1-3. Ekuma mpangi mosi ankento kakadila ye ziku vo Yave wazaya e nsatu zandi?

LANA, una vo mviti a nzila, kesinga vilakana ko dina diabwa vava kakala kuna Alemanha muna mvu wa 2012. Una ye ziku vo Yave wavana e mvutu za sambu yole kalomba. Vava kayendanga kuna yanzala kia ndeki muna kumbi dia ntoto (com­boio), wasamba kwa Yave kansadisa mu solola muntu kalenda sila umbangi. Vava kalwaka kuna yanzala kia ndeki, wawana vo e ndeki ina kekwendela mu lumbu kilanda kaka ilondoka. Lana walomba lusadisu kwa Yave kadi fulu kia leka kavavanga, kansi kakala diaka ye nzimbu zafwana ko.

² Vava kafokola samba, wawá muntu wamvovesa vo: “Kiambote kiaku e Lana. Nki osalanga okwaku?” Toko diadi ku sikola mosi batangila. Ntwadi kakala yo ngudi andi yo nkak’andi ankento ana bayenda kunsindika vava kayendanga kuna África do Sul. Vava Lana kabazayisa diambu kanuananga diau, o ngudi a toko diadina yo nkak’andi bambokela kenda leka kuna nzo au. Yuvu yayingi banyuvula mu kuma kia  mana kakwikilanga ye salu kiandi kia kimviti a nzila.

³ Muna lumbu kialanda, vava bamanisa dia madia ma mene, Lana wavana diaka mvutu za yuvu bayuvulanga mu kuma kia Nkand’a Nzambi. Lana wabalomba e nomba ya telefone ye email kimana mpangi ankaka kabakingula yo kwamanana vana mvutu za yuvu yau. Lana watoma lwaka kuna nsi andi ye wakinu sala se mviti a nzila. Una ye ziku vo Yave wawá e sambu yandi, wazaya e nsatu zandi yo kunsadisa.—Nkunga 65:2.

4. Nkia mambu tubadika mu longi diadi?

⁴ Vava tubwilanga e mpasi za kinsalukisa, diasazu dikalanga mu lomba lusadisu kwa Yave muna sambu. Yave una ye kiese kia vana mvutu za sambu yeto. (Nkunga 34:15; Ngana 15:8) Kansi, e sambu kia S’eto kikutulonganga vo vena ye mambu mankaka mamfunu tufwete lombanga muna sambu. Mu longi diadi, tubadika una e ndomba yá zansuka za sambu kia S’eto zilenda kutusadisila mu songa kwikizi muna Yave.—Tanga Matai 6:11-13.

5, 6. Ekuma Yesu katulongela vo twasambanga mu kuma kia “dia kweto” kana nkutu vo madia mayingi tuna mau?

⁵ Yesu watulonga vo twalombanga “dia kweto,” ke “dia kwame” kaka ko. Mpangi Victor una vo nkengi a zunga ku África, wavova vo: “Ivutulanga matondo kwa Yave kadi mono yo nkaz’ame ke tutokananga ko mu zaya kuna kutuka madia tudia mbazi yovo tokana mu kuma kia nzimbu za futila e nzo. Mpangi zeto bekutulunga-lunganga lumbu yawonso. Kansi, isambanga kimana awana bekutusadisanga basunda e mpasi za zingu benuananga zau.”

⁶ Tulenda kala ye madia mayingi, kansi vena ye mpangi zayingi bena vo asukami. Akaka bebwilanga sumbula. Ke tufwete sambanga kaka mu kuma kiau ko, kansi tulenda mpe vanga diambu mu kubasadisa. Kasikil’owu, tulenda kubakayila ina tuna yau. Tulenda mpe vana tukau mu yikama e salu kia nkangu a Yave mu nza yawonso. Tuzeye wo vo tukau tweto tusadisanga ampangi bena mu mpasi.—1 Yoane 3:17.

7. Ekuma Yesu kalongela vo ke tufwete ‘telamenw’owu wa mbazi mene e mioyo ko’?

⁷ Vava Yesu kalonga e sambu kia S’eto, wavova vo twalembi sianga e sungididi kiasaka muna madia, mvuatu yovo lekwa yankaka. Wavova vo avo Yave olunga-lunganga e mvuma, “nga ke yeno keluta vwika ko, oyeno akwa filukwikilu e? Dianu vo, ke nutelamw’e mioyo ko, nwavova vo, . . . , Nkia mpwata tuvwata?” I bosi, wavutukila vo: “Ke nutelamenw’owu wa mbazi mene e mioyo ko.” (Matai 6:30-34) Ke dina mfunu ko twatokanenanga oma ma mbazi. Kansi, tufwete yangalelanga ina tuna yau mu lungisa e nsatu zeto za unu. Kasikil’owu, tulenda samba kimana twakala ye fulu kia zingila, salu kikutusadisa mu lungisa e nsatu za esi nzo eto yovo ngangu mu baka e nzengo zambote  mu kuma kia vimpi weto. Kansi, vena ye diambu disundidi o mfunu tufwete lombanga muna sambu.

8. E mvovo mia Yesu mu kuma kia dia kweto kwa lumbu ke lumbu adieyi mikutusungamesanga? (Tala fwaniswa kuna lubantiku lwa longi.)

⁸ E mvovo mia Yesu mu kuma kia dia kweto kwa lumbu ke lumbu mikutusungamesanga diambu diankaka kavova: “Ke mu dia kaka ko i kazingila muntu, kansi mu konso edi divaikidi omu nu’a Nzambi.” (Matai 4:4) Muna kuma kiaki, tufwete sambanga vo Yave kakwamanana kutulonga yo kutuvana ina tuvuidi o mfunu muna kumfinama.

9. Ekuma masumu meto menena nze mfuka?

⁹ Yesu wavova vo: “Utuyambulwila mfuka zeto.” Lumbu kiakaka wavova vo: “Utuyambulwila masumu meto.” (Matai 6:12; Luka 11:4) Wavova e mvovo miami kadi e masumu meto mena nze mfuka. Eyingidilu dia mvu wa 1951, diavova vo vava tusumukanga, dina nze yeto tuna ye mfuka kwa Yave. Mfuka tuna yau kwa Yave ya kunsonga zola yo kunlemvokela. Muna kuma kiaki, avo tusumukini Yave, ke tufutidi mfuk’andi ko. Eyingidilu diavova vo Yave avo ozolele, olenda vonda kikundi yo yeto. Diakudikila vo: “O sumuka i lembi songa zola kwa Nzambi.”—1 Yoane 5:3.

10. Ekuma Yave kalenda lolokela masumu meto? Adieyi difwete kutufila mu vanga?

 ¹⁰ Tuvutulanga matondo kwa Yave wau kakubika kimenga kia Yesu kia lukûlu mu loloka masumu meto. E lumbu yawonso divavanga vo Yave katuloloka. Yesu wafwa mu kuma kieto se vioka 2.000 ma mvu. Kana una vo i wau, twakinu vua nluta mia lukûlu yamu unu. Tufwete vutulanga matondo kwa Yave lumbu yawonso mu kuma kia lukau lwalu lwamfunu. Ke mosi ko mu yeto wadi lenda futa lukûlu twavuanga o mfunu mu vevolwa muna sumu ye lufwa. (Tanga Nkunga 49:7-9; 1 Petelo 1:18, 19.) E mvovo “utuyambulwila masumu meto” mina muna sambu kia S’eto mikutusungamesanga vo mpangi zeto mpe lukûlu bavuidi mfunu, nze una yeto tuvuididi lo o mfunu. Yave ozolanga vo twayindulanga mpangi zeto kumosi ye ngwizani au yo yandi. Ediadi divavanga vo twabalolokanga vava bekutuvanganga e mbi. Nkumbu miayingi e mbi bekutuvanganga mpangi zeto vilwa wakete kwandi, kansi, vava tukubalolokanga, tusonganga vo zola tukubazolanga. Tusonganga mpe vo tuvutulanga matondo wau Yave kekutulolokanga.—Kolosai 3:13.

11. Ekuma tufwete lolokelanga akaka?

¹¹ Wau vo tu wantu alembi lunga, ezak’e ntangwa dilenda kala diampasi mu loloka awana bekutuvanganga e mbi. (Fuka 19:18) Avo tuyantikidi zayisa kwa wantu dina batuvangidi, akaka muna nkutakani balenda kuyisia muna diambu diadi. O vanga wo dilenda fwasa ungudi muna nkutakani. Avo tuyambwidi vo ediadi diakwamanana, disonga vo ke tuyangalelanga lukûlu ko luna vo i lukau lwa Nzambi ye ke tuvua nluta mia lukûlu ko (Matai 18:35). Avo ke tulolokele akaka ko, Yave mpe ke kutuloloka ko. (Tanga Matai 6:14, 15.) Vana ntandu, avo tuzolele vo Yave katuloloka, ke tufwete vanga ko mana kemenganga.—1 Yoane 3:4, 6.

12, 13. (a)Nkia diambu diabwila Yesu vava kavubwa? (b) Ekuma ke tufwete tumbila akaka ko vava tubwanga muna ntonta? (c) Adieyi Yesu kasonga muna sikila ye kwikizi yamuna lufwa?

¹² E mvovo mina muna sambu kia S’eto vo “kutufidi ko muna umpukumuni,” mikutusungamesanga dina diabwila Yesu vava kavubwa. Mwand’a Yave wamfila muna makanga kimana “kavukumunwa kwa Nkadi ampemba.” (Matai 4:1; 6:13) Ekuma Yave kayambulwila vo ediadi diavangama? Yave wafila Yesu ova ntoto mu singika diambu dimosi diavaika vava Adami yo Eva babembola luyalu lwa Yave. O ukolami wau wavaikisa yuvu yavavanga ntangwa mu vaninwa e mvutu. Kasikil’owu, nga diambu diakondwa mu mpila ina Yave kavangila wantu? Nga o muntu alunga olenda kwamanana songa kwikizi kwa Yave avo otontelo kwa ‘ndiona wambi’? Nga e zingu kieto kiambote kiadi kala kele vo wantu bakiyala yau kibeni? (Etuku 3:4, 5) Kuna sentu, vava yuvu yayi yawonso ivaninua e  mvutu mu mpila ina Yave kazolele, vangwa yawonso kuna zulu yo va ntoto bezaya vo luyalu lwa Yave lusundidi o wete.

¹³ Wau vo Yave wavauka, ke tontanga muntu ko muna mbi. Satana yandi otontanga wantu. (Matai 4:3) Satana ovanganga mawonso muna kututonta. Kansi oyeto tulenda sola. Konso muntu muna yeto olenda sola kana vo ozizidila ntonta yovo ve. (Tanga Yakobo 1:13-15.) Vava katontwa kwa Satana, vana vau Yesu wantelamena muna yika Diambu dia Nzambi. Yesu wasonga kwikizi muna Nzambi. Kansi, Satana kanyambula ko. Wavingila “yavana kevw’e ntangwa” muna tonta diaka Yesu. (Luka 4:13) Kansi muna ntonta zawonso za Satana, Yesu walemvokela Nzambi nze Nyadi andi. Wasonga vo muntu alunga olenda sikila ye kwikizi muna Yave kana nkutu muna ntangw’a mpasi. Satana wakinu tonta alandi a Yesu, kumosi yo ngeye kimana wakolamena Yave.

14. Adieyi tuvuidi o mfunu muna zizidila ntonta?

¹⁴ E yuvu yavaikiswa mu kuma kia luyalu lwa Yave ifwete vaninwa e mvutu. Kiaki i kuma Yave keyambulwilanga vo Satana katutonta yamu wau. Yave ke ‘kutufilanga muna umpukumuni ko.’ O unu, Yave una ye vuvu vo tulenda sikila ye kwikizi muna yandi ye ozolele kutusadisa. Kansi, ke kutukomekenanga ko mu vanga edi diansongi. Ozitisanga o nswa tuna wau wa kuyisolela. Muna kuma kiaki, oyambulanga vo yeto kibeni twabaka e nzengo kana vo tusikila ye kwikizi yovo ve. Muna venga bwa  mu ntonta, mambu mole tufwete vanga: Finama Yave yo kwamanana lomba lusadisu lwandi muna sambu. Aweyi Yave kevaninanga e mvutu za sambu yeto mu zizidila ntonta?

15, 16. (a) Nkia ntonta tufwete venga? (b) Nani tufwete tumba avo tuyivene mu vangu diambi?

¹⁵ Yave okutuvananga mwand’andi avelela kimana watusadisa mu sunda e ntonta za Satana. Yave watuvana mpe Nkand’a Nzambi ye nkutakani mu kutulukisa muna vonza. Kasikil’owu, okutulukisanga vo twalembi sadilanga e ntangwa, nzimbu ye ngolo zeto mu mambu makondwa mfunu. Mpangi Espen yo Janne mu nsi mosi ya umvuama bezingilanga kuna Europa. Mvu miayingi basala e salu kia kimviti a nzila mu zunga kimosi kiavuanga ateleki ayingi o mfunu. Vava bawuta mwan’au antete, bayambula e salu kia kimviti a nzila. Owau, wana wole bena yau. Mpangi Espen wavova vo: “Nkumbu miayingi tusambanga kwa Yave kimana twalembi bwa mu ntonta wau ke tusalanga diaka kwayingi ko muna salu kia Yave. Tulombanga kwa Yave vo katusadisa twasikila muna mwanda yo kwamanana songa vema muna salu kia umbangi.”

¹⁶ E ntonta zankaka tufwete venga i tala mavangu ma zumba. Avo tuyivene mu vangu diadi, ke tulendi tumba Satana ko. Ekuma? E kuma kadi Satana ye nz’andi ke balendi kutukomekena ko mu vanga diambu diambi. Akaka betalanga mavangu ma zumba kadi ke bevengomonanga ngindu zambi ko. Kansi, ayingi muna mpangi zeto bevenganga e vangu diadi, oyeto mpe tulenda dio venga.—1 Korinto 10:12, 13.

17. (a) Aweyi tulenda songela vo tuzolanga vo Yave ‘katuvuluza muna mbi’? (b) Nkia luvevoko lufinamene?

¹⁷ Aweyi tulenda songela vo tuzolele vo Yave ‘katuvuluza muna mbi’? Ka tufwete kala tu “a nza ko” yovo ‘zola nza, ngatu eyi in’omu nza.’ (Yoane 15:19; 1 Yoane 2:15-17) Ekwe luvevoko tukala lwau vava Yave kefwasa Satana ye nza yayi yambi! Kansi, yavana kilwaka e lumbu kiaki, tufwete sungamenanga vo Satana wina yo “makasi mayingi, wau kazeye wo vo kolo kiandwelo kaka kena kiau.” Ovanga mawonso kalenda kimana katufila mu yambula sadila Yave. Muna kuma kiaki, tufwete kwamanana samba kimana Yave katutanina muna ntambu mia Satana.—Lusengomono 12:12, 17.

18. Avo tuzolele vuluka vava nza ya Satana ifwaswa, adieyi tufwete vanga?

¹⁸ Nga ozolele zingila mu nza yakondwa Satana? Ozevo, kwamanana samba vo Kintinu kia Nzambi kiza, nkumbu a Nzambi yazitiswa, o luzolo lwandi lwavanga ova ntoto. Bundang’e vuvu muna Yave kimana kalunga-lunga yo kuvana mawonso ovuidi o mfunu mu sikila ye kwikizi muna yandi. Elo, vanga wawonso olenda mu zingila e ngwizani ye sambu kia S’eto.