1, 2. (a) Adieyi dikukwikidisanga vo Yave ozolanga nkangu andi? (b) Nkia nsatu bena zau o wantu?

ADIEYI dikukwikidisanga vo Yave ozolanga nkangu andi? Vitila wavana e mvutu za kiuvu kiaki, badika nona eyi: Mu mvu miayingi, mpangi z’akala ye z’akento bakasakesanga mpangi ankento una ye nkumbu Taylene. Bamvovesa vo kalembi tokananga kwayingi mu kuma kia dina kalendi vanga ko. Wavova vo: “Kele vo Yave kakadi yo zola mu mono ko, kadi kwamanana kumpana malongi ko.” Mpangi Brigitte, ona wafwila yakala, osansanga wana wole yandi mosi wavova vo: “O sansa o wana mu nza yayi iyalwanga kwa Satana, dimosi muna mambu masundidi e mpasi, musungula kwa se yovo ngudi osansanga wana yandi mosi. Kansi, ngina ye ziku vo Yave otoma kunzolanga kadi okumfilanga kana una vo inwananga ye mpasi zayingi. Ke yambulanga ko vo yabwilwa diambu dina kilenda zizidila ko.” (1 Korinto 10:13) Mpangi Sandra onuananga ye kimbevo kiampasi kilembi sasukanga.  Vava kakala kuna lukutakanu lwa mvivu, mpangi mosi ankento wansonga e ngemba. Nkaz’a mpangi Sandra wavova vo: “Kana una vo ke twazayana ko, o zola katusonga kwayangidika kikilu ntima mieto. Kana nkutu mambu makete mana bevanganga mpangi zeto mesonganga e ziku vo Yave zola ketoma kutuzolanga.”

² Yave wavanga wantu ye nsatu za zola yo zolwa. Kansi, diasazu dikalanga mu kendalala mu kuma kia mayela, kondwa nzimbu yovo vava tulembi monanga e nluta mia salu kieto kia umbangi. Avo tuyantikidi yindula vo Yave ke kutuzolanga diaka ko, tufwete sungamena vo mfunu twina vana meso mandi, okalanga yeto yo kutusimba muna koko kweto kwalunene mu kutusadisa. Kalendi kutuvilakana ko avo tusikidi ye kwikizi muna yandi.—Yesaya 41:13; 49:15.

3. Adieyi dilenda kutusadisa mu kala ye ziku vo Yave otoma kutuzolanga?

³ Ampangi tuyikidi kuna lubantiku bakala ye ziku vo Nzambi wakala yau muna ntangw’a mpasi. Yeto mpe tulenda kala ye ziku vo Nzambi wina yeto. (Nkunga 118:6, 7) Mu longi diadi, tubadika tukau yá katuvana Yave tusonganga e ziku vo zola kekutuzolanga: (1) Lekwa kavanga, (2) Nkand’a Nzambi, (3) sambu ye (4) lukûlu. O badika oma mambote kevanganga muna wete dieto dilenda kutusadisa mu kumvutula matondo mu kuma kia zola kwandi kulembi suka.—Tanga Nkunga 77:11, 12.

4. Adieyi tulenda longoka muna lekwa kavanga o Yave?

⁴ Vava tutalanga e lekwa kavanga o Yave, tubakulanga vo zola kikilu kekutuzolanga. (Roma 1:20) Kasikil’owu, Yave kavanga kaka ntoto ko kimana wazingilwa kwa wantu. Watuvana yawonso tuvuanga o mfunu muna yangalela e zingu. Wau vo dia tuvuanga o mfunu, Yave watuvana madia ma mpila mu mpila kimana twakalanga ye kiese vava tudianga. (Kimpovi 9:7) Mpangi mosi ankento una ye nkumbu Catherine oyangalelanga tala lekwa ina mu nsema, musungula muna nsungi isavukanga e nti kuna Canadá. Wavova vo: “Diasivi kikilu mu mona una e lekwa yawonso yavangilwa, nze una e mvuma zivaikilanga, e nuni zikangalanga ye ntietie zikwiza belanga vana dilu dia nuni dina vana ndambu a zianel’a kuku kiame. Yave zola kikilu kekutuzolanga wau katuvana lekwa yayingi ikutumwesanga kiese.” O Se dieto otoma zolanga e lekwa kavanga. Ozolanga mpe vo yatutwasila kiese.—Mavangu 14:16, 17.

5. Aweyi o zola kwa Yave kumonekenanga muna mpila kavangila wantu?

⁵ Yave watuvanga ye ngangu za sala yo yangalela e salu. (Kimpovi 2:24) Wavana wantu e kiyekwa kia zadisa e nza, sadila yo ye lunga-lunga mbizi, nuni ye lekwa yakaka yamoyo ina ova ntoto. (Etuku 1:26-28)  Watuvanga mpe ye fu yambote kimana twantangininanga.—Efeso 5:1.

6. Ekuma tufwete yangalelanga Diambu dia Nzambi?

⁶ Yave watuvana Diambu diandi wau vo zola kikilu kekutuzolanga. Dikutuvovesanga mana tufwete zaya mu kuma kiandi ye una kebadikilanga o wantu. Kasikil’owu, Nkand’a Nzambi ukutuzayisanga una Yave kamona vava Aneyisaele bankolamenanga. Muna Nkunga 78:38 tutanganga vo: ‘Oyandi, nkwa nkenda, obukika bi, kefwantekesa ko; Mpilula zingi kavilwidi makasi mandi, yo lembi yangumuna nsita zandi zawonso.’ O Badika e mvovo mia sono kiaki dilenda kusadisa mu bakula vo Yave zola kikilu kekuzolanga yo kulunga-lunga. Tulenda kala ye ziku vo Yave okutuvuanga kikilu o mfunu.—Tanga 1 Petelo 5:6, 7.

7. Ekuma tufwete badikilanga Diambu dia Nzambi vo diamfunu kikilu kwa yeto?

 ⁷ O Nkand’a Nzambi ufwete kalanga wamfunu kikilu kwa yeto. Ekuma? E kuma kadi Yave osadilanga Diambu diandi mu mokena yeto. Vava se yo mwana betoma mokenanga, besiamisanga zola muntu yo nkwandi yo bundaziana vuvu. Yave i Se dieto dianzodi. Kana una vo ke tulendi kumona ko yo wá nding’andi, vava tutanganga Nkand’a Nzambi, dikalanga nze yeto tumokenanga yandi. Tufwete kwamanana wá nding’andi. (Yesaya 30:20, 21) Vava tutanganga Diambu dia Nzambi, tuzayanga yo bund’e vuvu muna Yave ona okutufilanga yo kututanina.—Tanga Nkunga 19:7-11; Ngana 1:33.

8, 9. Adieyi Yave kazolele vo twazaya? Yika nona kia Nkand’a Nzambi.

⁸ Yave ozolele twazaya vo zola kekutuzolanga. Ke sianga sungididi muna usumuki weto ko. Omonanga oma mambote tuvanganga. (2 Tusansu 16:9) Yambula twabadika una Yave kamwena edi diambote muna Yosafate wa ntinu a Yuda. Yosafate nzengo zambi kabaka vava kayikama Akabi wa ntinu a Isaele yo nuanisa esi Suria kuna Ramote-ngiladi. Kana una vo 400 za ngunza za luvunu bavovesa Akabi vo osunda e vita, Mikaya wa ngunza yakieleka ya Yave wavovesa Yosafate yo Akabi vo avo bele nuana e vita, ke besunda ko. I diau kikilu diavangama. Akabi wafwa kuna vita, o Yosafate fioti fiasala nga wafwa. Vava vita yafokoka, Yave wasadila Yeu mu vana longi kwa Yosafate mu kuma kia vilwa kavanga. Kansi, Yeu wamvovesa mpe vo: “Omo ngeye musolokele oma mambote.”—2 Tusansu 18:4, 5, 18-22, 33, 34; 19:1-3.

⁹ Vitila mvu miayingi, Yosafate wavovesa akuluntu, Anelevi ye anganga vo benda kuna mavata ma Yuda mu longa nkangu o Nsiku a Yave. Ediadi diatwasa nluta kadi kana nkutu esi zula yankaka bazaya Yave. (2 Tusansu 17:3-10) Muna kuma kiaki, kana una vo kuna kwalanda Yosafate wabaka nzengo zambi, Yave kavilakana ko oma mambote kateka vanga muna zingu kiandi. E nona kiaki kia lufiaulwisu kikilu kwa yeto kadi ezak’e ntangwa tuvanganga mpe vilwa. Kansi, avo tusidi ngolo za sadila Yave, okwamanana kutuzola ye kesinga vilakana ko oma mambote tuvanganga.

10, 11. (a) Ekuma sambu kinina se lukau lwamfunu katuvana o Yave? (b) Aweyi Nzambi kalenda vanina mvutu za sambu yeto? (Tala fwaniswa kuna lubantiku lwa longi.)

¹⁰ O se dianzodi ovaulanga e ntangwa ya winikina wan’andi vava bekalanga ye tima dia mokena yandi. Ozolanga zaya ngindu zau kadi otoma kubazolanga. Yave wa Se dieto dianzodi diau dimosi mpe kevanganga. Okutuwanga vava tusambanga kwa yandi. Kieleka, o mokena yo Se dieto lau diampwena kikilu!

¹¹ Tulenda samba kwa Yave konso ntangwa. Wau vo Nkundi eto, ntangwa zawonso okalanga ye luzolo lwa wá sambu yeto. Taylene, ona tuyikidi kala kuna lubantiku, wavova vo: “Olenda vova konso diambu ye mu konso ntangwa.” Vava tuziulanga ntim’eto kwa Yave, olenda vana mvutu za sambu kieto muna lusadisu lwa sono kia Nkand’a Nzambi, longi muna nkanda  mieto yovo lukasakeso lwa mpangi. Yave owanga e ndomba zeto, ozayanga mpasi zeto kana nkutu vo ke vena muntu ankaka ko ozeye zo. E mpila kevaninanga mvutu za sambu yeto isonganga vo o zola kwandi muna yeto ke kuna nsuka ko.

12. Ekuma tufwete longokelanga e sambu ina muna Nkand’a Nzambi? Yika nona.

¹² Tulenda longoka mambu mamfunu muna sambu ina muna Nkand’a Nzambi. Ezak’e ntangwa, diambote twalongokanga yaka sambu muna longi dia esi nzo. Obadika e sambu ya selo ya Nzambi kuna nz’ankulu, dikutusadisa mu tomesa e sambu yeto. Kasikil’owu, tulenda longoka e sambu kina Yona kavanga kuna lulembamu lwawonso vava kakala muna vumu kia mbizi ampwena. (Yona 1:17–2:10) Tulenda mpe badika e sambu kina Solomo kavanga kwa Yave vava e tempelo yasunzulwa. (1 Ntinu 8:22-53) Tulenda mpe badika e sambu kia Yesu kia S’eto. (Matai 6:9-13) Edi disundidi o mfunu, tufwete ‘zayisanga e ndomba zeto kwa Nzambi.’ Muna mpila yayi, “o luvuvamu lua Nzambi, luna luviokele nyindu wawonso, luyingila ntima mieno, yo makani meno.” O luyangalalu lweto muna zola kwa Yave kulembi suka, lukwamanana wokela.—Filipi 4:6, 7.

13. Nkia lau tuna diau mu kuma kia lukûlu?

¹³ Yave watuvana lukau lwa lukûlu kimana ‘twakala o moyo.’ (1 Yoane 4:9) Muna songa o zola kwampwena kwa Nzambi, Paulu wa ntumwa wasoneka vo: “O Kristu wafwila mun’akwa luvezo. Kadi, muna nsongi a muntu, o muntu kalendakesela mo kumfwila ko: kansi muna muntu ambote, venkwa kal’ona wina ye nkabu za kumfwila. Kansi o Nzambi osongele yandi nzola katuzolele, e kuma wau twakal’asumuki, o Kristu watufwila.” (Roma 5:6-8) O lukûlu i ziku kisonganga o zola kwa Nzambi, luvananga mpe e lau kwa wantu mu kala ye ngwizani ambote yo yandi.

14, 15. O lukûlu kia nsasa luna kwa (a) Akristu akuswa? (b) awana bena ye vuvu kia zingila ova ntoto?

¹⁴ Vena ye buka kiakete kia Akristu betoma monanga o zola kwa Yave kulembi suka. (Yoane 1:12, 13; 3:5-7) Nzambi wakusa Akristu awaya muna mwand’avelela. Muna kuma kiaki, beyikilwanga vo wan’andi. (Roma 8:15, 16) Wau vo akaka muna yau bakinu ova ntoto, ekuma Paulu kavovela vo ‘bavwanda yo Kristu muna mwezulu’? (Efeso 2:6) E kuma kadi Yave wabavana e vuvu kia vuila moyo a mvu ya mvu kuna zulu.—Efeso 1:13, 14; Kolosai 1:5.

¹⁵ Kw’awana bena vo ke akuswa ko, balenda kituka akundi a Nzambi avo bakwikidi muna lukûlu. Balenda mpe kituka se wan’a Nzambi yo zinga yakwele mvu muna  paradiso ova ntoto. O lukûlu lusonganga o zola kwa Yave muna wantu awonso. (Yoane 3:16) Diakiese kikilu mu zaya vo avo tusadila Nzambi ye kwikizi kiawonso, okutuvana zingu kisundidi o wete muna nz’ampa. Muna kuma kiaki, yambula twasonga vo tuzitisanga lukûlu kadi i ziku kisonganga o zola kwa Nzambi kulembi suka muna yeto.

16. Avo tubadikidi o zola kwa Nzambi, adieyi dikutufila mu vanga?

¹⁶ Ke tulendi tanga nkumbu miawonso ko Yave kesonganga o zola kwandi muna yeto. Davidi wa ntinu wayimbila vo: “E ngindu zaku kuna kwatà zin’oku ngina, e Nzambi! O lutangu luau luayingi! Ovo ntangidi zo, zisundidi esenge.” (Nkunga 139:17, 18) O badika e mpila zina Yave kekutusongelanga o zola, dikutufila mpe mu kunzola yo vanga mawonso tulenda muna kunsadila.

17, 18. Aweyi tulenda songela zola kweto muna Nzambi?

¹⁷ Vena ye mpila zayingi tulenda songela kwa Yave vo zola tukunzolanga. Kasikil’owu, tulenda songa zola kweto muna Yave muna zayisanga kw’akaka e nsangu zambote za Kintinu kuna vema kwawonso. (Matai 24:14; 28:19, 20) Tulenda mpe songa o zola muna Nzambi muna zizidilanga mambu metontanga e kwikizi kieto. (Tanga Nkunga 84:11; Yakobo 1:2-5.) Kana nkutu vo mambu mayingi mampasi tunuananga mau, tulenda kala ye ziku vo Yave omonanga e mpasi zeto ye okutusadisa kadi mfunu kikilu twina kwa yandi.—Nkunga 56:8.

¹⁸ O zola kweto muna Yave kukutufilanga mu badika e lekwa yawonso kavanga. Tusonganga vo Yave tuzolanga ye Diambu diandi vava tulongokanga o Nkand’a Nzambi mu mpila yambote. Tusambanga kwa Yave ntangwa zawonso kadi zola tukunzolanga ye tuzolele kumika ngwizani eto yo yandi. Vava tubadikanga lukau lwandi lwa lukûlu, o zola kweto muna yandi kuwokelanga. (1 Yoane 2:1, 2) E zazi i zaka muna mpila tusongelanga kwa Yave vo tuyangalelanga o zola kwandi kulembi suka muna yeto.