Yuvu Y’atangi eto

Ekuma Mbangi za Yave ke Besadilanga Ekuluzu ko Muna Sambila?

Mbangi za Yave bekwikilanga vo muna lufwa lwandi, Yesu Kristu wavana moyo andi se lukulu lwaziula nzila kimana awana bekwikilanga muna yandi bavwa moyo a mvu ya mvu. (Matai 20:28; Yoane 3:​16) Kansi, ke bekwikilanga ko vo Yesu va kuluzu kafwila, nze una kesongwanga muna fwaniswa yayingi. Edi bazeye vo Yesu mu nti kakomwa, ke va kuluzu ko.

Mafunda mole ma mvu ekolo Kristu kawutukidi ko, ekuluzu diasadilwanga kuna Mesopotamia. E kimbangi kia Sren Tito Achen wa mwisi Dinamarca wa mfimpi a tusansu ye sinsu wasoneka muna nkanda Symbols Around Us vo: Esi zula basadilanga ekuluzu “nze sinsu kia mpandu . . . kitaninanga yo vana elau kwa wantu.” Ikuma o nkanda New Catholic Encyclopedia uvovilanga vo: “Tuka kuna nz’ankulu yamu tandu kiantete, ekuluzu dibadikilwanga se sinsu kiamfunu kwa esi zula.” Ozevo, ekuma ekuluzu diasolelwa se sinsu kiavauka muna mabundu ma nza yayi?

Vine wa nlongi otoma zitiswanga kuna Grã-Bretanha, wasonga e ziku eki: ‘Muna 300 za mvu tuka lufwa lwa Yesu . . . esi zula batambuka muna mabundu . . . yo yambulwa vo basadilang’e dimbu ye sinsu ya nsambil’au yankulu. Muna kuma kiaki, e sinsu kia Tau yovo T, . . . kumosi y’ekuluzu dia yantika sadilwa muna Kikristu kia Kimpangila.”​​—⁠Vine’s Expository Dictionary of Old and New Testament Words.

Vine wasoneka mpe vo e mvovo “ekuluzu” ye vangu dia “koma”, “nti disonganga . . . diaswaswana y’ekuluzu disadilwanga muna mabundu.” Muna songa e ziku kia ngindu zazi, Oxford University’s Companion Bible uvovanga vo: “Dialudi . . . O Yesu va nti yovo v’ebaya kavondelwa, ke va nti miole miabindana ko.” Kieleka, esi mabundu lusansu lwa zula batanginina ke luna mu Nkand’a Nzambi ko.

Achen wa mfimpi a tusansu tuyikidi wavova vo: “Ke vena ziku ko kisonganga vo muna tandu kia nkama zole tuka lufwa lwa Yesu, Akristu sinsu kia kuluzu basadidinge.” Wavova diaka mu kuma ki’Akristu a tandu kiantete vo, ekuluzu “diabadikilwanga nze sinsu kia lufwa ye umpumbulu, nze una ubadikilwanga nsinga wa zembekela wantu misadilwanga mu pelezo yovo kunda kia nsinga mia kura kisadilwanga mu tandu kieto.”

Edi disundidi o mfunu, lembi yindula e mpila kavondelwa o Yesu, ke vena teke ko yovo sinsu kia lekwa kiaki kifwete kituka se kima kia sambila kw’Akristu. Nkand’a Nzambi uvovanga vo, “nutin’ak’o samba teke.” (1 Korinto 10:​14) Yandi kibeni Yesu wasonga sinsu kizayilwanga alandi andi aludi. Wavova vo: “Muna wau i bezayil’o wantu awonso vo nu alongoki ame, ovo nzolani nuna yau.”​—⁠Yoane 13:⁠35.

Muna mambu mawonso ma nsambila, nze Akristu a tandu kiantete, Mbangi za Yave Nkand’a Nzambi belandanga ke tusansu twa wantu ko. (Roma 3:4; Kolosai 2:⁠8) Muna kuma kiaki, ke besadilanga ekuluzu ko muna sambila.

[Foto ina muna lukaya lwa 25]

Fwaniswa kia ntinu a zula ki’asuri ovwete ekuluzu, muna mvu wa 800 vitila kristu

[Avwe a Foto]

Photograph taken by courtesy of the British Museum