Una Lufwa lwa Yesu Lulenda Kuvuluzila

VIOKA 2.000 ma mvu, kina kia Nduta y’Ayuda ya mvu a 33 wa tandu kieto, muntu mosi wakondwa kuma wafwa kimana akaka bavwa moyo a mvu ya mvu. Nani ndiona? Yesu wa Nazarete. Aki nani balenda baka nluta muna lufwa lwandi? Wantu awonso. Sono kimosi kia Nkand’a Nzambi kitomene zayakana kivovanga mu kuma kia kimenga kiaki kia lukûlu vo: “Muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.”​—⁠Yoane 3:16.

Kana una vo ndonga bazeye sono kiaki, akete kaka bazayidi kio e nsasa. Beyuvulanga vo: ‘Ekuma tuvwididi kimenga kia Yesu o mfunu? O lufwa lwa muntu mosi aweyi lulenda vuluzila wantu awonso muna lufwa lwakwele mvu?’ Nkand’a Nzambi uvananga mvutu zakiá, za kiese za yuvu yayi.

Una Lufwa Lwayadil’e Kanda dia Wantu

Wantu akaka bekwikilanga vo wantu bavangwa kimana bazinga fikolo ova ntoto yo mona mpasi kumosi ye kiese, i bosi befwa yo kwenda kuna fulu kisundidi o wete. Muna ngindu zazi, o lufwa lubadikilwanga vo dimosi mun’ekani dia Nzambi mu kuma kia wantu. Kansi, Nkand’a Nzambi kuma kiakaka usonganga kina wantu befwilanga. Uvovanga vo: “Muna muntu mosi i mwakotel’esumu muna nza, o lufwa mpe mun’esumu; i ngyandangiana luayandangian’o lufwa muna wantu awonso, wau yawonso basumuka.” (Roma 5:​12) E tini kiaki kisonganga vo wantu befwanga mu kuma ki’esumu. Nani i “muntu mosi” wasambukisa e sumu kwa wantu awonso?

O nkanda Enciclopédia Delta Universal usonganga vo akwa ngangu ayingi a nza bekwikilanga vo wantu awonso va fulu kimosi batuka, o Nkand’a Nzambi utoma dio kiesesanga vo e fulu kiaki i “muntu mosi.” Mun’Etuku 1:27 tutanganga vo: “Nzambi osemene muntu muna mpw’andi, muna mpw’a Nzambi i kansemena; eyakala yo nkento kabasema.” Muna kuma kiaki Nkand’a Nzambi usonganga vo eyakala yo nkento antete i basundidi o mfunu muna vangwa yawonso ya Nzambi wa Mpungu-ngolo ova ntoto.

Nkanda Etuku mayingi uzaisanga mu kuma kia zingu kia wantu vava Yave wa Nzambi kavanga muntu antete. Muna lusansu lwalu, Nzambi wayika lufwa se tumbu kia ukolami. (Etuku 2:​16, 17) Wazola vo wantu bazinga yakwele mvu ye kiese muna paradiso yambote ova ntoto. Kazola ko vo wantu bamonang’e mpasi za kinunu yo lufwa. Ozevo, o lufwa aweyi lwakotela muna wantu awonso?

E kapu kia 3 ki’Etuku kisonganga una yakala yo nkento antete babakila nzengo zambi za kolamena Yave wa Nzambi wa Mvani a mioyo miau. I bosi, Nzambi wabavana tumbu kina kateka kubazayisa. Wavovesa yakala vo: “Kadi u ntoto wina, mu ntoto ovutuka.” (Etuku 3:​19) E mvovo mia Nzambi mialungana, kadi akolami awaya yau awole bafwa.

 Kansi, o mfwilu wau ke wamona kaka yakala yo nkento antete ko. O ukolami wau wavidisa vuvu kia moyo alunga una badi tambula wan’au. Una ke bawutukidi ko o wan’awaya, Yave wasonga ekani diandi kw’Adami yo Eva vo: “Nuwutana, nuwokela, nulungila nza, nukulula yo; nuyala mbizi za kalunga, ye nuni z’ezulu, ye ma yawonso yamoyo iyatatang’ova ntoto.” (Etuku 1:​28) Kuna kukwiziwa, wantu badi wutana yo zadisa ntoto kimana bazingila vo ye kiese yakwele mvu. Kansi, Adami wa nkulu au​—⁠wa “muntu mosi”​—⁠wabateka muna ubundu w’esumu ye lufwa luna ke balendi venga ko. Paulu wa ntumwa ona watuka muna mbongo a muntu antete wasoneka vo: “Vo i mono, i wanitu, yataika kw’esumu.”​—⁠Roma 7:14.

Nze una yimpumbulu beyivisanga salu kiambote ki’akwa umbangu, Adami wau kasumuka wayivisa wantu bena vo i vangwa ya Nzambi isundidi o mfunu. Wan’a Adami, wan’au bena vo atekelo andi ye muna mbandu zawonso. Konso mbandu ivinganga, iwutanga, i bosi ifwanga. Nkia kuma befwilanga yau awonso? Kadi awonso mu Adami batuka. Nkand’a Nzambi uvovanga vo: “Wau vo mun’ekuzuka dia muntu mosi ebidi diafwa.” (Roma 5:​15) Mayela, kinunu, ye fu kiavanga o bi yo lufwa i mfwilu mi’evangu dia Adami dia yekola esi nzo andi. Yeto awonso tuna muna kanda diandi.

Muna nkanda kasoneka kwa esi Roma, Paulu wa ntumwa wayika mpasi, ntantu ye lukendalalu lwa wantu alembi lunga, kumosi ye yandi kibeni. Wayuvula vo: “Ekw’omono muntu a nkangu a ntim’e! nani okuntayisa muna to kia lufwa lualu?” Nga kukwikidi ko vo kiuvu kiaki kiamfunu? Nani lenda vuluza Paulu y’akaka muna ubundu w’esumu yo lufwa? Yandi kibeni Paulu wavutula vo: “Ntondele Nzambi muna Yesu Kristu wa Mfumu eto.” (Roma 7:​14-​25) Elo, Mvangi eto waziula nzil’a luvuluku lweto muna Yesu Kristu wa Mwan’andi.

Fulu kia Yesu Mun’ekani dia Nzambi dia Vuluza Wantu

Yesu wayika e salu kiandi kia vuluza wantu muna ubundu w’esumu yo lufwa. Wavova vo: ‘Mwan’a muntu, wayiza . . . vana  moyo andi se lukulu lua wantu ayingi.’ (Matai 20:​28) O moyo a Yesu aweyi winina se lukûlu? O lufwa lwandi aweyi lulenda kututwasila nluta?

Nkand’a Nzambi uyikilanga Yesu vo “walembi sumuka” ye “wavauka mun’asumuki.” Muna zingu kiandi kiawonso, Yesu walemvokela emvimba Nsiku mia Nzambi. (Ayibere 4:15; 7:​26) Muna kuma kiaki, Yesu kafwa mu kuma ki’esumu dia Adami ko. (Yezekele 18:⁠4) Elo, Yesu watambulwila o fwa lufwa lwansongi, kimana kavanga luzolo lw’eS’andi lwa kûla wantu mun’esumu ye lufwa. Nze una tutekele vova, Yesu muna zola kwawonso ‘wavana moyo andi se lukûlu lua wantu ayingi.’ Muna kuma kia zola ke kusidi songa muntu akaka ko muna lusansu lwawonso, Yesu ‘wayeleka lufwa muna diambu dia wantu awonso.’​—⁠Ayibere 2:⁠9.

E moyo andi kavan’o Yesu se kimenga, betela wakala ye moyo una kavidisa Adami vava kasumuka. Nkia nsendo lwatwasa lufwa lwa Yesu? Yave watambulwila kimenga kiaki se “lukûlu lu’awonso.” (1 Timoteo 2:⁠6) Muna kuma kiaki, Nzambi wasadila moyo a Yesu mu sumbulula yovo kûla wantu muna ubundu w’esumu yo lufwa.

Nkand’a Nzambi utoma yikanga evangu diadi dia zola kwampwena kasonga o Mvangi a wantu. Paulu osungamesanga Akristu vo ‘mu ntalu basumbilwa.’ (1 Korinto 6:20; 7:​23) Petelo wasoneka vo muna kûla Akristu muna lufwa, Nzambi kasadila palata ye wolo ko, kansi menga ma Mwan’andi. (1 Petelo 1:​18, 19) Muna kimenga kia lukûlu lwa Kristu, Yave wakûla wantu muna tumbu kia lufwa lwakwele mvu.

Nga Osinga Baka Nluta mia Lukûlu lwa Kristu?

Muna kuma kia nsambu zitwasa lukûlu lwa Kristu, Yoane wantumwa wasoneka vo: “[Yesu Kristu] i lembeka muna masumu meto; kansi ke mu meto kaka ko, ye ma nza yawonso mpe.” (1 Yoane 2:⁠2) Elo, lukûlu lwa Kristu lwavewa mu kuma kia wantu awonso. Nga diadi disonganga vo wantu awonso besinga vwa e nsambu za kimenga kia lukûlu lwa Yesu? Ve. Sungamena wantu bavuluzwa muna sumbula kiyikilu mun’elongi divitidi. Awana bavuluza atimi a wumbu dia tadi, nsinga bakulumuna mun’ewulu, kansi diavavanga vo konso muntu katoma simba nsinga wauna muna kuntombola. Diau adimosi mpe, awana bazolele vwa nsambu za kimenga kia lukulu lwa Kristu kabafwete vingila vwa e nsambu za Nzambi mu ngovo ko. Diambu bafwete vanga.

Nkia diambu kevavanga o Nzambi? Muna Yoane 3:36 tutanganga vo: “On’okwikilanga muna Mwana, una yo moyo a mvu ya mvu; kansi on’okolamang’o Mwana, kemona moyo ko, o makasi ma Nzambi muna yandi  kaka mekalanga.” Nzambi ovavanga vo twakwikila muna kimenga kia Kristu. Vena mpe ye mambu makaka kevavanga. “Muna wau i tuzayidi wo vo tunzeye [Yesu], ovo tulunda nkanikinu miandi.” (1 Yoane 2:⁠3) Ka lukatikisu ko, o kwikila muna lukûlu lwa Kristu yo lemvokela nkanikinu miandi i nsabi muna vevoka mun’esumu yo lufwa.

E mpila yambote ya songela lukwikilu muna lukûlu lwa Yesu i kala muna luyindulu lwa lufwa lwandi nze una kakanikina yandi kibeni. Una kafwidi ko, wa dia elambu ye ntumwa zandi za kwikizi yo kubavovesa vo: “I wau wuwu nuvanga muna luyindulu luame.” (Luka 22:​19) Mbangi za Yave betoma zitisanga kikundi kiau yo Mwan’a Nzambi, muna lemvokela nkanikinu wau. Omu mvu wau, o Luyindulu lwa lufwa lwa Yesu Kristu kia Sabala kia 22 kia ngonde Malusu lwavangama, kunima ndimuk’a ntangwa.

O unu wantu akete kaka bevutulanga matondo muna lukau lwampwena kavana o Mvangi au ye Mwan’andi muna kubakula muna lufwa. Awana bekwikilanga muna kimenga kiaki kiese kiayingi bemonanga. Petelo wa ntumwa wasonekena akw’andi Akristu vo: “Wau nukwikila [muna Yesu], nuyangalelang’e ngyangalala ilembi vovakana, ya nkembo kikilu: nutambulanga ndandu a lukwikilu lueno, o luvuluku lua mioyo mieno.” (1 Petelo 1:​8, 9, NW) Muna wokesa o zola kwaku muna Yesu Kristu yo kwikila muna kimenga kia lukûlu lwandi, lenda kala ye kiese kiayingi muna zingu kiaku owau yo vingila luvevoko lwa masumu yo lufwa.

[Foto ina muna lukaya lwa 6]

O Yesu wavana moyo andi wakala betela ye una kavidisa Adami

[Foto ina muna lukaya lwa 7]

O Luyindulu lwa lufwa lwa Yesu Kristu kia Sabala kia 22 kia ngonde Malusu ya mvu a 2008 lwavangama, kunima ndimuk’a ntangwa