yesu wakatuka kuna Ngalili yo kwenda kuna Yuda yo kwamanana samuna e nsangu zambote za Kintinu kia Nzambi. Nanga ndonga bawá e nsangu za Yesu yo yangalela o zola kabasonganga. Yesu wazolanga fiaulwisa asukami ye mimbona-mpasi yo kubavana e vuvu.—Yesaya 61:1, 2; Luka 4:18-21.

⁸ Muna ngonde a Nisani, Yesu wayenda kuna Yerusaleme mu dia e lambu dia Nduta. E mbanza yazala yo wantu ekolo balwakanga mu kuma kia nkinzi wau wamfunu. Kuna node a tempelo kwakala ye zinga (piscina) kiayikilwanga vo Beteseda, i kuna Yesu kawananena yo muntu mosi kalendanga diata ko.

9, 10. (a)Ekuma wantu bayendelanga vana zinga kia Beteseda? (b) Adieyi Yesu kavanga vana zinga kiaki? Adieyi tulongokele muna mbandu andi? (Tala fwaniswa kuna lubantiku lwa longi.)

⁹ Mbevo zayingi bayendanga kuna Beteseda. Ekuma? E kuma kadi bakwikilanga vo mbevo olenda wukwa mu mpil’a sivi avo okotele vana zinga ekolo maza manikukanga. Yindula e mvuanga yakala ko mu kuma kia ulolo wa wantu ke bakala diaka ye vuvu ko, ana bavavanga wukwa. Yesu muntu alunga kakala, kavavanga wukwa ko. Ozevo, ekuma kayendela vana fulu kiakina? O zola kwandi muna wantu kwamfila mu kwenda vana fulu kiakina. I kuna kawana o muntu wayelanga mu mvu miayingi, lutila nkutu e mvu mina Yesu kazinga ova ntoto.—Tanga Yoane 5:5-9.

¹⁰ Yesu wayuvula muntu ndiona kana vo ozolele diata diaka. Yindula e nkenda kakala zau vava kavovesa Yesu vo wukwa kavavanga kansi ke dialendakananga ko, wau vo ke vakala muntu ko olenda kunsadisa mu kota vana zinga. Yesu wavovesa muntu ndioyo kavanga diambu dina kalendanga vanga ko. Wamvovesa vo kabonga ntand’andi, kadiata. O muntu ndioyo wabonga ntand’andi yo yantika diata! E sivi diadi diasonga mana kesinga vanga Yesu muna nz’ampa. Diasonga mpe o zola kwa Yesu muna wantu. Wavavanga ana bavuanga lusadisu o mfunu. E mbandu a Yesu ifwete kutukasakesa mu kwamanana vava wantu muna zunga kieto, ana betokananga mu kuma kia mambu mambi mevangamanga ova nza.

11. E sono kia Maku 5:25-34 aweyi kisongelanga vo Yesu zola kakala kwau muna mbevo?

¹¹ Tanga Maku 5:25-34. Vakala yo nkento mosi wayelanga kimbevo kiampasi mu 12 dia mvu. Kimbevo kiaki mayingi kiasoba muna zingu kiandi kumosi ye nsambil’andi. Wayenda kwa madotolo mayingi yo fwasa nzimbu zandi zawonso mu vava mawuku, kansi kimbevo ­wokela kaka  kiawokelanga. Lumbu kimosi, nkento ndioyo wavava mawuku mu mpila yaswaswana. Waviokela vana kati kwa ndonga yo viakana mvuatu a Yesu. (Fuka 15:19, 25) Vava Yesu kabakula vo ngolo zimvaikidi, wayuvula kana nani umviakene. O nkento ‘wamona wonga yo zakama.’ I bosi, ‘wamfukamena yo kunsamunwina e ludi kiawonso.’ Yesu wazaya wo vo Yave owukidi nkento ndioyo. Muna kuma kiaki, wamvovesa vo: “E mwana, lukwikilu luaku luvulwizi; wenda yo luvuvamu, wakala mvimpi muna nsongo aku.”

12. (a) Mun’owu wa mana tulongokele, nkia mpil’a muntu kakala o Yesu? (b) Nkia mbandu katusisila o Yesu?

¹² Dia lufiaulwisu kikilu mu zaya vo Yesu wazolanga kikilu o wantu, musungula awana bakala ye yimbevo. Yesu waswaswana kikilu yo Satana, ona ovavanga kutukwikidisa vo ke tuna mfunu ko ye ke muntu ko okutuzolanga. Masivi kavanga o Yesu masonga vo okutuzolanga kikilu yo tokana mu kuma kia mpasi zeto. Tuvutulanga matondo wau tuna yo Ntinu ye Ngang’ambuta una vo nkwa zola. (Ayibere 4:15) Dilenda kala diampasi kwa yeto mu bakula e mpasi kemonanga o muntu oyelanga mu kolo kiandá, musungula avo ke tuna ye kimbevo kiandi ko. Kansi, yindula e mbandu a Yesu. Kana una vo kasidi yela ko, wafwilanga awana bayelanga e nkenda. Yambula twavanga mawonso tulenda mu tanginina zola kwandi.—1 Petelo 3:8.

13. O lufuluku lwa Lazaro adieyi lusonganga mu kuma kia Yesu?

¹³ Yesu wakendalalanga kikilu vava akaka bakalanga mu mpasi. Kasikil’owu, vava nkundi andi Lazaro kafwa, Yesu ‘wafululuka muna ntima’ yo ‘telamwa moyo’ vava kamona yitu ye akundi a Lazaro badilanga. (Tanga Yoane 11:33-36.) Kana una vo wazaya wo vo ofula Lazaro, Yesu wadila. Kamona nsoni ko za songa una kamona muna ntima. Wau vo  Yesu wazolanga kikilu Lazaro ye yitu yandi, wasadila nkum’a Nzambi mu fula Lazaro.—Yoane 11:43, 44.

14, 15. (a) Adieyi disonganga vo Yave ozolele fokola mpasi za wantu? (b) Adieyi tulongokele mu kuma kia mvovo wa Kingerekia wasekolwa vo ‘ziami’?

¹⁴ Nkand’a Nzambi uvovanga vo Yesu wafwanana kikilu yo Yave wa Se diandi. (Ayibere 1:3) Muna kuma kiaki, masivi ma Yesu masonga vo Yave ozolele fokola mayela, mpasi yo lufwa. Ke kolo ko, Yave yo Yesu befula ulolo wa wantu. Yesu wavova vo “e ntangwa ikwiza, ina ikala vo awonso bena muna nkala (yovo ziami)” befuluka.—Yoane 5:28, 29.

¹⁵ O mvovo wa Kingerekia wasekolwa vo ‘ziami’ una ye nsasa vo luyindulu. O mvovo wau wafwana kikilu kadi Nzambi wa Mpungu-ngolo, wa mvangi a nsema, olenda sungamena mambu mawonso ma azolw’eto ana bafwa kumosi ye kiwuntu kiau. (Yesaya 40:26) Yave kena kaka yo nkuma wa kubasungamena ko, kansi ozolele mpe kubasungamena. Lufuluku lwa wantu beyikwanga muna Nkand’a Nzambi lusonganga mana mesinga vangama muna nz’ampa.

16. Nkia lau bekala diau ayingi muna selo ya Nzambi?

¹⁶ Avo tusikila ye kwikizi, tulenda kala ye lau dia mona dimosi muna masivi masundidi oma mavangama kala, isia vo, vuluka muna mpasi zayingi. Vava Armangedo ivioka, tumona diaka masivi mayingi. Muna kolo kiakina, wantu awonso bekala yo vimpi walunga. (Yesaya 33:24; 35:5, 6; Lusengomono 21:4) Yindula vava omona wantu beveta matala-tala, sikinwa ya avanguki (muleta), makalu ma avangudi ye masini mesadisanga mu toma wá. Yave ozeye wo vo awonso ana bevuluka muna Armangedo bafwete kala ye nitu zakumama yo vimpi wambote wau vo salu kiayingi bekala kiau. O wantu awaya yau bekitula o ntoto se paradiso.—Nkunga 115:16.

17, 18. (a)Ekuma Yesu kavangila masivi? (b) Ekuma tufwete vangila wawonso mu kota muna nz’ampa ya Nzambi?

¹⁷ O unu, e “ndong’ayingi” bekasakeswanga vava betanganga una Yesu kawukila mbevo. (Lusengomono 7:9) Masivi mama mekumikanga vuvu kieto kia kala yo vimpi walunga kuna sentu. Mesonganga mpe vo Mwan’antete a Nzambi zola kikilu kena kwau muna wantu. (Yoane 10:11; 15:12, 13) E nkenda za Yesu i ziku kisonganga vo Yave ozolanga selo yandi yawonso.—Yoane 5:19.

¹⁸ O unu, e nza yazala ye ntantu, mpasi ye lufwa. (Roma 8:22) Ekiaki i kuma tuvuididi o mfunu a nz’ampa ya Nzambi. Muna nz’ampa, wantu awonso bekala yo vimpi walunga una Nzambi kasia nsilu. E sono kia Malaki 4:2 kikutuvananga e vuvu vo tusinga “takuzioka nze wan’angombe.” Kiese kiayingi tukala kiau wau vo tuwukwa yo vevolwa muna usumuki. Yambula vo luyangalalu lweto muna Yave ye lukwikilu lweto muna nsilu miandi lwatufila mu vanga wawonso kimana twakota muna nz’ampa. Dia lukasakeso kikilu mu zaya vo masivi kavanga o Yesu masonga luvevoko besinga kala lwau o wantu muna luyalu lwandi.