LUSANSU
Owau Ngwizani Ambote Ngina Yau yo Nzambi yo Ngudi Ame
O NGUDI ame wangiuvula vo: “Ekuma kuzolele diaka sambila akulu aku ko? Nga kuzeye wo ko vo i mu kuma kiau winina o moyo? Kuzolele kubavutula matondo ko? Ekuma ozolele bembolwela kinkulu kieto? O lembi zitisa akulu eto dina nze ngeye ovovanga vo e nsambil’eto ya uzowa.” Vava Mama kafokola o vova, wayantika dila.
Ke vavioka ngonde zayingi ko vitila kavova e mvovo miami, Mbangi za Yave bayuvula Mama kana vo ozolele longoka Nkand’a Nzambi. Katambulwila ko. Muna lembi kubakendeleka, wabavovesa vo bayantika longoka yame. Owau se yandi okumfungilanga makasi. Ediadi dia kinzenza kadi lemvokela yanlevokelanga. Kansi, wau vo yazola yangidika Yave, o nkumbu wau kialemvokela ngudi ame ko. Diampasi diakala kwa mono, kansi Yave wampana o nkuma.
UNA YAZAYILA YAVE
Wau vo kuna Japão wantu ayingi besambilanga muna dibundu dia Buda, mase mame mpe esi dibundu diadi. Kansi, ngonde zole kaka zavioka vava yayantika longoka ye Mbangi za Yave, yakwikila vo e ludi mu Nkand’a Nzambi kina. Vava yalongoka vo ngina yo Se kuna zulu, yakala ye tima dia toma kunzaya. Kuna lubantiku, mono yo Mama twazolanga mokena mana yalongokanga. Yayantika kwenda muna tukutakanu kuna Seka dia Kintinu konso Kialumingu. Vava zayi wame wawokela, yazayisa Mama vo kikwenda diaka ku dibundu dia Buda ko. Vana vau, lose lwandi lwasoba. Wavova vo: “O zinga vamosi yo muntu ke zolanga akulu andi ko, dia nkenda kikilu.” Wandodokela vo yayambula longoka Nkand’a Nzambi yo kwenda muna tukutakanu. Kiayindulanga wo ko vo ngudi ame olenda kumpovesa diambu diadi. Wasoba kikilu.
O Papa mpe wayikama Mama. Yalongoka muna kapu kia 6 kia nkanda Efeso vo Yave ozolanga vo yalemvokela mase mame. Yazola vo e nzo eto yakala diaka mu luvuvamu. Muna kuma kiaki, yabakula vo avo ibalemvokele, oyau mpe bekala yo luzolo lwa wá ngindu zame. Wau vo muna kolo kiakina kizame twavanganga kuna sikola, yabak’e nzengo za lemvokela dina mase mame bavavanga. Kansi mu ngonde tatu kaka. Yasia nsilu kwa Yave vo vava ngonde tatu zivioka, iyantika diaka kwenda muna tukutakanu.
Vena ye kuma yole isonganga vo e nzengo yabaka ke zakala zambote ko. Kiantete, yabanza vo vava kivioka ngonde tatu ikala kaka ye tima dia sadila Yave. Kansi, e ngwizani ame yo yandi yakuluka
mu nzaki zawonso. E kuma kiazole, Papa yo Mama bavanga mawonso kimana yayambula sadila Yave.LUSADISU MU NTANGW’A LUBANGAMU
Kuna Seka dia Kintinu, yamokenanga ye mpangi zayingi basiwanga kitantu kwa esi nzo zau. Bankasakesa vo Yave okunkumika. (Matai 10:34-37) Bampovesa vo avo nsikidi ye kwikizi muna Yave, kuna kulanda mase mame mpe balenda longoka oma ma Yave. Wau vo yazola bund’e vuvu muna Yave, yayantika samba ye nsi a ntima yawonso.
Mase mame bayantika kumbangika mu mpila zankaka. O Mama wandodokela vo yayambula longoka, wavanga mawonso muna soba ngindu zame. Nkumbu miayingi kiavovanga konso diambu ko. Vava yavovanga konso diambu, twayantikanga tantana kadi yeto awole ndungidi twavavanga. Owau yabakwidi vo kele vo yazitisanga ngindu yo lukwikilu lwa ngudi ame, e mambu ke madi lwaka mu tezo kiaki ko. Muna lembi kwenda fulu kiankaka, mase mame bayantika kumpana salu yayingi ya nzo. Ezak’e ntangwa babindikanga e kielo kia nzo. Nkumbu miayingi ke bansisilanga madia ko.
O ngudi ame wavava lusadisu lwa wantu akaka kimana bankwikidisa yasoba e ngindu. Wamokena nkutu yo nlongi ame a sikola, kansi ke vasoba diambu ko. O Mama wandata kwa mfumu andi a salu kimana kankwikidisa vo mabundu mawonso ke mena mfunu ko. Wabokelanga mpe yitu yeto muna telefone yo bokomoka ye dilu ekolo kavavanga lusadisu. Ediadi diamfungisanga kikilu makasi. Kansi, vava yayendanga muna tukutakanu, akuluntu bansungamesanga vo vava ngudi ame kazayisanga mambu mama kwa wantu ankaka, umbangi kabasilanga.
Mase mame bazolanga vo yatanga sikola zandá kimana yabaka salu kifutanga nzimbu zayingi. Wau vo ke twalendanga vovela diambu diadi mu ntim’avuvama ko, yabasonekena nkanda muna kubasasila makani mame. O Papa wafunga kikilu makasi yo vova vo: “Wau ovovele vo olenda kwaku solola salu kiambote, solola kio o mbazi. Avo ke wau ko, kuzingila diaka mu nzo yayi ko.” Vana vau yasamba kwa Yave kimana kansadisa. Muna lumbu kialanda, vava yakala muna salu kia umbangi, mpangi zole z’akento bampana e salu kia longa wan’au. Papa kayangalala ko, wayambula kumpovesa yo yantika kumfusulwisa e nsoni. O Mama wavova vo mbote nkutu yakala kwame kimpumbulu ke mu kala Mbangi a Yave ko.
Yave wansadisa mu singika ngindu zame yo zaya dina mfwete vanga
Ezak’e ntangwa yakatikisanga kana vo Yave i diau kikilu kazolanga vo yakwamanana songa luzindalalu mu mana mase mame bavanganga. Muna kuma kiaki, yasamba kwa Yave yo badika dina Nkand’a Nzambi uvovanga mu kuma kia zola kwandi. Ediadi diansadisa mu kala ye ngindu zasikila yo bakula vo mase mame bansianga kitantu kadi batokananga mu kuma kiame. Yave wansadisa mu singika ngindu zame yo zaya dina mfwete vanga. Vana ntandu, wau vo yatoma vaikanga muna salu kia umbangi, yayantika kio yangalela. Muna kuma kiaki, yabak’e nzengo za kituka se mviti a nzila.
SALU KIA KIMVITI A NZILA
Vava mpangi zakaka z’akento bazaya e kani diame dia sala se mviti a nzila, bampovesa vo yavingila yavana ngindu za mase mame zivuvama. Yasamba kwa Nzambi kampana e ngangu, yavavulula yo fimpa e kuma yazolela kota muna salu kia kimviti a nzila. I bosi, yamokena ye mpangi zazikuka. Yabak’e nzengo za yangidika Yave. Yabakula mpe vo kana nkutu vo mvingidi kolo kiayingi muna yantika sala se mviti a nzila, dilenda kala vo mase mame ke beyambula kunsia kitantu ko.
Yayantika salu kia kimviti a nzila muna mvu wansuka wa sikola. Una yasala mvu miole, yazola vo ngienda sadila ku zunga kiavavanga ateleki ayingi. Kansi mase mame ke batonda ko vo yayaluka. Muna kuma kiaki, yavingila yavana yalungisa kimbuta kia 20 ma mvu. I bosi, yalomba kuna vula kimana bantwika ku zunga kina lukufi ye yitu yame, kuna sude ya Japão kimana Mama kalembi tokana kwayingi.
Ekolo yakala kuna zunga kiakina, wantu ayingi yalongokanga yau Nkand’a Nzambi bavubwa. Ediadi kiese kiayingi diantwasila. Yayantika longoka Kingelezo kadi yazola vo yawokesa salu kiame. Vava yamona o vema kwa aviti a nzila wole a espesiale bakala muna nkutakani eto ye una basadisilanga akaka, mono mpe yabak’e nzengo za kituka mviti a nzila a espesiale. Muna kolo kiaki, ngudi ame nkumbu miole kabakama kimbevo kiangolo. Muna nkumbu miole miami, yavutuka kuna nzo mu kwenda kunsadisa. Ediadi diansivikisa kikilu. Tuka wauna, wayantika kunsonga e ngemba.
YAVE WANSAMBULA KIKILU
Una vavioka mvu nsambwadi, mpangi Atsushi, mosi muna aviti a nzila a espesiale ngikidi kala, wantwikila nkanda. Tima dia sompa kakala diau. Wazola zaya kana vo aweyi yamonanga mu kuma kiandi. Kiakalanga ye nzol’a kimakangu ko muna mpangi Atsushi. Kiayindulanga wo ko vo mono kazolanga. Vioka ngonde mosi, yamvutula vo kampana e ntangwa kimana yatoma kunzaya. Twabakula vo yeto awole makani mamosi twakala mau. Twakala ye tima dia kwamanana muna salu kia ntangwa ke ntangwa yo tambulwila konso kiyekwa bekutuvana. Kuna kwalanda, twakazala. Kiese kiayingi yamona wau vo mase mame ye yitu yankaka bayiza kuna nkinzi a longo lweto.
Nepal
Ke vavioka kolo ko, vava twasalanga salu kia kimviti a nzila a ngonde ke ngonde, nkaz’ame Atsushi watumbikwa se nkengi a zunga ansadisi. Kuna kwalanda, twayantika sala e salu kia kimviti a nzila
espesiale, i bosi twafilwa muna salu kia kinkengi a zunga. Vava twafokola kingula nkutakani zawonso za zunga kieto mu nkumbu wantete, twabokelwa kuna vula muna telefone. Batuyuvula kana vo tulenda kwenda kuna Nepal yo kwamanana muna salu kia kinkengi a zunga.Yayantika kuyiyuvula una mase mame bemona avo ngialukidi yo kwenda ku nsi yankaka. Vava yababokela muna telefone, o Papa wampovesa vo: “Ku nsi yambote nukwenda.” Vitila lumingu lumosi, nkundi andi wamvana nkanda wavovelanga zingu kuna Nepal. Muna kuma kiaki, o Papa wakala nkutu ye ngindu za kwenda kingula nsi yayi.
Kiese kiayingi twamona mu kala vamosi yo nkangu a Nepal kadi wantu ambote kikilu. Kuna kwalanda, e nsi ya Bangladesh yakoteswa mpe muna zunga twakingulanga. Kana una vo lukufi yakala ye Nepal, e mambu kuna nsi yayina maswaswana. Muna salu kia umbangi twawanananga yo wantu ye mambu ma mpila mu mpila. Una vavioka mvu tanu, twavoveswa diaka vo twavutuka kuna Japão. Yamu wau, twakinu muna salu kia kinkengi a zunga.
Mayingi yalongoka mu kuma kia Yave ekolo twasadilanga kuna Japão, Nepal ye Bangladesh. O nkangu a nsi zazi fu ya kisi nsi yaswaswana bena yau. Yalongoka mpe vo konso muntu waswaswana. Imonanga una Yave kelunga-lungilanga konso muntu, kuntonda una kena, kunsadisa yo sambula e ngolo kevanganga.
Ngina ye kuma yayingi ya tonda Yave. Wampana e lau dia kunzaya yo sala salu kiandi. Wampana mpe yakala diambote. Nzambi okunsadisanga mu baka nzengo zambote. Owau, ngina ye ngwizani ambote yo yandi yo mase mame. Muna lusadisu lwa Yave, mono yo ngudi ame twakituka diaka se akundi ambote. Ivutulanga matondo wau ngina mu luvuvamu yo Nzambi yo ngudi ame.