Nga Mbangi za Yave Tongo Bevondanga?

“KELE vo yakala yovo nkento osobele dibundu, e longo lufwidi.” Ubevovanga ulolo wa wantu. Ezak’e ntangwa, mvovo miami mu nua a nkento yovo yakala ozolele kituka Mbangi a Yave mitukanga. Kansi, nga dialudi vo i diau divangamanga ntangwa zawonso?

Ke dianzenza ko vo dilenda twasa ntantani vava yakala yovo nkento kevavanga kota yovo soba e dibundu. Dilenda tokanesa yakala yovo nkento yo kundimbulwisa e vuvu yo kumfungisa makasi.

Nkumbu miayingi, nkento i wantete ozolanga soba dibundu. Avo nkaz’aku Nkand’a Nzambi kelongokanga ye Mbangi za Yave, adieyi dilenda bwa muna longo lwaku? Kele vo u nkento olongokanga ye Mbangi za Yave, adieyi olenda vanga muna lembeka e ntokani za nkaz’aku?

Ntokani za Yakala

Mark kuna Austrália vava balungisa mvu 12 mia lukazalu, o nkaz’andi wayantika longoka Nkand’a Nzambi ye Mbangi za Yave. Mark wavova vo: “Longo lwame lwakiese lwakala, salu kiambote yasalanga, zingu kiame kiambote kiakala. I bosi o nkaz’ame wayantika longoka Nkand’a Nzambi ye Mbangi za Yave. Vana vau, yabakula vo e nzengo za nkaz’ame zilenda kumfila mu soba e mpila zingu kiame. Kuna lubantiku kiatokana kwayingi ko kadi, yayindulanga vo nkaz’ame kesikila ko mu landa nzila yoyo. Kansi, vava kampovesa vo obakidi e nzengo za vubwa nze Mbangi a Yave, ediadi diantokanesa kikilu.”

Mark wayantika kiyuvula kana vo longo lwandi lulenda fwa mu kuma kia lukwikilu lwampa lwa nkaz’andi. Wazola kunsima kayambula longoka Nkand’a Nzambi yo zenga kikundi ye Mbangi za Yave. Vana fulu kia baka nzengo za nzaki nzaki, wavan’e ntangwa kwa nkaz’andi. Adieyi diabwa muna longo lwau?

Mark wavova ye kiese kiawonso vo: “Owau, longo lweto lulutidi e kiese, ka nze kuna lubantiku ko. Longo lweto lusikilang’aka tuka nkaz’ame kavubilwa nze Mbangi a Yave se vioka mvu 15.” Nki kiasadisa longo lweto mu sikila? Mark wavova vo: “Lusikilanga kadi o  nkaz’ame olemvokelanga nsiku mia Nkand’a Nzambi. Okunzitisanga.”

Kimbangi Ki’akento Babaka e Nluta

Avo u nkento wasompa olongokanga ye Mbangi za Yave, adieyi olenda vanga yo vova mu sadisa ye kulula e ntokani za nkaz’aku? Badika dina bavova akento bezingilanga mu nsi za mpila mu mpila.

Sakiko, kuna Japão wavova vo: “Mvu 31 miavioka tuka yasompela, wan’atatu tuna yau. Tuka yakitukila Mbangi a Yave, mvu 22 miviokele kala. O zinga yo yakala una vo ke twina ye lukwikilu lumosi ko, ezak’e ntangwa dilenda kala diampasi. Kansi, isianga ngolo mu lemvokela luludiku lwa Nkand’a Nzambi lwa ‘kala nzaki mu wa; yo vova, malembe; o makasi, malembe.’ (Yakobo 1:​19) Yisonganga e ngemba kwa nkaz’ame yo vanga dina kazolele, kele vo ke dikulula nsiku mia Nkand’a Nzambi ko. Ediadi disadisanga longo lweto mu kala lwasikila.”

Nadezhda, kuna Rússia wavova vo: “Mvu 28 miviokele kala tuka yasompela, mvu 16 se ngina tuka yavubilwa nze Mbangi a Yave. Una kiayantikidi ko longoka Nkand’a Nzambi, kiayindulanga ko vo nkaz’ame kafwete kala se ntu muna nzo. Yazolanga baka nzengo zayingi mono mosi. Kansi, malembe malembe yayantika mona vo o lemvokela nkanikinu mia Nkand’a Nzambi, diatwasa luvuvamu ye kiese muna nzo eto. (1 Korinto 11:⁠3) Malembe malembe yayantika sakalela nkaz’ame, yandi mpe wamona una yasobela e fu yame.”

Marli, kuna Brasil wavova vo: “Mvu 21 miviokele kala tuka yasompela, wana wole ngina yau. Mvu kumi ye sambanu miviokele tuka yavubilwa se Mbangi a Yave. Yalongoka vo Yave wa Nzambi ozolanga vo akazi bazinga kumosi lembi vambanesa e longo. Muna kuma kiaki, mvanganga mawonso mu kala nkento ambote, ivavanga yangidika Yave ye nkaz’ame muna mpova ye mavangu mame.”

Larisa kuna Rússia wavova vo: “Se vioka mvu 19 tuka yakitukila Mbangi a Yave, yamona vo edi disundidi mfunu muna zingu kiame i soba e fu yame. O nkaz’ame wamona mpila Nkand’a Nzambi wansadisila mu kituka se nkento ambote yo toma kungyangalela. Kuna lubantiku, twatantananga mu kuma kia sansa o wana, kansi twasingika diambu diadi. Nkaz’ame wayambula vo yanatang’o wana muna tukutakanu tweto kadi wabakula vo wana malongi mamfunu belongwa.”

Valquíria, kuna Brasil wavova vo: Mvu 19 se ngina tuka yasompela, mwana mosi ngina yandi. Yakituka Mbangi a Yave se vioka mvu 13. Kuna lubantiku nkaz’ame kazola ko vo yasala salu kia samuna nsangu zambote. Kansi, yavavanga lembeka e ntokani zandi muna kumvovesela kuna lulembamu lwawonso yo kunsungamesa una Nkand’a Nzambi wasobela kiwuntu kiame. Malembe malembe, nkaz’ame wabakula vo diamfunu diakala kwa mono dia kwenda mu salu kia umbangi. O unu okunsadisanga mu salu yame yawonso ya mwanda. Vava ikwenda longokanga Nkand’a Nzambi yo wantu muna mavata, okwenda kumfilanga mun’ekalu yo vingila yavana mfokolanga longoka yo wantu.”

Usobanga Zingu kia Wantu

Kele vo nkaz’aku Nkand’a Nzambi kelongokanga ye Mbangi za Yave, kuyindudi ko vo se kevonda e longo. Akala ayingi ye akento muna nsi za mpila mu mpila bemonanga vo Nkand’a Nzambi uzeye soba zingu kia wantu muna longo.

Yakala dimosi una vo ke Mbangi a Yave ko wavova ye ziku kiawonso vo: “Kuna lubantiku yatokana vava nkaz’ame kakituka se Mbangi a Yave, kansi owau imonanga vo e nluta mbakanga misundidi e mpasi yamona.” Yakala diakaka wavova mu kuma kia nkaz’andi vo: “E lukwikilu lwa nkaz’ame yo sikila kwandi muna ludi kutoma kumfilanga mu zitisa Mbangi za Yave. Nluta miayingi tubakanga muna longo lweto mu kuma kia lukwikilu lwandi. Tuvwanga muntu yo nkw’andi o mfunu yo kitula longo lweto se kintwadi kianzingi.”

 [Babu/​Foto ina muna lukaya lwa 32]

Mbangi za Yave Aweyi Bebadikilang’o Longo?

Mbangi za Yave bebadikilanga Nkand’a Nzambi vo Diambu diavumunwinwa dia Nzambi. Betoma zitisanga dina uvovanga mu kuma kia longo. Tala dina kevovanga Nkand’a Nzambi mu kuma kia yuvu yilende:

▪ Nga Mbangi za Yave belonganga asambidi akw’au mu vonda longo yo yakala yovo nkento una vo ke Mbangi ko? Ve. Paulu wa ntumwa wasoneka vo: “Konso mbunzi, ovo wina yo nkaz’andi walembi kwikila, oyandi mpe ovo otondele o kala yandi, kanyambula ko. O nkento mpe wina yo nkaz’andi walembi kwikila, oyandi mpe, ovo otondele o kala yandi, kayambul’o nkaz’andi ko.” (1 Korinto 7:​12, 13) Mbangi za Yave belemvokelanga nkanikinu wau.

▪ O nkento una vo Mbangi a Yave nga kafwete veza zolela ya nkaz’andi wau vo ke bena lukwikilu lumosi ko? Ve. Petelo wa ntumwa wasoneka vo: “Yeno akento, nusakalel’akazi eno; kimana, ovo vena y’ana balembele lemvokel’e diambu, babakilwa muna nkal’akazi au, ke mu diambu ko; wau bemonanga nkal’eno aziku yo vumi.”​—⁠1 Petelo 3:​1, 2.

▪ Nga Mbangi za Yave belonganga vo wisa kia yakala kifwete lemvokelwa muna mawonso? Ve. Paulu wa ntumwa wavova vo: “Nzolele nwazaya wo, ovo, o ntu akal’awonso, i Kristu: o ntu a nkento, i’yakala; o ntu a Kristu, i Nzambi.” (1 Korinto 11:⁠3) O nkento una vo Nkristu ozitisanga nkaz’andi wau vo yandi i ntu muna nzo. Kansi, e wisa kia yakala kivwidi tezo. Kadi fundiswa kefundiswa kwa Nzambi yo Kristu. Ikuma vo, vava nkanikinu mia yakala mifilanga nkento kakulula nsiku mia Nzambi, nkento una vo Nkristu ‘olemvokela Nzambi ke mu wantu ko.’​—⁠Mavangu 5:29.

▪ Nga Mbangi za Yave belonganga vo akazi ke bafwete vambana nkutu ko? Ve. Yesu Kristu wavova vo: “Inusamunwini vo, konso on’osindik’o nkaz’andi, ovo ke mu diambu dia zumba ko kasompa wakaka, zumba katele yandi.” (Matai 19:⁠9) Ozevo, Mbangi za Yave belemvokelanga luludiku lwalu lwa Yesu, lwa sia vo e zumba kilenda vana nzila kwa akazi mu vambana muna longo. Kansi, bazeye mpe ziku vo, e longo ka lufwete vondwa mu konso diambu ko. Bekasakesanga asambidi akw’au mu tatidila mvovo mia Yesu vo: “O’yakala kafwete yambwil’o s’andi yo ngw’andi, katatidil’o nkaz’andi; yau ewole bakala se nitu mosi. . . . Dianu vo, kina kiayikakeswa kwa Nzambi, o muntu kavambanisa ko.”​—⁠Matai 19:​5, 6.