1, 2. Muna Sono ya Kiyibere, o mvovo “nsikinw’a tambi” nki ulenda songa?

YAVE WA NZAMBI wavova vo: “Ezulu i kunda kiame, e nza i nsikinw’a tambi yame.” (Yesaya 66:1) Nzambi wayika mpe “nsikinw’a tambi” yandi vava kavova vo: “Zitisa nzitisa fulu kia tambi yame.” (Yesaya 60:13) Aweyi kazitisila yovo viengesela nsikinw’a tambi yandi? Ediadi aweyi disongele kw’awana bezingilanga ova nsikinw’a tambi yandi, i sia vo, ova ntoto?

² Muna Sono ya Kiyibere, o mvovo “nsikinw’a tambi” usadilwanga mpe mu yika tempelo yakala kuna Isaele yankulu. (1 Tusansu 28:2; Nkunga 132:7) Vana meso ma Yave, e tempelo yatoma vienga yakala kadi yakala se fulu kia nsambil’aludi. Yasadilwanga mu kembelela Yave ova ntoto.

3. Akieyi i fulu kia nsambil’aludi o unu? Nkia ntangwa yayantika?

³ Akieyi i fulu kia nsambil’aludi o unu? Ke nzo  yatungwa ko nze tempelo. Kansi, i tempelo ya kimwanda, ikembelelanga Yave lutila konso nzo. Nki i tempelo ya kimwanda? I nkubik’a Yave isadisanga wantu mu kituka akundi andi yo kunsambila. E nkubika yayi ina kadi Yesu wavana moyo andi se lukûlu. E nkubika yayi yayantika muna mvu wa 29 vava Yesu kavubwa yo kuswa nze Ngang’ambuta ya tempelo a Yave ya kimwanda.—Ayibere 9:11, 12.

4, 5. (a) Mun’owu wa nkand’a Nkunga 99, adieyi bafwete vanga asambidi a Yave? (b) Nkia kiuvu tufwete kiyuvula?

⁴ Tuvutulanga kikilu matondo mu kuma kia nkubik’a Nzambi ya nsambil’aludi. Tusonganga luyangalalu lweto vava tuzayisanga kw’akaka e nkumbu a Yave ye lukau katuvana lwa lukûlu. Tuna ye kiese kia zaya vo vena ye vioka mafuku nana (8 milhões) ma Akristu bekembelelanga Yave lumbu ke lumbu. Ekolo asambidi a mabundu mayingi bekuyivunanga vo vava befwa ku zulu bekwenda mu kembelela Nzambi, nkangu a Yave bazeye wo vo diamfunu mu kunkembelela owau ova ntoto.

⁵ Vava tukembelelanga Yave, tutangininanga e mbandu ya selo yakwikizi ya Nzambi beyikwanga muna nkand’a Nkunga 99:1-3, 5. (Tanga.) Akwa kwikizi nze Mose, Arone yo Samuele bayikamanga e nkubik’a Nzambi ya nsambil’aludi kuna nz’ankulu. (Nkunga 99:6, 7) O unu, vitila akuswa bena ova ntoto bayantika sala se anganga kumosi yo Yesu kuna zulu, besadilanga Yave ye kwikizi kiawonso muna tempelo ya kimwanda ova ntoto. Ulolo wa “mameme makaka” bekubayikamanga ye kwikizi kiawonso. (Yoane 10:16) E buka yau yole besadilanga Yave muna kintwadi. Muna kuma kiaki, tufwete kiyuvula: ‘Nga iyikamanga e nkubik’a Yave ya nsambil’aludi?’

6, 7. Nkia diambu diavangama muna nkutakani ya Akristu muna tandu kiantete? Adieyi diabwa muna mvu wa 1919?

⁶ Ke vavioka mvu 100 ko tuka nkutakani ya Akristu yasikidisilwa, umpengomoki wakota muna nkutakani nze una wasakulwa. (Mavangu 20:28-30; 2 Tesalonika 2:3, 4) Kuna kwalanda, diampasi diakala mu zaya asambidi akieleka a Nzambi. Mvu miayingi miavioka vitila Yave kasadila Yesu mu zaya ana basadilanga Nzambi muna tempelo andi ya kimwanda.

⁷ Muna mvu wa 1919, awana batondakana kwa Nzambi ye basadilanga muna tempelo andi ya kimwanda, bazayakana. Diavava vo bavanga e nsobani kimana e nsambil’au yatondakana kwa Yave. (Yesaya 4:2, 3; Malaki 3:1-4) Una vavioka mvu miayingi, mana Paulu wa ntumwa kamona muna mona-meso mayantika lungana.

8, 9. Nki i ‘paradiso’ kamona Paulu muna mona-meso?

 ⁸ E mona-meso kia Paulu kiasonama muna 2 Korinto 12:1-4. (Tanga.) Muna mona-meso kiaki, Yave wasonga Paulu diambu dimosi diadi vangama kuna sentu. Nki i ‘paradiso’ kamona Paulu? Diantete, ilenda songa e paradiso ina ikwiza ova ntoto ke kolo ko. (Luka 23:43) Diazole, ilenda kala vo i paradiso yalunga ya kimwanda muna nz’ampa. Diatatu, ilenda songa e zingu kiambote kina kuna zulu muna ‘paradiso a Nzambi.’—Lusengomono 2:7.

⁹ Ekuma Paulu kavovela vo “kawa mvovo milembi yikakana, mina ke misongele kwa muntu kayika mio ko”? E kuma kadi yayina ke yau ko i ntangwa kafwana sasila masivi mawonso kasongwa muna mona-meso. Kansi, o unu Yave okutuyambulanga vo twavovesa akaka e nsambu zina nkangu andi bevuanga tuka owau.

10. E paradiso ya kimwanda ke yau imosi ko ye tempelo ya kimwanda. Ekuma?

¹⁰ Nkumbu miayingi tuvovelanga e paradiso ya kimwanda. Kansi, nki i paradiso yayi? I luvuvamu luna Nzambi kevananga kwa nkangu andi. Kansi, e paradiso ya kimwanda ye tempelo ya kimwanda ke yau imosi ko. E tempelo ya kimwanda i nkubik’a Nzambi ya nsambil’aludi. E paradiso ya kimwanda isunzulanga awana betondakananga kwa Nzambi yo kunsambila muna tempelo andi ya kimwanda.—Malaki 3:18.

11. Nkia lau tuna diau o unu?

¹¹ Diakiese mu zaya vo tuka muna mvu wa 1919, Yave oyambulanga vo wantu alembi lunga balunga-lunga, siamisa yo wokesa e paradiso ya kimwanda. Nga ovananga moko muna salu kiaki kiamfunu? Nga oyangalelanga e lau dia sala kumosi yo Yave muna kuntwasila nkembo ova ntoto?

12. Aweyi tuzayidi vo e sono kia Yesaya 60:17 kilungananga? (Tala e fwaniswa kuna lubantiku lwa longi.)

¹² Yesaya wa ngunza wasakula vo nsobani zayingi zivangama muna nkubik’a Nzambi ova ntoto. (Tanga Yesaya 60:17.) Aleke yovo Akristu ampa tanga kaka betanganga yovo wá e nsobani zazi. Kansi, vena ye mpangi zayingi zamakala ye z’akento bakala ye lau dia mona e nsobani zazi. Akwa kwikizi awaya bena ye ziku vo Nzambi osadilanga Yesu wa Ntinu eto mu fila yo singika nkubik’andi. Vava tuwanga mana Akristu awaya anzolwa bevovanga mu kuma kia nsobani zazi, lukwikilu ye vuvu kieto muna Yave kiwokelanga.

13. Adieyi tufwete vanga mun’owu wa sono kia Nkunga 48:12-14?

¹³ Akristu awonso akieleka bafwete  zayisanga akaka oma ma nkubik’a Yave. Diasivi kikilu kadi kana una vo mu nza yambi ya Satana tuzingilanga, tuna ye luvuvamu ye kintwadi kia wana-ngudi. Kuna kiese kiawonso tufwete zayisanga e “mbandu ilanda” oma ma nkubik’a Yave ye oma ma paradiso ya kimwanda!—Tanga Nkunga 48:12-14.

14, 15. Nkia nsobani zavangama muna mvu wa 1970? Aweyi e nkubik’a Yave yabakila nluta?

¹⁴ Anunu ayingi muna nkutakani zeto bemonanga e nsobani zivangamanga ezi ziviengesanga e nkubik’a Yave ova ntoto. Besungamenanga vava e nkutakani zafilwanga kwa selo kimosi vana fulu kia filwa kwa buka ki’akuluntu, yovo vava nsi zafilwanga kwa selo kimosi kia vula vana fulu kia filwa kwa buka kia Afidi a Vula yovo vava mfidi a Sociedade Torre de Vigia kabakanga nzengo yandi mosi vana fulu kia Buka kia Selo Yambuta ya Mbangi za Yave. Kana una vo mpangi zazi zawonso bakala ye asadisi akwikizi, muntu mosi kaka wakalanga ye mbebe ya bak’e nzengo muna nkutakani, muna mavula ye kuna vula dia sina. I bosi, muna mvu wa 1970, nsobani yavangama kimana buka ya akuluntu yabakang’e nzengo vana fulu kia muntu mosi kaka.

¹⁵ Ekuma e nsobani zazi zatwasila e nluta muna nkubik’a Yave? E kuma kadi muna umbakuzi wa sono  ya Nkand’a Nzambi zatuka. Vana fulu kiakala kaka ye muntu mosi muna bakang’e nzengo, e nkubik’a Yave ibakang’e nluta muna fu yambote besonganga akuluntu awonso, yovo ‘tukau twa wantu’ katuvana o Yave.—Efeso 4:8; Ngana 24:6.

16, 17. Nkia nsobani zavangamene owau zikusivikisanga? Ekuma?

¹⁶ Yindula nsobani zavangamene ke kolo ko mu kuma kia nkanda mieto. Tukalanga ye kiese kia kaya e nkanda misadisanga wantu muna salu kia umbangi. Yindula mpe una tusadilanga umbangu wa nza mu samuna e nsangu zambote. Kasikil’owu, ulolo wa wantu beziulanga e nzil’eto ya Internete, jw.org, yo tambula lusadisu bavuidi o mfunu. Muna nsobani zazi zawonso, tumonanga o zola kwa Yave muna wantu.

¹⁷ Tuyangalelanga mpe e nsobani zavangwa mu kuma kia tukutakanu tweto kimana twakalanga ye ntangw’a nsambila y’esi nzo yovo longi dia yeto kibeni. Tuyangalelanga mpe e nsobani zavangamene mu kuma kia programa za lukutakanu lwa zunga ye lwa mvivu. Konso mvu mambu mu soba kaka mena. Tuvutulanga mpe matondo mu kuma kia malongi tuvewanga muna sikola zeto za Nkand’a Nzambi. Muna nsobani zazi zawonso, tuna ye ziku vo Yave ofilanga e nkubik’andi ye  okwamanana viengesa e paradiso yayi ya kimwanda.

18, 19. Aweyi tulenda toma viengesela e paradiso eto ya kimwanda?

¹⁸ Yave okutuvananga e lau dia toma viengesa e paradiso eto ya kimwanda. Kansi, aweyi tuvangilanga wo? Muna samunanga e nsangu zambote za Kintinu kuna vema kwawonso yo kitula wantu se alongoki. Konso ntangwa tusadisanga muntu mu kituka selo kia Nzambi, tusadisanga mu wokesa paradiso eto ya kimwanda.—Yesaya 26:15; 54:2.

¹⁹ Tusadisanga mpe muna viengesa paradiso eto ya kimwanda vava tuvanganga mawonso muna tomesa kiwuntu kieto kia Kikristu. Ediadi disadisanga mu tunta wantu ankaka beza muna paradiso eto ya kimwanda. Nkumbu miayingi, ke zayi weto kaka ko wa Nkand’a Nzambi utuntanga wantu, kansi fu yeto yambote ye nkal’eto ya luvuvamu ituntanga mpe wantu muna nkutakani, i bosi kwa Yave yo Yesu.

20. Mun’owu wa sono kia Ngana 14:35, nkia kani tufwete kala diau?

²⁰ O unu, Yave yo Yesu beyangalalanga vava bemonanga paradiso eto ya kimwanda yatoma vienga. E kiese tumonanga o unu ke kilendi tezaneswa ko ye kina tumona vava tusala mu kitula o ntoto se paradiso. Tufwete sungamenanga e sono kia Ngana 14:35, kivovanga vo: “Edienga dia ntinu dina muna ntaudi alungalala.” Yambula twalungalala ekolo tuvanganga mawonso mu viengesa e paradiso eto ya kimwanda.