Adieyi Kieleka Dibwilanga Muntu Vava Kefwanga?

“Mioyo ke mifwanga ko, kana nkutu mioyo mia yimpumbulu . . . Kana milandilu e kunda yo yokwa vana tiya tulembi zimwa, ke milendi fwa ko ngatu [fukiswa], ke mivevoka muna mpasi ko.”​—⁠Clemente de Alexandria, nsoneki a tandu kiezole ye kietatu kia tandu kia Kristu.

NZE Clemente, awana belonganga vo bilungi fulu kia bangikila wantu, bekwikilanga vo moyo a muntu ke ufwanga ko. Nga elongi diadi ngwizani dina yo Nkand’a Nzambi? Tala dina kevovanga Nkand’a Nzambi muna vana mvutu za yuvu eyi.

Nga Adami wa muntu antete, moyo ulembi fwa kavewa? Muna nsekola ya Protestante izayakene vo Versão Rei Jaime (RJ) yovo Versão Autorizada, tutanganga mu kuma kia Adami vo: “O Mfumu Nzambi obumbidi muntu muna mbundukutu a ntoto, umvumunwini muna mazunu o mwand’a moyo; o muntu okitukidi se wamoyo.” (Etuku 2:⁠7) E sono kiaki ke kisonganga ko vo Adami moyo kavewa.

Adieyi diabwila Adami vava kasumuka? Nzambi kamvana tumbu kia mpasi zakwele mvu ko kuna bilungi. Kansi, e nsekola ya Nova Bíblia Americana, Católika, (NBA) ivovanga mu kuma kia tumbu kia Nzambi vo: “Muna kiufuta kia ndose aku odil’o dia, yavan’ovutuka muna ntoto, mûna wabongwa; kadi u ntoto, mu ntoto ovutuka.” (Etuku 3:​19) E mvovo mia Nzambi ke misonganga ko vo Adami má kavewa kilenda sala yo moyo muna lufwa. Vava Adami kafwa, o moyo andi wafwa.

Nga vena ye muntu wina ye moyo ulembi fwa? Nzambi wavovesa Yezekele wa ngunza vo: “O moyo una usumuka, wau ufwa.” (Yezekele 18:​4, A Bíblia Sagrada​—⁠Nova Versão International) Paulu wa ntumwa wasoneka vo: “Muna muntu mosi [Adami] i mwakotel’esumu muna nza, o lufwa mpe mun’esumu; i ngyandangiana luayandangian’o lufwa muna wantu awonso, kadi awonso basumuka.” (Roma 5:​12, NBA) Wau vo wantu awonso basumuka, ozevo, mioyo miawonso fwa mifwanga.

Afwa nga balenda yindula yovo zaya diambu? Nkand’a Nzambi uvovanga vo: “Ana ben’o moyo bazeye wo vo fwa befwa, kansi afwa ke bazeye diambu ko.” (Kimpovi 9:​5, NBA) Muna songa edi dibwilanga muntu vava kefwanga, o Nkand’a Nzambi uvovanga vo: “Muna ntoto kevutuka; muna lumbu kiakina o makani mandi mavididi.” (Nkunga 146:​4, RJ) Wau vo afwa “ke bazeye diambu ko,” o ‘makani mau mevilanga,’ aweyi balenda mwena mpasi kuna bilungi?

Yesu Kristu watezanesa lufwa ye tulu, lembi zaya diambu. (Yoane 11:​11-​14) Akaka balenda vova vo, Yesu walonga oma ma bilungi yo songa vo asumuki ku bilungi bia tiya betubwa. Yambula twafimpa dina kavova Yesu mu kuma kia bilungi.