Ese Dilembi Tezakana
Finama Nzambi
Ese Dilembi Tezakana
“ESE.” Mvovo wakete uyangidikanga wantu. Ese otoma zolanga wan’andi, okubasadisanga kimana bakala ye zingu kiasikila. Muna kuma kiaki, Nkand’a Nzambi uyikilanga Yave wa Nzambi vo “Se.” (Matai 6:9) Nkia mpila Se kena o Yave? Muna vana e mvutu za kiuvu kiaki, yambula twafimpa dina kavova Yave kwa Yesu muna lumbu kia luvubu lwandi. Vana ntandu, e mpila ina o se kemokenanga yo wan’andi isongang’e mpil’e se kena.
Muna ngonde a Oktoba ya mvu 29 wa tandu kia Kristu, Yesu wayenda vubwa muna Nkoko a Yodani. Muna Nkand’a Nzambi tutanganga dina diabwa: “O Yesu, vava kavubilu, katombok’aka muna maza, ezulu dinziukìdi, omwene o mwand’a Nzambi okulumukini nga eyembe, yo kwiza vana yandi; ndinga itukidi kun’ezulu, oku vo, Ndioyu i Mwan’ame anzolwa, ona nyangalelanga.” * (Matai 3:16, 17) Mvovo miami mia Yave mitoma songang’e mpil’e Se kena. Tala mambu matatu kavova o Yave kwa Mwan’andi.
Diantete, vava kavova vo “Ndioyu i Mwan’ame,” o Yave edi kavova, ‘Ikitundidikanga wau vo i S’aku.’ O wana bevavanga vo se diau kabazaya yo kubavwa o mfunu. O se una ye umbakuzi osianga e sungididi kia lungisa e nsatu zazi za wan’andi. Wana betoma yangalalanga vava bezayanga vo mfunu bena muna nzo. Kana una vo mbuta kakala, tulenda bakula una kamona o Yesu vava kawa e mvovo mi’e S’andi vo mfunu kekumvwanga!
Diazole, Yave wasonga zola kwandi kwa Yesu vava kanyikila vo Mwan’ame “anzolwa.” Muna mvovo miakía, o Se edi kavova, ‘Yitoma kuzolanga.’ E se diambote ovovesanga wan’andi vo otoma kubazolanga. E mvovo miami zola kwakieleka misonganga, milenda sadisa wana mu nungunuka una ufwene. Ekwe kiese kamona o Yesu vava kawa e mvovo mi’e S’andi vo otoma kunzolanga!
Diatatu, o mvovo “omu ngeye i ngyangalelanga” misongang’e dienga dia Yave kwa Mwan’andi. Muna mvovo miakía, o Se edi kavova, ‘Mwan’ame, nyangalele edi ovangidi.’ E se dianzodi ovavanga elau dia sanisina wan’andi kimana bazaya vo oyangalelanga dina diambote bavangidi yovo bavovele. O wana bekalanga yo unkabu yo kumama vava betondwanga kwa mase. Ekwe lukasakeso kabaka o Yesu vava kawa vo e S’andi wanyangalelanga!
Kieleka, Yave i Se dilembi tezakana. Nga zolele vo Yave kakala e se diaku? Avo i wau, diakiese mu zaya vo lenda kala ye ngwizani ambote yo Yave. Avo ovwidi lukwikilu yo zaya oma ma Yave yo vanga luzolo lwandi, okutonda. Muna Nkand’a Nzambi tutanganga vo: “Nufinama Nzambi, oyandi mpe okunufinama.” (Yakobo 4:8) Nkia diambu dilenda kutwasila luvuvamu avo ke kala ye ngwizani ambote ko yo Yave wa Nzambi?
[Mvovo Vana Yand’a lukaya]
^ tini. 5 Nze una tutanganga muna Nsangu Zambote zasoneka Luka, Yave wasadila o mvovo “ngeye.” Wavova vo: “Ongeye Mwan’ame anzolwa; omu ngeye i nyangalelanga.” —Luka 3:22 [Yeto tutekekele mvovo miami].