1, 2. (a) Nkia ngwizani ina vana vena songa kwikizi kwa Yave yo lembi yikama ntantani za nza yayi? (Tala e fwaniswa ova ntandu.) (b) Wantu ayingi ku nkia sambu bekuyisianga? Nkia mfwilu ditwasanga?

SELO ya Yave ke bekuyisianga ku konso sambu dia luyalu ko ngatu kuyisia mu mambu mevambulanga wantu nze ntatani za makanda ye fu ya kisi nsi. Ekuma? E kuma kadi Yave tuzolanga, tusonganga kwikizi kwa yandi yo kunlemvokela. (1 Yoane 5:3) Kiakala nkia fulu tuzingilanga yovo nkia nsi twawutukila, nkanikinu mia Nzambi tulemvokelanga. O songa kwikizi muna Yave ye Kintinu kiandi, i diambu disundidi o mfunu muna zingu kieto. (Matai 6:33) Ekiaki i kuma tulenda vovela vo ‘ke tu a nza ko.’—Tanga Yoane 17:11, 15, 16; Yesaya 2:4.

² O unu, wantu ayingi mu nza beyikamanga nsi au, kanda, fu ya kisi nsi yovo buka ya nsaka. Diankenda kikilu vo ediadi difilanga ayingi muna yau mu kala ye fu kia vava sunda akaka yo mengaziana. Ezak’e ntangwa bevondanga nkutu awana bena ku sambu diankaka. Kana una vo ke tukuyisianga mu ntantani zazi ko, zilenda kututwasila mfwilu  kumosi y’esi nzo eto. Tulenda mweswa mpasi kondwa kuma. Avo ayadi babakidi e nzengo zambi, diasazu mu kuyisia ku sambu diankaka, kadi Nzambi watuvanga ye ngangu za swaswanesa edi diambote y’edi diambi. (Etuku 1:27; Nsiku 32:4) Aweyi omonanga avo diambu diambi divangamene? Nga osiang’e ngolo zalembi kuyisia ku konso sambu?

3, 4. (a) Ekuma ke tukuyisilanga mu ntantani za nza yayi ko? (b) Adieyi tulongoka mu longi diadi?

³ Wantu ayingi beyikamanga vita kadi ayadi bekubakwikidisanga vo i diau bafwete vanga awana bezolanga nsi au. Kansi oyeto Yesu tulandanga. Muna kuma kiaki, ke tukuyisianga mu mambu ma mbumba ko ngatu nuana vita. (Matai 26:52) Akristu akieleka ke beyindulanga ko vo vena ye fulu isundidi fulu yankaka mu nza ya Satana. (2 Korinto 2:11) Ke tukuyisianga muna ntantani za nza yayi ko.—Tanga Yoane 15:18, 19.

⁴ Wau vo tu wantu alembi lunga, akaka muna yeto balenda kala ye ngindu zabendomoka mu kuma kia awana baswaswana yo yeto. (Yeremiya 17:9; Efeso 4:22-24) Mu longi diadi, tulongoka nkanikinu milenda kutusadisa mu nuanisa yo sunda e ngindu zazi zivambanesanga wantu. Tubadika mpe una tulenda yikamena Kintinu muna kuyilonga mu badikila mambu una Yave yo Yesu bebadikilanga mo.

5, 6. Vava Yesu kakala ova ntoto, aweyi kabadikilanga wantu a makanda maswaswana? Ekuma?

⁵ Avo diampasi dikalanga kwa ngeye mu lembi kuyisia mu mambu ma nza, ukiyuvula: ‘Kele vo Yesu, adieyi kadi vanga?’ Vava Yesu kakala ova ntoto, esi Yuda, Ngalili ye Samaria ke bawizananga ko. Badika yaka nona. Ayuda y’esi Samaria ke bavovananga ko. (Yoane 4:9) Kitantu kiayingi kiakala vana vena Afarisi ye Asaduki. (Mavangu 23:6-9) Ayuda ana balongoka Nsiku babanzanga vo basundidi awana ke balongoka wo ko. (Yoane 7:49) Ayingi bamenganga akwa mpaku y’esi Roma. (Matai 9:11) Kansi, Yesu kayisianga mu ntantani zazi ko. Kana una vo wataninanga e ludi kia Yave yo zaya vo e Isaele yakala se zula kiamfunu kwa Nzambi, kasidi longa alongoki andi ko vo basundidi wantu ankaka. (Yoane 4:22) Kansi, wabalonga vo bazolanga wantu awonso.—Luka 10:27.

⁶ Ekuma Yesu kayindulwilanga ko vo vena ye buka kia wantu kisundidi yankaka? Mu kuma kia una yandi yo Se diandi bebadikilanga o wantu. Yave wavanga wantu kimana bazadisa e nza ye makanda maswaswana. (Etuku 1:27, 28) Muna kuma kiaki, Yave yo Yesu ke beyindulanga ko vo vena ye kanda, nsi yovo ndinga isundidi zankaka. (Mavangu 10:34, 35; Lusengomono 7:9, 13, 14) Tufwete tangininanga e mbandu au yalunga.—Matai 5:43-48.

7, 8. (a) Ku nkia sambu twina? Ekuma? (b) Adieyi tufwete sungamenanga mu kuma kia mpasi za wantu?

 ⁷ Ekuma ke tuyikamenanga ayadi a nza yayi ko? Kadi ku sambu dia Yave twina. Yandi i Mfumu eto. Muna Edene, Satana wavova vo Yave ke nyadi ambote ko. Satana ozolele vo wantu bakwikila vo e mpil’andi ya vangila o mambu isundidi eyi ya Nzambi. Yave oyambulanga vo twayisolela kana nkia sambu tukala. Kansi, adieyi tuvova mu kuma kiaku? Nga olemvokelanga Yave wau una ye ziku vo e mpil’andi ya vangila o mambu isundidi o wete? Nga una kikilu ye ziku vo Kintinu kiandi kaka kifokola e mpasi zeto? Nga oyindulanga vo wantu balenda kiyala mu mpila yambote kondwa Nzambi?—Etuku 3:4, 5.

⁸ Kasikil’owu, avo muntu uyuvuidi mu kuma kia una obadikilanga e yaka buka ya tuyalu yovo nkubika zankaka, nkia mvutu ovana? Vena ye buka bevovanga e ludi yo zola sadisa wantu. Kansi, tuzeye wo vo Kintinu kia Yave kaka kilenda fokola mpasi za wantu ye mbi yawonso. Vana fulu kia konso muntu kavanga dina kazolele, luludiku lwa Yave tulandanga muna nkutakani. Ekiaki i kuma e nkutakani inina yo ungudi.

9. Nkia fu bakala kiau Akristu ankaka muna tandu kiantete? Adieyi bafwana vanga?

⁹ Muna tandu kiantete, Akristu ankaka kuna Korinto batantananga muntu yo nkwandi yo vova vo: “Mono i wa Paulu; mono i wa Apolo; mono i wa Kefa; mono i wa Kristu.” Vava Paulu kawá e diambu diadi, wakendalala kikilu. Diambu dianene kikilu diakala kadi luvuvamu lwa nkutakani diasianga mu vonza. Muna kuma kiaki, wayuvula mpangi zandi z’akala ye z’akento vo: “Nga Kristu ovambwilu e”? Paulu wabavana longi vo: “Inuwondelele abunzi, muna nkumbu a Mfumu eto Yesu Kristu, yeno awonso nuvova dimosi, ke vakadi mpambula ko vovo nwina; nwakunkukila kumosi muna ntima mosi yo lukanu lumosi.” Diau dimosi mpe o unu. Ke tufwete sianga mpambula ko muna nkutakani.—1 Korinto 1:10-13; tanga Roma 16:17, 18.

10. Nkia diambu Paulu kasungamesa Akristu? Adieyi tulongokele?

¹⁰ Paulu wasungamesa Akristu akuswa vo e kisi nsi kiau ku zulu kina, ke bafwete sianga sungididi ko mu “oma manza.” (Filipi 3:17-20) * Akristu akuswa i akunzi ana besunzulanga Nzambi yo Kristu. Vava nkunzi kekalanga ku nsi ya kinzenza, ke kuyisianga mu mambu ma luyalu lwa nsi yayina ko. Diau dimosi mpe kwa Akristu akuswa, ke diambote ko bayisianga mu mambu ma tuyalu twa nza yayi. (2 Korinto 5:20) Awana bena ye vuvu kia zingila ova ntoto  yakwele mvu, bafwete mpe songanga kwikizi kiau muna Kintinu yo lembi kuyisia mu ntantani za nza yayi.

11, 12. (a) Nkia ngindu tufwete venga avo tuzolele yikama Kintinu kia Nzambi ye kwikizi kiawonso? (b) Aweyi mpangi mosi ankento kabadikilanga wantu ankaka? Adieyi diansadisa mu soba e ngindu zandi?

¹¹ Mu nza yawonso, wantu betoma zolanga awana bawutukila mu nsi mosi, bena ye fu ya kisi nsi yo vova ndinga mosi. Nkumbu miayingi bekuyisananga mu kuma kia fulu bawutukila. Kansi, yeto ke tufwete yambula ko vo e ngindu zazi zatusambukila. Tufwete soba e ngindu zeto yo longa ntona zeto kimana twayivambulanga ye nza. Aweyi tulenda wo vangila?

¹² Kasikil’owu, Mirjeta * wawutukila kuna nsi yayikilwanga vo Iugoslávia. Muna zunga kasansukila, wantu ke bazolanga esi Sérvia ko. Vava kalongoka oma ma Yave, wabakula vo Yave ke swaswanesanga makanda ko, Satana yandi ozolanga vo wantu bamengaziananga. Wavanga e ngolo za soba e mpila kabadikilanga o wantu. Kansi, vava vabwa e vita vana vena makanda ma nsi yayina muna zunga kazingilanga, Mirjeta wayantika diaka menga esi Sérvia. Kazolanga nkutu kubasila umbangi ko. Wazaya wo vo ediadi diambi kikilu. Muna kuma kiaki, wadodokela Yave kimana kansadisa mu katula e ngindu zazi. Wasamba mpe kimana kansadisa kakota muna salu kia kimviti a nzila. Mirjeta wavova vo: “Yabakula vo o sia sungididi muna salu kia umbangi dia lusadisu kikilu. Vava ikalanga muna salu kia umbangi, ivavanga tanginina zola kwa Yave, ediadi dikunsadisanga mu vengomona e ngindu zambi.”

13. (a) Adieyi diabwila mpangi Zoila? Adieyi kavanga? (b) Adieyi tulenda longoka muna nona kia mpangi Zoila?

¹³ Zoila, mpangi ankento wawutukila kuna México, wayenda kuna Europa. Muna nkutakani au, muna ye mpangi zatuka kuna zunga kiankaka kia América Latina. Mpangi Zoila wavova vo akaka muna yau basevanga e nsi ina kawutukila, fu ya kisi nsi ye nkunga miau. Wau vo wafunganga makasi, wasamba kwa Yave kimana kansadisa mu lembi lunda makasi muna ntima. Adieyi twadi vanga kele vo twakala vana fulu kiandi? Akaka muna mpangi zeto z’akala ye z’akento bakinu sia ngolo za venga e fu kia funga makasi vava bewanga mvovo mia lutiangu mu kuma kia nsi ina bawutukila. Muna kuma kiaki, ka tuzolele vova yovo vanga konso diambu ko dilenda fila wantu mu yindula vo e kanda diau disundidi e kanda diankaka. Ka tuzolele sia mpambani ko muna nkutakani yovo konso fulu twina.—Roma 14:19; 2 Korinto 6:3.

14. Adieyi dilenda kusadisa mu badikila wantu nze una Yave kekubabadikilanga?

¹⁴ Yeto awonso tuzeye wo vo selo ya Yave mu ungudi bena nze nkangu mosi. Muna kuma kiaki, ke tufwete yindulanga ko vo vena ye fulu yovo nsi isundidi zankaka. Kansi, dilenda kala vo esi nzo aku y’awana nwasansukila vamosi bafila mu luta zola e nsi ina wawutukila.  Nanga ezak’e ntangwa okalanga ye ngindu za bendomoka mu kuma kia wantu a nsi zankaka, fu ya kisi nsi, ndinga yovo se kia nitu. Adieyi dilenda kusadisa mu soba e ngindu zaku? Badikanga una Yave kemonanga mu kuma kia wantu bekuyisananga mu kuma kia nsi au yovo ana beyindulanga vo basundidi akaka. Vavululanga mu kuma kia diambu diadi muna longi dia ngeye kibeni yovo muna nsambila ya esi nzo. I bosi, lomba kwa Yave kasadisa mu badikila wantu nze una kekubabadikilanga.—Tanga Roma 12:2.

15, 16. (a) Aweyi akaka bekutubadikilanga wau vo twaswaswana? (b) Aweyi mase balenda sadisila wan’au mu sikila ye kwikizi muna Yave?

¹⁵ Tuzolele sadila Yave ye ntona zambote. Muna kuma kiaki, ezak’e ntangwa divavanga vo twakala twaswaswana ye akw’eto a salu, a sikola, mfinangani yovo ye yitu yeto. (1 Petelo 2:19) Yesu watulukisa vo akaka bekutusaula wau vo twaswaswana yo yau. Sungamena vo ayingi mun’awana bekutusianga kitantu ke bazeye diambu ko mu kuma kia Kintinu kia Nzambi. Muna kuma kiaki, ke bebakulanga ko e kuma dinina diamfunu kwa yeto mu yikama Kintinu vana fulu kia yikama tuyalu twa wantu.

¹⁶ Muna sikila ye kwikizi muna Yave, tufwete kunlemvokelanga kana nkutu  nkia diambu wantu akaka balenda vanga yovo vova. (Daniele 3:16-18) Dilenda kala diampasi, musungula kwa aleke, mu kala baswaswana yo wantu akaka. Mase, nusadisa wan’eno mu kala yo unkabu kuna sikola. Wan’eno balenda mona wonga wa lembi tonda kunda sinsu kia nsi yovo kembela miaka nkinzi mia nsi. Muna nsambil’eno ya esi nzo, nulenda longoka una Yave kebadikilanga mambu mama. Nubalonga una balenda toma sasila kw’akaka mana bekwikilanga kuna luzitu lwawonso. (Roma 1:16) Vana ntandu, avo divuilu o mfunu, nusadisa wan’eno muna kwenda mokena ye alongi au yo sasila mana nukwikilanga.

17. Nkia ngindu tufwete venga? Ekuma?

¹⁷ Yeto awonso tuyangalelanga madia, ndinga ye fu ya kisi nsi ina twasansukila. Kansi, nga yawonso tuyangalelanga isundidi ina wantu akaka beyangalelanga? Yave ozolanga vo twayangalela lekwa ya mpila mu mpila kavanga. (Nkunga 104:24; Lusengomono 4:11) Ozevo, ke tufwete yindulanga ko vo e mpila tuvangilanga mambu i yau isundidi o wete.

18. Ekuma tufwete badikila o wantu nze una Yave kekubabadikilanga?

¹⁸ Yave ozolele vo wantu a mpila zawonso banzaya, bansambila yo zinga yakwele mvu. (Yoane 3:16; 1 Timoteo 2:3, 4) Muna kuma kiaki, vava mpangi zeto bekalanga ye ngindu zaswaswana ye zeto, tufwete kalanga ye tima dia wá ngindu zau avo ngwizani zina ye nkanikinu mia Yave. Avo tuvanga wo, tukala ye zingu kiakiese yo tatidila ungudi ye mpangi zeto. Nze una tulongokele, wau vo tusonganga kwikizi muna Yave ye Kintinu kiandi, ke tukuyisianga mu ntantani za nza yayi ko. Ke tuzolanga fu kia lulendo ko ye kia vava sunda akaka, eyi yasayana mu nza yayi ya Satana. Tuvutulanga matondo wau vo Yave okutulonganga twazola luvuvamu yo kala alembami. Tumonanga nze una kamona o ntozi a nkunga ona wavova vo: “Wa, kuna kwa wete, kuna kwa kiese kwa mpangi bakadila vamosi!”—Nkunga 133:1.