O Zaya e Ludi mu Kuma kia Bilungi Aweyi Dilenda Vanga Muna Zingu Kiaku?

AWANA belonganga vo e bilungi fulu kiabangikila wantu, luvunu bevovanga mu kuma kia Yave wa Nzambi ye fu yandi. Dialudi vo, Nkand’a Nzambi uvovanga vo Nzambi ofwasa yimpumbulu. (2 Tesalonika 1:​6-9) Kansi e makasi mansongi, ke kiau i fu kia Nzambi ko eki kisundidi.

Nzambi ke nkwa nsoki ko ngatu nlandi a kunda. Wá edi kayuvula: “Nga nyangalelel’o lufwa lua kimpumbulu?” (Yezekele 18:​23) Wau vo Nzambi keyangalelanga lufwa lwa kimpumbulu ko, aweyi kalenda yangalela e mpasi z’awana bebangikwanga yakwele mvu kuna bilungi?

E fu kia Nzambi eki kisundidi i zola. (1 Yoane 4:⁠8) Kieleka, “O Yave wambote kw’awonso; e nkenda zandi zina muna mavangu mandi mawonso.” (Nkunga 145:​9, A Bíblia Sagrada-Nova Versão International) Muna kuma kiaki, Nzambi ovavanga vo twanzola ye nsi antim’eto wawonso.​—⁠Matai 22:​35-38.

Wonga wa Bilungi Yovo Zola kwa Nzambi​—⁠Adieyi Dikufilanga?

Elongi dia sia vo wantu mpasi bemweswanga kuna bilungi, difilanga wantu mu mwena Nzambi o wonga. Kansi, ndiona olongokanga e ludi mu kuma kia Nzambi, okunzola yo kumvumina. Muna Nkunga 111:10 tutanganga vo: “O vumi wa Yave i lubantiku lua ngangu; o umbakuzi wambote kw’awonso bekala zau.” O vumi wau wa Nzambi, ke wonga wa tumbwa ko kansi, i vumi wakieleka kuna kwa Mvangi. Ukutufilanga mu mona wonga yo lembi kunkendeleka.

O zaya e ludi mu kuma kia bilungi kwasoba e zingu kia Kathleen una ye kimbuta kia mvu 32, ona wanwanga fomo zangolo. Nzodi a nkembo, zumba ye fu ya nsoki kakala yo lembi kiyangalela. Wavova vo: “Vava yatala mwan’ame ankento una ye kimbuta kia mvu mosi, yakiyuvula, ‘adieyi ivanganga mu kuma kiandi. Yokwa iyokwa kuna bilungi mu kuma kiaki.’” Kathleen wateza yambula nua fomo zangolo, kansi ke vasoba diambu ko. Wavova mpe vo: “Yazola vo yakala muntu ambote, kansi mawonso mavangamanga muna zingu kiame ye mu nza, ke makala mfunu ko. Ke vakala kuma ko mfwete kadila muntu ambote.”

I bosi, Kathleen wayantika longoka ye Mbangi za Yave. Wavova vo: “Yalongoka vo kavena bilungi bia tiya ko. Nkand’a Nzambi usonganga e ziku kiasikila mu kuma kia diambu diadi. O zaya vo kiyokwa ko ku bilungi bia tiya diakala se luvevoko lwampwena. Walongoka mpe e nsilu a Nzambi vo wantu besinga zinga yakwele mvu ova ntoto owu uveleleswa muna mbi.” (Nkunga 37:​10, 11, 29; Luka 23:​43) “O wau ngina ye vuvu kiasikila kiazinga yakwele mvu muna Paradiso.”

 Nga Kathleen walenda yambula nua fomo zangolo mu kuma kia wonga wa yokwa kuna bilungi? Wavova vo: “Vava yakalanga ye luzolo lwa nua fomo, yalombanga lusadisu lwa Yave wa Nzambi muna sambu. Yayindulanga una Nzambi kebadikilanga mavangu mama masafu ye kiazola kunkendeleka ko. Wavana e mvutu za sambu yame.” (2 Korinto 7:⁠1) O vumi wau walembi kendeleka Nzambi wasadisa Kathleen mu yambula mavangu masafu kakala mau.

Elo, kala yo zola ye vumi wa Nzambi, ke mu wonga wa bangikwa ko ku bilungi, kulenda kutufila mu vanga luzolo lwa Nzambi yo vwa e nsambu zakwele mvu. Ntozi a nkunga wasoneka vo: “Nkwa nsambu konso on’ovumina Yave, on’okangadila muna nzila zandi.”​—⁠Nkunga 128:⁠1.

[Babu/​Foto ina muna lukaya lwa 9]

Nani Okûlwa Muna Bilungi?

Nsekola zakaka za Nkand’a Nzambi mavwanga zisianga mu kuma kia mvovo miole mia Kingerekia, Geena ye Hades. Besekolanga mio mu mvovo umosi kaka vo, “bilungi.” Muna Nkand’a Nzambi e mvovo Geena lufwasu lwakwele mvu usonganga kondwa vuvu kia lufuluku. Vo i awana bena muna Hades, vuvu kia lufuluku bena kiau.

Muna kuma kiaki, vava Yesu kafwa yo fulwa, Petelo wa ntumwa wavovesa nkangu vo Yesu “kasiswa kuna bilungi ko.” (Mavangu 2:​27, 31, 32; Nkunga 16:10 Versão Rei Jaime) E mvovo “bilungi,” wasadilwa muna nsekola yayi i Hades, mu nding’a Kingerekia watuka. Yesu kayenda ku fulu kia lubangamu ko. Hades yovo “bilungi,” i ziami kwandi. Kansi, Yesu ke yandi kaka ko ona Nzambi kakûla muna Hades.

Muna kuma kia lufuluku, Nkand’a Nzambi uvovanga vo: “O kalunga kuyekwele mafwa makala mo; o fwa ye bilungi iyekwele mafwa makala mo.” (Lusengomono 20:​13, 14, RJ) O kûlwa muna “bilungi,” disonganga vo vutulwisa e mioyo mi’awana kefula o Nzambi. (Yoane 5:​28, 29; Mavangu 24:​15) Ekwe vuvu ki’esivi kia mana mebwa kuna sentu vava tumona diaka azolw’eto bevayikiswa muna ziami! Yave wa Nzambi a zola kusundidi, osinga wo vanga.