Adieyi Tulongokele Muna Yesu

Mu Mpila Tulenda Kadila Y’akaka

Ekuma tufwete kadila akwa ngemba?

Nga ovangang’o wete kana nkutu akaka ke bevanganga wo ko? Avo tuzolele tanginina Yesu, tufwete vangang’o wete, kana nkutu kw’awana bekutumenganga. Yesu wavova vo: ‘Ovo nuzolele ana banuzolele, nkia wete nuna wau? kadi asumuki bazolele ana babazolele. . . . Kansì tu, nuzol’atantu eno, . . . nwakala nu wan’a Mpungu: kadi oyandi mvevodi kuna kwa ntokozi, yo kuna kw’akwa bi.’​—⁠Luka 6:​32-36; 10:​25-37.

Ekuma tufwete lolokelanga akaka?

Vava tusumukanga, tuvavanga vo Nzambi katuloloka. Yesu walonga vo, diamfunu twalombanga luloloko kwa Nzambi muna sambu. (Matai 6:​12) Kansi, Yesu wavova mpe vo o Nzambi muna kutuloloka, yeto mpe tufwete loloka akaka. Wavova vo: “Ovo nuyambulwila wantu o makuzuka mau, o S’eno kun’ezulu okunuyambulwila mpe. Kansi ovo nulembi yambulwila wantu o makuzuka mau, o S’eno kekunuyambulwil’omeno makuzuka ko.”​—⁠Matai 6:​14, 15.

 Esi nzo aweyi balenda kadila ye kiese?

Kana una vo Yesu kasompa ko, tulenda longoka mayingi kwa yandi muna mpila tulenda kitulwila zingu kia nzo se kiakiese. Muna mvovo ye mavangu mandi, watusisila e mbandu ina tulenda tanginina. Badika mambu matatu oma malende:

1. O yakala kafwete zola nkaz’andi nze yandi kibeni. Yesu wasisa mbandu ambote kw’akala. Wavova kw’alongoki andi vo: “Nkanikinu ampa ikunusia, nuzolaziana.” Yamu nkia tezo? “E nzola inuzolele, i nuzolaziananga” u kavova. (Yoane 13:​34) Muna vana nkanikinu wau kw’akala, Nkand’a Nzambi uvovanga vo: “Akala, nuzolang’akazi eno, waun’o Kristu wazola dibundu, yo kuyekwela dio; . . . wauna mpe, akala bafwete zol’akazi au, nze to ya yau kibeni. Ndion’ozolele owandi nkento, wiyizolele: kadi ke vakedi nkutu muntu wasaula yandi nitu ko; tongonona kaka ketongononanga yo, yo wonzakana, nze Kristu mpe dibundu.”​—⁠Efeso 5:​25, 28, 29.

2. Akazi bafwete songanga kwikizi muntu yo nkw’andi. E mvukana za nitu kuna mbazi a longo sumu diampwena kuna kwa Nzambi ye ngwizani difwasanga muna nzo. Yesu wavova vo: “Nga ke nwatanga wo ko . . . Muna diambu diadi o’yakala kafwete yambwil’o s’andi yo ngw’andi, katatidil’o nkaz’andi; yau ewole bakala se nitu mosi. Ke bekala diaka nwole ko, se nitu mosi kaka. Dianu vo, kina kiayikakeswa kwa Nzambi, o muntu kavambanisa ko. . . . Inusamunwini vo, konso on’osindik’o nkaz’andi, ovo ke mu diambu dia zumba ko kasompa wakaka, zumba katele yandi.”​—⁠Matai 19:​4-9.

3. O wana bafwete lemvokelanga mase mau. Kana una vo Yesu walunga kakala, mase mandi ke bakala balunga ko, kansi wabalemvokelanga. Nkand’a Nzambi uvovanga vo vava Yesu kakala ye kimbuta kia mvu 12, “okulumukini yau [mase mandi], wele kuna Nazarete; ubatumamene.”​—⁠Luka 2:51; Efeso 6:​1-3.

Ekuma tufwete lemvokela nkanikinu miami?

Yesu wavova kw’alongoki andi vo: “Ovo nuzeye mo mama, nu akwa nsambu, ovo nuvanga mo.” (Yoane 13:​17) Muna kala Akristu akieleka, tufwete lemvokelanga luludiku katuvana o Yesu lwa mpila tufwete kadilanga y’akaka. Wavova vo: “Muna wau i bezayil’o wantu awonso vo nu alongoki ame, ovo nzolani nuna yau.”​—⁠Yoane 13:35.

Muna zaya mambu makaka, tanga kapu kia 14 kia O Nkand’a Nzambi Adieyi Kieleka Kelonganga? *

[Mvovo Vana Yand’a lukaya]

[Foto ina muna lukaya lwa 16, 17]

E kingana kia Yesu kia mwan’ankolami, kikutulonganga o mfunu wa vanga o wete yo lolok’akaka.​—⁠Luka 15:​11-32

[Foto ina muna lukaya lwa 17]

Akazi bafwete songanga kwikizi muntu yo nkw’andi