1. Vava tusamunanga e nsangu zambote, aweyi tulenda sadila e sambu kia Yesu kina muna Matai 6:9-13?

WANTU ayingi bazeye e mvovo mia sambu kina muna Matai 6:9-13. Vava tusamunanga e nsangu zambote, tusadilanga e mvovo mia sambu kiaki mu longa wantu vo e Kintinu i luyalu lwakieleka lwa Nzambi, olu lukitula e nza se paradiso. Tusadilanga e mvovo “yambula nkumbu aku yazitiswa” mu songa vo Nzambi una ye nkumbu ye tufwete yo zitisanga.—Matai 6:9.

2. Aweyi tuzayidi wo vo Yesu kazolele ko vo twavutukilanga mvovo miau mimosi konso ntangwa tusambanga?

² Nga Yesu ozolele vo twavutukilanga e mvovo mia sambu kiandi konso ntangwa tusambanga nze una uvanganga akaka? Ve. Yesu wavova vo: “Ovo se nusamba, ke nuvovolola ko.” (Matai 6:7) Lumbu kiankaka vava kalonganga alongoki andi e mpila ya sambila, wavutukila e sambu kiaki, kansi, kasadila mvovo miau mimosi ko. (Luka 11:1-4) Ozevo, Yesu wasadila e sambu kia S’eto kimana katulonga mambu tufwete sianga muna sambu.

3. Nkia yuvu olenda kiyuvula ekolo tulongokanga e sambu kia S’eto?

 ³ Mu longi diadi ye dina dilanda, tutoma longoka e sambu kia S’eto. Ekolo tulongoka e sambu kiaki, ukiyuvula: ‘Aweyi e sambu kiaki kilenda kunsadisila mu vanga sambu yambote?’ Edi disundidi o mfunu, ‘nga izingilanga e ngwizani ye sambu kia Yesu’?

4. O mvovo “S’eto” adieyi ukutusungamesanga? Aweyi Yave kenena Se dieto?

⁴ Yesu wayantika sambu kiandi mu mvovo “S’eto.” Ediadi dikutusungamesanga vo Yave i Se mpe dia mpangi zeto zawonso mu nza. (1 Petelo 2:17) Awana basolwa kwa Yave mu kwenda zingila kuna zulu bekitukanga se wan’andi. Yave i Se diau mu mpila yaswaswana kikilu. (Roma 8:15-17) Awana bezinga yakwele mvu ova ntoto balenda mpe kunyikila vo “Se.” Yave wabavana moyo yo lungisa nsatu zau kuna zola kwawonso. Besinga yikilwa vo “wan’a Nzambi” vava bekituka wantu alunga yo sikila ye kwikizi kwa Yave muna lutonto lwa nsuka.—Roma 8:21; Lusengomono 20:7, 8.

5, 6. Nkia lukau lusundidi o mfunu luna mase balenda vana kwa wan’au? Adieyi kafwete vanga konso mwana? (Tala fwaniswa kuna lubantiku lwa longi.)

⁵ Amase bevananga lukau kwa wan’au vava bekubasadisanga mu bakula vo Yave i Se diau una kuna zulu ye vava bekubalonganga o samba kwa yandi. Nkengi mosi a zunga kuna África do Sul wavova vo: “Tuka muna lumbu kina wan’eto bawutuka, yasambanga yau entwadi konso fuku, nanga vo kina ku nzo ko. O wan’eto nkumbu miayingi bevovanga vo ke betoma sungamenanga ko e mvovo mia sambu yayina. Kansi, besungamenanga e kiese twakalanga kiau vava twasambanga kwa Yave wa S’eto yo luvuvamu diatutwasilanga muna ntima. Vava bayantika samba yau kibeni, yabakasakesanga vo basamba mu nding’a ngolo kimana yawá e mpila basongelanga e ngindu zau kwa Yave. Ediadi diakala se lau diampwena dia zaya mana makala muna ntima miau. Kuna zola kwawonso, yabalonganga una balenda sadila e mvovo mia sambu kia S’eto yo zaya una balenda tomesena e sambu yau.”

⁶ O wan’au bakwamanana finama Yave kana nkutu vava bakituka ambuta. Owau, bakazala ye besadilanga Yave mu salu kia ntangwa ke ntangwa ye akazi au. O lukau lusundidi o mfunu luna mase balenda vana kwa wan’au, i kubalonga vo Yave una kikilu ye balenda kituka se akundi andi akieleka. Kansi, konso mwana kafwete kwamanana siamisa kikundi kiandi yo Yave.—Nkunga 5:11, 12; 91:14.

7. Nkia lau tuna diau? Adieyi tufwete vanga?

⁷ Tuna ye lau dia zaya nkumbu a Nzambi yo yikilwa vo “nkangu muna nkumbu andi.” (Mavangu 15:14; Yesaya 43:10) Tusambanga vo “yambula nkumbu aku yazitiswa,” i sia vo, yaveleleswa. Tulombanga mpe kwa Yave vo katusadisa twalembi vanga yovo vova konso diambu dilenda vezesa e nkumbu andi. Ka tufwete kala nze akaka ko muna tandu kiantete ana ke basadilanga ko mana balonganga kw’akaka.  Paulu wabasonekena vo: “E nkumbu a Nzambi itiangukinanga vana ven’azula muna kuma kieno.”—Roma 2:21-24.

8, 9. Yika nona kisonganga una Yave kesadisilanga awana bezitisanga nkumbu andi?

⁸ Tuvanganga mawonso tulenda mu zitisa nkumbu a Yave. Mpangi mosi ankento kuna Noruega wasala yandi mosi kaka yo mwana wa mvu miole vava nkaz’andi kafwa, wavova vo: “Kolo kiampasi kikilu kiakala muna zingu kiame. Yasambanga lumbu yawonso ye konso ola mu lomba nkuma kimana yakala ye ngindu zasikila yo lembi vana nzila kwa Satana kaveza Yave mu kuma kia nzengo zambi ndenda baka yovo kondwa kwame kwa kwikizi. Yazolanga zitisa e nkumbu a Yave yo sadisa mwan’ame kimana kamonana diaka yo se diandi muna Paradiso.”—Ngana 27:11.

⁹ Nga Yave wavana e mvutu za sambu yandi? Elo. Wakasakeswanga ekolo kakalanga vamosi ye mpangi z’akala ye z’akento. Vava vavioka mvu ntanu, wakazala yo nkuluntu. O mwan’andi, owau una ye kimbuta kia mvu 20, se mpangi wavubwa. Wavova vo: “Ngina kikilu ye kiese wau vo nkaz’ame wansadisa mu sansa mwan’ame.”

10. Aweyi Nzambi kevelelesela mvimba e nkumbu andi?

¹⁰ Yave ovelelesa mvimba e nkumbu andi vava kefwasa awonso bekumvezanga yo lembi kunzitisa nze Mfumu au. (Tanga Yezekele 38:22, 23.) Muna kolo kiakina, wantu bekituka alunga, awonso kuna zulu ye va ntoto besambila kaka Yave yo kembelela nkumbu andi avauka. I bosi, o Se dieto dianzodi ‘okala wonso muna wonso.’—1 Korinto 15:28.

11, 12. Muna mvu wa 1876, nkia diambu Yave kasadisila nkangu andi mu bakula?

¹¹ Vitila Yesu kavutuka kuna zulu, alongoki andi banyuvula vo: “E Mfumu, nga i ntangwa yiyi ovutul’e kintinu kwa Isaele?” Yesu wabavutula vo ke kiau ko i kolo bafwete zaya e ntangwa ina Kintinu kia Nzambi kiyantika yala. Wavovesa alongoki andi vo basia sungididi muna salu kiamfunu kia samuna e nsangu zambote. (Tanga Mavangu 1:6-8.) Kansi, wabalonga mpe vo basambanga vo Kintinu kia Nzambi kiza yo vingila e ntangwa kikwiza. Ekiaki i kuma tukwamanenanga samba vo Kintinu kiza.

¹² Vava kiafinamanga e ntangwa ina Yesu keyantika yala kuna zulu, Yave wasadisa nkangu andi mu bakula o mvu keyantika yala. Muna mvu wa 1876, mpangi Charles Taze Russell wasoneka longi diakala yo ntu a diambu vo: “Tandu ya Zula Nkia Ntangwa Ifokoka?” Wasasila vo e “kolo nsambwadi” iyikwanga muna ungunza wa Daniele, yau imosi ye “tandu ya zula” iyikwanga muna ungunza wa Yesu. E longi diadina diavova vo e kolo yayina ifokoka muna mvu wa 1914. *—Daniele 4:16; Luka 21:24.

13. Adieyi diabwa muna mvu wa 1914? E mambu mevangamanga ova nza tuka muna mvu wa 1914 adieyi mesonganga?

¹³ Muna mvu wa 1914, vita yayantika kuna Europa ye ke vavioka kolo ko yasayana mu nza yawonso. Muna kuma kia vita, o mvengele wakota. Vava e vita yafokoka muna mvu wa 1918,  vavaika kimbevo kiavonda ulolo wa wantu lutila nkutu ana bafwa muna vita. Mawonso mama mena muna “sinsu” kayika o Yesu. E sinsu kiasonga vo Yesu wayadikwa se Ntinu kuna zulu muna mvu wa 1914. (Matai 24:3-8; Luka 21:10, 11) Muna mvu wauna, wayantika nuana yo sunda. (Lusengomono 6:2) Yesu wayinga Satana ye nkuya miandi kuna zulu yo kubaveta ova ntoto. Tuka wauna, ungunza wayantika lungana. Uvovanga vo: “Tâtu kwa nza yo kalunga, e kuma kadi, o Nkadi ampemba okulumukini oko nwina, wina yo makasi mayingi, wau kazeye wo vo kolo kiandwelo kaka kena kiau.”—Lusengomono 12:7-12.

14. (a) Ekuma twakinu sambila vo Kintinu kia Nzambi kiza? (b) Nkia salu kiamfunu tufwete sala owau?

¹⁴ O ungunza una muna kapu kia 12 kia Lusengomono ukutusadisanga mu bakula e kuma mambu mambi mayantikila vangama ova ntoto tuka Yesu kayadikilwa se Ntinu a Kintinu kia Nzambi. Kana una vo Yesu mu yala se kena kuna zulu, Satana wakinu yala e nza. Kansi ke kolo ko, Yesu ‘ofokola e nsund’andi’ vava kesukisa umpumbulu wawonso ova ntoto. Ekolo tuvingilanga e ntangwa yayi, tukwamanana samba vo Kintinu kia Nzambi kiza yo kuyivana muna salu kia samuna e nsangu zambote za Kintinu kiaki. E salu tusalanga kilungisanga ungunza wa Yesu, oku vo: “E nsangu zazi zambote za Kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.”—Matai 24:14.

15, 16. Ekuma tufwete sambilanga vo luzolo lwa Nzambi lwavangama ova nza?

¹⁵ Se vioka tezo kia 6.000 ma mvu, o luzolo lwa Nzambi lwavangamanga ova nza. Ekiaki i kuma Yave kavovela vo yawonso “yambote kikilu” yakala. (Etuku 1:31) Kuna kwalanda, Satana wakolama. Tuka muna ntangwa yayina, wantu  ayingi ke bevanganga luzolo lwa Nzambi ko. Kansi, o unu vena ye vioka mafuku nana (8 milhões) ma wantu besadilanga Yave. Besambanga vo luzolo lwa Nzambi lwavangama ova nza ye bevanganga mpe luzolo lwa Nzambi. Bezingilanga mu mpila iyangidikanga Nzambi yo longa akaka oma ma Kintinu kiandi kuna vema kwawonso.

¹⁶ Kasikil’owu, misionario mosi ku África una ye kimbuta kia mvu 80, ona wavubwa mu mvu wa 1948, wavova vo: “Nkumbu miayingi isambanga vo awonso bena nze mameme bawá e nsangu zambote yo sadiswa kimana bazaya Yave ekolo e ntangwa yakinu. Vana ntandu, avo muntu nzolele sila umbangi, ilombanga e ngangu kimana yakotesa e ludi muna ntim’andi. Muna kuma kia mameme mana masoloka kala, isambanga kimana Yave kasambula e ngolo zeto za kubalunga-lunga.” Mpangi ndioyo ankento una vo se nunu wantu ayingi kasadisi kala mu zaya Yave. Nga olenda sungamena mpangi zankaka z’anunu bevanganga luzolo lwa Yave kuna vema kwawonso?—Tanga Filipi 2:17.

17. Aweyi omonanga mu kuma kia mana Yave kesinga vanga mu kuma kia wantu yo ntoto?

¹⁷ Tufwete kwamanana samba vo luzolo lwa Nzambi lwavangama yavana Yave kefwasa mbeni zandi zawonso ova ntoto. I bosi, e nza ikituka se paradiso, mazunda ye mazunda ma wantu befulwa. Yesu wavova vo “e ntangwa ikwiza, ina ikala vo awonso bena muna nkala (ziami) bewa nding’andi, bevaika.” (Yoane 5:28, 29) Yindula e kiese tukala kiau vava tumonana diaka ye azolw’eto ana bafwa! Nzambi ‘okunguna mansanga mawonso’ muna meso meto. (Lusengomono 21:4) Ayingi mun’awana befuluka i wantu bakala vo ‘mindembi songa’ ana ke bakala ye lau dia longoka oma ma Yave yo Yesu ko. Tukala ye kiese kia kubalonga luzolo lwa Nzambi kimana bavua “moyo a mvu ya mvu.”—Mavangu 24:15; Yoane 17:3.

18. Nkia mambu o wantu bevuanga kikilu o mfunu?

¹⁸ Vava Kintinu kia Nzambi kikwiza, kivelelesa nkumbu andi. Wantu awonso ye mbasi besambila Yave entwadi. Elo, Nzambi ovana o wantu ina bevuanga kikilu o mfunu vava kevana e mvutu za ndomba tatu zantete zina muna sambu kia S’eto. Muna longi dilanda, tubadika mambu mankaka mamfunu katulonga o Yesu twalombanga muna sambu.