Kwamanana Badika Mambu ma Mwanda
Kwamanana Badika Mambu ma Mwanda
“Toma tala mambu mama; wiyisia mo; o lunungunuku luaku luamoneka kw’awonso.” —1 TIMOTEO 4:15.
NKUNGA: 57, 52
ADIEYI OBENZE?
O badika aweyi disongele?
Nkia mambu mambote tulenda badika?
Nkia nluta obakanga wau obadikanga Diambu dia Nzambi lumbu yawonso?
1, 2. Adieyi diswaswanesanga wantu ye bulu?
TOMFO twa muntu mu mpil’a sivi twavangilwa. Kasikil’owu, o wantu bena ye ngangu za longoka e ndinga. E ndinga ikutusadisanga mu tanga, soneka, vova yo bakula mana tuwanga. Ikutuvananga mpe ngangu za samba yo yimbidila Yave. Mawonso mama mekutuswaswanesanga ye bulu. Akwa ngangu za nza ke betoma bakulanga ko una tomfo tweto tuvangilanga mambu mama masivi.
2 E ngangu za vova e ndinga i lukau lwatuka kwa Yave. (Nkunga 139:14; Lusengomono 4:11) Yave watuvana mpe lukau lwankaka lukutuswaswanesanga ye bulu. O wantu mu ‘fwaniswa kia Nzambi’ bavangilwa. Tuna yo nswa wa kuyisolela, i sia vo, wa baka e nzengo yeto kibeni. Tulenda sadila e ndinga mu sambila yo kembelela Yave.—Etuku 1:27.
3. Nki katuvana o Yave kimana twakala ye ngangu?
3 Yave watuvana Nkand’a Nzambi mu kutusonga una tulenda kunsadila yo kunkembelela. Nkand’a Nzambi wawonso yovo wa ndambu, wavaikiswa mu ndinga vioka 2.800. Vava tubadikanga mana tutanganga muna Nkand’a Nzambi, tulenda yantika badikila mambu nze una Nzambi kebadikilanga mo. (Nkunga 40:5; 92:5; 139:17) E Diambu dia Yave dikutuvananga ngangu yo kutufila mu moyo a mvu ya mvu.—Tanga 2 Timoteo 3:14-17.
4. O badika aweyi disongele? Nkia yuvu tubakila e mvutu?
4 O badika disongele vo toma sia sungididi muna diambu yo toma yindula. (Nkunga 77:12; Ngana 24:1, 2) Nluta miayingi tuvuanga vava tubadikanga mana tulongokanga mu kuma kia Yave yo Yesu. (Yoane 17:3) Mu longi diadi, tubaka mvutu za yuvu eyi: Aweyi tulenda tangila mu mpila ikutusadisila mu badika? Nkia mambu tulenda badika? Adieyi dilenda kutusadisa mu kala ye fu kia badika yo yangalela fu kiaki?
BAKANGA E NLUTA MU MANA OLONGOKANGA
5, 6. Adieyi dilenda kusadisa mu sungamena yo toma bakula mana otanganga?
5 Vena ye mambu mayingi tuvanganga lembi mo yindula, nze vava tufulumunanga, kangala yovo kangalela mu mvelo. Ezak’e ntangwa olenda tanga lembi wo kana. Yovo yindula mambu mankaka ekolo otanganga. Adieyi olenda vanga mu venga e fu kiaki? Diambote wasianga e sungididi mu mana otanganga yo yindula e nsas’a mambu mama. Avo olweke ku mfoko a tini yovo ntu a diambu wa nkanda, ningama yo badika mana otangidi. Yindulanga mana otanganga yo kala ye ziku vo otomene mo bakula.
6 Muna lufimpu bavanga akwa ngangu za nza, babakula vo diasazu mu sungamena diambu avo tutangidi dio muna nding’angolo. O Mvangi eto ozeye wo, kiaki i kuma kavovesela Yosua vo katanga o nkand’a Nsiku muna ‘ndinga yalembama,’ i sia vo, tanga mu kuma kia yandi kibeni. (Tanga Yosua 1:8.) O tanga Nkand’a Nzambi mu nding’angolo dilenda kusadisa mu toma sia sungididi mu mana otanganga yo sungamena mo.
7. Ayeyi i ntangwa yambote ya badika oma ma Nkand’a Nzambi? (Tala fwaniswa kuna lubantiku lwa longi.)
7 Ngolo divavanga mu badika yo sia e sungididi mu mana tutanganga. Muna kuma kiaki, diambote twabadikanga mu ntangwa ke tuna twayoya ko yo vava e fulu kiavuvama ke kina ye lekwa yayingi ko ilenda vunzanesa ngindu zeto. O Davidi wa ntozi a nkunga, wabadikanga vana mfulu vava tulu twavempokanga muna fuku. (Nkunga 63:6) Yesu ona wakala walunga, wasolanga fulu kiavuvama mu badika yo samba.—Luka 6:12.
MAMBU MAMBOTE TULENDA BADIKA
8. (a) Nkia mambu tulenda badika? (b) Aweyi Yave kemonanga vava tuvovelanga nkumbu andi kw’akaka?
8 Vana ntandu a mana otanganga muna Nkand’a Nzambi, vena ye mambu mankaka olenda badika. Kasikil’owu, vava otalanga lekwa ina Yave kavanga, ningama yo kiyuvula: ‘Adieyi ndongokele mu kuma kia Yave?’ E kiuvu kiaki kikufila mu tonda Yave muna sambu. Avo vamosi wina yo wantu ankaka, okala ye tima dia kubazayisa mana obadikidi. (Nkunga 104:24; Mavangu 14:17) Yave osianga e sungididi yo yangalala vava tubadikanga, samba yo vovela nkumbu andi kw’akaka. Nkand’a Nzambi okutuzayisanga vo: ‘Vasonekenw’o nkand’a luyindwilu vana kena w’awana bevuminanga Yave, bebadikanga nkumbu andi.’—Malaki 3:16.
9. (a) Nkia mambu Paulu kavovesa Timoteo mu badika? (b) Nkia mambu tulenda badika vava tukubamanga mu kwenda mu salu kia umbangi?
9 Paulu wa ntumwa wavovesa Timoteo vo kabadikanga una e mvovo, mavangu ye malongi mandi mavanganga kw’akaka. (Tanga 1 Timoteo 4:12-16.) Ongeye mpe olenda badika mambu mama. Kasikil’owu, ofwete vaulanga e ntangwa ya badika vava okubikanga longi dia Nkand’a Nzambi. Yindulanga nlongoki aku yo vava e yuvu yovo nona ilenda kunsadisa mu nungunuka muna mwanda. Vava okubamanga mu mpila yayi vitila wenda longoka Nkand’a Nzambi yo muntu, o lukwikilu lwaku lukumama yo kituka nlongi ambote a Nkand’a Nzambi. Ovua mpe nluta vava obadikanga vitila wenda mu salu kia umbangi. (Tanga Ezera 7:10.) Olenda tanga kapu kimosi kia nkand’a Mavangu kimana kiasadisa mu kala yo vema muna salu kia umbangi. Olenda mpe badika e sono ya Nkand’a Nzambi osadila ye nkanda okaya. (2 Timoteo 1:6) Yindulanga wantu a zunga kieno ye dina olenda vova muna tunta e sungididi kiau. Avo okubamene mu mpila yayi, dikusadisa mu sadila Nkand’a Nzambi una ufwene mu sila umbangi kw’akaka.—1 Korinto 2:4.
10. Nkia mambu mankaka mambote tulenda badika?
10 Nkia mambu diaka olenda badika? Avo mambu osonekene muna longi dia nkangu, mu lukutakanu lwa zunga ye lwa mvivu, vaulanga e ntangwa ya badika mo. Ekolo obadikanga, ukiyuvula: ‘Adieyi ndongokele muna Diambu dia Nzambi ye muna nkubik’andi?’ Olenda mpe badika mambu otanganga konso ngonde mun’Eyingidilu ye Despertai! ye nkanda miampa tutambulanga muna lukutakanu lwa mvivu. Vava otanganga Anuário, ningamanga yo badika nona otangidi yo yambula vo kiasimba ntim’aku. Vava otanganga nkanda mieto, sianga sinsu mu mvovo miasina yovo soneka maka mambu vana ndambu. Ediadi dikusadisa vava okubamanga mu kwenda kingula wantu muna salu kia umbangi, vungula ampangi yovo vava okubikanga longi. Edi disundidi o mfunu, vava oningamanga yo badika mana otangidi, oyambula vo mambu makota muna ntim’aku yo kala ye ntangwa ya samba mu tonda Yave mu kuma kia mambu mambote olongokanga.
BADIKANGA DIAMBU DIA NZAMBI LUMBU YAWONSO
11. Nkia nkanda usundidi o mfunu tufwete badikanga? O vanga wo aweyi dikutusadisila? (Tala mpe mvovo va yand’a lukaya.)
11 Kieleka, o Nkand’a Nzambi i nkanda usundidi o mfunu una tufwete badikanga. Kansi, adieyi ovanga avo basimini vo kukadi diaka yo Nkand’a Nzambi ko? * Ke vena muntu ko olenda kusima o badika mana mena muna ntima, nze sono ya Nkand’a Nzambi yovo nkunga mia Kintinu otoma yangalelanga. (Mavangu 16:25) O mwand’avelel’a Nzambi ukusadisa mu sungamena mambu wateka longoka, oma mekusadisa mu sikila ye kwikizi.—Yoane 14:26.
12. Aweyi olenda vangila e nkubika ya tanga Nkand’a Nzambi lumbu yawonso?
12 Aweyi olenda vangila e nkubika ya tanga Nkand’a Nzambi lumbu yawonso? Muna lumbu yankaka ya lumingu, olenda tanga yo badika e sono ina muna programa ya ntangilu a Nkand’a Nzambi ya Sikola ya Salu kia Kimfumu ya konso lumingu. E lumbu yankaka olenda tanga e nsangu zambote zasoneka Matai, Maku, Luka ye Yoane yo badika mana Yesu kavova yo vanga. (Roma 10:17; Ayibere 12:2; 1 Petelo 2:21) Tuna mpe ye nkanda uvovelanga zingu kia Yesu muna ndandani a mambu. O nkanda wau ulenda kutwasila nluta ekolo otanganga e nsangu zambote zasoneka Matai, Maku, Luka ye Yoane.—Yoane 14:6.
EKUMA O BADIKA KWININA O MFUNU?
13, 14. Ekuma dinina diamfunu mu kwamanana badika oma ma Yave yo Yesu? Ediadi dikutufila mu vanga nkia diambu?
13 O badika oma ma Yave yo Yesu dilenda sadisa muntu mu kituka Nkristu azikuka yo kala ye lukwikilu lwasikila. (Ayibere 5:14; 6:1) O muntu ona ke vaulanga ntangwa ko ya badika oma ma Nzambi, malembe-malembe ovidisanga ngwizani andi yo Yave yovo kumbembola. (Ayibere 2:1; 3:12) Yesu watulukisa vo avo ke tuwidi ko yovo tambula Diambu dia Nzambi “muna ntim’ambote asonga,” ke ‘tulunda’ dio ko. Tulenda ‘finangeswa kwa ntokani yo umvwama yo mawete ma zingu kiaki.’—Luka 8:14, 15.
14 Muna kuma kiaki, tukwamanana badika oma ma Nkand’a Nzambi yo toma zaya Yave. Ediadi dikutufila mu tanginina fu ye kiwuntu kiandi una ufwene. (2 Korinto 3:18) Tulenda kwamanana longoka mu kuma kia Se dieto una kuna zulu yo kuntanginina yakwele mvu. Ekwe lau diampwena tuna diau!—Kimpovi 3:11.
15, 16. (a) Nkia nluta ovuanga muna badika oma ma Yave yo Yesu? (b) Ekuma ezak’e ntangwa dilenda kadila diampasi mu badika? Ekuma tufwete kwamanena sia ngolo?
15 O badika oma ma Yave yo Yesu dikusadisa mu kala yo vema muna ludi. O vema kwaku kukasakesa mpangi zaku yo wantu ana omokenanga yau muna salu kia umbangi. Avo obadikidi mana Yave kavanga muna wete diaku muna kubika kimenga kia lukûlu kia Yesu, dikusadisa mu kwamanana kumika ngwizani aku yo Nzambi. (Roma 3:24; Yakobo 4:8) Mpangi Mark, ozingilanga kuna África do Sul waviokesa mvu ntatu muna pelezo mu kuma kia lukwikilu lwandi, wavova vo: “O badika kulenda tezaneswa ye nsaka za kiese. Avo tukedi ye fu kia badika mambu ma mwanda, tusolola mpe mambu mayingi mampa mu kuma kia Yave wa Nzambi eto. Ezak’e ntangwa vava ikendalalanga yovo tokana mu kuma kia zingu, ibakanga Nkand’a Nzambi yo badika Sono kimosi. O ntim’ame uvuvamanga kikilu.”
16 Wau vo e zingu mu nza yayi kiazala ye mambu mefwisanga e diya, diampasi dikalanga mu vaula e ntangwa ya badika Diambu dia Nzambi. Mpangi Patrick, ozingilanga ku África wavova vo: “E ngindu zame zina nze nkela yazala ye nkanda mia mpila mu mpila, mina miamfunu ye mina miakondwa o mfunu. Divavanga vo lumbu yawonso twasola mina miamfunu. Vava ifimpanga ngindu zame, nkumbu miayingi imonanga vo zazala ye ntokani. Divavanga vo yasamba kwa Yave mu kuma kia ntokani zazi kimana yabadika kondwa ntokani. Kana una vo ntangwa divavanga mu vanga wo vitila yayantika badika mambu ma mwanda, dikunsadisanga mu finama Yave. Diziulanga ntim’ame kimana yatoma bakula e ludi.” (Nkunga 94:19) Nluta miayingi tuvuanga vava tutanganga yo badika Diambu dia Nzambi lumbu yawonso.—Mavangu 17:11.
NKIA NTANGWA OBADIKANGA?
17. Nkia ntangwa obadikanga?
17 Akaka besikamanga mu mene-mene mu tanga, badika yo samba. Akaka bevanganga wo muna ntangw’a vunda. Nanga kwa ngeye, ola yambote ya tanga Nkand’a Nzambi i muna fuku yovo vitila waleka. Akaka beyangalelanga tanga Nkand’a Nzambi muna mene yo muna fuku vitila baleka. (Yosua 1:8) Edi disundidi o mfunu i ‘toma sadila e ntangwa,’ i sia vo, sadila e ntangwa ya mambu makondwa o mfunu kimana wabadikanga Diambu dia Nzambi lumbu yawonso.—Efeso 5:15, 16.
18. Nkand’a Nzambi nkia nsilu usianga kw’awana bebadikanga Diambu dia Nzambi lumbu yawonso yo sadila mana belongokanga?
18 Nkand’a Nzambi usianga nsilu vo Yave osambula awonso ana bebadikanga Diambu diandi yo sia e ngolo za sadila mana belongokanga. (Tanga Nkunga 1:1-3.) Yesu wavova vo: ‘Akwa nsambu ana bewanga mambu ma Nzambi yo lunda mo.’ (Luka 11:28) Vana ntandu, o badika Diambu dia Yave lumbu yawonso dikutusadisa mu vangila mambu mu mpila ina ikunyangidikanga. Avo tuvangidi wo, Yave okutusambula owau yo kutuvana moyo a mvu ya mvu kuna sentu.—Yakobo 1:25; Lusengomono 1:3.
[Mvovo Vana Yand’a lukaya]
^ tini. 11 Tala longi dina yo ntu a diambu: “Nossa luta para permanecer espiritualmente fortes,” mun’Eyingidilu dia 1 Desemba, 2006.
[Yuvu ya Longoka]
[Mvovo mia Fwaniswa mina muna lukaya lwa 22]
O tanga o Nkand’a Nzambi mu nding’a ngolo dilenda kusadisa mu sia sungididi mu mana otanganga yo sungamena mo
[Mvovo mia Fwaniswa mina muna lukaya lwa 24]
Yambula vo mana otanganga masimba o ntim’aku yo tonda Yave mu kuma kia mambu mambote olongokanga
[Mvovo mia Fwaniswa mina muna lukaya lwa 25]
O badika oma ma Yave yo Yesu dikusadisa mu kala yo vema muna ludi
[Mvovo mia Fwaniswa mina muna lukaya lwa 26]
MVOVO MISASILU
Badika mambu ma mwanda:
Toma yindula mu kuma kia diambu omwene muna nsema yovo diambu otangidi muna Nkand’a Nzambi yovo muna nkanda mieto. Vava bakula dina olongokele mu kuma kia Yave yo Yesu ye una olenda kubatanginina yo sadisa akaka. Ediadi dikusadisa mu finama Yave
