Nkia Ntangwa Kikwiza e Kintinu kia Nzambi?

“E MFUMU, nga i ntangwa yiyi ovutul’e kintinu kwa Isaele, una kiakal’e?” (Mavangu 1:⁠6) Antumwa bavava zaya e ntangwa ina Yesu kesikidisa Kintinu kiandi. O unu, vioka 2.000 ma mvu, wantu bakinu ye luzolo lwa zaya: Nkia ntangwa kikwiza e Kintinu kia Nzambi?

Wau vo Kintinu i mbuta diambu muna nsangu kasamuna o Yesu, lenda yindula vo wavan’e mvutu za kiuvu kiaki. Elo, wavana zo kikilu! Watoma songa mambu mayingi mebwa muna lumbu ina kayikila vo lumbu ya “nkal’andi.” (Matai 24:37; NW) E Kintinu kia Masia kiasikidiswa muna lumbu yovo kolo kia nkal’andi. E nkal’andi, nkia nsasa ina? Yambula twafimpa mambu mayá kesongang’o Nkand’a Nzambi mu kuma kia nkal’a Kristu.

1. Mvu miayingi miteka vioka tuka lufwa lwandi, i bosi kiyantika e nkal’andi muna Kintinu. Yesu watá kingana kimosi kina kayitezanesa yo muntu “wayenda kuna nsi anda, kayend’ayekelwa kintinu, kavutuka kwandi.” (Luka 19:​12) Aweyi walunganena ungunza wa kingana kiaki? Vava Yesu kafwa yo fuluka, wayenda kuna “nsi anda,” i sia vo kun’ezulu. Nze una Yesu kavova muna kingana kiakaka, ‘kolo kiayingi kivioka’ muna vutuka se ntinu.​—⁠Matai 25:⁠19.

Vioka mvu miayingi vava Yesu katomboka kun’ezulu, Paulu wa ntumwa wasoneka vo: “Vo i yandi [Yesu], una kamana kelela kiamakulu e kimenga kimosi, muna diambu dia masumu, ovwende kuna koko kwalunene kwa Nzambi; kuna i kevingila, yavan’atantu andi besiwa se nsikinw’a tambi yandi.” (Ayibere 10:​12, 13) Ozevo, Yesu vava kayenda kun’ezulu, kolo kiayingi kavingila. E kolo kiaki kiafokoka vava Yave wa Nzambi kakitula Mwan’andi se Ntinu muna Kintinu kia Masia, eki kiasilwa o nsilu tuka kuna nz’ankulu. E yayi i ntangwa ya yantika e kolo kia nkal’a  Kristu. Nga wantu ova ntoto bamona e diambu diadi diasivi?

2. E nkala yayi ke yimoneka mu meso ma wantu ko. Sungamena vo, Yesu sinsu ya nkal’andi kayika. (Matai 24:3; NW) Kele vo e nkal’andi yamoneka mu meso ma wantu, e sinsu nkia mfunu yadi kala? Muna bonga e nona: Yindula vo mu nzila una mu kwenda zaya o mbu. Ekolo okwendanga lenda mona sinsu yisonganga e nzila a mbu. Kele vo olweke van’ekumu dia mbu yo mona mavuku mampwena, nga sinsu diaka ovava kiasonama mu masono manene vo wau i “Mbu”? Ve kikilu! E sinsu ke kina mfunu ko mu zaya e lekwa kina lenda mona mu meso maku.

Yesu muna yika sinsu kia nkal’andi, wasonga dina kadilendi moneka mu meso ma wantu ko, kansi wazola kubasadisa babakula diambu divangama kun’ezulu. Muna kuma kiaki, Yesu wavova vo: “E kintinu kia Nzambi ke kikwizila mu moneka ko.” (Luka 17:​20) Ozevo, e sinsu aweyi kilenda songela kwa wantu ova ntoto vo kolo kia nkal’a Kristu kiayantika?

3. E kolo kia nkal’a Yesu kizayakana muna mambu mampasi mebwa ova ntoto. Yesu wavova vo e nkal’andi nze Ntinu kun’ezulu, yizayakana mu kuma kia vita, mvengele, nzakama za ntoto, vuku yo umpumbulu. (Matai 24:​7-12; Luka 21:​10, 11) Nani otwasa mpasi zazi zawonso? Nkand’a Nzambi usonganga vo Satana wa “nkuluntu a nza yayi,” una ye makasi mayingi, wau kazeye vo kolo kiandwelo kaka kasidi kiau, kadi e lumbu kia nkal’a Kristu nze Ntinu kiayantika. (Yoane 12:31; Lusengomono 12:​9, 12) O makasi ma Satana ye sinsu yisonganga e ziku kia nkal’a Kristu, itoma monekanga mu lumbu yeto. Musungula tuka muna mvu wa 1914, owu uzayakene kw’asoneki a tusansu vo i mvu wasoba mambu muna lusansu. E ziku kia diambu diadi kimonekanga mu nza yawonso.

Mawonso mama malenda badikilwa vo nsangu zambi, kansi ke wau ko. Ediadi disonganga vo owau Kintinu kia Masia mu yala kina kun’ezulu. Ke kolo ko, Kintinu kiaki kiyala e nza yawonso. O wantu aweyi balenda zayila Ntinu a Kintinu kiaki yo kala muna luyalu lwandi?

4. E salu kia samuna nsangu zambote mu nza yawonso i sinsu kisonganga nkal’a Yesu. Yesu wavova vo e nkal’andi ikala nze muna “lumbu ya Noa.” * (Matai 24:​37-​39) Noa mayingi kavanga, katunga kaka nzaza ko, “nteleki a ndungidi” mpe kakala. (2 Petelo 2:⁠5) Noa walukisanga wantu vo  e mfundisa Nzambi yafinama. Yesu wavova vo alandi andi ova nza, diau adimosi mpe bevanga muna kolo kia nkal’andi. Wasakula vo: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.”​—⁠Matai 24:⁠14.

Nze una tumwene muna longi diviokele, Kintinu kia Nzambi kisinga fwasa tuyalu twawonso twa nza yayi. E salu kia samuna nsangu zambote kilukisanga wantu vo o luyalu lw’ezulu lufinamene yo kubavana elau dia vuluka yo kala muna Kintinu kiaki. Kansi, e kiuvu kiamfunu i kiaki, Adieyi ovanga?

E Kintinu kia Nzambi nga Nsangu Zambote kwa Ngeye?

E nsangu zina kasamuna o Yesu, vuvu kilembi tezakana zitwasanga. Vioka mazunda ma mvu tuka ukolami wakotela muna Edene, Yave wa Nzambi wabaka e nzengo za sikidisa luyalu lusingika mambu yo vutulwisa moyo a mvu ya mvu kwa wantu akwikizi muna paradiso, nze una wakala luzolo lwa Nzambi kuna lubantiku. Diakiese dia zaya vo luyalu lwalu lwasilwa o nsilu tuka kolo, owau mu yala se luna kun’ezulu. E Kintinu kiaki ke nkubika yakondwa mfunu ko, kansi kia ludi kikilu!

Owau, e Ntinu wasolwa kwa Nzambi oyalanga vana vena mbeni zandi. (Nkunga 110:⁠2) Muna nza yayi yambi yavambana yo Nzambi, Masia olungisanga luzolo lwa S’andi lwa vava ana bazolele zaya vo Nzambi una kieleka yo kunsambila “muna mwanda ye ludi.” (Yoane 4:​24) E vuvu kia zinga yakwele mvu muna Kintinu kia Nzambi kivewanga kwa wantu a makanda mawonso, ntela ye mpila za nsansuka zawonso. (Mavangu 10:​34, 35) Tuwondelele watambula elau diadi diasivi diveno kwa ngeye. Muna vwa moyo wakwele mvu muna luyalu lwandi lwansongi, longoka oma ma Kintinu kia Nzambi tuka wau.​—⁠1 Yoane 2:⁠17.

[Mvovo Vana Yand’a lukaya]

[Mafoto zina muna lukaya lwa 8, 9]

E nsangu zambi tuwanga lumbu yawonso zisonganga e ziku vo mambu mambote mafinamene

[Avwe a Foto]

Antiaircraft gun: U.S. Army photo