Kw’atangi eto

TUNA ye kiese kia kunuzayisa vo tuka muna finkanda-nkanda fiafi, vena y’oma masobele mun’Eyingidilu. Una ka tusongele ko oma masobele, yambula twasonga oma ka masobele ko.

E nkumbu a finkanda-nkanda fiafi, Eyingidilu Disamunanga Kintinu kia Yave, ka yisobele ko. Muna kuma kiaki, Eyingidilu diakinu kembelela Yave vo i Nzambi aludi yo fiaulwisa atangi ye nsangu zambote za Kintinu kiandi. Malongi mena muna lukaya lwa 5 yakuna lukaya lwa 9 mu finkanda-nkanda fiafi, mesonganga nsas’a Kintinu ye nkia ntangwa kikwiza. Vana ntandu, nze una divanganga tuka mvu miayingi, Eyingidilu dikwamanana kasakesa wantu bakala yo lukwikilu muna Yesu Kristu, yo kiesesa eludi kia Nkand’a Nzambi yo songa e nsasa za mambu mebwanga mu nza yawonso, ekolo melungisanga ungunza wa Nkand’a Nzambi.

Ozevo, nkia diambu disobele? Yambula twasonga edi disobele muna Eyingidilu dia wantu awonso muna Kikongo. *

Malongi mayingi malukasakeso mesinga vaika muna finkanda-nkanda fiafi. Elongi dina yo ntu a diambu, “Nga Ozeye?” nsangu zayingi zamfunu disonga, zina ye nsasa muna yak’e sono ya Nkand’a Nzambi. Elongi dina yo ntu a diambu, “Finama Nzambi” disonga una tulenda zayila Yave muna yak’e sono ya Nkand’a Nzambi. E ntu a diambu wa “Yuvu Y’atangi Eto” uvana mvutu za yuvu ya Nkand’a Nzambi beyuvulang’o wantu. Kasikil’owu, ndonga beyuvulanga, “E Kintinu kia Nzambi Nga mu ntim’aku kina?” Lenda baka mvutu za kiuvu kiaki muna lukaya lwa 13.

Musinga kala ye malongi mayingi malenda twasa nluta kwa esi nzo. Musinga vaika mpe elongi dina yo ntu a diambu, “Nsabi za Zingu kia Nzo Yakiese,” disonga mambu mebwilanga esi nzo ye una malongi ma Nkand’a Nzambi malenda kubasadisila mu singika mo. “Longa Wan’aku,” elongi diadi dikubikilu kinumana mase batanganga yo wan’au, disinga vaikiswa ntangwa zawonso. Ezak’e ntangwa, o ntu elongi ulenda sobwa vo, “Kuna kw’Aleke Eto,” elongi diadi disonga kw’aleke una balenda kubikila elongi dia Nkand’a Nzambi.

Vena ye malongi makaka mesinga vaika mpe muna Eyingidilu diadi. Elongi dina yo ntu a diambu, “Tanginina Lukwikilu Lwau” dikutufila mu landa mbandu ambote ya Selo ya Nzambi beyikwanga muna Nkand’a Nzambi. Kasikil’owu, muna lukaya lwa 18 yakuna lukaya lwa 21 lwa finkanda-nkanda fiafi, lenda tanga lusansu lwa Eleya wa ngunza ye una tulenda tanginina lukwikilu lwandi. E ntu a diambu, “Nkanda Wa . . . ” usonga nsangu za missionários ye selo yakaka muna nsi zakaka. “Adieyi Tulongokele muna Yesu,” elongi disonga malongi masina ma Nkand’a Nzambi mu mpila yaleboka.

Tusidi e vuvu vo Eyingidilu dikwamanana yangidika atangi ana bezitisanga Nkand’a Nzambi yo zola zaya dina kieleka kelonganga. Tuna mpe ye vuvu vo finkanda-nkanda fiafi filenda kusadisa mu lungisa e nsatu zaku za zaya eludi kia Nkand’a Nzambi.

AMWANGI

[Mvovo ku yanda dia lukaya]