Yuvu Y’atangi eto

Ekuma Tufwete Sadila Nkumbu a Nzambi wau vo ke Yizayakene ko una Yayikilwanga?

O unu kavena muntu ko ozeye una wayikilwanga e nkumbu a Nzambi muna ndinga Kiyibere kuna nz’ankulu. Kansi, e nkumbu a Nzambi tezo kia 7.000 yasonama muna Nkand’a Nzambi. Yesu vava kakala ova ntoto wasengomona e nkumbu a Nzambi yo vovovesa alongoki andi basambanga kimana e nkumbu yayi yazitiswa. (Matai 6:9; Yoane17:⁠6) Muna kuma kiaki, o sadila e nkumbu a Nzambi i diambu disundidi o mfunu kw’Akristu akieleka. Ekuma ke yizayakene ko e mpila yayikilwanga e nkumbu a Nzambi? Vena ye kuma yole.

Kiantete, se vioka mafunda mole ma mvu, Ayuda muna kuma kia lusansu lwau balonganga vo diambi dia yika nkumbu a Nzambi. Vava muntu katangang’o Nkand’a Nzambi yo lwaka va fulu kiasonama nkumbu a Nzambi, wavingisanga mvovo “Mfumu” vana fulu kiandi. Wau vo bayambula yo sadila mu mvu miayingi, o nkangu wavilakana una wavovelwanga e nkumbu a Nzambi.

Kiazole, e ndinga Kiyibere ke yasonekwanga ye sono nze yayi ko: a, e, i, o, u. Diau adimosi mpe muna Kingelezo ye ndinga zakaka vava bekufikanga e mvovo, ke besadilanga sono yayi ko. Vava muntu katanganga sono ya Kiyibere, diavavanga vo muna ngindu zandi kakudikila e sono yayi yakondwa. Kuna sentu, bayantika sadila e sono yayi a, e, i, o, u kimana balembi vilakana e mpila yatangila e mvovo mia Kiyibere. I bosi, e sono yayi yakudikilwa mpe muna konso mvovo wa Kiyibere muna Nkand’a Nzambi. Kansi, vana fulu kia nkumbu a Nzambi, ke bakudikila e sono yayi ko, mvovo a “Mfumu” kaka bavingisa vo kimana atangi balembi wo vilakana.

Sono eyi YHWH yovo JHVH kaka yasala. Dicionário dimosi disonganga vo “e sono yayi yau yá i nkumbu a Nzambi muna ndinga Kiyibere.” E mvovo JHVH avo ukudikilu e sono eyi, e, o, a, uyantika tangwa vo “Jeová” mu Kimputu. Muna ndinga Kikongo vo “Yave.” E nkumbu yayi itomene zayakana yo sadilwa.

Kansi, akwa ngangu akaka bevovanga vo e nkumbu yayi ifwete tangilwanga owu, “Yahweh” yovo “Javé.” Nga i wau kikilu yavovelwanga kuna nz’ankulu? Kavena muntu ko lenda zaya e ziku kia diambu diadi. Owau, akwa ngangu akaka besonganga ekuma ka ifwete sadilwa ko e nkumbu yayi. Kieleka, e nkumbu za Kiyibere kia nz’ankulu muna Nkand’a Nzambi vava zivovwanga mu ndinga za tandu kiaki, ke zisobanga ko ye kavena muntu ko omenganga zo. Tukulukiananga yo yangalela nkumbu zazi muna ndinga zeto. Diau adimosi mpe mu kuma kia nkumbu a Yave.

Akristu a tandu kiantete bayikilwanga vo nkangu muna nkumbu a Nzambi. Basamunanga e nkumbu a Nzambi kw’akaka yo kubakasakesa bavovelela yo. (Mavangu 2:21; 15:14; Roma 10:​13-​15) Kieleka, Nzambi ovavanga vo twasadila e nkumbu andi muna ndinga zawonso, twazaya nsas’andi yo zingila ngwizani ye nkumbu andi.

[Mvovo mia Sina muna lukaya lwa 32]

E nkumbu a Nzambi tezo kia 7.000 yasonama muna Nkand’a Nzambi