1, 2. (a) Nkia mambu olakukilanga o moyo muna Paradiso? (Tala fwaniswa ova ntandu.) (b) Adieyi diluta kutuvana e kiese muna nz’ampa?

TUVINGILANGA ye tima diawonso o “moyo a mvu ya mvu.” Paulu wa ntumwa wayikila wo vo “moyo wina vo moyo kikilu.” (Tanga 1 Timoteo 6:12, 19.) Kuna kwa wantu ayingi, o moyo wau i zinga yakwele mvu muna Paradiso ova ntoto. Diampasi mu yindula una tumona vava tuyantika sikama konso mene yo vimpi wambote yo yangalela e zingu. (Yesaya 35:5, 6) Yindula e kiese okala kiau mu viokesa e ntangwa ye yitu yaku, akundi ye awana befuluka. (Yoane 5:28, 29; Mavangu 24:15) Okala ye ntangwa ya longoka salu yampa yo toma zaya e salu oyangalelanga. Kasikil’owu, osinga longoka mayingi mu kuma kia nsema. Olenda mpe longoka sika miziki yovo vanga e mpul’a nzo aku.

² Kana una vo tuvingilanga mambu mama mambote, o sambila Yave i diambu diluta kutuvana e kiese. Yindula una ukala e zingu vava wantu awonso bezitisa e nkumbu avauka  ya Yave yo kuntambulwila se Mfumu au. (Matai 6:9, 10) Kiese kiayingi tukala kiau mu mona e nza yazala ye wantu alunga nze una Nzambi kakana. Ekolo tukituka malembe-malembe se wantu alunga, ke dikala diampasi ko mu siamisa kikundi kieto yo Yave.—Nkunga 73:28; Yakobo 4:8.

3. Adieyi tufwete kubamena owau?

³ Tuna ye vuvu vo Yave olungisa mambu mama mawonso, kadi ‘kuna kwa Nzambi, mawonso malendakana.’ (Matai 19:25, 26) Avo tuzolele zinga yakwele mvu muna nz’ampa, eyayi i ntangwa ya ‘simbinina o moyo’ a mvu ya mvu. Tuzeye wo vo e mbaninu ifinamene, muna kuma kiaki, e mpil’a zingu kieto kifwete songanga vo tukwikilanga vo e mbaninu ilenda kwiza konso ntangwa. Tufwete vanga mawonso tulenda owau kimana twakala twakubama mu zingila muna nz’ampa. Yambula twazaya una tulenda kubamena.

4. Aweyi tulenda kubamena owau mu zingila muna nz’ampa? Yika nona.

⁴ Aweyi tulenda kubamena mu zingila muna nz’ampa? Avo tuzolele kwenda zingila mu nsi yankaka, tufwete kubama mu kuma kia zingu kia nsi yayina. Kasikil’owu, tulenda yantika longoka ndinga ye fu ya kisi nsi ya wantu bezingilanga mu nsi yayina. Tulenda mpe yeleka madia mau. Diau dimosi, tulenda kubama mu zingila muna nz’ampa muna vanganga mana tulenda owau mu zingila nze vika sia vo tuna kala muna Paradiso. Yambula twabadika una tulenda wo vangila.

5, 6. O lemvokela luludiku lwa nkubik’a Yave aweyi dilenda kutusadisila mu kala twakubama mu zingila muna nz’ampa?

⁵ Mu nza yayi, Satana ozolanga vo wantu bayindula vo balenda kwau vanga mawonso bazolele. Ayingi beyindulanga vo kuyitumina diambu diambote, o lemvokela Nzambi ke dina mfunu ko. Nkia mfwilu ditwasanga? Mpasi ye ntantu. (Yeremiya 10:23) Kansi, Yave Nyadi anzodi. Ekwe zingu kiambote tukala kiau muna nz’ampa vava wantu awonso belemvokela Yave!

⁶ Muna nz’ampa, tukala ye kiese kia landa tuludiku twa nkubik’a Yave tuna tukutusadisa mu kitula o ntoto se paradiso yo longa awana befuluka. Yave okutuvana salu kiayingi. Kansi, adieyi tuvanga avo ana bevitang’o ntu batuvovese vo twasala e salu kina ke tuzolanga ko? Nga tukubalemvokela? Nga tuvanga mawonso mu lungisa yo yangalela salu bekutuvana? Muna kala twakubama mu vua moyo a mvu ya mvu muna nz’ampa, tufwete lemvokelanga luludiku lwa nkubik’a Yave owau.

7, 8. (a) Ekuma tufwete lemvokelanga awana bevitang’o ntu? (b) Nkia nsobani zivangamanga mu zingu kia mpangi zankaka? (c) Nkia ziku tulenda kala kiau mu kuma kia nz’ampa?

⁷ Avo tuzolele zingila muna nz’ampa, tufwete longoka yangalela ina tuna yau yo sala e ntwadi ye nkubik’a Yave ye mpangi zeto. Kasikil’owu, avo batuvene kiyekwa kiampa, tutambulwilanga kio yo sala ye kiese kiawonso. Avo tulongoka sala e ntwadi y’awana bevitang’o ntu o unu, ke dikala diampasi ko mu vanga dio muna nz’ampa. (Tanga Ayibere 13:17.) Vava Aneyisaele bakota muna Nsi a Nsilu,  bavewa e fulu kina bafwete zingila. (Ntalu 26:52-56; Yosua 14:1, 2) Ke tuzeye ko e fulu kina konso muntu mu yeto kevewa mu zingila muna nz’ampa. Kansi, avo tulongokele songa lemvo owau, tukala ye kiese kia vanga luzolo lwa Yave konso fulu tuzingila.

⁸ Yindula e kiese tukala kiau vava tuzingila muna nz’ampa ya Nzambi muna luyalu lwa Kintinu. Muna kuma kiaki, tuna ye kiese kia sala kumosi ye nkubik’a Yave owau yo vanga konso salu tuvewanga. Kansi ezak’e ntangwa, kiyekwa kieto kilenda sobwa. Kasikil’owu, mpangi zankaka basadilanga kuna Betele ya Estados Unidos bafilwa muna salu kia kimviti a nzil’a espesiale. Akaka muna akengi a zunga bafilwa muna salu kia kimviti a nzil’a espesiale mu kuma kia kimbuta yovo mambu makaka. Wau vo beyangalelanga kiyekwa kiau kiampa, Yave okubasambulanga. Avo tulombele lusadisu lwa Yave muna sambu, tuvangidi mana tulenda mu kunsadila yo yangalela konso kiyekwa tuvewanga, tukala ye kiese yo sambulwa kwa Yave. (Tanga Ngana 10:22.) Adieyi tuvova kele vo muna nz’ampa tusolele fulu kina tuzolele zingila, kansi e nkubik’a Yave ituvovese vo twasoba fulu kiankaka? Muna kolo kiakina, ke tutokanena fulu kia zingila ko ngatu salu. Matondo kaka tuvutula wau vo tukotele mu nz’ampa.—Nekemiya 8:10.

9, 10. (a) Ekuma divavila vo twasonga luzindalalu muna nz’ampa? (b) Aweyi tulenda songela luzindalalu owau?

⁹ Muna nz’ampa, ezak’e ntangwa divava vo twasonga luzindalalu. Kasikil’owu, tulenda wá vo wantu ankaka mu kiese bena kadi e yitu ye akundi au bafulukidi. Nanga divava vo yeto twavingila lufuluku lwa azolw’eto. Avo ediadi divangamene, nga tuyangalala y’akaka yo songa luzindalalu? (Roma 12:15) Avo tusongele luzindalalu muna ndungan’a nsilu mia Yave owau, dikutusadisa mu songa luzindalalu muna kolo kiakina.—Kimpovi 7:8.

¹⁰ Tulenda mpe kala twakubama mu zingila muna nz’ampa muna songanga luzindalalu vava kisingikwanga umbakuzi weto wa ludi kia Nkand’a Nzambi. Nga tulongokanga malongi mama mampa yo songa luzindalalu avo ke tutomene mo bakula ko? Avo i wau, muna nz’ampa ke dikala diampasi ko mu songa luzindalalu konso ntangwa Yave kekutuvana luludiku lwampa.—Ngana 4:18; Yoane 16:12.

11. Ekuma tufwete lolokelanga akaka owau? Ediadi aweyi dikutusadisila muna nz’ampa?

¹¹ E mpila yankaka tulenda kadila twakubama mu zingila muna nz’ampa, i lolokanga akaka. Muna kolo kia Luyalu lwa Kristu lwa Funda dia Mvu, ntangw’ayingi ivioka yavana yeto awonso tukituka se wantu alunga. (Mavangu 24:15) Nga tusinga songa zola yo loloka akaka? Avo  tulolokanga yo kala ye ngwizani ambote ye akaka owau, ke dikala diampasi ko mu vanga wo muna nz’ampa.—Tanga Kolosai 3:12-14.

12. Ekuma tufwete kadila twakubama owau muna zingila muna nz’ampa?

¹² Muna nz’ampa, ke ntangwa zawonso ko tuvua ina tuzolele, ezak’e ntangwa divava vo twavingila. Matondo kaka tukala vutula yo yangalela zingu kieto. Divava vo twasonga e fu ina Yave kekutulonganga owau. Muna kuma kiaki, vava tusongang’e fu yayi owau, tukwikilanga vo e nz’ampa ikwiza kikilu, twakubama twina mu zinga yakwele mvu. (Ayibere 2:5; 11:1) Tusonganga mpe vo tuzolele kikilu zingila muna nz’ampa, vava wantu awonso belemvokela Yave.

13. Nki tusia vana fulu kiantete muna zingu kieto muna nz’ampa?

¹³ Muna nz’ampa, tukala ye lekwa yawonso tuvuidi o mfunu muna yangalela e zingu. Kansi, edi diluta kutuvana e kiese i ngwizani eto yo Yave. (Matai 5:3) Mayingi tuvanga muna salu kia Yave, tukala ye kiese kia kunsadila. (Nkunga 37:4) Muna kuma kiaki, avo tusianga Yave va fulu kiantete muna zingu kieto owau, mu kubama twina mu zingila muna nz’ampa.—Tanga Matai 6:19-21.

14. Nkia makani aleke balenda kuyisila muna salu kia Yave?

¹⁴ Aweyi tulenda kadila ye kiese kiayingi muna salu kia Yave? Muna kuyisilanga makani ma mwanda. Avo u nleke, toma yindula una osadilanga e zingu kiaku muna salu kia Yave. Ekuma olembi vavulwila muna nkanda mieto e mpila zaswaswana za salu kia ntangwa ke ntangwa? Olenda kuyisila e kani dia kota mu salu kia ntangwa ke ntangwa. *  Mokena yo mpangi ona osadilanga Yave muna salu kia ntangwa ke ntangwa se mvu miayingi. Avo osadidi zingu kiaku muna salu kia Yave, mayingi olongoka. O zayi wau ukusadisa mu sadila Yave muna nz’ampa.

15. Nkia makani mankaka tulenda kuyisila muna salu kia Yave?

¹⁵ Vena ye makani mayingi tulenda kuyisila muna salu kia Yave. Kasikil’owu, tulenda kala ye kani dia longoka ndekwa zampa za sila umbangi. Yovo tulenda sia ngolo za toma bakula nkanikinu mia Nkand’a Nzambi yo zaya una tulenda mio sadila muna zingu kieto. Tulenda mpe sia ngolo za tomesa e mpil’eto ya tangila vana meso ma ndonga yovo ya fila malongi yo vana nkomena muna tukutakanu. E diambu diamfunu i diadi: Avo uyisididi makani muna salu kia Yave, ediadi dikusadisa mu kala yo vema yo kubama mu zingila muna nz’ampa.

16. O sadila Yave i mpil’a zingu kisundidi o wete. Ekuma?

¹⁶ Vava tusadilanga ntangw’eto muna kubama mu zingila muna nz’ampa ya Nzambi, nga zingu kieto tufwasanga? Ve! O sadila Yave i mpil’a zingu kisundidi o wete. Ke tusadilanga Yave ko mu kuma kia sia vo muntu okutukomekenanga yovo muna vuluka kaka muna mpasi zayingi. Avo ngwizani ambote tuna yau yo Yave, e zingu kieto kiambote ye kiakiese kikala. Eyayi i mpil’a zingu kakana o Nzambi. O zola Nzambi yo tambulwila luludiku lwandi muna zingu kieto disundidi o wete ke mu konso lekwa ko. (Tanga Nkunga 63:1-3.) Yeto awonso tulenda mona e kiese kitukanga muna sambila Yave ye nsi a ntima wawonso. Mpangi zankaka ana besadilanga Yave se mvu miayingi balenda vova ye ziku kiawonso vo ekiaki i mpil’a zingu kisundidi o wete.—Nkunga 1:1-3; Yesaya 58:13, 14.

17. E nsaka ye zolela yeto nkia fulu ikala muna Paradiso?

 ¹⁷ Muna Paradiso, tukala ye kiese kiasadila e ntangw’eto muna mambu ma yeto kibeni ye nsaka. Vana ntandu, Yave watuvanga ye luzolo lwa yangalela zingu, wasia nsilu wa “yukutisa kinzola-nzola kia mioyo miawonso.” (Nkunga 145:16; Kimpovi 2:24) Nsaka ye vunda tuvuang’o mfunu, kansi tutoma zo yangalelanga vava tusianga e ngwizani eto yo Yave va fulu kiantete. I diau mpe divangama muna nz’ampa. Muna kuma kiaki, diangangu mu kwamanana ‘sia Kintinu va fulu kiantete’ yo sia sungididi muna nsambu tutambulanga muna salu kia Yave.—Matai 6:33.

18. Aweyi tulenda songela vo mu kubama twina muna zingila yakwele mvu muna Paradiso?

¹⁸ Muna nz’ampa, e zingu kiambote kikala lutila nkutu una tuyindulanga. Yambula twasonga vo tuzolele kikilu zingila muna nz’ampa, muna kubamanga owau kimana twavua “moyo una vo moyo kikilu.” Tufwete songanga e fu ina Yave kekutulonganga yo samuna nsangu zambote yo vema kwawonso. Yambula twamona e kiese kitukanga muna sia nsambil’a Yave va fulu kiantete muna zingu kieto. Tuna ye ziku vo muna nz’ampa, Yave olungisa mawonso kasia o nsilu. Muna kuma kiaki, tufwete zingilanga nze yeto tuna kala muna nz’ampa.