KONSO mvu, vena ye mameme mayingi mavila mevutukanga mu nkutakani. Yindula e ‘kiese kiayingi kikalanga kuna zulu’ vava muntu kevutukanga mu nkutakani. (Luka 15:7, 10) Avo ke kolo ko wavutukidi mu nkutakani, olenda kala ye ziku vo Yesu, ambasi yo Yave, bena ye kiese wau ovutukidi mu ludi. Dialudi vo, ekolo okwamanana kumika e ngwizani aku yo Yave mambu mayingi mampasi owanana mau. Nkia mambu mama? Nki kilenda kusadisa mu sunda mambu mama?

Mpangi zayingi vava bevutukanga mu nkutakani benuananga ye lukendalalu. Nanga olenda mona una Davidi wa Ntinu kamona. Kana nkutu vava kalolokwa masumu mandi, wavova vo: “O bi wame unkosomwene.” (Nku. 40:12; 65:3) Vava mpangi kevutukanga kwa Yave, olenda kwamanana kuyitumba mu mvu miayingi. Mpangi Isabelle, * ona wavaikiswa mu nkutakani vioka mvu 20, wavova vo: “Diampasi kikilu diakalanga kwa mono mu tambulwila vo Yave wandoloka.” Avo kwamanene kala wakendalala, yoya diaka oyoya muna mwanda. (Nga. 24:10) Kuyambula ko ediadi diavangama kwa ngeye.

Akaka wonga bemonanga wa sia vo ke belenda diaka vanga mawonso ko mevavuanga muna kumika e ngwizani au yo Yave. Vava kavutuka mu nkutakani, mpangi Antoine wavova vo: “Yamonanga nze mono yavilakana mawonso yalongoka yo vanga vitila yavaikiswa muna nkutakani.” Mu kuma kia ngindu za mpila yayi, mpangi zankaka ke belendanga kuyivana una ufwene ko muna salu ya mwanda.

Muna bonga e nona, yindula vo tembwa kiangolo kifwasidi e nzo aku. Nanga olenda yoya muna zaya e ngolo ye ntangwa ovanga muna tungulula e nzo yayi. Diau mpe dilenda vangama avo sumu  diampwena ovolele yo fwasa e ngwizani aku yo Yave. Nanga olenda yoya muna zaya e ngolo ofwete vanga muna vutulwisa e ngwizani yayi. Kansi, kuvanga diambu diadi ngeye mosi ko.

Yave okutuvananga e mboka vo: “Owau nuiza, twasingika o mambu ova kati kweto.” (Yes. 1:18) Kieleka, mayingi kala ovangidi muna ‘singika o mambu’ yo Yave. Otoma kuzolanga wau ovanganga e ngolo zazi. Owau yindula diambu edi: Yave olenda sadila nona kiaku muna vana e mvutu kwa Satana ona okuntiangunanga.—Nga. 27:11.

Wau ovutukidi mu ludi, disongele vo ofinamene Yave, yandi mpe okufinama. (Yak. 4:8) Akaka bayangalele kikilu wau bamwene vo ovutukidi mu nkutakani, kansi mayingi diaka ofwete vanga. Ofwete kwamanana kumika e ngwizani aku yo Yave wa se diaku dia zulu. Aweyi olenda wo vangila?

Teza kuyisila makani mana olenda lungisa. Nanga wakinu sungamena mambu mantete walongoka mu kuma kia Yave yo nsilu wa Paradiso. Kansi, owau divava vo wakala ye nkubika yambote nze samuna e nsangu zambote, kwendanga mu tukutakanu yo vaula e ntangwa yakalanga kumosi ye mpangi zaku. Tala makani olenda kuyisila.

Sambanga kwa Yave. O Se diaku dia zulu obakulanga vo e fu kia kuyitumba kilenda kufila mu lembi samba kwa yandi. (Roma 8:26) Muna kuma kiaki, “siamanana muna sambu,” zayisanga kwa Yave vo ozolele kala nkundi andi. (Roma 12:12) Mpangi André osungamenanga vo: “Yakitumbanga ye nsoni yamonanga. Kansi, konso ntangwa yasambanga, e ngindu zazi zavilanga. O ntim’ame wavuvamanga.” Ozevo, avo kuzeye ko dina ovova muna sambu, badika e sambu ya Davidi wa Ntinu yasonama muna Nkunga 51 ye 65.

Kalanga ye longi dia Bibila dia ngeye kibeni. Ovanga wo dikumika kimwanda kiaku yo wokesa o zola kwaku muna Yave. (Nku. 19:7-11) Mpangi Felipe wavova vo: “Wau vo kiakalanga ye longi dia mono kibeni ko, ediadi diayoyesa e kimwanda kiame yo bembola Yave. Kizolele diaka vanga vilwa wau ko. Muna kuma kiaki, yabak’e nzengo zakwamanana kala ye longi dia Bibila dia mono kibeni, kadi ediadi dikala se lutaninu kwa mono.” Ongeye mpe olenda vanga diau dimosi. Avo luludiku ovuidi o mfunu mu zaya malongi olenda longoka muna longi dia ngeye kibeni, lomba lusadisu lwa nkundi azikuka.

Kumika kikundi ye mpangi zaku muna nkutakani. Akaka muna mpangi ana bavutuka mu nkutakani, wonga bamonanga wa sia vo akaka makasi bekubafungila. Mpangi ankento, Larissa wavova vo: “Nsoni zayingi yamonanga. Yayindulanga vo mpangi zawonso yakendeleka muna nkutakani. Kolo kiayingi yakala ye ngindu zazi zambi.” Avo i wau omonanga, kala ye ziku vo akuluntu ye mpangi zankaka zazikuka bazolele kusadisa mu kumika e kimwanda kiaku. (Tala e babu, “ Adieyi Akuluntu Balenda Vanga?”) Kiese kiayingi bena kiau wau ovutukidi mu nkutakani ye bazolele vo ngeye mpe wakala ye kiese.—Nga. 17:17.

Nki kilenda kusadisa mu finama ampangi muna nkutakani? Wendanga kumosi ye mpangi zaku muna tukutakanu twawonso yo vaika yau muna salu kia umbangi. Nkia nluta dikutwasila? Mpangi Felix wavova vo: “Ampangi muna nkutakani bavingilanga vo yavutuka. Yamona vo zola kikilu banzolanga. Yau awonso bansadisa mu kuyimwena vo omono mpe imosi muna mpangi za nkutakani, Yave wandoloka kikilu ye ndenda kwamanana kunsadila.”—Tala e babu “ Adieyi Olenda Vanga?”

Ekolo okumikanga e ngwizani aku yo Yave, zaya wo vo Satana okwamanana kutwikila e tembwa kiangolo, i sia vo, mambu mampasi kimana wayoya diaka muna mwanda. (Luka 4:13) Kala wakubama muna kwamanana kumika e ngwizani aku yo Yave.

Tala e nsilu una Yave kesianga kwa mameme mandi: “Ivava dina divididi, ivutulwisa dina diyungananga, ikanga e tenda dina ditolokele, ikumika dina ditovokele.” (Yez. 34:16) Yave osadisanga mpangi zayingi kimana bakumika e ngwizani au yo yandi. Muna kuma kiaki, kala ye ziku vo ozolele mpe kusadisa kimana wakwamanana kumika e ngwizani aku yo yandi.