Elongi Diatoma Mwanganeswa

“Elongi dia yokwa kuna bilungi diatoma kuntokanesanga! Yalotanga e ndozi vo ntubilu ku bilungi, yo sikama ye kazu. Yasiang’e ngolo kimana yalembi sumuka.”​—Arline.

NGA okwikilanga vo bilungi fulu kiakubikwa mu bangikila asumuki? Ndonga bekwikilanga dio. Kasikil’owu, muna mvu wa 2005, nkwa ngangu mosi kuna Universidade ya Andrews kuna Escócia wabakula vo afidi akaka a mabundu kuna Escócia bekwikilanga vo awana bavambana yo Nzambi “bekendalala yakwele mvu kuna bilungi.” Ayingi bekwikilanga vo awana bena kuna bilungi mpasi zakwele mvu bemonanga.

Wantu muna nsi zayingi, betoma kwikilanga mun’elongi dia bilungi. Kasikil’owu, muna mvu wa 2007, Lufimpu lwavangama kuna Estados Unidos lusonganga vo ndonga bekwikilanga elongi dia bilungi. Kana nkutu mu nsi zina vo wantu ke akwikidi ko, ndonga bekwikilanga elongi diadi. Lufimpu lwavangama kuna Canadá muna mvu wa 2004, lusonganga vo ndonga bekwikilanga elongi dia bilungi. Kuna Grã-Bretanha diau adimosi mpe bekwikilanga.

Edi Belonganga Afidi a Mabundu

Afidi ayingi a mabundu ke belonganga diaka ko vo bilungi bia tiya fulu kia bangikila wantu. Kansi, dina belonganga betela dina y’elongi dina muna nkanda Katekismo ya Dibundu dia Katolika, wavaikiswa mu mvu wa 1994, uvovanga vo: “E tumbu kiampwena bevewanga kuna bilungi biatiya i vambana yo Nzambi yakwele mvu.”

Kana una vo i wau, elongi dia sia vo bilungi fulu kiamweswa mpasi yovo bangikila wantu diakinu kwikilwa. Awana belonganga dio bevovanga vo mu Nkand’a Nzambi diatuka. Albert Mohler wa mfidi a Sikola zikubikanga alongi a dibundu dia Batista wavova vo: “Elongi diadi mu Nkand’a Nzambi diatuka.”

Ekuma Ofwete Zayila Ziku kia Lukwikilu Lwaku?

Avo bilungi fulu kieleka kia bangikila wantu, wonga kikilu kifwete kumwesa. Kansi, avo elongi diadi ke dia ludi ko, mfumu za mabundu ana belonganga dio, mavwanga ye nkenda betwasanga kw’awana bekubakwikilanga. Nzambi mpe betumbanga.

O Nkand’a Nzambi aweyi uvovanga mu kuma kia diambu diadi? Muna malongi melanda tusadila Nsekola za Nkand’a Nzambi za esi Katolika ye Protestante mu vana mvutu za yuvu eyi: (1) Adieyi dibwilanga muntu vava kefwanga? (2) O Yesu adieyi kalonga mu kuma kia bilungi? (3) O zaya ludi mu kuma kia bilungi nkia nluta dilenda kutwasila?