E sono kia Yosua 6:10-15, 20 kivovanga vo makesa ma Isaele mazieta mbanz’a Yeriko mu lumbu sambanu. Muna lumbu, nkumbu mosi bazietanga. Muna lumbu kiansambwadi, bazieta e mbanza nkumbu nsambwadi. I bosi, Nzambi wabwisa e yaka yangolo ya Yeriko, Aneyisaele bakota muna mbanza. Nga vena ye lekwa basolola asatuludi kisonganga vo e mbanza Yeriko mu kolo kiandwelo yabakwa nze una wasonama muna Nkand’a Nzambi?

Kuna nz’ankulu, avo makesa bazolele bak’e mbanza yo fwasa yo, entete bazunganga e yaka ya mbanza. Ke bayambulanga ko vo muntu kakota ngatu vaika muna mbanza. Muna kuma kiaki, o nkangu muna mbanza wadianga madia bakala mau. Avo makesa ma mbeni babakidi e mbanza, basanzanga yawonso bayangalelanga, kumosi ye madia bawananga. Kiaki i kuma asatuludi ke besololwelanga madia mayingi ko. Ezak’e ntangwa nkutu ke besololanga madia ko vava besatululanga mbanza zankulu za Palestina zina zabakamanga mu mpila yayi. Kansi, ediadi diaswaswana ye mbanz’a Yeriko. Nkanda mosi uvovanga vo: “E masa ye yinzu i lekwa yatoma sololwa vava kiafwaswa e mbanza yayi.” Wakudikila vo: “Dia tutu kikilu dikalanga mu wana ulolo wa masa.”

Nkand’a Nzambi uvovanga vo Aneyisaele ke basanza madia ko vava babaka mbanza Yeriko kadi Yave wabakanikina balembi wo vanga. (Yosua 6:17, 18) Uvovanga mpe vo Aneyisaele mu nsungi a masanza babaka e mbanz’a Yeriko, mu nsungi a nsâlu kadi masa mayingi makala muna mbanza. (Yosua 3:15-17; 5:10) Wau vo masa mayingi makala muna Yeriko vava yabakwa, ediadi disonganga vo mu kolo kiandwelo yabakama nze una wasonama muna Nkand’a Nzambi.