Nga Ozeye?

Anganga nkia ntangwa bakingula Yesu?

Muna Nsangu Zambote zasoneka Matai, tutanganga vo “e nganga zatuka kuna este” zayiza kingula Yesu, banata tukau twantalu. (Matai 2:​1-​12) E lutangu lwa nganga yovo “akwa mpandu” awaya bakingula Yesu ka luzayakene ko. Kavena ziku ko kisonganga vo atatu bakala nze una ulonganga lusansu lw’akwa ngangu za nza; e nkumbu zau mpe ke zasonama ko muna lusansu lwa Nkand’a Nzambi.

E nsekola ya Biblia de Estudo da Nova Versão Internacional ivovanga mu kuma kia Matai 2:11 vo: “Nswaswani ye dina divovanga tusansu, Akwa Mpandu ka bakingula Yesu mu dikilwa kia bulu ko muna fuku una kawutuka, nze una wavanga avungudi. Vava bayenda kunkingula wakala se ‘mwana’ muna ‘nzo’ andi, ngonde zayingi zateka vioka.” E ziku kia diambu diadi kimonekanga muna nkanikinu kavana Erodi vava kazola vondesa o nsedia. Wakanikina vo wan’amakala awonso muna Yerusaleme ye muna zunga yandi bavondwa, tuka mun’ana bena muna mvu miole y’ana ke balueke mo ko. Muna sola ntel’a yingyana-ngyana yafwana vondwa, wabadika ‘e kolo kina katoma fimp’e nganga.’​—⁠Matai 2:⁠16.

Kele vo nganga bakingula Yesu muna fuku una kawutuka yo kuntwasila wolo ye tukau twankaka twantalu, Maria kadi vana kaka lukau lwa nuni zole ko, vava bayenda kunsunzula muna tempelo muna Yerusaleme, ekolo kalungisa lumbu 40. (Luka 2:​22-​24) Muna Nsiku, e lukau lwa nuni zole nkubika y’asukami ana ka balendanga vana mwan’ememe ko. (Fuka 12:⁠8) Kansi, o lukau lwalu lwantalu mu ntangw’ambote batambula lo, kadi luasadisa esi nzo a Yesu vava batina kuna Engipito.​—⁠Matai 2:​13-15.

Ekuma Yesu kanangina lumbu yá mu lwaka vana ziami kia Lazaro?

Nanga Yesu mu lukanu kavangila wo. Ekuma tulenda vovela ediadi? Tala lusansu lwasonama muna Yoane kapu kia 11.

Vava Lazaro wa mwisi Betania, wa nkundi a Yesu kabakama mayela, nsanga zandi batwika nsangu kwa Yesu. (Tini kia 1-3) E mbanza kakala Yesu muna lumbu kiakina, lumbu yole bavanganga mu lwaka kuna Betania. (Yoane 10:​40) Dialudi, o Lazaro wafwa mu lumbu kina Yesu katambula nsangu za mayela. Adieyi kavanga? “Onangini ko lumbu yole,” i bosi kayenda kuna Betania. (Tini kia 6, 7) Wau vo lumbu yole kananga yo kangala mpe lumbu yole, ozevo, mu lumbu ki’eyá kalwaka vana ziami kia Lazaro.​—⁠Tini kia 17.

Yesu masivi mole ma lufuluku kateka vanga​—⁠o mosi wamfula muna lumbu kina kafwa, wakaka kolo kiakete kiavioka tuka kafwila. (Luka 7:​11-17; 8:​49-​55) Nga olenda fula muntu wafwa vioka lumbu yá una vo nitu andi yayantika wola? (Tini kia 39) Nkanda mosi ufimpanga oma ma Nkand’a Nzambi uvovanga vo, Ayuda bakwikilanga vo “ka vakalanga diaka vuvu ko kele vo muntu wafwa lungisi lumbu ya; kadi e nitu andi yayantika wola, e moyo andi uvaikidi yo kwenda muna ngambwila se lumbu tatu.”

Avo wantu akwa lukatikisu bakala vana ziami, owau bekala se mbangi mu mona nkum’a Yesu wafula mafwa. Vava katelama vana mwelo a ziami, Yesu wavova mu nding’a ngolo vo: “E Lazaro, nza vaika!” I bosi, “ona wafwa ovaikidi.” (Tini kia 43, 44) O lufuluku i vuvu kiakieleka kw’awana bafwa, kansi ke longi dia luvunu ko dina bekwikilanga ayingi vo moyo ke ufwanga ko.​—⁠Yezekele 18:4; Yoane 11:25.