1. Akieyi i fu kia Nzambi kisundidi? Aweyi omonanga mu kuma kia Nzambi wau vo nkwa zola?

NKAND’A NZAMBI ukutuvovesanga vo “Nzambi i zola.” (1 Yoane 4:8) Ediadi aweyi disongele? O zola kwaswaswana ye fu yankaka ya Yave. O zola i fu kiandi kisundidi. Yave kena kaka ye zola ko, kansi yandi i zola. Mawonso ovangilanga mo kuna zola. Tuvutulanga kikilu matondo wau vo zola kwafila Yave mu vanga nsema wawonso ye lekwa yawonso yamoyo.

2. Nkia ziku tuna kiau mu kuma kia zola kwa Nzambi? (Tala e fwaniswa ova ntandu.)

² Yave ozolanga nsem’andi. O zola kwandi muna yeto i ziku kisonganga vo e nsilu miandi mu kuma kia wantu lungana milungana. Awana bekunlemvokelanga kiese kiayingi bemona. Kasikil’owu, mu kuma kia zola, Yave ‘wasikidisa e lumbu kina kefundisil’e nza muna nsongi muna muntu ndiona kasola,’ Yesu Kristu. (Mavangu 17:31) Tuna ye ziku vo e mfundisa yayi vangama ivangama. Awana besonganga o lemvo, bekala ye zingu kiambote yakwele mvu.

3. Aweyi wadi kala e zingu kele vo Nzambi kakadi ye zola ko muna wantu?

³ Aweyi wadi kala e zingu kia wantu kele vo Nzambi kakadi ye zola ko, kina vo i fu kiandi kisundidi? O wantu badi kwamanana kukiyala yo filwa kwa Satana wa nzambi a nsoki, wakondwa zola. (2 Korinto 4:4; 1 Yoane 5:19; tanga Lusengomono 12:9, 12.) E zingu kiambi kikilu kiadi kala kele vo Yave katuzodinge ko.

4. Ekuma Yave kayambulwila ukolami mu luyalu lwandi?

⁴ Vava Satana kakolamena kimfumu kia Nzambi, wavukumuna mpe mase meto mantete. Wafidisa e mpaka muna wisa kia Nzambi kia kala mfumu a nz’amvimba. Satana wavova vo luyalu lwandi lusunda olu lwa Nzambi. (Etuku 3:1-5) Kuna ngangu zawonso, Yave wayambula vo Satana kasonga e ziku kia mvovo miandi mu fikolo. Kansi, e mambu mebwanga ova nza mesonganga vo wantu ye Satana ke balendi kala ayadi ambote ko.

5. O lusansu adieyi lusonganga?

⁵ O unu, e mpasi ova nza mu wokela kaka zina. Vioka mafunda 100 ma wantu bavondwa muna vita mu mvu 100 miviokele. O Nkand’a Nzambi uvovanga mu kuma kia “lumbu yambaninu” vo: ‘Vo i wantu ambi, y’akwa luvunu benungunukin’o bi.’ (2 Timoteo 3:1, 13) O Nkand’a Nzambi uvovanga mpe vo: “Nzeye wo vo e nzil’a muntu ke ina muna yandi ko: ngatu singikila ntambi zandi o munduti-a-nzila.” (Yeremiya 10:23) O lusansu lusonganga vo e mvovo miami mialudi. Yave kavanga wantu ko ye ngangu yovo nswa wa kukiyala kondwa luludiku lwandi.

6. Ekuma Nzambi keyambulwilanga umpumbulu?

⁶ Muna yambula vo umpumbulu wakwamanana mu fikolo, Yave wasonga mpe ziku vo luyalu lwandi kaka lulenda sikila. Kuna sentu, Nzambi ofwasa yimpumbulu yawonso. Kuna kulanda, avo muntu ofidisi diaka e mpaka muna mpil’andi ya yadila, Nzambi okumfwasa vana vau. Nzambi olenda sadila lusansu lwa wantu mu songa vo awana bekolamena luyalu lwandi besukiswa mu nzaki zawonso. O umpumbulu ke ukala diaka ko.

7, 8. Aweyi Yave kesongelanga o zola kwandi?

⁷ Yave mu mpila zayingi kesongelanga o zola kwandi. Se yindula o nene yo wete wa nsema. Uvuidi ulolo wa buka ya ntetembwa, konso buka kivuidi mazunda ye mazunda ma ntetembwa ye planeta. E ntangwa i mosi muna ntetembwa zina muna Via-Láctea, buka kia ntetembwa eki tuzingilanga. Kondwa kwa ntangwa e zingu ke kiadi kala ko ova ntoto. E lekwa yawonso ina mu nsema isonganga vo Yave i Mvangi eto. Usonganga mpe fu yandi nze nkuma, ngangu yo zola. Nkand’a Nzambi uvovanga  vo mavangu ma Nzambi “malembi monakana, matomene moneka tuka kun’esemo dia nza, wau mazayakenene muna lekwa yavangwa, i nkum’andi a mvu ya mvu, yo unzambi.”—Roma 1:20.

⁸ Yave wakubika o ntoto kimana wazingilwa kwa vangwa yamoyo. E lekwa yawonso ina ova ntoto yakubikwa mu kuma kia bulu yo wantu. Nzambi wavanga mpatu yambote kimana wantu bazinga. Wavanga o wantu ye nitu ye ngindu zalunga kimana bazinga yakwele mvu. (Tanga Lusengomono 4:11.) Vana ntandu, Yave “ovananga madia kwa nitu zawonso: Kadi o walakazi wandi wakwele mvu.”—Nkunga 136:25.

9. Kana una vo Yave Nzambi a zola, adieyi kemenganga?

⁹ Yave i Nzambi a zola, omenganga oma mambi. Kasikil’owu, e sono kia Nkunga 5:4-6 kivovanga mu kuma kia Yave vo: “Ku Nzambi a yangalela umpumbulu ko . . . Omenga mimpanga-mayi miawonso.” Omenganga mpe “mbungudi a menga, yo mvunginiki.”

10, 11. (a) Adieyi dibwila wantu ambi? (b) Nkia nsendo Yave kevana kw’awana besonganga o nlemvo?

¹⁰ Muna ntangwa kasikidisa, Yave ofokola umpumbulu mu nza yawonso kadi yandi i Nzambi a zola, ona omenganga o bi. Diambu dia Nzambi dikutusianga nsilu vo: “Amimpanga-mayi kendonwa bekendonwa: Awana betadila Yave, bevwa nsi. Finkolo-kolo kaka, e kimpumbulu, ladi.” E mbeni za Yave ‘zivempoka; nze mwisi.’—Nkunga 37:9, 10, 20.

¹¹ E Diambu dia Nzambi dikutusianga mpe nsilu vo: “Asongi bevwa nza, besikila vo yakwele mvu.” (Nkunga 37:29) Asongi “beyangalela muna mawete mayingi.” (Nkunga 37:11) Ekuma? E kuma kadi o Nzambi eto a zola ovanganga mawonso mambote mu kuma kia selo yandi yakwikizi. Nkand’a Nzambi ukutuzayisanga vo: “Kakunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: oma mantete maviokele.” (Lusengomono 21:4) Ekwe zingu kiambote bevua awana besonganga o lemvo yo yangalela zola kwa Nzambi!

12. Nani i “nkwa ziku”?

¹² O Nkand’a Nzambi ukutuzayisanga vo: “Tona nkwa ziku, yo tala nsongi: Kadi mbaninu andi luvuvamu. Vo i akwa makuzuka, befwasakena kumosi: Mbaninu a kimpumbulu, kendonwa.” (Nkunga 37:37, 38) O “nkwa ziku” ozayanga Yave yo Mwan’andi yo vanga luzolo lwa Nzambi kuna nlemvo wawonso. (Tanga Yoane 17:3.) Okwikilanga vo “e nza mpe vempoka ivempoka, y’eketo diandi: vo i ndion’ovangang’o luzolo lua Nzambi, zing’aka kezinganga yakwele mvu.” (1 Yoane 2:17) Wau vo e mbaninu a nza yayi ifinamene,  tufwete ‘tadila Yave, yo simba nzil’andi’ mu nzaki.—Nkunga 37:34.

13. Akieyi i ziku kisundidi kia zola kwa Nzambi?

¹³ Kana una vo tu wantu alembi lunga, tulenda lemvokela Nzambi. Tulenda mpe kala ye ngwizani ambote yo Yave mu kuma kia kimenga kia Yesu kia lukûlu, kina vo i ziku kisundidi kia zola kwa Nzambi. Yave wakubika lukûlu kimana awana besonganga o nlemvo bakala ye lau dia vevolwa muna sumu ye lufwa. (Tanga Roma 5:12; 6:23.) Yesu wasonga kwikizi kwa Nzambi mu mvu miayingi kuna zulu, muna kuma kiaki, Yave wakala ye ziku vo Mwan’andi okwamanana songa kwikizi ova ntoto. Wau vo Se dia zola, Yave wakendalala kikilu vava kamona e mpila wantu bamengenanga o Mwan’andi. Kansi, Yesu wayikama e kimfumu kia Nzambi yo songa vo o muntu alunga olenda kwamanana songa e kwikizi kwa Nzambi kana nkutu mu mambu masundidi e mpasi.

14, 15. O lufwa lwa Yesu adieyi lwavanga kwa wantu?

¹⁴ Kana una vo wawanana ye ntonta zayingi, Yesu wakwamanana songa kwikizi yo yikama kimfumu kia Yave. Tufwete vutulanga matondo wau vo muna lufwa lwandi, Yesu wafuta e ntalu a lukûlu olu lwavana wantu e lau dia zinga yakwele mvu muna nz’ampa ya Nzambi. O Paulu wa ntumwa wavovela o zola kuna Yave yo Yesu batusonga muna vana lukûlu. Wavova vo: “Kadi e kolo twakal’aka twatovoka, muna ntangw’andi o Kristu wafwila mun’akwa luvezo. Kadi, muna nsongi a muntu, o muntu kalendakesela mo kumfwila ko: kansi muna muntu ambote, venkwa kal’ona wina ye nkabu za kumfwila. Kansi o Nzambi osongele yandi nzola katuzolele, e kuma wau twakal’asumuki, o Kristu watufwila.” (Roma 5:6-8) Yoane wa ntumwa wasoneka vo: “Muna wau mwasengomoken’o zola  kwa Nzambi omu yeto, o Nzambi watumin’o Mwan’andi amosi ova nza, twakadil’o moyo muna yandi. Muna wau i mwin’o zola, ke wau ko vo yeto twazola Nzambi, yandi kaka watuzola, katuma mpe o Mwan’andi, wa lembeka muna masumu meto.”—1 Yoane 4:9, 10.

¹⁵ Yesu wavova vo “muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.” (Yoane 3:16) Kana una vo diampasi diakala kwa Yave, wavana Mwan’andi se lukûlu. Ediadi disonganga vo zola kikilu kena kwau muna wantu. O zola kwaku kuzinga yakwele mvu. Paulu wasoneka vo: “Ntomene wo zaya vo ke lufwa ko, ovo moyo, ovo mbasi, ovo kuluntu, ovo ina ina wau, ovo ina ikwiza, ovo ngolo, ovo ezangu ovo sina, ngatu nsem’akaka nkutu, ulenda kutuvambula muna zolwa kwa Nzambi, kuna muna Kristu Yesu wa Mfumu eto.”—Roma 8:38, 39.

16. Nki i Kintinu kia Masia? Yave nani kasola mu kala se Ntinu?

¹⁶ O luyalu lwa Nzambi, i sia vo, Kintinu kia Masia, i ziku kisonganga mpe o zola kwa Yave muna wantu. Mu nkia mpila? Yave wasola Ntinu ona ozolanga wantu, wafwana mu yala. O ntinu ndioyo i Yesu Kristu. (Ngana 8:31) Nzambi wasola mpe 144.000 ma wantu mu yala kumosi yo Kristu kuna zulu. Vava befulwanga, besungamenanga e mpasi banuana zau vava bazinga ova ntoto nze wantu. (Lusengomono 14:1) Vava Yesu kakala ova ntoto, e Kintinu i ntu a diambu a nsangu kasamunanga. Walonga alongoki andi basambanga vo: “E S’eto koko’zulu, yambula nkumbu aku yazitiswa. E kintinu kiaku kiza. O luzolo luaku luavangam’ova nza nze koko’zulu.” (Matai 6:9, 10) Tuvingilanga e ntangwa ilungana oma tulombanga mu sambu kiaki, vava Kintinu kia Nzambi kitwasa ulolo wa nsambu kwa wantu.

17. Yika e nswaswani ina vana vena luyalu lwa Yesu ye luyalu lwa wantu.

¹⁷ Nswaswani ina vana vena luyalu lwa Yesu lwazola ye luyalu lwa wantu. O luyalu lwa wantu lutwasanga vita ezi zivondanga ulolo wa wantu. Kansi, o Yesu wa Nyadi eto, okutuzolanga kikilu ye otangininanga e fu ya Nzambi, musungula o zola. (Lusengomono 7:10, 16, 17) Yesu wavova vo: “Nwiz’oku ngina, yeno awonso nufuntukanga yo bimuka yo mazitu, ikunuvundisa. Nuvwata vangu kiame, nwalongwa kwa mono; kadi i nlembami yo ntim’anleka: nwasolola vundu kia mioyo mieno. Kadi vangu kiame kiambote, enatu diame diampevo.” (Matai 11:28-30) Ekwe nsilu a zola kekutusianga!

18. (a) Nkia diambu divangamanga tuka muna mvu wa 1914? (b) Adieyi tubadika muna longi dilanda?

¹⁸ Nkand’a Nzambi uvovanga vo Kintinu kia Nzambi kiayantika o yala muna mvu wa 1914. Tuka muna mvu wauna, bekutakeswanga awana beyala kumosi yo Yesu kuna zulu kumosi ye “ndong’ayingi” ya wantu ana bevuluka muna mbaninu a tandu kiaki yo kota muna nz’ampa. (Lusengomono 7:9, 13, 14) E ndong’ayingi akwa bena? Adieyi Nzambi kevavanga kwa yau? E longi dilanda divana e mvutu za yuvu yayi.