Vutulanga Matondo Muna Ntim’amvevo a Yave
YAVE nkwa ntim’amvevo. (Yakobo 1:17) Tumonanga ntim’andi amvevo muna lekwa yawonso kavanga. Wazadisa e zulu ye ntetembwa, o ntoto wawonso mpe wazala ye nti miambote-mbote.—Nkunga 65:12, 13; 147:7, 8; 148:3, 4.
O nsoneki a Nkunga 104 watonda Yave muna lekwa yawonso kasema yo soneka nkunga muna kunkembelela. Vava otanganga nkunga wau, nanga ngeye mpe omonanga nze una kamona o ntozi a nkunga ona wavova vo: ‘Nyimbidila Yave muna zingu kiame: Nyimbidila Nzambi wau ngina o moyo.’ (Nkunga 104:33) Nga ke diau ko ozolele vanga?
MBANDU ISUNDIDI YA VANINA KUNA MVEVO
Yave ozolele vo twatanginina e mbandu andi ya vanina kuna mvevo. Watuvana kuma yayingi mu kala akwa ntim’amvevo. Wavumunwina Paulu wa ntumwa mu soneka vo: “Ludika awana bena vo mvuama mu tandu kiaki balembi kala akwa lulendo, balembi sia e vuvu kiau muna umvuama wavilu-vilu, kansi muna Nzambi kaka ona okutuvananga yawonso tumwenanga o wete. Ubavovesa bavanganga o wete, bavuamina muna mavangu mambote, bakala avani a mvevo, bakayilanga ankaka, bayilundilanga lusâlu, luna vo, nkubilw’ambote mu kuma kia lumbu ikwiza, kimana basimbinin’o moyo wina vo moyo kikilu.”—1 Timoteo 6:17-19.
Muna nkand’andi anzole kwa esi Korinto, Paulu wayika e kani tufwete kala diau vava tukayilanga akaka. Wavova vo: “Konso muntu yambula kavanga wauna kakanini muna ntim’andi, ke mu lukendalalu ko ngatu komekenwa, kadi Nzambi mvani amvevo kezolanga.” (2 Korinto 9:7) Aki nani tusadisanga vava tusonganga ntim’amvevo? Paulu wavova vo tusadisanga akaka vava tukubavananga ina bavuidi o mfunu, kansi yeto mpe tukuyisadisanga kadi Yave okutusambula.—2 Korinto 9:11-14.
I bosi, Paulu wayika e mpila isundidi ina Nzambi kasongela ntim’amvevo vava kavova vo: “Matondo kwa Nzambi muna lukau lwandi lwangovo lulembi tangakana.” (2 Korinto 9:15) ‘Lukau lwangovo’ lwa Yave i yawonso yambote katuvana muna Yesu Kristu. Ke vena mvovo ko tulenda sadila mu songa o mfunu a lukau lwalu.
Aweyi tulenda songela luyangalalu lweto muna mawonso Yave yo Yesu bevanganga ye mana besinga vanga muna wete dieto? Imosi muna mpila tulenda songela vo tu akwa ntim’amvevo i sadilanga ntangwa, ngolo ye mavua meto muna salu kia Yave yo sadisa akaka bazaya Yave. Tulenda wo vanga kiakala vo tu amvuama yovo tu asukami.—1 Tusansu 22:14; 29:3-5; Luka 21:1-4.
