Obokelo Wiza Lungana Yeto

NANGA olenda viokela kun’Eseka dia Kintinu dia Mbangi za Yave muna zunga kiaku yo yuvula kana nki bevanganga mo. Ng’ozeye wo vo konso muntu olenda kwandi kala muna lukutakanu lwau lwa konso lumingu? Anzenza betoma tambulwanga yo kaiswa kiambote.

Kansi, olenda kala ye y’aka yuvu. Ekuma Mbangi za Yave bekutakaninanga vamosi? Nkia diambu divangamanga muna tukutakanu twatu? Adieyi bevovanga anzenza bena vo ke Mbangi za Yave ko mu kuma kia tukutakanu twatu?

‘Lunganesa Nkangu’

Tuka kuna nz’ankulu, o nkangu wakutakananga vamosi mu sambila yo longoka mu kuma kia Nzambi. Se vioka 3.500 za mvu, Aneyisaele bavoveswa vo: “Lungisa nkangu, akala y’akento ye yingyanangyana, ye nzenza in’omu mavitu maku, bawa yo longwa, bavumina Yave wa Nzambi aku, yo vis’o meso muna vanga mambu mawonso ma nsiku wau.” (Nsiku 31:​12) Muna mpila yayi, muna Isaele yankulu, yingyanangyana y’ambuta bakutakananga mu sambila yo lemvokela Yave wa Nzambi.

Muna tandu yalanda, vava nkutakani ya Kikristu yasikidiswa, o lungana muna tukutakanu dia kituka se diambu diamfunu muna nsambila aludi. Paulu wa ntumwa wasoneka vo: “Mbula twabadikaziana mpe twapalanina muna zola yo mavangu mambote; ke tuvunz’o lungana ko, nze fu kia wantu akaka, tuwonzaziana kaka; yo siamisa wo o vanga, wau tumwene vo e lumbu se kifinamene.” (Ayibere 10:​24, 25) Nze una ungudi vana vena esi nzo ulenda siamiswa vava bevaulang’e ntangwa mu kala vamosi, diau adimosi mpe, e kangwa kia zola muna nkutakani kisiamiswanga vava Akristu bekalanga vamosi mu sambila Nzambi.

Mun’owu wa Sono kiyikilu kala, Mbangi za Yave nkumbu miole bekutakananga muna lumingu, mun’Eseka diau dia Kintinu. Tukutakanu twatu tusadisanga awana bekalanga mo mu bakula yo sadila nsiku mia Nkand’a Nzambi. Muna nza yawonso, malongi mamosi belongokanga. Kuna lubantiku ye ku mfoko a lukutakanu, awana bekalanga mo ‘befiaulwisanga’ muntu yo nkw’andi mu mbokena zau zivangamesanga. (Roma 1:​12) Adieyi divangwanga muna konso lukutakanu?

Elongi dia Nkand’a Nzambi

Lukutakanu bekwendanga ulolo wa wantu mu nkumbu antete i lw’Elongi dia Nkand’a Nzambi edi difilwanga kwa nkangu. Nkumbu miayingi ku nsuka lumingu difilwanga. Yesu Kristu mpe wafilanga elongi kwa nkangu wawonso. Dimosi muna diau, i Longi Diandi vana Mongo. (Matai 5:1; 7:​28, 29) Paulu wa ntumwa wafila mpe elongi kwa esi Atenai. (Mavangu 17:​22-​34) Muna landa mbandu au, mu tukutakanu twa Mbangi za Yave mufilwanga elongi kwa wantu awonso, akaka muna wantu awaya nanga i nkumbu antete bekalanga mo.

Tukutakanu tuyantikanga mu nkunga mibongelwanga mu nkanda Cantemos Louvores a Jeová. * Awonso ana balenda, balenda kwau telama yo yimbila. I bosi, vefilwanga e sambu kia nkufi, o mpovi ofila elongi dia miniti 30. (Tala e quadro: “Malongi Mamfunu kwa Nkangu.”) Malongi mau mu Nkand’a Nzambi metukanga. O mpovi olombanga kwa nkangu banlanda ekolo ketanganga e sono ya Nkand’a Nzambi. Muna kuma kiaki, olenda nata Nkand’a Nzambi wa ngeye kibeni, yovo lomba wo kwa Mbangi za Yave una lukutakanu ke luyantikidi ko.

 Eyingidilu dia Longoka

Muna nkutakani zayingi za Mbangi za Yave, elongi dia nkangu wawonso dilandilwanga kw’elongi di’Eyingidilu, divangamenanga mu yuvu ye mvutu, mu tezo kia ola mosi. Lukutakanu lwalu, lukasakesanga awana bekalanga mo mu landa mbandu ya esi Beroya a lumbu ya Paulu, ana “batambulwila e diambu kuna mvevo a ntima, e lumbu yawonso bafimpidinge e Sono.”​—⁠Mavangu 17:⁠11.

Elongi d’Eyingidilu mu nkunga diyantikilanga. Mambu mebadikwanga ye yuvu keyuvulanga o mfidi, mun’Eyingidilu dia longoka metukanga. Olenda lomba Eyingidilu diadi dia longoka kwa mosi muna Mbangi za Yave. Mambu malongokwa mu lumbu iviokele i mama: “Mase, Nulongela Wan’eno Muna Zola,” “Ke Nuvutula Muntu Mbi Muna Mbi Ko” ye “E Mpasi se Zifokoka.” Kana una vo elongi difidilwanga mu yuvu ye mvutu, ke vekomekenwanga muntu ko mu vana e mvutu. Awana bevananga e mvutu, beteka kubikanga elongi yo tanga e sono ina mo kuna nzo zau. Lukutakanu lufokokanga mu nkunga ye sambu.​—⁠Matai 26:30; Efeso 5:⁠19.

Elongi dia Nkand’a Nzambi dia Nkutakani

Mu fuku u mosi wa konso lumingu, Mbangi za Yave belungananga diaka mun’Eseka dia Kintinu mu longoka kunku tatu ya malongi mu ola 1 ye miniti 45. E kunku kiantete i Longi dia Nkand’a Nzambi dia Nkutakani dia miniti 25. Disadisanga awana bakutakene mu kulukiana ye Nkand’a Nzambi yo soba e ngindu ye fu yau yo kuyifwanisa nze alongoki a Kristu. (2 Timoteo 3:​16, 17) Nze Eyingidilu dia Longoka, elongi diadi mpe dia yuvu ye mvutu za oma ma Nkand’a Nzambi. Ke mu komekenwanga mpe muntu ko mu vana mvutu.  Besadilanga finkanda yovo nkanda mivaikiswanga kwa Mbangi za Yave mu longoka Nkand’a Nzambi.

Ekuma musadilwanga nkanda mibakulwisanga oma ma Nkand’a Nzambi muna tukutakanu twatu? Tuka kuna nz’ankulu, nkangu a Nzambi ke batanganga kaka Nkand’a Nzambi ko. Kansi, ‘basianga mpe e nsasa, i ngwa batoma wa mana matangwanga.’ (Nekemiya 8:⁠8) Muna mvu miavioka, e nkanda mieto miasasila nkand’a Yesaya, Daniele ye Lusengomono, e mpila yayi isadisanga awana bekalanga muna tukutakanu twatu mu bakula tini ya Nkand’a Nzambi.

Sikola ya Salu kia Kimfumu

Sikola ya Salu kia Kimfumu ilandilanga Elongi dia Nkand’a Nzambi dia Nkutakani. Lukutakanu lwalu lwa miniti 30, lusadisanga Akristu mu tomesa e ‘mpilau ya longela.’ (2 Timoteo 4:⁠2) Kasikil’owu, nga kwayuvulwa kiuvu ko kwa wan’aku yovo akundi aku mu kuma kia Nzambi yovo kia Nkand’a Nzambi kina walembi vanina e mvutu? E Sikola ya Salu kia Kimfumu ilenda kusadisa mu zaya mvutu za Nkand’a Nzambi za yuvu yampasi oyuvulwa. Tulenda kitula e mvovo mia Yesaya wa ngunza se mieto ona wavova vo: “O Mfumu Yave umpene lubini lu’alongoki, yazay’e nkumika nkumikina muna mvovo on’oyoyele.”​—⁠Yesaya 50:⁠4.

Sikola ya Salu kia Kimfumu iyantikanga y’elongi dibongelwanga mu Nkand’a Nzambi. Nkangu ukasakeswanga mu tanga e kapu ya Nkand’a Nzambi ya lumingu lwaluna. Vava kifokokanga elongi diadi, o mpovi olombanga kwa nkangu bavova mambu mamfunu basolwele muna ntangilu au ya Nkand’a Nzambi ye nluta babakidi. Vava kifokokanga elongi diadi, alongoki ana bena ye kiyekwa bebokelwanga mu sunzula malongi mau.

Alongoki ana bevewanga kiyekwa kia malongi, bekwendanga kun’evovelo mu songa e mpila balenda longela Diambu dia Nzambi kw’akaka. Kuna nim’elongi diadi, o mfidi a sikola osadila nkanda Beneficie-se da Escola do Ministério Teocrático, mu sanisina alongoki mu mpila yambote bafididi malongi mau. I bosi,  kuna mfoko a lukutakanu, o mfidi a sikola olenda yika diambu kafwete singika o nlongoki.

Malongi mama ke mesadisanga kaka awana befilanga mo ko, kansi mesadisanga mpe awonso muna nkutakani, ana bazolele tomesa mpil’au ya tanga, ya vova ye yatoma longela. Vava Sikola ya Salu kia Kimfumu yifokokanga, veyimbilwanga e nkunga ubongelo muna sono ya Nkand’a Nzambi yo landila Lukutakanu lwa Salu.

Lukutakanu lwa Salu

E kunku kia nsuka muna kunku yayi, i Lukutakanu lwa Salu. Muna kunku kiaki, vekalanga y’elongi, nsongesela, mbokena y’elongi dia mbokena yo nkangu, o nkangu ulongokanga sadila e ludi kia Nkand’a Nzambi una ufwene. Una kafididi ko alongoki andi mu salu kia umbangi, Yesu wabakutakesa yo kubavana luludiku lwa sikididi. (Luka 10:​1-​16) Wau vo batoma kubikwa una bafwete sila umbangi, babaka nluta miambote muna salu kiau. Vava alongoki a Yesu bavutuka, bantwasila e nsangu za salu kiau. (Luka 10:​17) Nkumbu miayingi alongoki bamokenanga muntu yo nkw’andi mana mababwilanga muna salu kia umbangi.​—⁠Mavangu 4:23; 15:⁠4.

E kunku kiaki kia miniti 35 kia Lukutakanu lwa Salu kisongelwanga muna fipapela fiyikilwanga vo Salu Kieto kia Kintinu. Mambu malongokwa mu lumbu iviokele i mama: “Esi Nzo Nusadila Yave Kumosi,” “Ekuma Tuvutukilanga Kingula Wantu Ntangwa Zawonso” ye “Tanginina Kristu Muna Salu Kiaku kia Umbangi.” Lukutakanu lufokokanga ye nkunga, i bosi, mosi muna ampangi osolwanga mu fila e sambu kiansuka.

Anzenza Adieyi Bevovanga

Ampangi besianga ngolo mu kaisa konso muntu okwizanga mu lukutakanu. Kasikil’owu, Andrew wa wá ulolo wa mambu maluvunu mu kuma kia Mbangi za Yave. Kansi nkumbu antete kayenda kuna lukutakanu, wasivika kikilu e mpila ina katambulwilwa. Wavova vo: “I fulu kiambote kikilu mu kala. Yasivika kikilu e ngemba bansonga ye mpila bamvwila o mfunu.” Ashel wa ndumba mosi kuna Canadá wakwikila kikilu mu mvovo miami. Wavova vo: “Malongi mambote belonganga ye ke mampasi ko mu landa mo.”

José ozingilanga kuna Brasil wazayakana muna zunga kiandi vo kimpumbulu. Kana una vo i wau, wabokelwa kenda mu lukutakanu kun’Eseka dia Kintinu. Wavova vo: “Awana bakala mun’Eseka dia Kintinu batoma kuntambula kana una vo bazaya wo vo i kimpumbulu.” Atsushi ozingilanga kuna Japão, wavova vo: “Dialudi vo vava yayenda e nkumbu antete kuna lukutakanu lwa Mbangi za Yave, kiakala yayanza ko. Kana una vo i wau, yamona vo oyau wantu nze mono. Bavanga mawonso mu kungyangidika.”

Wiza Kiambote

Nze una usonganga e mvovo mia wantu bayikilu va ntandu, o kala mun’Eseka dia Kintinu, dilenda kukasakesa. Yave wa Nzambi okulonga mpila olenda bakila nluta muna longoka mu kuma kiandi yo wa malongi mena mu Nkand’a Nzambi.​—⁠Yesaya. 48:⁠17.

Tukutakanu twa Mbangi za Yave twa ngovo, ke mu lombwanga nzimbu ko. Ng’ozolele kwiza mun’Eseka dia Kintinu dina muna zunga kiaku? Obokelo mu vanga wo.

[Mvovo Vana Yand’a lukaya]

[Babu kina muna lukaya lwa 30]

Malongi Mamfunu kwa Nkangu

Malongi ma nkangu wawonso, metukanga muna 170 lwa malongi maswaswana ma Nkand’a Nzambi, nze i mama:

▪ Adieyi Okwikilanga mu Kuma Ki’etuku dia Wantu?

▪ Ngindu za Nzambi mu Kuma kia Kinkento ye Kiyakala ye Longo

▪ Nzambi Ofwasa Awana Befwasang’e Nza

▪ Aweyi Olenda Sundila Mpasi za Zingu

▪ E Kiaki nga i Zingu Emvimba?

[Foto ina muna lukaya lwa 30]

Elongi dia Nkand’a Nzambi

[Foto ina muna lukaya lwa 30]

Eyingidilu dia Longoka

[Foto ina muna lukaya lwa 31]

Elongi dia Nkand’a Nzambi dia Nkutakani

[Foto ina muna lukaya lwa 31]

Sikola ya Salu kia Kimfumu

[Foto ina muna lukaya lwa 32]

Lukutakanu lwa Salu