“Dumbelele wa Mwisi Isaele” omu Lumbu Yeto

MUNA mvu wa 2006, vitila tumingu tole e lumbu kia Luyindulu lwa lufwa lwa Yesu, Abigayl ye mase mandi kumosi ye mbut’andi w’eyakala, bekalanga kuna Praia Grande ya Brazil, basoneka e nkumbu za wantu ana bakana bokela beza ku luyindulu. Abigayl una ye kimbuta kia mvu nsambanu, wavewa e mboka kwa mase mandi yo kunyuvula kana kwa nani ketambika yo.

Wavova vo: “Kwa muntu okunsevesanga yitambika yo.”

Mase mandi banyuvula kana: “Nani i muntu ndioyo?”

Wavutula vo: “O muntu on’ovwandanga van’ekalu di’avanguki.”

Vioka lumbu yá , Abigayl wasonga muntu ndiona kwa mase mandi. O muntu ndioyo i Walter, ozingilanga lukufi y’Eseka dia Kintinu. Se vioka mvu 15 tuka kavangukila mu sumbula ki’ekalu, vava kakala kimbuta kia mvu 28. Wau vo mvwama, wakala yo wantu wole banlunga-lunganga. Vava Abigayl kavewa nswa wamokena yo Walter, mase mandi bavovesa Walter vo mwan’au ankento ozolele kuntambika e mboka.

Kuna mfoko a moko, Abigayl wavova vo: “Wantu awonso mun’Eseka dia Kintinu mboka zayingi bena zau, kansi mono imosi kaka ngina yau. Muna kuma kiaki, ngeye kaka mbokele. Avo kukwiza ko, kikala yo muntu ko. Kansi, avo wizidi iyangalala kikilu, o Yave mpe oyangalala.”

Muna lumbu kia Luyindulu, ampangi kumosi yo Abigayl bayenda komba Eseka dia Kintinu divangilwa Luyindulu. Muna ntangwa yayina, Walter waviokela kun’Eseka dia Kintinu, una kamona Abigayl, ovovese muntu wanatanga ekalu diandi kaningama. Vana vau oziwidi e zianela y’ekalu, oyuvwidi Abigayl kana nkia salu kesalanga. Umvovese vo, eseka bevelelesanga mu kuma kiandi.

Oku masika, Abigayl watelama moyo. Vava elongi diayantika, wavavanga zaya kana vo Walter wizidi kala. Vana vau, Walter wizidi kumosi ye wantu wole ana banlunga-lunganga. Wayangalala kikilu. Kuna mfoko elongi, Walter wavova kwa Abigayl vo ku mbanza yakaka kadi kwenda, kansi kele ko kimana keza ku Luyindulu mu kuma kiandi. I bosi wakudikila vo: “Elongi ngwidi i diau yavavidinge.” Walomba Nkand’a Nzambi, wayantika longoka yo kwenda muna tukutakanu.

Muna kolo kiakina, nsanga a Walter wasonga luzolo lwa monana ye Abigayl ona mpangi andi ayakala kayikanga nkumbu miayingi. Vava bawanana, wamon’e kiese mu zaya vo Abigayl mwan’ambote kieleka. Wavova vo: “O wau nzeye ekuma mpangi ame ayakala kenena ye kiese.”

Walter wakinu longoka yo kwenda mu tukutakanu. Ovananga e mvutu yo mokena y’akaka mana kelongokanga. Kieleka, Abigayl okutusungamesanga e dumbelele kia mwisi Isaele ona wasadisa Namani mu zaya Yave wa Nzambi aludi.​—⁠2 Ntinu 5:​2-14.