Nga Nzambi Muntu Kieleka?
Nga Nzambi Muntu Kieleka?
Mvutu zivewanga i zazi:
▪ “Nzambi okalanga mwawonso, muna lekwa yawonso. Una nze tembwa.”
▪ “Ovwidi ngangu zilembi suka ye nkuma, kansi ke muntu ko.”
O Yesu adieyi kavova?
▪ “Kuna nzo Es’ame kalu yingi ina ko.” (Yoane 14:2) Yesu wavova vo Nzambi ovwidi nzo yovo fulu kiazingila.
▪ “Omu Se yatuka, ngizidi ova nza: ye diaka diaka, katuka nkatuk’ova nza, kuna kwa Se nkwenda.” (Yoane 16:28) Yesu wakwikilanga vo Nzambi Muntu kieleka ye una ye fulu kezingilanga.
YESU kasidi yikila Nzambi ko nze nkuma. Kansi, wamokena yo Nzambi yo samba kwa yandi. Wayikila Yave vo S’andi ezulu, ediadi disonganga e ngwizani ambote kena yau yo Nzambi.—Matai 6:14, 26, 32.
Dialudi vo, ‘ke vena nkutu muntu wamona Nzambi ko.’ Kadi “o Nzambi i mwanda.” (Yoane 1:18; 4:24) Kansi, ediadi ke disongele ko vo kena ye nitu ko yovo mpwa. Muna Nkand’a Nzambi tutanganga vo: “Ovo vena ye to kiawuntu, vena mpe ye to kiamwanda.” (1 Korinto 15:44) Nga Yave nitu a mwanda kena yau?
Ingeta. Vava Yesu kafuluka, ‘wakota . . . mun’ezulu kibeni, kamoneka vana ndose a Nzambi, muna diambu dieto wau.’ (Ayibere 9:24) E sono kiaki mambu mole mamfunu kitulongele mu kuma kia Nzambi. Diantete, Nzambi una ye fulu kiazingila. Diezole, Nzambi muntu ke nkuma ko ukalanga konso fulu.
E wisa kia Nzambi aweyi kilenda monekena mwawonso? Nzambi olenda fila mwand’andi avelela yovo nkum’andi wasala konso fulu muna nsema. Nze una ese keyalumunanga koko kwandi mu fiaulwisa yo kumika mwan’andi, Nzambi ofilanga mwand’andi avelela mu lungisa ekani diandi.—Nkunga 104:30; 139:7.
Wau vo Nzambi Muntu, vena ye dina kezolanga ye dina kemenganga—omonanga mpe kiese yovo ntantu. Nkand’a Nzambi ukutuvovesanga vo Nzambi ozolanga nkangu andi, omwenanga mavangu mau e kiese, osaulanga nsambila za teke yo kendalala mu kuma kia umpumbulu. (Etuku 6:6; Nsiku 16:22; 1 Ntinu 10:9; Nkunga 104:31) Muna 1 Timoteo 1:11, oyikilwanga vo ‘Nzambi a kiese.’ Ekiaki i kuma Yesu kavovela vo tulenda kweto zola Nzambi ndioyo yo ntima eto wawonso.—Maku 12:30. *
[Mvovo Vana Yand’a lukaya]
^ tini. 12 Muna zaya maka mambu tala e kapu kia 1 kia O Nkand’a Nzambi Adieyi Kieleka Kelonganga? wavaikiswa kwa Mbangi za Yave.
[Babu kina muna lukaya lwa 5]
Nze una ese keyalumunanga koko kwandi mu fiaulwisa yo kumika mwan’andi, Nzambi ofilanga mwand’andi avelela mu lungisa ekani diandi