Yuvu Y’atangi eto

E Kintinu kia Nzambi nga mu Ntim’aku Kina?

O unu ndonga bekwikilanga vo elo i mvutu za kiuvu kiaki. Kasikil’owu, The Catholic Encyclopedia (Enciclopédia Católica) ivovanga vo: “Kimfumu kia Nzambi i mpila ina, . . . Nzambi keyadilanga ntima mieto.” Mfumu za mabundu i diau betoma longanga. Nga Nkand’a Nzambi ulonganga kieleka vo Kintinu kia Nzambi mu ntima mia wantu kina?

Akaka beyindulanga vo yandi kibeni Yesu walonga vo Kintinu kia Nzambi mu ntima mia wantu kina. Yesu wavova vo: “Tala, e kimfumu kia Nzambi kiena va kati ye beno.” (Luka 17:21 ML) Nsekola zakaka zivovanga vo: “E Kintinu kia Nzambi omo yeno i kina” yovo “muna kati kweno.” Nga nsekola zazi zatoma sekola e mvovo mia Yesu? Nga i wau kieleka kavova vo Kintinu kia Nzambi mu ntima mia wantu kina?

Diantete, yambula twafimpa kana nki i ntima muntu. Muna Nkand’a Nzambi, o ntima i kiwuntu kiaswekama, nto a ngindu ye makani ma muntu. Kasikil’owu, e ngindu za sia vo muna ntima muntu muna ye nkubika yatunda nze Kintinu kia Nzambi, zilenda moneka vo zambote yo tundidika muntu. Kansi, e ngindu zazi nga zansongi?

Muna Nkand’a Nzambi tutanganga vo: “O ntima usundidi mawonso o tekama, wayela kikilu.” (Yeremiya 17:⁠9) Yandi kibeni Yesu wavova vo: “Una utuka muna muntu, i una ufunzula muntu. Kadi muna kati, muna ntima mia wantu, mutuka makani mambi, ngyambila, ngiya, mponda, zumba, maloko, mbi.” (Maku 7:​20-​22) Badika edi: Nga kukwikilanga ko vo, mpasi tumonanga o unu mu nza, mu ntima mia wantu asumuka zitukanga? E Kintinu kia Nzambi kialunga, aweyi kilenda kadila muna ntima mia wantu awaya? Kieleka, wau vo muna nsende ke muvelwanga bundu ya vinyo ko, Kintinu kia Nzambi ka kilendi kala mu ntima muntu ko. ​—⁠Matai 7:16.

Diazole, yindula nkangu una Yesu kavovesa mvovo mina muna Luka 17:21. Muna tini kivitidi tutanganga vo: “Vava kayuvulwa kw’Afarisi vo kana nkia ntangwa kikwiz’e kintinu kia Nzambi; ubavutwidi vo, E kintinu kia Nzambi ke kikwizila mu moneka ko.” (Luka 17:​20) Afarisi atantu a Yesu bakala. Yesu watoma dio kiesesa vo akwa kuvunina awaya ke bekota muna Kintinu kia Nzambi ko. (Matai 23:​13) Wau vo Afarisi ke bekota muna Kintinu kia Nzambi ko, nga Kintinu kiaki kilenda kala muna ntima miau? Ke dilendakana ko! Ozevo, Yesu adieyi kavova?

Muna sekola e mvovo miami mia Yesu, asekodi ayingi ambote a Bíblia e mvovo basadila betela mina ye mia Tradução do Novo Mundo. Nsekola zakaka zivovanga vo e Kintinu kina “vana nwina” yovo kina “vakati kweno.” Kintinu kia Nzambi aweyi kia kadila vakati kwa wantu awaya kumosi y’Afarisi? Yesu i Ntinu Wasolwa kwa Yave wa Nzambi mu yala Kintinu kiaki. Wau vo yandi i Ntinu wasolwa, Yesu wakala vana kati kwa wantu awaya. Walonga oma ma Kintinu kia Nzambi yo vanga masivi muna kubasonga oma mevangama muna Kintinu kia Nzambi. Kieleka, Kintinu kiakala vana kati kwau.

Kavena Sono ko kisonganga vo Kintinu kia Nzambi mu ntima mia wantu kina. Kansi, Kintinu luyalu lwakieleka lusingika mambu ova ntoto nze una wasakulwa kw’angunza. ​—⁠Yesaya 9:​6, 7; Daniele 2:44.